Lu Matrimuoni. . . . pe’ Procura

Lu Matrimuoni. . . . pe’ Procura
 
Mo’ ti cuntu la storia de l’emigrazione de li curinghisi accussì cuomu la puotti canuscìra io e cuomu fhu chiggha chi fici io.
Nui ojia ni potìmu ritenira fhortunati pe’ tuttu chigghu chi rescimmi mu ni conquistamu, chi quand’era io cotraru, era sulu mpenzabili. Ti dicu ca rispettu a chigghu chi apparu mu passanu chigghi chi nescìru verzu la fhini de l’ottocentu e li primi de lu millenovecientu, sunu ojia de cunziderara buoni, vistu l’esitu e li difficoltà chi happaru mu superanu tutti chigghi povaracci chi avìanu decisu mu emigranu nta l’America accussì cuomu decisi io verzu la fhini de’ l’anni ‘60.
Na marea de meridionali chi si nda jia verzu li Stati Uniti d’America, e pe tutti, li primi mpatti cu lu mundu nuovu, si presentau difficili fhina de lu primu momentu, accussì cuomu mi succedìu a mia quandu misi peda nta sta nova terra. A chigghi tiempi, l’emigrati vinianu ammassati nta n’edifhiciu de Ellis Island, o de ncun’attru puortu cuomu Boston, Baltimora o New Orleans, e doppu settimani de viaggiu, affruntavanu l’esami medicu e la verifhica de li documenti de identifhicazioni, pemmu stabiliscianu si potianu o menu trasira nta l’Americanu. L’autirità locali, eranu accussì severi chi, senza nu minimu de pietà, rimpatriavanu la maggior parti de li perzuni, e li gienti ciangìru tantu, chi fhiciaru chjiamara l’isula, “l’isula de lu piantu”. Doppu tanti sacrifhici, tanti sufferenzi e soprattuttu doppu havira perdutu puru li sordi de lu viaggiu, si fhinìa propi nta stu puortu la speranza de na vita cchjiù decenti. Curga viva sti pagini de storia d’emigrazioni, cu li paruoli de nu paisanu, certu don Peppinu Cirianni, chi descriva nta na poesìa, tutti li difficoltà chi ha mu passa prima ancora mu menta peda nta l’America, duva emigra na prima vota verzu la fhini de lu 1800, e na sicunda vota, ntuornu a l’età de sessant’anni, nta lu 1929.
Nta li poesì de igghu scritti, s’intreccianu emozioni e sentimenti, soprattuttu quandu descriva na tempesta chi si scatinau mentra la Navi attraverzava l’oceanu e mentra descriva propi l’isula de li lacrimi.
Pe’ bona sorta, lu fhattu ca appartenìa a nu gruppu Massonicu cuntrassegnatu cu nu distintivu a fhorma de Squatra e Cumpassu, lu fhiciaru passara senza tanti problemi, anzi, superau li controlli nta nenta e senza mancu avira a chi fara cu chigghi guardi chi spedianu senza pietà arriedi la maggior parti de li gienti. Tutti volìanu mu emigranu nta l’America, nta li Stati Uniti, pecchì nta l’Italia e nta lu meridioni mparticolari, la fhami “si tagghjiava cu la zzappa” pe’ tanti motivi chi no’ stajiu ccà mu ti cuntu ma, chi ciercu sulu mu ti elencu.
Ccà nui, li causi chi costringianu li perzuni mu emigranu fhuru la crisi de la campagna chi, nonostanti la fhatiga de zzappa, de notta a notta de li zzappaturi, no’ producìanu tantu de potìra mantenira na fhamigghjia. Cu fhacìa l’Artigianu no’ ricivìa commiossioni e la crisi agraria misa ndinuocchjiu popolazioni e famigghji interi.
