Amministrazioni Nova
- Dettagli
- Categoria principale: ROOT
- Visite: 27138
Amministrazioni nova
1) Quandu fhicimu sta lista
Ni guardammi nta la fhaccia
E giurammi a prima vista
“Stu nimicu ha mu si caccia”.
2) Si, però stacimu attienti
Ca su tanti li problemi
Ca si nci sunu ‘nconvenienti
Già, ni pigghjianu pe’ scemi.
Prima ancora mu partimu
Tuttu quantu programmamu
Avimu e mo’ mu capiscimu
Cui ni po’ dara na manu.
Li problemi, li cchjiù duri
E chi dunanu de fhara
Sunu: l’Acqua, Spazzaturi
E lu culuri de lu mara.
A li Tassi, a i Ruvettara
E a li Fhuossi ‘nta li strati
‘Ncunu e nui ha de’ penzara
Nommu sumu trascurati.
Si bolimu mu rescimu
‘Nta st’impresa eccezionali
Tanti gruppi ha mu fhacimu
Mu affruntamu chisti mali.
Cui s’impiccia de lu Mara
Cui de l’Acqua da muntagna
Cui controlla a Spazzatura
E cui mu carma cui si lagna.
A li Tassi ha mu ‘nci penza
All’Igieni e a la Saluti
Cui de nui ha competenza
E si ‘nda ‘ntenda de malati.
Mu controlla l’acqua a mara
‘Nci mentimu n’abbronzatu
Chi non’ha tantu chi fara
Ma ha mu esta navigatu.
10) Ha mu sa’ mu vajia mbarca
Pemmu chjianta n’ombrelloni
Ha mu gira e l’arca a merca
E mu scova sti mbroglioni.
Qu’è chi spurga nta stu mara
Tubi, oppuru collettori
E si de notta fhanu sbadara
L’acqua do’ depuratori.
No’ vi sembra cosa pazza
Ca Fhalerna e Gizzeria
Ccà ni mandanu a pisciazza
Grazzi a sta democrazìa?.
‘Nta na chjiana senza cura
Cu Pineta e Spiaggi immensi
Radunaru a spazzatura
Sti politici dementi.
Pe’ chiggh’acqua de lu spizzu
Chi no’ ‘nc’è mancu de viernu
No’ po’ essere nu vizzu
E mu ‘nci penza u Patratiernu.
Propi tu, chi ti lagnavi
Ca arrivavi da campagna
E nemmenu ti lavavi
Senza l’acqua mu ti vagna.
L’acqua fhrisca da’ muntagna
Ha mu arriva a lu paisi
E ca nugghu ha mu si lagna
Pecchì chistu, lu prumisi.
Ritrovamu li sorgenti
I pulizzamu cu na runca
E a tutti quanti i diffidenti
non’ava l’acqua, mu ‘nci manca.
Si li tubi sunu rutti
Accattamu ciaramidi
E inchjimu tanti vutti
Cu acqua bona mu ta vivi.
Chiggha ch’esta nta li strati
Propi chiggha chi zampilla
La cogghjimu cu li cati
Pe’ li fhjiuri de la villa.
20) Puru e l’acqua scura, scura
Chi si spanda pe’ la strata
Ha mu ni pigghjiamu cura
Ch’è de’ troppu trascurata.
A li fhuntani do’ paisi
Tutti sparzi canti canti
Senza spisa e nu tornisi
‘Nci mandamu acqua frizzanti.
N’attru gruppu ha mu si cura
E mu controlla nta li strati
Ruvettara e spazzatura
Mu su belli ca curati.
‘Nci mentimu na divisa
Nu fhoccigghjiu ‘nta li mani
E si guadagnanu la spisa
Pulizzandu sti pantani.
Mu pagamu st’impiegati
Attri tassi ha mu mentimu
‘Nci penzamu nui Abbucati
Quala tassi ha mu aumentamu.
Io, de tiempu già ‘nci pienzu
E proponu io n’istanza
Si mi dunati lu cunsienzu
‘Nci tassamu a tutti a panza.
