Chi notizia mi portasti? (1)
- Dettagli
- Categoria principale: ROOT
- Visite: 585
Chi notizia mi portasti? (1)
di: Er. Ga.
PERSONAGGI:
- Concetta Mamma impicciona
- Antonella Mamma di Betta
- Antonio (Ntuoni) Marito di Concetta
- Gianni Figlio di Concetta
- Vincenzo Marito di Antonella
- Elisabetta (Betta) Figlia di Antonella
- Domenico Ex Fidanzato di Betta
- Carmela Ragazza messa incinta da Domenico
- Battista Cognato di Concetta
- Carlo Cugino di Concetta e Avvocato
- Maria Mamma di Carmela
- Don Vito Parroco
- Felicia Sarta
|
Chi notizia mi portasti ? C
Chi si dici anta lu passu ?
Quala sunu l’antipasti
Ntisi dira e nu scunquassu.
|
A la missa nc’era ncunu? C
O aspettasti nta la villa?
La bacheca de lu diacunu
Riportava la postilla?
|
|
Dammi tiempu mu m’assiettu G
Fhammi armenu mu nci pienzu
Nu minutu, u mi riciettu
Ca mi vena lu discienzu.
|
Dimmi mo’ chi bua sapira G
Quala cosa t’interessa
Si fhinisti e suffhrijira
Io ti dicu la prommessa.
|
|
Io trasivi nta la chjiesa G
Guardai puru la bacheca
Mo’ ti dugnu na sorpresa
Chi doluri no’ m’arreca.
|
Nc’era scrittu a stampatellu G
Ca Dominicu l’annuncia
Senza n’attru cuntr’appellu
Ca a Carmela no’ rinuncia.
|
|
No’ mi dira ca Carmena C
Cittu cittu spusa a Micu?
Fhina a jieri stacìa mpena
Ca de iggha era nimicu.
|
No’ bastasse sta notizia G
Ntisi dira nta la villa
Dittu propriu cu malizia
Ca scoppiau na scintilla.
|
|
Pua de sutta ncunu dissa G
C’hanu e fhara lestu lestu
Ca la misa cricifhissa
E ca stu fhigghjiu nescia priestu.
|
10) Ai rovina chi dicisti C
E chi nitizia chi portasti
No’ si tratta de conquisti
Ma soltantu de dui mpiastri.
|
|
Pua si fhanu l’evoluti C
Ca de Ddio su timorati
Ma su comu prostituti
E jiarìanu smerdijiati.
|
Nta la chjiesa mprima fhila C
A la fhini nsegrestìa
Appicciava na candila
Si movìa cu maestrìa.
|
|
E la mamma a menzijiuornu C
Domandava a chistu e a chigghu
Si la vittaru pe’ scuornu
Ca sparìa comu jirigghu.
|
Ogni scusa nc’era bona C
Mu ritarda a lu rientru
Ca fhacìa la lazzarona
Passijiandu nta lu centru.
|
|
Mo’ chi sacciu chi successa C
E si nci pienzu nu momentu
Mi lu spiegu ch’è depressa
E puru chigghu movimentu.
|
La ncuntrai a la fhuntana C
Chi aspettava la vicenda
E la vitti tutta strana
Ammucciava sta fhaccenda.
|
|
Era tutta penzierosa C
Chi guardava la Madonna
Ma non’era spiritosa
E non’havìa la minigonna.
|
Forse propi a stu momentu C
Nci cercava ncuna grazzia
Havìa tantu turbamentu
Ca penzava a sta disgrazzia.
|
|
Mo’ nda parru cu Antonella C
Nci domandu puru ad’iggha
Si la sa sta scappatella
Ch’era zzitu de la fhigghjia.
|
20) Nci domandu cuomu mai C
No’ mi dissa nuggha cosa
Mu nci ciercu, tu chi saì
De sta storia scandalosa?
|
|
Ha mu ammientu ncuna scusa C
Pemmu vajiu mu la truovu
Nommu fhacia la rugnusa
Io nci dicu s’hava n’uovu.
|
Pua de corpu nci domandu C
Cuomu mai no’ mi lu dissa
Ca la stava corteggiandu
E ca si spusa mo’ cu chissa.
|
|
Hai pe’ casu n’uovu fhriscu C
C’ha mu fhazzu na ricetta
Cu lu pana ha mu lu mbiscu
C’hajiu e fhara a cotuletta?
|
Ti lu pigghjiu e ti lu dugnu A
Tantu nd’hajiu na padella
Sunu gruossi cuomu pugnu
L’accattai a la bancarella.
|
|
No’ ti vijiu cchjiù serena C
Ti domandu e ti lu dicu
Lu sapivi ca Carmena
Và e si spusa cu lu Micu?
|
Passau già na settimana A
Chi no’ ciangia cchjù sta fhigghjia
Ca l’azioni fhù villana
Mu la dassa e mu sa’ pigghjia.
|
|
Ca ti sembra na gran cosa A
Tuttu chigghu chi successa?
