Li tiempi cangiaru e. . . spariru li sapuri de na vota

Li tiempi cangiaru e. . . spariru li sapuri de na vota
 
Penzandu a tuttu chigghu chi ti cuntai e guardandu a cuomu cangìau e cuomu si trasformau stu paisi, mi sembra ca ti cuntài cuosi de terzu mundu, chi puocu hannu a chi fara cu sta vita fhrenetica e moderna chi ni travolgìu a tutti quanti.
Si sulu unu de l’antenati nuostri, chi campàu all’inizi de lu 1900 potarìa tornara pe’ nu momentu e potarìa vidira cuomu si trasformau e cuomu cangìaru li cuosi aiutati de sti nuovi tecnologii, restarìa sicuramenta ncredulu e atturrutu.
Tuttu chistu è chigghu chi tutti li generazionu fhuturi hanu mu subiscianu nta l’anni, e puru la generazioni nostra chi sto momenti li stacia viviendu, arriverà lu momentu ncui puru nui restamu stramangulati de l’innovazioni chi la scienza porta senza mu nci pua fhara nenta.
Mpenzabili li progressi chi si oteniru cu li telefhoni e cu li computer, ma soprattuttu lu puocu tiempu chi nci vo’ mu arrivi nta l’America o nta l’attru capu de lu mundu.
Si sunu cunpruntati cu li tiempi chi nci volìanu na vota, quandu s’emigrava nta l’America, sembranu ojia n’eternità, accussì cuomu li littari speduta pe’ via aerea chi nci mentìanu settimani prima mu arrivanu a lu destinatariu.
Ojia li notizi viaggianu all’istanti de nu capu all’attru de lu mundu, cu condizioni de vita chi, pe tuttu l’occidenti, raggiungìru livelli de progressu notevoli, duva li sforzi muscolari fhatti de l’uomu nta lu lavoru, sunu ormai quasi tutti fhatti de macchinari e jiuornu pe’ jiuornu vena sotituitu nta ogni tipu de fhatiga.
Nu paragoni cu li tiempi chi ti stajiu cuntandu, mi fhani penzara a tutti chigghi machini usati ojia nta l’agricoltura chi riduciru a lu minimu sia lu tiempu de lavoru ca li costi de produzioni, e a la ndustrializzazioni de ogni cosa, duva l’uomu esta sulu la menta chi organizza.
Nu sulu trattori chi no’ sulu lavura ettari de terra ma provìda mu chjianta, mu simina e mu ricogghjia, quandu lu fhruttu chi si chjiantau o si siminau arrivau mu matura.
No’ nc’è cchjiù chiggha fhila de uomini chi a peda o ncavagghu, cu zzappi e fhoccigghjia jienu jiusu mu puonu siminara o metìra accussì cuomu fhacìanu a li tiempi mia, ma lavoru de trattori, de aratri, de scuotitori, de fhalciatrici, mballatrici e mietitrebbi chi, guidati de l’uomu e de suli, nta puocu tiempu ti dunanu già lu fhruttu lavuratu.
Tutti chigghi fhimmini de cui ti parrai, chi cu lu scuru jianu nta campuluongu mu cogghjianu l’alivi de lu patruni, ojia sunu sotituiti de scuotituri chi scotulanu, ricogghjianu, mentanu nta gabbietti e certi vuoti macinanu dirattamenta l’alivi appena cogghjiuti, aumentandu sia li quantità de alivi cogghjiuti ca la qualità de l’uogghjiu chi si producia.
De quantu attri cuosi ti potarìa ojia parrara chi riduciru a lu minimu li sforzi de l’uomu e chi spessu, non’è chiù sforzu fhisicu ma sulu mentali?
Sunu sicuramenta tanti e tutti dovuti a lu progressu e li nuovi scoperti fhatti de l’uomu de st’urtimi generazioni chi si potta dedicara de cchjiù a lu studiu e a la ricerca. Tuttu è dovutu a lu progressu e a la scoperta, e cu chisti, miglioramenti, progressu e stara miegghjiu pe tutti li perzuni.
Nuovi scoperti, nuovi ritrovati, nuovi strumenti de lavoru cu conseguenti risparmiu de tiempu chi po’ essare usatu mu si studia de cchjiù e mu si viaggia e mu si diverta scopriendu nuovi mundi e nuovi ritrovati.
Si tutti sti progressi sunu evidenti e no’ si puonu nemmenu negara, è veru puru ca cu chisti cangiaru puru l’abitudini chi de tiempu ti stajiu parrandu.