N’attra cosa chi favorìu l’emigrazioni verzu l’America fhu chiggha chi ficia trovara prezzi de biglietti pe’ lu viaggiu, a nu costu accessibili a tutti. Succedìu ca li Navi chi portavanu merci de ogni generi nta l’Italia e nta l’Europa, nommu tornanu vacanti e pemmu guadagnanu ncuna cosa, carricavanu tutti chigghi perzuni chi s’avìanu accattatu lu bigliettu a vasciu costu. De stu modu, diventau cchjiù vicina l’America ca no’ li paisi de lu nord de l’Europa. Cu li primi emigrati, cu li pionieri, uomini suli chi s’avventuravanu nta l’America, si fhormau na catina d’emigrazioni pecchì, unu chjiamava l’attru, richjiamandu prima li parienti, pua li paisani e mpini, tutti chigghi chi avìanu nu mistieri nta li mani.
Fhatigavanu costruiendu fherruvì, costruiendu palazza e zzappandu terra nta li piantagioni de cuttuni e de cafhè. Puru li parienti cchjiù stritti, amici, paisani raggiungiru li primi emigrati grazzi a li notizi chi arrivavanu e cu li littari chi arrivavanu de l’America. Li littari fhuru lu mezzu cchjiù mportanti pe’ havìra notizi supa la nova terra, ed’eranu propri sti notizi chi cumbincianu cchjiù fhacilmenta li giuvini chi volianu mu emigranu. Tanti vuoti venìanu lejiuti nta la chjiazza e chistu attirava sempa cchjiù perzuni verzu l’America. Man manu chi si jia avanti, li littari contenianu puru li biglietti pagati pe’ nu fhamiliari chi manifhestava la voglia mu vaja nta l’America, pe’ la mugghjiera mu si cungiungia cu lu maritu o pe’ nu fhigghjiu mu si congiungia cu lu patra o pe’ ncunu fhrata chi si travava ndifficoltà. Pe’ primi, pottaru emigrara chigghi chi si pottaru accattara lu bigliettu; pua li primogeniti pe’ cui si fhacìa la colletta mu si ricogghjianu li sordi pe’ lu viaggiu e a cui partecipavanu puru li perienti stritti, vindiendu l’attrezzi chi servìanu pe’ l’attività lavorativa. No’ sulu lu piezzu de terra ereditatu da parti de lu patra o de lu suoceru venìa vindutu, ma puru vacchi, piecuri e crapi, pe’ cui l’avìa, mu si racimulanu li sordi pe’ lu viaggi a l’America.
Emigra ojia emigra domana, de jiuornu a jiuornu aumentavanu l’Italiani nta l’America e accussì si costruiru paisi chjiamati “little italies”, a la perifheria de li città cchjiù randi, duva nc’era lu mercatu e si vindianu sulu prodotti mportati de l’Italia. Nta lu periodu tra li dui guierri, l’emigrazioni diminuiu parecchjiu, de na parti pecchì certi stati impedianu l’ingressu de emigrati, de n’attra pecchì mu si trasa nta nu statu avìa mu si era sprovvisti de nu vistu d’ingressu, chi era scrittu de lu Parrucu e de lu Brigadieri de lu paisi de residenza e chi cunzentìa lu rilasciu de lu passapuortu pe’ la partenza.
Era lu periodu de lu Fhascismu, nu periodu particolari chi bastava mu ieri de’ tendenza politica opposta a chigghu de regimi, pe’ dira addio cu certezza a la possibili emigrazioni nta l’America.
Si a chistu si jiungìa lu pareri negativu de lu Prieviti de lu paisi d’origini, allora li cuosi si complicavanu ancora de cchjiù, e quindi a tutti nci cumbenìa mu cunducianu na vita timorata de Ddio si bolianu, a la necessità, mu hanu nu parere favorevoli pemmu ti fhanu espatriara.
Tanti fhuru nta curnga li pareri negativi scritti de lu prieviti chi mpedìru l’emigrazioni puru a perzuni chi nd’avìanu necessità pemmu puonu sperar anta nu fhuturu cchjiù decenti rispettua chigghu chi stacìanu viviendu.