Cu ha cchjiù randa la currijia
E li cavuzzi all’allascu
Lu fhacìmu pemmu alijia
E mu si vinda puru u bascu.
A cui mangia troppa pasta
Fhilatiegghji e carni russa
Ha mu paga quantu basta
E nommu torcia pua li mussa.
Certu ‘nc’è cui paga puocu
Ca non’hava chi ha mu mangia
Ma, nommu penza ca è nu jiuocu
Ha mu paga, e mu s’arrancia.
Cui la panza l’hava liscia
E si lagna ca no’ mangia
Lu tassamu e quantu piscia
E lu fhacìmu pemmu ciangia.
30) Risorvimmi tuttu quantu
Ogni gruppu ha na fhunzioni
Basta puocu e senza vantu
Nui vincimmi st’elezioni.
E n’incaricu pe’ mia?
Chi su tra l’urtimi arrivati?
. . . Io, sapiti chi vorìa?
Mu organizzu stornellati.
Pe’ la gente cchjiù rugnusa
Chi protesta e si lamenta
La rendimu cchjiù cumpusa
‘Nci bloccamu puru a menta.
E si l’acqua de’ lu mara
Esta gialla a lugliu e agustu
Nta la chjiazza è na caciara
Sorgia certu nu trambustu.
Pe’ li giuvini ribelli
Chi no’ sunu mai cuntienti
Nci sonamu Tarantelli
Accussì simu innocenti.
De’ na cosa no’ parrammi
De li Libra e a Biblioteca
No’ criamu attri drammi
Ca la genta non’è ceca.
Ma non’è ca ‘nc’è la fhila
Mu consultanu sti saggi
Riducimu la trafhila
Nommu trovanu disagi.
Ca sti giuvini moderni
Sia scolari ca studenti
No’ li usanu i quaderni
Vuonu libra cchjiù mportanti.
Tutti chigghji chi ‘nci sunu
Sunu chjini e purvulata
Ha mu nci mentimu ‘ncunu
Mu ‘nci fha na sistemata.
N’attra cosa ha mu fhacìmu
Mu avvisamu lu paisi
Nu modellu ha mu stampamu
Pe’ ogni jiuornu pe’ l’avvisi.
40) Ha mu nc’esta ‘ncunu addettu
Chi comincia do’ matinu
Cu paruoli o pe’ n’edittu
M’usa lu Telefhoninu.
L’argomentu no’ ‘nci manca
O pe’ l’acqua o spazzatura
Esta luongu pua l’elencu
Chi ha mu scriva a ogni ura.
Sia d’estati ca de viernu
Primavera o nta l’autunnu
Ha mu n’ajiuta u Patreternu
Nommu jiamu troppu a fundu.
Si la Scola resta chjiusa
E a Turrina ‘nc’è la chjina,
tutti quanti ha mu s’abbisa
da Muntagna nta la Rina.
Si lu mara esta umbratu
E lu bagnu no’ pua fhara,
ognid’unu ha mu è abbisatu
mu provvida duva jira.
Si pua chjiova a dismisura
E li casi su all’asciuttu
Esta certu Jiettatura
C’ha mu ni, mentimu a luttu.
Ha mu simu tempestivi
Mu arrivamu prima e tutti
Puru e chigghji cchjiù cattivi
Soprattuttu fharabutti.
Mo’, mi para ca fhinimmi
De limara chisti ammendi
E pe’ chistu nui giurammi
Mu cangiamu sti fhaccendi.
Pe’ cui abita a Curinga
A montagna o a la marina
Sottoliniu cu na singa
Ha mu simu a vitamina.
Pe cui dicia fhissarì
Rispundimu de’ volata
Ca nui simu sulu ‘ntri,
E ni proteggia a“Mmaculata”.
50) Io, mi sientu soddisfattu
E si ‘nci pienzu, già mi ‘mbrodu
Mantenimu stu cuntrattu
E jiamu avanti a d’ogni modu!!!!!!!
