Chi notizia mi portasti ? (3)

Chi notizia mi portasti? (3)
di: Er. Ga.

PERSONAGGI: 

  • Concetta                Mamma impicciona
  • Antonella               Mamma di Betta
  • Antonio (Ntuoni)     Marito di Concetta
  • Gianni                    Figlio di Concetta
  • Vincenzo                 Marito di Antonella
  • Elisabetta (Betta)     Figlia di Antonella
  • Domenico                Ex Fidanzato di Betta       
  • Carmela                 Ragazza messa incinta da Domenico
  • Battista                  Cognato di Concetta
  • Carlo                     Cugino di Concetta e Avvocato
  • Maria                     Mamma di Carmela
  • Don Vito                 Parroco
  • Felicia                    Sarta
Mentre Concetta è diretta in cucina, arriva Antonella che le chiede di poter vedere di nascosto il giovane avvocato e valutare se va bene per la figlia.
101) Vinni sulu mu ti dicu    A
Si mi fhai pemmu l’annuocchjiu
L’abbucatu ch’esta amicu
Sulamenta cu menz’uocchjiu.
102)Vieni, trasa e ti presentu    C
Ca preparu nu cafhè
C’accussina t’accuntientu
E lu vidi tu com’è
Concetta fa la padrona di casa e presenta Antonella all’avvocato. Di rimando, Antonella invita l’avvocato e Concetta a casa sua per un caffè napoletano.
Chista è na vera amica    C
Chi ha na fhigghjia fhavolosa
Si pigghjiau  mo’ la prica
Mu mi porta na gazzosa.
Mu mi dicia si voliti    C
Nu cafhè napulitanu
Mu ni fhacia chisti mbiti
E a la casa sua mu jiamu.
Certamente  è  nu piacira    Ca
mu venimu a casa vostra
ca havimu e digerira
tutta quanta sta minestra.
Fhazzu strata, caminati    A
Mi seguiti chjianu chjianu
Accussina l’assaggiati
Assettati a lu divanu.
Bella casa chi tenìti    Ca
E stu saloni è bellu randa
Pua cu chisti margheriti
Lu profhumu cca si spanda.
Chjiama a Betta pemmu vena
Mu canuscia l’Abbucatu    C
Ca si vida sta sirena
Resta certu affascinatu.
Betta sente l’arrivo di qualcuno e si presenta mettendo in seria difficoltà l’avvocato che rimane strabiliato dalla sua bellezza.
Bona sera a tutti quanti   B
Su la fhigghjia d’Antonella
E la cummara ch’è davanti
Sempre dicia ca su bella.
110) Ma guardati chistu fhjuri     C
Chistu gigliu de fhigghjiola  
No’ nci sunu attri fhiguri
Sembra propi  na spagnola
Comprimenti signorina   Ca
E scusati pe’… sta tussi
Ha ragiuni Cuncettina
Siti unu de sti lussi.
Mo’ divientu puru russa   B
Si parrati cu lu Vui
E si mamma trasa e bussa
Simu russi tuttidui.
Cuomu puozzu ricambiara   Ca
Chistu mbitu inaspettatu
Si mi puozzu presentara
Sugnu propi n’Abbucatu.
Vajiu e vijiu si Antonella   C
Ha bisuognu de n’ajiutu
Ca io pierzi la fhavella
Ca non’hajiu digerutu.
Mo’ chi simu ncumpidenza   Ca
Ti lu dicu a chjiara vuci
io ti parru cu cuscienza
mi mentisti propi ncruci.
Cchjiù ti guardu e cchjiù si bella
E fussarìa na cosa giusta   Ca
Mu fharissi  la modella
S’esta chistu chi ti gusta.
L’avvocato si dichiara a Betta. – Entra tossendo Concetta e Antonella col caffè
 
Ma si cierchi ncunu amicu   Ca
O ncun’uomu mu ti spusi
Io de certu ti lu dicu
Nci su io, e senza scusi.
Nta sti casi troppu randi   C
Pigghjiu  spessu l’allergia
Si  chjiudivi sti verandi
Chista tussi si nda jia.
Eccu prontu nu cafhè     A
Fhattu propi cu sti mani
Ca de miegghjiu mo’ no’ nc’è
Pe’ sti dui paisani.
120) Si sapìa de sta venuta   A
Preparava dui biscotti
M’accussìna  all’insaputa
Hajiu sulu buccunotti.
Ma pecchì vi proccupati    Ca
Già mi sientu de fhamigghjia
Mo’ chi sacciu duva stati
No’ mi fhazzu maravigghjia.
Quandu tuornu n’attra vota   Ca
Viegnu già dirittu ccana
Cca sta bella curingota
C’ha stu bellu toccasana.
Io pe’ mona  vi salutu    Ca
Vi ringrazziu d’ogni cosa
Ca mi sientu rimbenutu
E sta jiornata strepitosa.
Si beniti nta Nicastru   Ca
Mi trovati a chist’ufficiu
Ca no’ sugnu io nu mastru
Ma su io lu capufficiu.
 