Spariru tutti chigghi sapuri e chigghi adduri de na vota, e puru ca sti tiempi moderni ni proponanu supermercati cu tanta arrobba, bella sulu mu si vida pecchì si pruovi mu ti li mangi non’hanu sapuri, soprattuttu pe’ chigghi chi cuomu mia, provaru ngioventù attri sapuri.
De ricanuscìra ca tuttu subìu trasformazioni ma, subìu soprattuttu produzioni ndustriali, lavurando ncontinuazioni nmodu mu si producia de cchjiù e quantità mpenzabili chi venanu pua misi sutta vuotu e nta busti sigillati nmodu mu conservanu la fhragranza de lu prodottu lavuratu.
Certi vuoti . . . nci rescianu, ma lu sapuri, l’adduru e lu gustu de na vota, scumpariru completamenta ed’è difficili mu si riassapura.
Ricuordu cu tanta nostalgìa tutti chigghi cunziervi, a prima vista fhacili de riproducira ma chi riprodotti ojia usandu nuovi tecnichi, no’ conzervanu cchjiù la qualità de na vota, soprattuttu pe li modi e pe l’ingredienti jiungiuti, chi non’hanu cchjiù chigghi caratteristichi.
Pe’ dira: Alivi Grechi, Agghjiu Spaguolu, Ariganu Cecenu, Pipariegghi Messicani, Arangi de lu Portogallu, Malangiani Cinesi, Fhungi de la Croazia e. . . tanti attri cuosi chi arrivanu sempre de l’esteru, chi sostituiru li cuosi nuostri e chi de chisti non’hannu cchjiù chigghi sapuri genuini. L’arrobba nostrana era n’attra cosa.
No’ sulu stu cangiamientu de prodotti, ma puru lu modu adoperatu pemmu si fhanu subìru trasformazioni chi, ligati a lu guadagnu de tiempu e a li quantitativi chi si producianu pe esigenzi de commerciu, fhiciaru scordara tutti chigghi operazioni chi li fhimmini de casa nostrani fhacianu a manu.
Sti fhimmini, nsilenziu, cu amuri e disponiendu de tuttu lu tiempu possibili necessariu mu s’ottena na bona cunzerva, nci mentìanu la massima attenzioni, guardandu soprattuttu a li fhasi lunari de Manzanza nta li vari periodi chi si fhacìanu chisti operazioni.
Ed’era na bona cosa pecchì, si no’ benìa rispettata la mancanza, l’alivi de la giarra venìanu muogghi, lu Pana ammuffava, la giardiniera no’ si potìa mangiara e accussì diciendu.
Mu ti fhazzu capiscira ca li cuosi tracangiaru, mi limitu mu ti cuntu una ma potarianu essere migghj stuori, ligati propi a li cuosi chiù semplici chi facìanu parti de l’alimentazioni basilari de li perzuni e chi sullevaru tanti gienti de la fhami, sia prima ca doppu la guerra.
Cominciu mu ti parru de n’alimentu cuomu li scadi, e pua ti parru de na cosa cchjiù mportanti cuomu lu pana, li sozzizza, li suppressati, la fhrutta e li verduri vari.
Li Scadi o li Fhomici così cuomu veniu no e venanu chjiamati ndialettu nostranu, fhuru ma risorza mportanti pe’ la maggior parti de li fhamigghji curinghisi, tantu chi parecchi, si affittavanu li Fhicari de li Livariegghi, stimati de nu peritu de parti, chi stabilìa lu prezzu de pagara.
Tutti jianu a li Fhicari de li Livariegghi, mu cogghjianu fhicu e mu hganu scadi cu li fhicu de li Livariegghi, località chjiamata de stu modu pecchì lu terrenu era fhattu soprattuttu de rina e pe chistu no’ facìa mu criscianu nmodu adeguatu li livari gghà chjiantati.
Li fhicu erano però li miegghjiu chi nc’eranu nta lu circondariu, duci cuomu mela e cchjiù sapuriti de tutti l’attri chi arrivavanu de attri posti de lu paisi, fhorzi pecchì la terra era fhatta de vricciu de fhjiumara.
 E nta l’estati, periodu quandu maturanu li fhicu, nc’era nu via vai de “de li fhicari de li Livariegghi”, mu si preparanu li Cannizza pemmu si puonu amprara li fhicu tagghjiati a dui sutta lu sula liuni.
Mi ricuordu chigghi perzuni chi costruianu li Cannizza, chi doppu chi avìanu cogghjiutu nu mazzu de Canni nta Sambuni, postu duve criscianu e abbundavanu, seduti supa lu scaluni de casa o ncampagna supa nu sgabellu de lignu fhattu de igghi stessi, chi annettavanu canni, li spaccavanu a quattru e li ntrecciavanu ca tanta maestrìa.