Cu simpatizzava pe’ partiti de sinistra oppuru era manescu, era segnalatu cuomu elementu negativu accussì cuomu negativu era segnalatu cu era portatu mu viva vinu e mu si mbrijiaca senza n’apparenti motivu.
Sti perzuni, nonostanti si vittaru negara la possibilità mu pouonu emigrara a l’America, no’ reagiru mai a spropositu anzi, si rassegnavanu serenamenta a sti decisioni pecchì, nta lu cora loru, no’ nc’era la fhorza la volontà mu emigra veramenta affrontandu tutti chigghji difficoltà chi si dicìanu ngiru.
Ad’ogni modu, la politica restrittiva de lu Fhascismu, chi perdìa cu st’emigrazioni onori e prestigiu, e la necessità de uomini mpegnati nta scopi militari, eranu motivi chi mpedìanu defhinitivamenta la possibilità mu si emigra.
 
Puru la fhami de lu ’29, cuomu nsegna la storia, fhu motivu de negazioni pe lu populu Italianu mu emigra verzu l’America.
Nta sti periodi, cchjiù ca emigrara verzu l’America, si emigrava verzu la Fhrancia duva si nda jianu in’esiliu l’oppositori politici a lu Fhascismu, e verzu la Germania nta l’anni ’30, speciarmenta doppu chi si fhirmau “lu pattu d’azzaru”.
Aumantanu nta stu periodu li richjiami de li parienti all’esteru e criscia quindi la presenza de li fhimmini Italiani nta l’America, segnu ca ognunu cercava sistemazioni defhinitiva all’esteru cu tutta la fhamigghjia sua.
Puru la fhamigghjia nostra, cuomu sai bene, misa radici nta sta terra e tu stessu, chi nescisti nta l’America e chi ti chjiami Peter Junior cu nu nomi americanizzatu, sini la conferma de quantu ti stajiu cuntandu.
De lu 1920 a lu 1940, cuomu si lejia supa li statistichi, emigraru verzu la Fhrancia e la Germania oltre Tri milioni de cristiani, pemmu occupanu posti de manud’opera comuni necessaria ncampagna, nta l’edia e nta l’industria.
Nta l’urtimu periodu chi riguarda l’anni 1945 fhina a lu 1970, de l’Italia verzu l’esteru emigraru sette milioni de cristiani (chistu dicianu l’esperti de lu settori).
Propi chistu è lu periodu de lu boom economicu nta l’Italia, cu li ricostruzioni de lu doppu guerra e cu li rpodotti ndustriali (machini, fhrigorifheri, ecc) prodotti tutti a lu nord.
Stu cambiamientu economicu stravorgiru la vita de paisi, duva tutti si sonnavanu mu lavoranu a la FIAT, mu emigranu nta lu Piemonti e mu lavoranu nta l’industria, accaparrati de ncunu chi lu fhacìa mu fhatiga cuomu no’ fatigava cchjiù de tiempu, ed’essera accussì pagati a fini misi cuomu mai potìa succedira nta lu paisi sua.
 
 
 La emigrazioni comunque no’ si fherma e si continua ad’emigrara verzu l’Argentina, ralia e lu Venezuela oltre ca emigrara verzu la Svizzara, la Germania e la Fhrancia. Ncunu emigràu puru nta lu Belgiu, mu fhatiga nta li minieri, ma quandu 136 minaturi Italiani moriru sutta terra nta lu 1956, ognunu, prima mu emigra nta lu Belgiu, nci penzava supa migghi vuoti.
