Nu passu verzu la Storia de stu territoriu

Nu passu verzu la Storia de stu territoriu
 
Tutti li stori chi ti cuntai fhina a mo’, happaru tutti nu protagonista o li protagonisti, descritti e cuntati no’ sulu pe’ chigghu chi fhiciaru, ma puru pe’lu ruolu sociali chi chisti svolgiru nta la comunità de’ curnga.
Contemporaneamente nci fhuru e nci sunu stori chi esaltanu, pe’ mportanza, stu territoriu e chi mo’ ti cuntu, no’ cu l’intentu mu assumu lu ruolu de’ storicu, ma piuttostu mu ti fhazzu canuscira fhina nfhondu chigghu chi mi mparai documentandumi, supa l’origini e supa la storia de’ lu paisi mio.
Lejivi, ad’esempiu, ca a Virdiegghu, fhuru scoperti tracci de insediamenti umani chi risalanu addirittura a lu Neoliticu (5000 anni a. C.), cu nu Fhocularu chi risala propri a stu periodu, chi fhù scopertu de certi ricercaturi chi vinnaru de l’Univerzità de Fhirenze.
 
Lejivi puru c anta lu 1916 fhuru scoperti moneti, li Stateri arcaici greci, canusciuti miegghjiu cuomu lu “Tesorettu de’ Curnga”, conservati a lu Museu Nazionali de’ Reggiu Calabria, segni evidenti de’ n’antica presenza de’ civiltà umana nta stu territoriu.
Mportanti sunu li “Termi Romani” chi risalanu a lu IV – V sec. d. C., cu mura mponenti de la struttura fhatta cu Mattuni de’ Crita, ancora visibili e visitabili de’ parti de’ li Turisti.
 
Ti stajiu cuntandu chistu mu ti fhazzu capiscìra ca Curnga, happa nu ruolu mportanti nta la storia e, mu ti fhazzu capiscìra miegghjiu stu concettu ti parru de la mportanza chi happa la presenza de’ li Monaci Basiliani, chi costruiru nu Monasteru, databili verzu la fhini de’ lu IX seculu e de cui sunu visibili ancora resti de la struttura.
Mportanti, supa stu territoriu, sunu puru li dui Torri de’ avvistamentu chi si trovanu nta la località Turrazzu, cu la prima Torri denominata propri “Turrazzu”, chi fhù costruita nta lu luntanu 1600, e cu la sicunda denominata “Turri Vecchjia”, chi si trova puru chista nta la località Turrazzu, e chi rasala a lu XVII seculu.
 
Li reperti storici de stu territoriu no’ fina ccà pecchì è puru mportanti lu Palazzu Ducali, chi appartenìu a la Regina Sancia, la mugghjiera de Goffredu Borgia (1494).
Chistu Palazzu, fhicia parti de la Feudu de’ Maida e fhù dunatu a la Regina Sancia de’ lu Rre Robertu, ma successivamente era de’ proprietà de’ li Marzanu e ancora doppu de’ l’Anmgiò (1330 circa).
 
 
Nci fhussarianu attri reperti storici de cuntara e de’ riportara chi sottolineanu ulteriormenta la mportanza storica de’ stu territoriu cuomu: ad esempiu li Quattru Colonni de’ Granitu chi fhacianu parti de lu Palazzu ducali, ma chi li Cefhalì, gruossi proprietari terrieri, decidiru, cu l’intentu mu li preservanu de’ li vandali, si li portaru all’internu de’ la Villa nta Acconìa.
 
Accussì cuomu mportanti sunu lu Mulinu de’ Lava Vurcanica, chi si trova vicinu a lu Palazzu Ducali, e li ruderi de’ na Chjiesa Gotica chi risalanu a lu XV –XVI seculu.
Vuogghjiu chjiudira lu discurzu ricordandu lu “Platanu Giganti”, chi ha nu diametru de vinti metri.
È chjiamatu lu Giganti Buonu, e costituiscia orgogliu de’la comunità de’ Curnga, pecchì è tra li primi posti de li giganti vegetali esistenti nta l’Italia.
Lu cchjiù randa, è lu Castagnu de’li Cientu Cavagghi chi si trova a Sant’Alfio, nta la Sicilia, e misura vintidui metri de’ diametru.
 
Coriusu, ma veru, lu territoriu vanta puru la presenza de’ n’attru Arvuru Giganti, lu Chjiuppu de’ lu Suncurzu, cu lu troncu cavu, chi fhacia n’umbra chi sovrasta la chjiesa de lu Suncurzu, e la Fhuntana chi si trova de’ lu latu oppostu de’la strata.
 