 
Supa sti Cannizza venìanu asciucati li fhicu accussì cuomu si siccavanu li pumadora a provuliegghu, quandu venìanu tagghjiati a dui e cacciata la simenta, ma nta certi casi venìanu puru usati mu s’alleva lu Bacu de Sita, e Curnga, nta attri tiempi era fhamosa puru pe’ chistu tipu d’allevamentu.
 
Venìanu appojiati supa a quattru fhurchi nmodu nommu vanu li licierti o attri muscagghjiuni ma s’appojianu de supra.
Li Cannizza, fhissati de stu modu e izzati de nterra, fhacìanu siccara li fhicu abbastanza priestu pecchì eranu ventilati puru de sutta.
E la gente era abbarundata mu ndacca, mu stenda e mu cogghjia scadi pecchì la stagioni era longa e li fhicu maturavanu momentu doppu momentu e jiornata doppu jiornata.
Li quantitativi non’eranu mai puocu anzi, nta ogni casa nc’era lu casciuni de li scadi, na cascia randa tutta chjina de scadi chi contenìa li scadi pe’ tuttu la vernata.
Li scadi eranu tantu mportanti chi li mugghjieri e li mammi de fhamigghjia, mentre preparavanu lu serviettu de lavoru, chigghu chi li mariti o li fhigghji nta l’età de fhatiga si portavanu supa lu lavoru, jiungianu sempre nu pugnu o dui de scadi assiemi a l’attru cumpanaticu. Spessu nci inghjianu puru li taschi de li cavuzzi de fhatiga.
Lu cumpara mio dicìa sempre: na scada misa nta la vucca mentre fhatìghi, ti fhà venìra cchjiù forza, ti renta cchjiù energicu e ti renda duci la vucca cuomu nuggh’attra cosa sa far anta sti momenti de fhatìga.
Ti dicu ancora de cchjiù, li mammi eranu accussì premurusi chi na jiunta o dui de scadi, nci la mentìanu sempre nta la Cartera de li fhigghji chi jianu a la scola.
Nta la cartera no’ nc’era sulu lu libru e li quaderni de scola ma nc’eranu puru li scadi chi eranu li Cingommi de na vota, necessari no’ sulu mu ti carmanu la fhami duranti li lezioni, ma pe’ fhara cchjiù amicizia cu li cumpagni de classi o cu l’attri fhigghjiuoli de attri classi pecchì si scangiavanu cuomu ojia si scangianu li fhigurini de li jiocaturi.
Si rigalavanu puru a chigghi chi no’ nd’avìanu o, si barattavanu cu chigghi chi l’avianu fhatti cu li nuci.
Chista eranu de cchjiù valori rispettu a chigghi tagghjiati a dui, accussì cuomu nc’eranu puru li scadi de fhicu nivuri, chi però eranu cchjiù rari.
Ojia, li scadi si producianu usandu l’Essiccaturi a colonna chi, nt ana sula operazioni, scarfandu e ventulijandu, nta lu giru de puocu tiempu, ti producia li scadi belli e pronti mu si mangianu.
No’ cchjiù Sula Liuni ma, ventilazioni ad’aria cavudda; chista è ojia la tecnica de produzioni moderna de li scadi.
Potarissi dira ca si tratta sempre de scadi, cioè de na cosa chi ojia sparìu quasi completamente de l’abitudini alimentari nostrani, pecchì lu gustu chi dunanu ojia la Nutella e li Merendini, fhiciaru sparira completamente chigghu de li scadi.
Propi pecchì vuogghjiu mu capisci puru tu ca chigghu chi ti stajiu diciendu è verità, ti fhazzu mo’ attri esempi de sapuri perduti de alimenti chi sunu ndispenzabili pe’ lu mangiara de l’uomu.
 Mi rifherisciu ad’esempiu a lu pana, chi ojia no’ si rescia mu s’apprezza ne’ adduru e ne’ sapuri, si no’ ca nta puocu occasioni e sulu pe’ chigghji chi fanu ancora lu pana usandu lu fhurnu a ligna.
Nu paninu o nu fhiloni de pana accattatu ojia a qualunque putifha, hai mu lu cunzumi subitu, nta la stessa jiornata pecchì, si ti nda resta pe lu jiuornu doppu, lu pua sulu grattara pe’ ncuna cotuletta ca no’ ti lu puà cchjiù mangiara tantu diventa tuostu.
N’attra cosa eranu li fhurnati de pana chi facìanu li fhimmuni de casa de na vota, chi usavanu fharina appena macinata a lu mulinu de Pruscinu, fhatta de ranu chi arrivava de la marina nostra, cuottu a lu fhurnu a ligna chi ogni casa de lu paisi avìa e chi durava e si cunservava manteniendu tutta la fhragranza pe’ armenu quindici jiuorni, senza perdira nu minimu de sapuri.