Nta l’America no’ si smettìu mai de jira puru ca li cristiani chi decidianu mu van unta sta terra diminuiru tantu. Si chista era la situazioni chi riguardava l’emigrazioni e chi li libbra specializzati descrivanu, a chista restanu ligati certi aspetti de vita paisana chi pe’ mportanza e pe’ particolarità, vuogghjiu nta ncunu modu mu ti cuntu. Tutti l’emigrati, e no’ sulu curinghisi, si trovavanu de suli nta na terra nova, cu l’unicu ligagghjiu a la fhamigghjia d’origini fhattu sulu de littari chi arrivavanu e partianu de l’America e pe’ l’America. La ricerca de na Mugghjiera e de na cumpagna pe’ tutta la vita nta n’ambieti nuovu, chi parra na lingua diverza de la tua e duva l’abitudini de vita sunu tutti diverzi, diventava difficili e quasi mpossibili, accussì tornavanu a menta li vicini de casa, li fhimmini chi piacianu prima ancora mu si parta, e arriedi suggerimenti de li genitori, cumbincianu a la longa st’emigrati mu si spusanu pe’ procura, affruntandu tutti li rischi chi chistu potìa cumportara. Accussì, cu li littari cominciaru a viaggiara fhotografì de fhimmini chi potìanu essera possibili fhuturi mugghjieri pe’ li fhigghj emigrati, e tra na littara chi partìa e na littara chi arrivava, si cominciava a penzara a na vita passata assiemi cu na fhimmina riportata supa sti fotografì, chi eranu pur una cumpagnia pe’ cui era abituatu mu stacia de’ sulu.
Ncunu cuntava:
“Quandu arrivau chiggha fhotografhìa de lu paisi, dissi subbitu de sì, ca jia bene chista e la certizza ca si trattava de na bona fhigghjiola mi la dunava la provenienza, pecchì sapìa ca lu paisi mio era abitatu de bravi perzuni, de fhimmini onorati e rispettati e de onesti lavoraturi.
Eranu sempre fotografì chi, purtroppu non’avìanu lu poteri mu fhanu capiscira lu caratteri de la perzuna riportata, ma nonostanti tuttu, si rescìa a distanza mu si concorda nu matrimoniu chi doppu tiempu avìa fhattu ncuntrara li dui distinati.
A matrimuoni celebratu, lu maritu mandava l’attu de richiamu pe’ la mugghjiera prumisa, ed’era nu matrimuoni fhattu a lu scuru, cu tutti li possibili rischi de scumbinamientu pecchì li zziti, no’ s’avìanu mai canusciutu prima ma, nonostanti chistu, li matrimuoni accussì cumbinati, rescìanu lu stessu ed’avìanu lunga durata.
Certi vuoti supa la serietà de la fhimmina suggerita cuomu sposa, si fhidava supa la parola e supa la fhiducia de cui, la realtà fhamiliari l’avìa semplicemente seguitasenza mu l’avia mai vivuta.
Era la serietà de la fhamigghjia e la cunzapevolezza c anta lu paisi, rari eranu li situazioni de cui no’ si potìa e no’avìa mu si fhida de na cotrara pecchì tutti li fhimmini, senza nuggha distinzioni, a modu propriu e pe’ avìra vivutu nta sta comunità, garantìanu a modu loru la serietà e la purezza.
Era lu periodu de li Matrimuoni pe’ procura, na pratica diffusa e dovuta all’emigrazioni chi, fina a l’anni ’50 – ’60, cuomu ti dissi, colpìu l’Italia e a cui mancu curnga rescìu pemmu sfuggia.
Si trattava de nu veru e propi Matrimuoni chi venìa celebratu nta lu paisi de origini e nta chistu registratu. Nta la chjiesa lu prieviti celebrava la fhunzioni cu la sposa vetuta de jiancu, mentre a lu postu de lu sposu nc’era n’amicu de fhiducia o nu parenti strittu, de solitu lu patra de lu sposu, e seguìa na fhesta fhatta ncasa.