Concetta e l’avvocato rientrano e discutono della bellezza di Betta.
L’avvocato è stordito ed entra in stato confusionale.
 
Sta fhigghjiola la vidisti    C
Quant’è  bella ed’educata ?
Esta pe’ profhessionisti
Si la vua pe’ fhidanzata.
Ca ti vitti chi ‘a guardavi     C
Cu nteressi  e cu rispettu
E cu la vuci tua soavi
Nci fhacìvi u sorrisettu.
Puru mo’ ti vijiu stranu    C
Cu la testa strulanata
Pigghjia postu a  stu divanu
Ca pigghjiasti na sbandata.
No’ nci puozzu mo’  cridira  Ca
Tuttu chigghu chi successa
Ca la testa mo’ mi gira
E la vita è compromessa.
Io no’ sacciu chi ha mu fhazzu    Ca
Mu nci mandu na mbasciata
Nomu passu pe’ pupazzu
Ca la vuogghjiu fhidanzata.
130) S’esta chistu lu problema   C
Truovu io la soluzioni   
Viegnu io, ca  jiamu assema
E risorvìmu a situaszioni.
Ma no’ sacciu s’è d’accordu  Ca
E si mi vo’ pe’ fhidanzatu
Certu è ca mu’  ricuordu
Chiggha voltu sua mpatatu.
Io no’ sacciu si stasira    Ca
Mi nda vajiu a casa mia
O  si m’hajiu d’accertara
Si nci fhazzu simpatìa.
Il marito Ntuoni e il cognato commentano il ritardo e lo stato di malore in cui si trova l’avvocato. Concetta li invita ad andare in cucina per continuare a bere e a giocare a carte, opure andare in piazza a passeggiare.
Ma duv’è chi ti nda jisti   Ba
Era luongu stu cafhè
E si pua ti decidisti. . .
O ti pigghji puru u tè?
Ma chi fù, chi ti successa   Ba
Forse tu no’ digeristi
Hai  mu fhai ncuna commessa
O hai forse . . . mu conquisti?
Ma pecchì no’ vi nda jiati   C
Nta cucina mu vivìti
Chigghu  vinu  ggha assettati
E  lu fhiascu mu fhinìti?
Vai, ca t’accumpagna Ntuoni
Ca parrati e discutiti   C
E staciti buoni buoni
Ca ogni tantu vi vidìti.
Vi fhacìti  ‘na partita    Ca
O arrivati nta la chjiazza
ca de certu v’è gradita
fhara ncuna brisculazza.
Nel frattempu all’Abbucatu  C
Nci preparu a camumiggha
Quandu s’hava ripigghjiatu
Vena Giuanni mu vi pigghjia.
E và buonu, jiamuninda    N
Ni fhacimu quattru passi
Ca sinnona ccà ni blinda
E tu mancu ti rilassi.
140) Certi vuoti chi si mpunta   N
No’ la smovu mancu  io   
E su guai pe’ cu’  l’affrunta
No’ nci riescia mancu Ddio.
Carlo confessa di essersi perdutamente innamorato di Betta.
Menu mala ca nescìru     C
C’accussì parramu buoni
Mentre  Giuanni,  vajia ngiru
E non’havìmu testimuoni.
Ma devieru tu la vua    C
Sta fhigghjiola chi vidisti?
Ma non’è ca tuna pua
Ti dirigi ad’attri pisti ?
Ma si fina a ieri sira       Ca
No’ sapìa mancu ca’  nc’era
No’ la vuogghjiu ndisponìra
Ma la vuogghjiu pe’ mugghjiera.
Pe’ na vota chi la vitti
Nta lu cora mi trasìu
Buoni, santi e beneditti
Li paruoli chi dicìu.
Ca si fhicia russa russa   Ca
Quandu mpacci mi guardau
E nci lu dicu nta li mussa
Co’ Signuri mi mandau.
Mi la fhicia canuscìra   Ca
Comu fhussa provvidenza
E mo’ l’hajiu d’ammettira
Mi cangiaru l’esistenza.
Io vi dicu cu cuscienza     Ca
Ca sta Betta mi la spusu
Si no’ nc’è ncuna mpedenza
Sugnu sempe speranzusu.
No’ lu sacciu s’esta zzita   Ca
E si nc’è ncunu chi la vò
Si de ncunu esta patìta
No’ nc’è ma e no’ però.
Concetta racconta per sommi capi la storia tra Domenico e Betta.
Ti la dicu io la storia    C
E chi successa fhinammo’
Nc’era unu cu na boria
Chi parìa nu Ciccantò.
150) Jia diciendu ca pe’ igghu
Na cotrara n’attra vala    C
Savuttava comu grigghu
No’ la trova n’attra  guala.