Era na produzioni a longa conservazioni senza usara medicini particulari o strategì complicati.
Jia, mbeci, li panini mpurnati perdanu la fhragranza doppu puocu uri e diventanu duri chi sunu buoni sulu cuomu munizioni de difhesa cuntra a ncunu nimicu.
Potarìa continuara l’elencu de sapuri ormai perduti parrandu de virdura e frutta chi pe chisti, si spenda ojia cchjiù de medicinali pe li parassiti ca de fhatiga mu si portanu a na sana maturazioni.
No’ vuogghjiu mancu mu ti parru de li Suppressati e de li Capicoggha a cui li fhimmini dedicavanu tutta la bravura e la competenza manuali, produciendu a la fhini suppressati chi, sulu cu l’adduru, ti sazzijiavanu.
Spariru ormai de lu tuttu chigghi Suppressati cunzervati sutt’uogghjiu o sutta la cinnara chi quandu l’affettavi cacciavanu la lacrima e profhumavanu chi ti fhacìanu venira subitu l’acquolina nta la vucca.
Duva jiru a finira chigghi fhilara de sozzizza, suppressati e mangulari salati, mpenduti a li pierci nta la cucina e affumicati cu luci de canni o de fraschi virdi, oppuru chigghi gambuni mangiati a la sira cu l’amici davanti a nu bicchieri de vinu?
Puru ojia li truovi li suppressati a lu supermercatu, ma no’ sunu fhatti cchjiù a manu ma cu l’asciucamientu artifhiciali e misi sutta vuotu, nta busti de plastica trasparenti, chi preservanu l’igieni de lu prodottu, ma perdiendu de lu stessu tutta la fhragranza e lu sapuri caratteristicu.
Prova ojia mu conzervi nta lu fhrigorifaru, pe’ nu paru de jiuorni la virdura chi accatti a lu supermercatu, quandu vai mu la pigghji la truovi certamenta mpradiciuta pe’ cchjiù de la mità, ed’hai mu la jietti nta la spazzatura pecchì li medicinali usati pe’ conservanti, hanu puru igghi na determinata durata e, fhinuta chista, tuttu si mpracida.
 
A stu puntu hai mu ti cumbinci puru tu ca no’ nci po’ essere confrontu tra chigghu chi si producìa na vota e chigghu chi si producia ojia riferitu a li prodotti alimentari, pecchì lu confrontu no’ po’ reggìra assolutamenta, soprattuttu si si cunfruntanu li sapuri o l’adduri.
De ricanuscìra ad’ogni casu a sti tiempi moderni, lu progressu dovutu a l’evoluzioni de la tecnologia e sunu li buoni venuti a tutti chigghi chi portanu aggiovamienti a la vita sociali e civili.
La elettronica no’ trova e no’ po’ trovara raffrontu cu li tiempi de cui stacimu parrandu de tiempu, pecchì si era sulu a l’inizi de sta scienza; accussì pe’ chiggha chi riguarda la meccanica e chi nci fhornìu all’uomu tutta na serie de macchinari chi lu sostituiru quasi completamenta nta l’opera manuali.
Lu rimpiantu, non’è pe’ lu progressu chi arriva e chi cangia e porta sempre cuosi buoni, ma semmai pe’ li sapuri, li profhumi e tutti chigghi delizi chi, purtroppu. . . no’ si vidanu e si santanu cchjiù.
 
Cangiaru puru li gruppi de associazioni.
 
Ca lu progressu e l’evoluzioni chi si verifhicaru nta st’urtimi tiempi e chi superaru ogni limiti immagginabili, è palìsi e resta sutta l’uogghji de tutti.
Ti dissi già ca chistu è benvenutu si esta rivoltu a lu miglioramentu de la vita umana civili e sociali, pecchì ojia ad’esempiu cu nu computer e na connessioni a Internet, cuomu spessu verifhicammi puru nui, consentunu soluzioni de problemi chi mai prima de ojia era pensabili immagginara. 
E’ ricanusciutu de tutti ojia ca nu computer vena applicatu cu ottimi risultati nta tuttu lu mundu scientificu, ma restandu cu li piedi nterra e nta li cuosi chi ti stajiu cuntandu, ti dicu ca ndagandu cu st’aggeggiu, scoprimmi parecchi cuosi chi riguardanu lu paisi de curnga, duva io passai tutta la vita mia de cotraru, e tu, niputi mio, mi sini testimuoni pecchì tantu m’ajiutasti quandu ierumu nta l’America.