Tutti li parienti, li vicini de casa e tutti li mbitati presenti, si ritrovavanu pe’ conzumara nu durci, nu biccherinu de liquori o nu bicchjieri de vinu accumpagnatu de na Nicatula chi no’ mancau mai nta li Matrimuoni curinghisi. Fhinuta la cirimuona, si penzava subitu lu jiuornu doppu mu si preparanu li carti pe’ l’espatriu e mu si spediscia via mara, lu famosu Bauli chi contenìa, oltre a l’abitu de sposa, tuttu lu corredu avutu ndota de la fhamigghjia.
Quandu li sposi si congiungianu, avìanu mu si fhanu li fotografì pemmu nci li mandanu a li parienti, cu la sposa chi si mentìa n’attra vora l’abitu jiancu de zzita, oppuru nu velu jiancu, pemmu si riviva, armenu pe’ nu momentu, l’allegrizza de quandu unu si spusa.
Era nu fotomontaggiu fhattu de li fhotografi de lu tiempu chi mentìa li dui sposi, unu vicinu all’attru, chi rendianu cuntienti li genitori chi la ricivianu.
Pur unta curnga nci sunu stori de perzuni chi si spusaru pe’ procura e chi camparu fhelici e cuntienti pe’ tutta la vita.
Quantu fhimmini chi camparu sempre all’umbra de nu campanili de chjiesa, chi fatigavanu sempre timorati de Ddio, portandu avanti lavori pisanti de campagna e de normali vita fhamiliari, vivuta mpovertà cu li propri genitori scegghjiru mu si spusanu pe’ procura?
Quantu fhimmini spusati a nu maritu emigratu sopportaru li difficoltà de lu viaggiu, cu figghjiuoli arriedi, pemmu arrivanu nta l’America pemmu si jiungianu n’attra vota cu li mariti?
Fhuru tanti, puru ca a nui ojia ni sembra na cosa triste de vita pecchì mpratica, mu ti spusi cu cui no’ canusci, è sicuramente nu rischjiu de vita.
N’attra tessera de jiungira a lu mosaicu:
Lu Rioggiaru de Sutta la Via
 
De quantu ti cuntai fhina a mmò, capiscisti sicuramenta ca ogni storia de ogni perzunaggiu, esta na tessera de lu mosaicu chi stacimu cercandu mu ricostruimu.
Scoprimu accussina lu modu de campara de li perzuni chi ni precediru, nta quala difficoltà campavanu e quala problemi avìanu de superara jiuornu pe’ jiuornu sperandu mu puonu arrivara a la jiornata successiva e campara cchjiùaluongu possibili.
Vena accussì fhora la storia vera de sta comunità, no’ sulu chiggha chi vitta tanti eroi chi si sacrifhicaru pe la patria, ma puru chiggha de perzuni normali chi fatigaru e sacrifhicaru la vita luoru rendiendu redditizia l’attività artigianali chi svolgianu e ogni lavoru de igghi fhattu nta ogni angulu de terra chi circonda lu paisi produciendi nta chisti ogni bena de Ddio de cui s’alimentavanu jiuornu doppu jiuornu. Na comunità caratterizzata de la fhatiga decui nugghu penzau mai mu si tira arriedi, e l’attivtà eranu tanti e si svolgianu nta putifhi chi si trovavanu sempre o quasi sempra supra la strata principali chi attraverzava l’interu paisi.
Corsu Garibaldi, Via Roma, Gurniegghi, Via Nazionali, lu Spizzu, la Petrachjiana, Santu Ruoccu, Rivenzinu, la Ndolerata e tutti l’attri carrieri restanti, eranu chjini d’attività e no’ nc’era catuojiu chi non’ospitavaarmenu nu Tilaru duva fhimmini chi tessianu passavanu jiornati interi portandu avanti la fhatiga luoru.