Li cuosi descritti no’ fhacìanu parti de lu percorsu chi fhicimu, ma no’ potìa fhara a menu mu ti nda parru.
Prefherivi mu lu fhazzu ala fhini de li ricordi mia, pecchì nci tenìa mu canusci per bene tuttu lu territoriu duva criscìru nannuta e pattrita.
Mo’ chi fhinivi mu lu fhazzu, puozzu essere soddisfattu pecchì, accussì fhaciendu, potisti canuscira miegghjiu e a fhondu lu Paisi mio “Curinga
 
Epilugu
 
Ti portai pe’ tutti li strati de’ lu paisi mio e no’ ti portai mai ‘nta na Carrera de fhama minori ma no’ de ‘mportanza pecchì ‘nta chista, a parti ‘ncuna tessitura e ‘ncunu tilaru, puocu eranu l’attività.
Tutti li strati eranu comunque animati de’ na marea de’ fhigghjiuoli masculi e fhimmini chi jiocavanu, e capitava puru ca ‘nc’eranu gagghjini chi si trovavanu pe’ li strati.
Si arribbegghavanu quandu arrivavanu li Ciucci de’ la campagna pecchì ognunu sapìa ca arrivavanu portandu cuosi buoni de’ mangiara.
Fhicu, Cerasi, Pruna, Recina e tanti attri cuosi, ricogghjianu li fhigghjiuoli de’ lu vicinatu chi si jiungìanu ‘nta na specie de’ merenda ‘mprovvisata chi aiutava e rahfhorzava la stima e lu rispettu tra fhamigghji.
Nc’era solidarietà pe’ ogni problema chi riguardava lu vicinu de’ casa, e nc’era na’ specie de’ mutuu soccorsu chi consolidava li rapporti umani, sia nta li casi duva nc’era de’ gioira c anta chigghji duva nc’era de’ soffhrira.
Soprattuttu quandu morìa ncunu de’ la fhamigghjia si vidìa l’unioni tra fhamigghji vicini de’ casa.
Si usava, e fhorse si usa ancora l’usanza de’ preparara lu Cuonzu pe’ l’intera fhamigghjia quandu morìa ncunu de’ la fhamigghjia.
Quandu li fhamiliari abitavanu luntanu, era la vicina de’ casa chi provvedìa a tuttu chistu, e chistu, era nu modu mu si raffhorza lu rapportu d’amicizia.
Mi ricuordu li Chjianti de’ li mammi de’ fhamigghjia, vicini de’ casa, quandu unu de’ li fhigghji havìa mu parta pe’ l’america.
‘Nc’era d’attraversara l’Oceanu e . . . cu’ sa’ si lu destinu l’avarìa fhatti cchiù ‘ncuntrara duranti la vita.
 
La vicinanza era sempre cchiù fhorta ed’era ancora cchiù sentuta quandu si ‘mbicinava la data de’ partenza. Lu momentu de’ lu distaccu era strazianti, soprattuttu pe’ chigghi chi no’ potìanu accumpagnara lu parenta fhina a la stazioni pecchì puru gghana, no’ sulu maccaturi chi sbentilijiavanu ma puru lacrimi chi era difficili fhermara.
. . . E li lagrimi continuavanu puru ‘nta li jiuorni chi seguianu e la disperazioni avvolgìa tutti li perzuni cuomu nu’ mpermiabili chi t’isolava de’ tuttu chigghu chi succedìa ‘ntuornu e s’appiccicava de’ ‘ncuogghu cu na tristezza ‘ndescrivibili. Mu risulleva de’ sta disgrazzia ‘nc’era sempre lu vicinu chi domandava sempre e si ‘mpurmava de’ chigghu chi avìa partutu, e quandu passava lu postinu, tutti l’aspettavanu davanti la porta de’ casa cu la speranza mu ricivanu na’ littara de’ l’America.
‘Nta stu percorzu chi ficiumu, no’ sacciu si ‘nci fhacisti casu a la conformazioni de’ li casi chi hava stu paisi. Quasi tutti casi a dui piani e cu n’ingressu esternu chi si ‘nchjiana cu na scala cu lu ballaturi.
Lu Mignanu era lu terrazzu de’ la casa, lu postu duva si ‘ncuntravanu li vicini de’ casa, mu parranu e mu cuntanu, passandu lu tiempu lavorandu cu l’uncinettu o a li fherra, ‘nta l’autunnu e d’estati quandu li pomeriggi eranu accalurati e sereni ma puru quandu no’ fhacìa fhriddu pecchì, cca nui, lu viernu e lu fhriddu dura puocu.
Non’era necessaru mu si porta la seggia de’ la casa mu s’assetta pecchì li scaluni fhacìanu de’ sieggi, ed’eranu puru commidi. Fhimmini chi lavoravanu ma puru attienti a chigghu chi fhacìanu li fhigghji chi jiocavanu ggha vicinu, cu chigghi jiuochi chi ojia, no’ si vidanu cchjiù fhara pe’ li strati.
Puru li rumuri eranu particolari pe’ ognu carrera e strata: nu Cana chi abbajiava, lu ragghjiu de’ nu ciucciu o lu nitritu de’ nu Cavagghu, volìanu dira ca stacìa arrivandu lu maritu o lu fhigghjiu de la fhatiga de’ la campagna, e ‘nta sti momenti si ricongiungìa la fhamigghjia ‘ntuornu a lu fhocularu duva si mangiava, magari ‘nta n’unica ‘nzalatera, cuntandu li fhatti de’ la jiornata, stanchi ma tantu fhelici.  ‘Nta li fhamigghji duva campava ‘ncuna Nanna o Nonnu, era ancora cchiù bellu stara ‘ntuornu a lu fhocularu pe’ passara li sirati sentiendu cuntara stuori veri ma, spessu mbentati, sempre avvincenti pe’ contenutu. Eranu chigghi lezione deì’ vita chi ti fhacìanu criscìra e canuscira, senza mu l’hai mai vistu, lu mundu chi ti circondava, mentiendu li fhigghjiuoli sempre in’allerta cuntra li possibbili periculi e ridiendu supa lu comportamentu de’ certi perzonaggi Principi e Principini chi non’avìanu nenta a chi fhara cu la vita povara de’ li povaracci. ‘Nc’era na vota . . . cominciava sempre accussì lu cuntu de’ la Nanna chi era sempre abili mu ammuccia l’Uorcu arriedi l’uomu malignu e lu Principi o Sordatu chi vincìa la guerra mu cuntanu de’ uomini buoni ed’onesti, chi spessu ‘nc’era puru ‘ncuna cosa vera, chi unìa sti personaggi a li fhigghji o a li mariti muorti ‘nguerra ‘nta sti cunti chi sembravanu inutili. Si canuscìanu accussì uomini e patri de’ fhamigghjia chi moriru ‘nguerra pe’ l’amuri de’ la Patria, ‘nta nu mistu de’ veru e de’ fhantasticu chi spessu si comincìava a ciangira senza apparenti motivu.
‘Nfondu, pe’ li fhigghjiuoli, si trattava sempre de’ na . . . . Fhavula. Era chista la Televisioni de’ sti tiempi, usata mu passi lu tiempu onestamenti e pemmu ti ‘mpari ‘ncuna cosa, canuscira e . . . mu si addormenta, quandu era lu momentu mu si fhacia senza malandrinerii.
Attri tiempi.
Er. Ga 2012

