Ha ragiuni Polimeni
- Dettagli
- Categoria principale: Poeti
- Visite: 1583
Ha ragiuni Polimeni
Quandu i ciucci si mbriganu
I varrili si sdoganu
Ha ragiuni Polimeni
Mu ni chjama pecuruni
Ca cu tutti sti problemi
Ni grattamu li Buttunii.
Era bona l’occasioni
Mu cangiamu chistu andazzu
Ma votammi a Berlusconi
E n’acchjiappamu de’ stu lazzu.
Chi vorgogna, disgrazziati
Dissa Linu Polimeni
Propi vui chi protestati
Vi mentistuvu li fhreni.
Nc’è nu dittu calabrisi
Chi n’arriva de’ luntanu
Si l’amici su divisi
Ogni sforzu resta vanu.
Dittu ancora a la mpalisi
Cu cchjiù gagghji a lu pollajiu
La gagghjina de paisi
No’ fha l’uovu mancu a majiu
Cca cumandu sulu io
Chi canusciu chista zona
E lu sapa sulu Ddio
Ca lottai cu li ddimona.
Scuverchjiai la cassalora
Chi ammucciava la magagna
Chi sfruttava a cui lavora
E nc’era cca, nu magna magna.
L’esperienza chi mi fhici
Cu a camorra a la campania
Fhazzu io li sacrifhici
La Calabria mu è padania.
Ricogghjimu li mundizzi
Ogni sorta e spazzatura
Accussi cu sti ricchizzi
S’Aumenta la cultura.
Ca la Mafia calabrisi
Soprattuttu Ndranghetisti
No’ li copranu li spisi
Si ni portanu turisti.
Si nc’è ncunu a stu comuni
Chi ni caccia e sta mboina
Esta certu Amalia Bruni
Chi scopriu la Nicastrina.
Esta nota nta lu mundu
Senza tanti cirimuoni
E tu chi si nu giramundu
Nci ruppisti li cogghjuni.
Tu no’ fhusti mai capaci
Mu risolvi li problemi
Fhusti sempre n’incapaci
E nui, ti cridi simu scemi?
Io mi tiru mienzu fhora
Ca no’ sugnu n’affarista
Ni spartimu de bon’ora
E ad’ognunu la sua lista.
È na vita chi su ncampu
De Cosenza all’Ampollinu
Pe’ nui attri no’ nc’è scampu
Si tra nui ni dividimu.
Fhummi sempre nsanta paci
La sinistra tutta unita
Arrivai stu Pappataci
E la gente fhu allibita.
Certu è pe’ tradizioni
Cca, la cruci và su cruci
E l’affiliatu e Berlusconi
Ccà , n’acchjiappa a fhampaluci.
Già speranza mancu nc’era
Puru misi tutti assema
E si no’ si vida spera
È sempre piejiu stu problema.
Cu li Pipi e i Pumadora
Cucuzzeggha e Malangiani
Su tri euru pe’ ogni ura
Cuomu pienzi a nu domani?
Puru piejiu è cu l’Arangi
Cu i Tarocchi e i Mandarini
Chi ti vena pemmu ciangi
Quamdu ncuntri l’aguzzini.
S’hai mu fhai lu manovali
Pemmu fhrabbichi a mattuni
Hai mu truovi u capurali
Ma no’ ti paga l’infortuni.
Si studiasti pe’ dottori
De ‘ngegnieri o fharmacista
Si non’hai nu protettori
Riesti sempre n’apprendista.
Lu poteri è cosa seria
La politica è a rovina
Si no’ mienti cattiveria
E non’hai na parlantina.
Ca si trasi nta lu giru
Chi decida ogni cosa
Scopri certu lu tragiru
Ch’è na cosa vergognosa.
Regionali in Calabria 2021
