A la Musa calavrise

A la Musa calavrise
 
Cu mai si la cridia, doppu tant’anni,
mi rivigghijava ntra li vrazza tue?
Ti vuòzzi bbene, e avie mancu decianni;
mi scialava mu fai chillu chi bbue
quandu, quatraru, nind'innamurai
tantu, chi ogni chiffàre mi scordai.
 
Ma mo’, pecchi non mi dassasti stare?
pecchi mi dici ch’aju forzi ancora?...
Sii nzurtulina!... e ppe ti cuntentare
lu hjatu chi mmi resta cacciu fora
ma cu nnu pattu pe’ lu mio destinu:
basta chi quarchi cosa la cumbinu.
 
Jamuninde mbraccettu pe' ogni bbìa,
e non dassamu mancu ’na vinella,
siminandu lu bene ’ncurtisia
jo, mienzu viecchju e ttu, sempre cchjù bella:
dunamìnde n’ugnìlla de criteriu
pe mmu raggiùnu de uominu seriu.
 
Lu mundu, cuomu sempre, va' ’n rovina
e non si trova ’na pirsuna sana:
non c’è bbilenu e mmancu medicina
cà ognidunu fila a la sua lana,
e senza vrigogna e senza pastura
penzandu: campu jo, dura cu dura!
 
Sunu li leggi ’nu mbruogghju e ’na mbrogghja,
chi mmancu pigghja pista n’abbucatu;
de juornu a juornu chjù ncara l’arrobba
pe' lu ricriju de lu scilleratu
e l’amarure de la bona gente,
chi bbo’ vìvere onesta e non ha nente.
 
Lu Guvernu, chi a fforza si mantene,
sta' mu guarda, cuntìja e puocu cunta;
Partiti, Sindacati, e a ccu cumbene
vatalìjanu sempre (aja ’na runca!);
e Titta va’ mmu attizza e Cola ragghja:
« lavuraturi!... » - e non c’è cu travagghja!
Li giuvani, cu làuria o dipromati,
pe’ mpiegu comedé fanu la fila,
ma cud’ abbussa a fforza de pedati
è distinatu a la seggia mu arriva
e l'àutri, chi tti vanu ngiru ngiru
li vidi cuomu cìciari a lu crivu.
 
’Ntra tantu mbarambùogghju spungia fora
la ndràngata, la mafia, ogni viulenza,
e ppropiu cu non curpa paté e mora
suttacuverta de la ndifferenza;
e ssi lu malandriunu è carceratu
cuomu ’nu galantuominu è trattatu!
 
MUSA, lu sai ca chissu è n’assaggiu,
e de nente oramai mi meravigghju;
sai puru ca pe’ quantu a lu coraggiu
non su’ ffattu de carni de conigghju:
dammi, però, cchjù fantasia, e prudenzia
mu ambicinamu ognunu « NCUMPIDENZA ».