Quandu potianu si mentianu nta li strati principali delu paisi nmodu mu dunanu cchjiùvisibilità a laputifha luoru, pecchì la rendìa cchjiù popolari tra li perzuni de lu paisi ed’era cchjiù fhacili trovara lavoru rispettu a n’attra attività guala chi si trovava magari nta nu viculu nternu de lu paisi. Tra Fhorgiari, Fhalignami, Scarpari, Custurieri, Tessitrici e . . . attru, chi già a matinata comincìanu mu fhatiganu nta la putifha, li strati principali delu paisi eranu trafficati e popolati de gienti ndaffarati ntenti mu portanu avanti lu mistieri luoru.
Ogni fhatiga venìa scanditu de li rintocchi de la campana de lu riuoggiu de la chjiesa matra chi, ogni quartu d’ura, e pe tutti li vintiquattr’uri de la jiornata, cu rintocchi cchjiù fuorti pe’ l’uri e menu fhuorti peli minuti, annunciava l’ura de la jiornata a tutti l’abitanti. Mpratica, lu Matutinu e lu Vespru stabilianu, pe’ quasi tutti l’attività, l’iniziu e la fhini de la jiornata lavorativa, e lu riuoggiu de la Chiesa scandìa l’operatu de li perzuni pecchì, nmassima parti, nugghu havìa lu riuoggiu a lu puzzu.
Nta li campagni e senza riuoggiu, ogni fasi lavorativa seguìa la posizioni de lu sula nta lu cielu o la ntensità de la luci o, la necessità mu si menta ncuna cosa sutta li dienti pemmu si placa la fhami, e nta sti casi volìa dira ca si mbivinava menzijiuornu.
 Nta li casi, li uri venianu segnati de svegli troppu rumorusi, cu nu Tic – Tac chi si sentìa deogni puntuni de la casa e. . . de la carrera vicina, e la sveglia matutina era ngradu mu risbigghjia l’interu vicinatu, sensa ca pe’ chistu rumuri, li gienti si lamentavanu. Nc’eranu li fhamigghji benestanti chi havìanu lu riuoggiu a pendulu mpendutu a nu muru nta la casa e, lu capu fhamigghjia, havìa lu riuoggiu de taschinu ligatu cu na catineggha, de uoru o d’argientu, a nu passanti de li cavuzzi o a n’ogghjiellu de gilè. Nonostanti no’ nc’eranu tanti rioggia, nu rioggiaru, nu certu Brunu Villella, fhatigava de stu mistieri nta nu scantinatu sutta la via. Chistu, sistemava svegli chi no’ jianu buoni e chi spessu si fhermavanu senza n’apparenti motivu, oppuru jianu troppu avanti o troppu arriedi cumpundiendu completamente l’ura de la jiornata. Era necessariu nta sti casi, l’aiutu e l’opera de lu rioggiaru. Villelli era bravu nta stu mistieri pecchì, volenta o nolenta, rescìa sempre mu menta a postu li rioggia o li svegli de li gienti, era tantu bravu, tantu chi de tutti venìa ricordatu cuomu “lu profhessori” de stu mistieri.
Puru quandu venìa fhermatu pe’ li strati, era sempre prontu e ngradu mu preveda lu difhettu de nu riuoggiu o de na sbeglia guasta.
Dicìa sempre, o quasi sempre: “è certamente lu bilancieri”, e no’ nc’eranu attri tipi de guasti diverzi de chigghu pronosticatu de don Brunu Villelli.
Ti sembrerà certamenta stranu, ma de lu riuoggiu de la chjiesa chi scandìa ognu quartu d’ura lu passara de lu tiempu, derivava nu jiuocu, chjiamatu propriu “jiuocu de lu riuoggiu”, chi era usatu deli giuvini de chigghi anni e chi mo’, è scordatu de tutti.
Si jiocava soprattuttu nta l’anni ’50 – ’60 a la prajia de curnga, quandu li fhamigghji si trasferianu a mar anta capandi o barracchi, e si jiocava tra giovanotti e signorini vicini de barracca, ndudici perzuni (tanti quantu sunu l’uri de la jiornata), sedutiunu accantu all’attru nmodu de fhormara nu bellu circhjiu, e si chjiamavanu l’unu cu l’attru usandu lu numeru de l’ura chi a ognunu de igghi era statu assignatu.