Cu lu computer, tuttu sembra fhattu de nenta, ma diventa ncuna cosa riali quandu la notizia trovata e chi interessa, si stampa supa a nu piezzu de carta e si trasforma nmodu mu si po’ lejira e studiara e mu si po’ approfhondira la canuscenza de la cosa stessa.
Chistu fhicìmu, si ti ricuordi, quandu ierumu luntani de stu paisi, pecchì ndagammi e cercammi assiemi notizi chi, pe mia, servianu pemmu annulu lu tiempu chi stitti luntanu de lu paisi mio, provandu mu scrivu lu nomi de curnga supa nu motori de ricerca, accussì cuomu venanu chjiamati, e scoprivi tutta la vitalità chi caratterizzau e chi caratterizza ancora sta comunità.
Riscoprivi certi risvolti de vita sociali e de paisi chi, nta mia, de tiempu s’eranu addormentati, e lu puotti fhara collegandomi cu lu computer mio a li siti de li gruppi associativi chi nci sunu nta curnga.
Lejiendu li vari notizi supa li manifhestazioni chi, misi doppu misi e annu doppu annu si svolgianu e si portanu avanti nta curnga, mi tornaru a menta tanti attri cuosi chi vuogghjiu ancora mu ti cuntu, senza pe chistu, volìra sopraffara l’operatu de sti gruppi, chi è sempre nu fhattu buonu quandu arriva de nu spontaniu volontariatu, utili mu si ricordanu fhatti e immaggini de attri tiempi.
Cu n’indagini accurata supa li gruppi chi operanu nta curnga, scoprivi ca nta stu paisi esistanu e lavoranu tanti associazioni chi, pe’ quantu mi riguarda, sunu de nova istituzioni e chi si affiancanu a chigghi gruppi storici chi già esistianu o. . .chigghj chi già esistiru e scumpariru.
Nci sunu o nci fhuru:
  1. Gruppi Storici religiosi: cuomu li Confraterniti la Mmaculata e de lu Carmelu;
  2. Gruppi religiosi derivati: cuomu lu Terz’ordine Carmelitanu e Fhranciscanu, lu gruppu de preghiera de Padre Pio, lu Volontariatu Vincenziano e Azioni Cattolica;
  • Gruppi de Solidarietà: viecchji cooperativi defhunti ormai de tiempo cuomu Unione e Lavoro, La Concordia, Ente comunali d’assistenza (chi dunau origini a la Casa de Riposu Maggiori Peruginu), ACLI, RCI, Croce Rossa, Laboratoriu Moietta, Fidapa e Associazioni Carabinieri mpensione;
  • Gruppi pe la difhesa de lu territoriu: Costa nostra e Vivi Acconia;
  • Gruppi musicali bandistici: Città de Curnga (Direttori prof. D. Furciniti), Giuseppe Verdi (Direttori prof. Maurizio Augruso), Francesco Currado (Direttori Maestru Vito Currado);
  • Gruppi de promozioni de lu postu: Associazioni pe’ Curnga, Pro Loco;
  • Gruppi Sportivi de vecchjia e de nova generazioni: Libertas Curinga, Nuova Curinga;
 
Cu molta probabilità, ncun’attru gruppo chi opera o chi operau nta curnga mi sfuggìu, ma sulu chigghi chi elencai sunu nu numaru consistenti e signifhicativu pe’ nu paisi chi ava sulu 6788 abitanti.
Onori e meritu ad’ognunu de chisti chi nsegua obiettivi ndirizzati tutti a lu benesseri de lu paisi de curnga.
Tra li gruppi storici nci sunu chigghi chi nescìru cu li chjiesi chi nci sunu nta curnga (Mmaculata e Carminu) e a chisti su’ ligati a doppiu fhilu.
A la chjiesa de la Mmaculata, è ligata la congrega omonima, chi sorgìu quandu sorgìu la chjiesa stessa (all’iniziu San Nicola), chi rasala a lu 1593 cu li successivi modifhichi e ristrutturazioni de l’anni 1661 e 1777.
La stessa cosa si po’ dira pe’ la Congrega de lu Carminu chi risala a l’origini de la chjiesa d’appartenenza 1652, quandu vinna postata la prima petra mu si costruiscia la chjiesa chi pua diventau Santuariu.
Li congregati, de l’una e de l’attra parti, operaru sempre cu Carità Cristiana, nta li confronti de lu prossimu e nmodu ncondizionatu verzu tutti ndistintamenta. Oparavanu pe’ lu bene de li consociati e de la comunità chi facìa capu a la chjiesa de appartenenza, cu nu Priuri elettu de li Fhratelli, e nu gruppu direttivu elettu puru igghu de li fhratelli scritti a la confraternita.
