Memorie
- Dettagli
- Categoria principale: Poeti
- Visite: 1612
Memorie
Certi vuoti a mezzanotte
No' riesciu u m'addormientu
E mi ritrovu nta na botta
Nta Curinga, e su cuntientu.
Nta la chjazza, nta lu passu
A Gurniegghi o a na Traccola
E caminu passu a passu
Pe' li strati e i carriola.
E riviju tanti gienti
Mastri d'ascia e muraturi
E cui tenìa ammienzu a i dienti
Chiova o spilli pe' mpuntuti
Donna nGiuanna donna Rosa
Cu Cuncetta e Caterina
Tutti all'arti senza posa
De la sira a la mattina.
E Marianna a lu Mignanu
Cu Agu e filu ripezzava
Sutta l'Arco de Tavanu
Pantaluni a la zuava.
Fhilomena disperata
Cu lu Cagghipu a lì mani
Aiutava e Mmaculata
Pitti e pana mu mpurnava.
Nta la chjazza mastru Vitu
Si mperrava ncunu ciucciu
Puòcu avanti mastru Micu
Cu mortiegghu mpingìà attacci.
Li dominichi ricuordu
Donn'Antuoni dicìa missa
E puru cu lu Mussu luordu
Arrivavanu da Contissa.
Tutti l'orta de Rijiola
Producianu l'ira e Ddio
E nta Chigghj carriola
Ammienzu a tanti nc'era io.
E nta l'orta de Crimenza
De Cavuri o de Terrata
Fhrutti nc'era in abbundanza
Ca la gente era affamata.
E lu fhumu de ggha Lucciu
Li gridati e li jiastimi
Non'e' cosa mu l!ammucciu
Tutti quanti i ricordamu.
E ggha Tommu ancora piejiu
Tra biliardi e bigliardinI
Tuttu quantu era nu sbiju
Tra Aranciati e Cappuccini.
Li cchjiu povari e sciancati
Ricogghjiuti a na Cantina
A nu tavulu accampati
Si torcianu na cartina.
Cu li carti Nta li mani
Nu bicchieri chjinu e vinu
Discutienu e lu domani
Ma, brindandu a San Martinu.
Chigghi gienti acculturati
Discutienu nSartoria
Spessu chigghi separati
Si nda jienu nVarveria.
Cui era jiancu
Cu era russu
E Cui sedutu a ncunu bancu
Arrussia storcendu u mussu.
Quandu si parràva e Paggha
Si gridava a tuttu spianu
Si sentìa de nta Rugheggha
Cui parràva chjianu chjianu.
Si arrivavanu li pisci
De lu Pizzu o d'Amantea
Strumbi e Alici fhrischi fhrischi
Si nda jienu pe’ gulìa.
E avojjia ca Pepponi
Strumbettava nta u Paisi
Ca la troppa confusioni
Richjiamava a farà spisi.
Cui Patati, cui Cipugghi
Cui vindìa li Pumadora
Nta na cista muogghi muogghi
Nc'era pruna sgagghalora
Certi vuoti nta lu suonnu
Mi riviju a lidu e Mara
No distinguu nta qual'annu
Cu na lenza chi piscava.
A lu sboccu de mButigghu
Duva l'acqua jia nta Mara
Esta veru ch'era miegghju
Ca de pisci s'abbundava.
Pisci Puorci, Murmuruni
Chigghi Tracini reali
S'inchja subito u bidoni
Cu li Scorfani cu l'al
E l'Angigghi de Turrina
Chigghi Cefhali e Ranuocchj
Era vi, na cosa fhina
Chista pisca t'inchìa l'uocchij.
L'attra notta per'esempiu
Mi guardava lu suffittu
Mi ricordai de chigghu scempiu
De lu Puorcu lu suffittu.
Cora, Fhicatu e Purmunì
Carni fhrisca. grassa e magra
Nu suffrittu pe spuntinu
Nc'era tantu de sciagrata.
Pua, Sozzizza e Suppressati
Mangularu e Capicoggha
A li pierci ggha ligati
Mu ti mangi quandu hai vogghjia.
No' nc'è cchiu mastru Tumasi
Mastru Lia, mastru Ntoninu
Ti dicianu: vieni, trasi
Ca ti offru u Biccherinu.
La Sambuca, lu Liquori
O nu bellu Lambruschinu
No’ sulleva Menta e Cora
Cuomu stu bicchieri e Vinu.
Non’è Vinu,e Papanici
ne’ tampocu de’ Trimalu,
è lu Vinu de’ Salici
chi ti sarva de’ li mali.
Certu, chista è nostalgia
De’ na vita chi passau
E no’ la truovi pe’ la via
Ma ‘nta la mente ti restau.
E non’è ca si cancella
E ti la scuordi fhacilmente
Pecchì era “vita bella”
E Si campava cu nu nenta.
Li dominichi a la missa,
la novena de’ Natali
a Pasqua tanti crucifhissa
e la Cuzzupa inaugurali.
Tanti auguri, mastru Giuanni
Altrettanti, mastru Ntuoni
Cu saluti pe’ tant’anni
E mu stacimu tutti buoni.
Mu l’annata vajia bona
Mu matura chigghu ranu
Vinu e uogghjiu u si rinnova
E pemmu abbunda chigghu ndianu.
E si a saluti ni supporta
E la fhorza ni surreggia
La sfidamu chista sorta
Si mangia e viva… e si scurreggia.
Sett. 2022