Mpratica, si mentìa a dura prova l’attenzioni, la concentrazioni e la prontezza de riflessi de ognunu chi, nta nu qualsiasi istanti e nmodu casuali, potìa essere nterpellatu e chjiamatu ncausa mu rispunda cu lu numaru sua, rispundiendu e chjiamandu n’attru cumpagnu chi ritenìa ca nta chigghu momentu, era cchjiù distrattu de igghu.
Rispundìa. . . . “non’eranu le dui ma eranu li nove” e, cuomu risposta, si sentìa lu numaru nove chi cuntrabbattìa ‘stantaneamenta: “non’eranu li nove ma eranu. . . li dodici”.
A stu puntu, lu jiocaturi chi nterpretava li dudici, si no’ rispundìa ntiempu, pecchì magari stacìa guardandu la fhidanzata, o stacìa parrandu cu lu vicinu de postu, o pecchì era cuottu de suonnu, era costrettu, appojiatu cu li mani nterra, mu pista lu sederi supa la rina pe’ tanti vuoti quantu era la pena assignata riproducia chigghu chi lu riuoggiu de la chiesa fhacìa quandu eranu li dodici.
Era nu modu pe’ fara amicizia, mu si stacia assiemi e . . . pe’ fara capiscira a na fhigghjiola presente, o viceversa a nu cotraru presente, l’interessi chi havìanu l’unu nta li confronti de’ l’attru.
Eracertu ca ognunu richjiamava l’attenzioni dela perzuna nteressata mponiendu magari nu numaru fhacili d’eseguira si chista era eventualmenti distratta e no’ rispundìa.
Tuttu cu lu scopu mu espona menu possibili la “fhidanzata” nta esibizioni luonghi e faticusi, chi si esponìa a l’uocchji e all’attenzioni de tutti li partecipanti.
Si provava sempre, puru ca no’ nc’era motivu, nu minimu de gelusìa.
Potarissi penzara: “Jiuochi nfantili pe’ giuvini. . . ngenui e gnoranti”.
Fhorseè puru veru, ma si campava nmodu cchjiùserenu e genuinu.
 
La Libretta
(Quadernu mastru usatu pe’ la spisa)
 
Ca li Curinghisi fhuru sempre solidali l’unu cu l’attru è notu a tutti, ma no’ tutti si ricordanu de nu tipu de solidarietà chi consentìa a parecchi fhamigghji de lu postu mu campa serenamente senza mu sunu assillati de l’idea de chi, de cuomu e chi accattara pe’ mangiara duranti la jiornata.  Chigghu chi si portava de la campagna no’ bastava mu si mantena nfuorzi n’uomu de campagna, unu chi havìa mu zzappa de la matina a la sira o nu qualsiasi mastru de lavoru chi fussa.
E’veru ca fhilatiegghi, pana, salami, polli, gagghjni, alivi scacciati o nta la giarra, pipi nta lu cugniettu e attru, no’ mancavanu mai nta li casi de li curinghisi, ma era puru veru ca no’ tutti li jiuorni si potìa mangiara fhilatiegghi o sula verdura de campagna, o pana e suppressati, accussì cuomu non’era sempre possibili disponira de fharina pe’ fara pasta o fhilatiegghi, pecchì, no’ tutti havìanu li stessi possibilità economici.  
Era quindi necessariu accattara a la putifha ncunu generi alimentari diversu de chigghi chi si disponianu pemmu s’affronta la jiornata, puru pecchì de chisti, no nd’havìa semprea sufficienti. L’annati pua, no’ sempre eranu chjini e benevuli cu li perzuni, ma nc’eranu de superara li malannati, chigghji ‘ncui li fhrutti scarsijiavanu.