Mi ricuordu rivalità accaniti pe’ lu “primu postu” tra chisti dui gruppi storici chi, saprattutta nta l’anni ’40 e ’50, gareggiavanu mu preparanu la miegghjiu prigessuoni, magari cu cchjiù gienti rispettu a chiggha de l’avversari, e chi costituia orgogliu pe’ lu gruppu chi nci rescìa.
Rivalità chi portavanu a veri e propri inimicizi tra fhamigghji, cu ricaduta supa li cchjiù giuvini chi, no’ potìanu scegghjira mancu na fhidanzata chi appartenia a la congraga diversa de chiggha a cui appartenia la fhamigghjia sua.
Pe’ fortuna, tutti sti cuosi si verifhicavanu nta attri tiempi e no’ nta chisti moderni duva, addirittura, li congreghi si associanu e si scambianu fhavori nta la ricerca de na stessa unità religiosa.
A sti confraterniti e a li singuli chjiesi, sunu puru ligati li Gruppi de Terz’Ordini Carmilitanu e Fhranciscanu.
Si lu Priuri de la Congrega fhu sempre na fhigura maschili, nta li Terz’ordini Fhranciscanu o Carmilitanu chi fhussa, nci sunu mpravalenza fhiguri fhimminili, cu li stessi obiettivi de Carità Cristiana chi manifhestanu cu atteggiamenti de solidarietà verzu cui soffra de cchjiù e de cui cchjiù nd’ava bisuognu.
A chisti, nta li Prigessuoni, sunu misi nta nu spaziu a igghi dedicatu, chi precede lu santu, cu la Priura chi porta lu stendardu chi rappresenta l’Ordini d’appartenenza.
 No’ su certu de menu li Gruppi de Preghiera de Padre Piu, de lu Volontariatu Vincenzianu, puru igghi chi si dedicanu cu Carità Cristiana verzu cui nd’ava cchjiù bisuognu.
Ti parrai recentemente de cooperativi chi si fhormaru nta curnga subbitu doppu l’urtima guerra, chi contribuiru no’ puocu mu miglioranu l’agricoltura e l’economia de sta comunità, fhorniendu propi chigghu chi necessitava mu si rendanu fhruttuosi chigghi tierri avuti cu dirittu de coltivazioni de li fhamigghji de zzappaturi curinghisi. La Banca de lu Ranu e la distribuzioni de l’utili guadagnati de chista cooperativa a tutti chigghi chi eranu scritti nra l’elencu de li povari, no’ fu’ puocu cosa anzi, va ricanusciutu tuttu lu meritu a tutti chigghi chi promoviru stu mezzu de solidarietà umana.
No’ vanu mancu scordati tutti chigghi perzuni chi, nvogliati de lu Maggiori Peruginu e arriedi la rendita de igghu dunata, fhiciaru costruira la Casa de Riposu chi esta ojia fhjiuri all’occhjiellu pe’ sta comunità.
Na citazioni particolari merita sta Casa de Riposu Maggiori Peruginu, pecchì dunau confortu e speranza a tutti chigghi perzuni ormai randi, cu la possibilità mu stanu assiemi e mu socializzanu cu tutta l’assistenza igienica e medica possibili.
N’attru gruppu chi sorgìu verzu la fhini de l’anni ’50, fhù chigghu de l’ACLI, nu gruppu politicu-ricreativu de tendenza democristiana, chi nci fhornìa a li lavoratori la possibilità mu jiocanu a li carti nta nu postu diversu de lu Bar duva, quasi tutti, jiocavanu pe’ abitudini. Accussì cuomu nescìu lu circulu de l’ACLI, a lu stessu modu, doppu puocu tiempu nescìu l’ARCI, de tendenzi politichi opposti, chi tentava mu ndirizza l’interessi e l’impegnu de li giovanotti verzu ncuna cosa cchjiù utili pe’ igghi stessi e guardara cu cchjiù nteressi a lu fhuturu. No’ na vita fhatta sulu de passijiati avanti e arriedi supa lu Corzu Garibaldi de Curnga, ma usu cchjiù miratu de lu tiempu libaru e de l’interessi chi ogni guagliuni manifhestava verzu lu mundu esternu.
Mi ricuordu riunioni chi duravanu nottati interi, supa li problemi politici e sociali de l’epoca, cu na perzuna chi venìa apposta de fhora, chi n’istruìa cu tuttu lu sapira e cu tutta l’esperienza chi avìa rispettu a nui chi, no’ sapiamu mancu chi stacìa succediendu nta lu mundu. Eranu li tiempi de De Gasperi, Nenni, Kennedy, Papa Giovanni, Berlinguer ecc., e avìra vissutu chiggh’anni, fhicia criscira nta nui giuvini na conzapevolezza utili a tutti mu diventamu uomini prima ancora mu arriva l’età mu potìamu diventara.