Fhicia propi la schifhosa
Pemmu resta cumprumessa.
|
Puru igghu sbirgognatu A
Ha la fhacci cuomu u culu
Nci fhacìa l’annammuratu
Ca era fhigghjiu de nu mulu.
|
|
Certi siri ccà presente A
Fhacìa tanti cirimuoni
Lu penzava differente
Era ambeci nu ddimuoni.
|
30) E lu gestu ch’igghu fhicia A
Esta degnu de disprezzu
Mo’, qualunque cosa dicia
Già mi vena lu ribrezzu.
|
|
Igghu ccàna no’ mbicina A
Ha mu dassa stara Betta
Mu si spusa a Carmelina
Ca lu sparu cu a scupetta.
|
Si lu ncuntru nta la chjiazza A
Nci la fhazzu la partaccia
Mu nci lavu cu sputazza
Tutta quanta chiggha fhaccia.
|
|
Ca pe’ mia non’è virgogna A
Mu camìnu pe’ la strata
La sua fhacci è de mulogna
Ca la mìa è mmacolata.
|
Mi dispiacia ca sta fhigghjia A
Fhù de’ chistu nnammurata
Ma cu chistu dassa e pigghjia
Mo’ si trova disperata.
|
|
Nci lu dissi ca fhù miegghjiu A
Ca fhinìu de chistu modu
Ca no’ ntisa lu cunzigghjiu
E ca no’ venìa a lu sodu.
|
Rimandava d’annu in’annu A
C’ha mu trova occupazioni
Sutta nc’era chistu ngannu
Attru ca sistemazioni.
|
|
L’attra vota sai chi dissa? A
“Io mi spusu a quarant’anni”
E si no’ succedìu na rissa,
E’ ca non’hajiu battipanni.
|
Ca la genta mo’ conviva A
Stannu assema senza ‘mpegnu
E si a sira si decida
Cangia propi lu disegnu.
|
|
Dassa tuttu e si nda vajia A
Cangia pura la cumpagna
Và e si trova n’operajia
E fhesteggia cu sciampagna.
|
40) Ca la legge lu permetta A
Mu la dassa cu li fhigghji
Esta vì, na barzelletta
Chisti sunu li fhamigghji.
|
|
Si hai sordi nci nda duni A
Ma li fhigghji i pua vidìra
Vidi tuna chi accattuni
Ca mi fhicia mbestialira.
|
Ca marituma no’ nc’era A
E pe’ paci da’ fhamigghjia
Io no’ fhici la severa
Evitai nu parapigghjia.
|
|
Si Vicienzu lu sapìa A
Si pe’ casu havìa sentori
Puru la fhisionomìa
Nci cangiava a stu signori.
|
Ma lu jiuornu và e fhatiga A
Si ricogghjia già strosciatu
No’ pua fhara mu si mbriga
Mu si senta cchjiù umiliatu.
|
|
Mo’ chi sapa la notizia A
No’ lu sacciu chi cumbina
Si si cerca na giustizia
E si facia na strimìna.
|
Puru Betta ha mu nci penza A
Mu lu ciarma cu li buoni
Ca non’hava cchjiù mportanza
Senza fhara cirimuoni.
|
|
Mu lu dassa stu rimitu A
Stu cornutu e fharabuttu
Ca scoprìu nu pervertitu
N’accattoni pigghjiatuttu.
|
Puru tuna fhai de tuttu A
Si nci parri e vera amica
Ca no’ tuttu esta distruttu
E si và avanti cu fatìca.
|
|
Nd’hava uomini a stu mundu C
Belli, onesti e signoruni
E non’è lu fhinimundu
Si si scorda stu luntruni.
|
50) Ca lu dicia na canzuni: C
si si chjiuda cca na porta
s’apra certu nu portuni
chi ti cangia chista sorta.
|