Nta sti casi, certi generi alimentari cuomu ad’esempiu la pasta o lu stessu pana, havìanu mu si accattanu a la putifha, e pe’ certi fhamigghji chistu no’ sempre era possibili pecchì sordi nd’havìa puocu e scarsijiavanu.
Pe’ suparara sti momenti de crisi li curinghisi usavanu la Libretta, nu quadernu nduplici copia cu la copertina nivura e lu bordu russu, supa a cui, jiuornu doppu jiuornu, lu negozianti, signava la spisa.
 
Tra li dui parti, nc’era n’impegnu fhattu cu na stritta de manu, e cu chista si mpegnava mu nci duna generi alimentari, cu la prumisa ca venìa pagatu pe’ tuttu chigghu chi conzumava, non’appena lu patruni o l’azienda duva fhatigava lu pagavanu.
Mpratica, quandu na fhimmina de casa jia a la putifha mu fhacia la spisa, no’ portava sordi appriessu pemmu paga, ma si portava la Libretta supa a cui venìanu annotati tutti li merci accattati.
Giorno 12-1-1957
N° 1 Kg de pasta Vermicelli       £ 120;
½ Kg de  fhormaggio £ 200;
…………………..
………………….
………………….
e accussì via diciendo.
 (li prezzi sunu chigghi de l’anni ’50 – ’60, quandu li cuosi eranu menu cari rispettu a chigghi de li tiempi nuostri, e pemmu ni rendimu cuntu basta penzara ca n’operaiu stipendiatu pigghjiava25/30.000 liri alu misi.
Lu giornali custava 20 liri, na Tazzina de cafhè £ 20, lu Pana 100/110 £ a lu Kg, lu Latta 75/80 £ a lu litru, la Pasta 130/140 £ lu Kg, la Carni 500/800 £ a lu Kg, lu Zzuccaru 275 liri a lu Kg, e la Benzina 116 £ lu litru). La lista de la spisa venìa trascritta nta l’identicu modu nta lu quadernu tenutu de lu putifharu nta lu cassettu, e la lista si scrivìa ogni vota che s’accattava ncuna cosa.
 No’ nc’eranu limitazioni supa all’usu de la libretta nta lu sensu ca si potìa usara ogni vota chi si volìa e cchjiùvuoti ntala stessa jiornata senza chi lu putifharu nda fhacissa nu problema. Lu prezzu de ogni singula cosa venìa trascrittu supa lalibretta assiemi a la data, lu generi deprodottu, lu quantitativu , accussì cuomu ojia vena riportatu supa nu scontrinu fhiscali rilasciatu de nu putifharu qualsiasi.
Certamente, l’usu de la libretta non’era na pratica legali, ma era supportata de quasi tutti li putifhari de lu paisi, e cu nda fhacìa usu, no’ portava nuggha virgogna pecchì sapìa ca a fhini misi potìa pagara tutti li diebita contratti.
Li cuosi riportati nta la libretta venìanu cunteggiati a fini misi, o a la data ncui mpiegati, operai, zzappaturi e artigiani venìanu pagati de li committenti.
A lu momentu de lu pagara, venìanu misi a confrontu li dui quaderni, e li cifri corrispundianu a la perfezioni, e venìanu pagati fhina all’urtimu centesimu de lu contraenti, serenamente e ringrazziandu l’amicu putifharu.
A operazioni conclusa, si salutavanu cu na stritta de manu, segnu de rinnovatu accordu supa lu rinnovamentu contrattuali de l’usu de la libretta.
De sti cuntratti nd’havìa tanti, e a mio ricordo, mai nesciru lizzi tra li contraentiì chigghu chi ven’a riportatu venìa pagatu fhina all’urtima lira e senza chi supa li prezzi segnati venìanu cunteggiati interessi o attru.
Cui, nta chigghu momentu no’ potìa pagara l’intera cifra conzumata, nci venìa concessa na proroga adeguata, fhina a quandu la somma no’ venìa completamente pagata.