Li problemi eranu tanti e li rivalità tra fazioni politici opposti ancora de cchjiù, cu nu marchjiu de appartenenza chi ognunu si portava arriedi fhina a la morta.
La fhorza, era lu potere politicu, ed’era stu potere chi comandava e dicidìa chi fara e duva fhara, e a dimostrazioni ca lu populu no’ cuntava nenta, restanu li scioperi fhatti pe’ la scelta de la sede Universitaria nta la Calabria, chi avìa mu era nta la chjiana de Sant’Eufemia e chi ambeci si la portaru nta li muntagni de Cosenza.
Si gridava “A lu Postu Giustu”, ed’era lu slogan de li manifhestazioni de’ chjiazza. All’epoca era Ministru Riccardu Misasi, unu chi nescìu nta Cosenza, e fhu pe’ igghu cchjiù facili mu la dirotta nta Cosenza, quandu la chjiana de Sant’eufhemia era ancora vergini, no’ nc’era costruitu nenta.
Penzaru mu accuntentanu li gienti costruiendu la SIR propi a lu postu duva avìa mu sorgia l’Università.
La smuntaru de nta la Sardegna e la muntaru cca nui, assumiendu tanta genta chi però, misaru subitu ncassa integrazioni.
No’ funzionau mai unu chi fussa unu sulu repartu eppuru, avìanu costruitu capannani, recintatu tutta l’aria riservata, fhiciaru dui ciminieri, costruiru lu pontili ma, de li ciminieri no’ nescìu mai nu rivulu de fhumu.
Abbandunaru tuttu e. . . subitu, e misuru tutti chigghi chi havìanu speratu ca havìanu trovatu fhinarmenta nu postu de lavoru sicuru, ncassa integrazioni, paganduli senza mu fhanu nenta. “Genta assistuta senza mancu mu fhatiga”. Tanta speranza chi sfumau nta nenta.  Lu piejiu de tutta sta scena, fhu chigghu chi nci cumbinaru a li proprietari de chigghi tierri chi nci li espropriaru cuomu beni de pubblica utilità “pe’ na mangiata de pipi”. Eranu li terreni duva si producìa qualsiasi tipu d’ortaggiu, ma soprattutta si chjiantavanu Bietuli, puru quandu lu Zzuccarifhiciu de Sant’Eufhemia chjiusa defhinitivamenta.
Lu povaru cumpara mio, zzappaturi e proprietariu de la terra chi nci espropriaru dicìa:
chigghu chi mi dunaru pe’ metru quatratu de terra, io lu fhacìa chjiantandu nta lu stessu quattru lattuchi chi maturavanu nta quindici jiuorni”.
 
Chistu, pemmu ti fhazzu capiscìra la cifra chi nci pottaru dunara pemmu s’impossessanu de tutti sti tierri.
Ojia ni trovamu cu la cchjiù mportanti Università de la Calabria chi si trova a Rende de Cosenza, nta orrendi cubi e nta nu postu chi è difficili puru mu s’arriva quandu lu tiempu non’è buonu.
Ndialettu dicimu: “non’arrivanu mancu li passari”.
 
Na bella cosa è ojia la presenza de la Croce Rossa nta Curnga, fhatta de profhessionisti chi si dedicanu a la comunità, operandu nta st’importanti servizzu sociali.
Na presenza costanti supa a tuttu lu territoriu, ma puru quandu nci sunu manifhestazioni nta la chjiazza, garantiendu presenza e assistenza de miedici qualifhicati.
Non’è menu mportanti lu gruppu chi costituiscia lu Laboratoriu Moietta, chi si proponanu jiuornu pe’ jiuornu, obiettivi de solidarietà verzu cui nd’ava de chjiù bisuognu, passandu assiemi tuttu lu tiempu libaru de cui disponanu.
De notizi lijiuti supa internet e de costatazioni personali diretti, lu Gruppu chi fhicia e sta faciendu de cchjiù nta Curnga, è sicuramenta l’Associazioni pe’ Curnga, cu tutti li manifhestazioni estivi chi, annu doppu annu, stannu diventandu na vera e propria tradizioni criandu nu movimentu de gienti chi mai s’era vistu nta lu paisi.
Lu premiu Città de Curinga, Vicoli e Gusti, La Battola, Riscopri Curinga, Befana in Piazza e Calendario Curinghese, sunu sulu certi attività programmati e portati avanti de st’Associazioni chi popolanu li strati e li carrieri fhaciendu assapurara la vita e li sapuri de na vota.
Senza scordara la sirata dedicata e li “fhotografì de na vota” cu “Curinga mon amur” duva, nta lu passu, a nu schermu giganti si projiettanu tutti l’immaggini de cuomu ieramu, tantu graditu a li viecchj generazioni.