Dovuti Ringrazziamenti.
 
A conclusioni de’ stu lavoru, no’ mi resta ca ringrazziara nu certu numeru de’ perzuni chi m’ajiutaru mu riendu sempre cchjiù precisu e completu li cunti de’ li Zziu Pietru chi, no’ sunu ammentati, ma chi riportanu fhatti de’ na vita vissuta de’ li curinghisi nta l’anni ’40 – ’50 e puocu de’ cchjiù.
 Ringrazziu pe’ primu Donn’Antuoni Bonellu, lu Parrucu de’ lu paisi, pe’ lu libru chi scrissa, Curinga – Recuperi di storia e di vita sociali – de cui traivi l’ispirazioni pemmu cuntu puru io la storia vissuta,
Hajiu pua de’ ringrazziara na serie de’ perzuni chi, durante la scrittura, pubblicata supa lu situ www.curingaonline.it, a puntati, mi correggiru cuntandumi particolari chi, riportai cu piacere a completamentu de’ li contenuti de’ li vari stori cuntati de’ lu Zziu Pietru.
Ringrazziu: lu profhessori Martinu Granatu, pe’ li precisazioni apportati e certi fhatti e pe’ certi eventi; a Mastru Micu Grassu, pe’ li stori de’ igghu ricordati, co l’acuta osservazioni supra a certi eventi chi sembravanu completamente e defhinitivamente scordati; a Don Ciccinu Mirenda, pecchì mi indirizzau supa la giusta sequenza de eventi chi riguardavanu li Putifhji de’ Curnga; a Battistinu Curradu, pecchì m’illuminau supra li leggi chi governavanu li negozi multipli e a singula gestioni; a fhratima Peppinu de’ cui vinni a sapira de’ certi eventi goliardici chi mentìanu in attu tutti li fhigghjiuoli de’ l’età sua cuomu li partiti a li carti sutta l’arvuri de’ fhrutta, e la punizioni chi subìu propri igghu, quandu scindiru a lu Ponta pe’ vidira lu Giru d’Italia, chi si concludìu cu nu sequestru de’ perzuna chi durau n’intera jiornata; a la suocera mia Donna Maria Diacu e la canata Donna Vatricia Mazza, pecchì cchjiù vuoti mi chjiariru rapporti parentali e matrimuoni cu nomi e cognomi de’ perzuni riportati nta sti stori.
Ringrazziu mpini mugghjierima Dottoressa Bettina Mazza, chi mi seguiu passu passu e stimolatu nta stu progettu de’ scrittura, e li fhigghji mia Fhrancescu e Roberta, pecchì fhuru li perzuni a cui volìa mu nci fhazzu canuscira li mia origini ma puru li loru, nmodu mu capiscianu miegghjiu verzu duva ha mu ndirizzanu lu fhuturu loru.
 
Ernestu Gaudinu