Puru la Pro Loco si duna de fhara, soprattuttu d’estati programmandu Tiatru mpiazza e Musica nmodu de fhara socializzara sempre cchjiù li curinghisi, compresi chigghji chi venanu de fhora.
Li Bandi musicali presenti nta curnga ormai de tradizioni centenaria, fhanu tutta na storia a parti.
La Banda Franciscu Curradu, la cchjiù vecchjia tra chigghi esistenti nta curnga, vivva ripigghjiata e portata avanti de lu Maestru Vitu Curradu chi, quandu s’esibiscia, ottena sempra cchjiù conzenzi.
Nc’è pua la Banda Città de Curnga, chi fhù pe’ parecchiu tiempi la banda ricanusciuta ifficialmente de l’amministrazioni comunali.
La dirigia lu Maestru Fhurciniti, chi, nta l’anni, la persanalizzau sempre de cchjiù.
Pe’ urtimu la Banda Giuseppe Verdi chi la dirigia lu Maestru Mauriziu Augrusu, fhatta de cotrari talentuosi, chi sonandu marci cchjiù o menu canusciuti, rallegranu lu pubblicu presenta.
E’ inutili mu ti dicu ca tra sti vari gruppi bandistici, nta lu tentativu mu prevala una supa all’attra, nc’è sempre baruffa e mbidia, chi serva mu li cunducia mu fanu sempra miegghjiu.
Ognunu de chisti fhicia e sta faciendu ancora ojia tutta la parti sua, e menumala can ci sunu pecchì ognunu de chisti fhacia discutira supa li problemi de la comunità, pecchì puotti verifhicara de perzuna lu distaccu e l’incomprenzioni chi nc’esta tra lu populu e la chjiesa chi cunta.
Mi documentai e verificai c anta curnga, doppu chi morìu l’Acciprieviti Bonelli chi fhù lu 4-9-1984, nta la parrocchia s’avvicendaru nova Prieviti pemmu dicianu missa nta lu tiempu de vinticincu anni circa.
Li tiempi cangiaru veramenta, caru niputi mio, e chigghu chi la chjiesa de curnga subì unta st’urtimi tiempi, è assurdu vistu ca Donn’Antuoni fhù parrucu de stu paisi pe’ quarant’anni senza nu minimu de nterruzioni, e sta stu tiempu si preoccupau de tutti e fhicia pe’ tutti. Io mi criscivi sutta la dottrina sua, mi vitta nescìra, mi Vettijiau, mi preparau pe’ la Prima Comunioni, mi fhicia diventara sordatu de Cristu, mi aiutau pemmu emigru e mi seguiu ntuttu e pertuttu, accussì cuomu fhicia cu mia, fhicia cu tutti l’attri perzuni chi la curia nci affidau.
Tanti attrij li spusau puru e, purtroppu, a tanti attri nci dunau puru l’estrema unzioni, e nta sti casi, li paruoli chi dicìa eranu de ncorniciara, pecchì sapìa mu porta confortu a li fhamiliari e ricordava lu muortu cu paruoli santi esaltandu l’operatu nvita de lu defhuntu. Potarìa sembrara nsignifhicanti chigghu chi ti stajiu diciendu, ma mpratica ha mportanza e pisu, pecchì nu Parrucu de nu paisi, avarìa mu esta la guida spirituali de tutta la comunità, chigghu chi ndirizza li perzuni verzu lu bena, chigghu chi nci duna educazioni a li giuvini, chigghu chi jiungia li perzuni nta lu spiritu cristianu, chigghu chi smussa l’attriti de li vari ceti cociali, chigghu chi. . . moralizza tutti quanti, e nta curnga, tuttu chistu, si vitta sempre de cchjiù venira menu.
Certamenta chisti cuosi sunu lu pana quotidianu de lu Viscuvu chi dirigia la diocesi de appartenenza, ma propi pe’ chistu avarìa mu capiscia ca no’ si po’ mandara a lu sbandu n’interu paisi, spostandu e mpastandu a propriu piacimentu li carti ntavula, dassandu la comunità senza na guida spirituali sicura, senza nu rifherimentu certu, senza ncunu de cui ti pua fhidara cecamenta e nta cui sperara armenu nta la sarvezza spirituali.
Ti spiegu miegghjiu chista rabbia, accussì la pua capiscira puru tu cuomu la capiscivi io sentiendu dira ngiru quantu succediu doppu la morta de Donn’Antuoni Bonellu chi succedìu nta lu 1984.
Arrivaru unu de seguitu a n’attru:
  • Due Prieviti pe’ quasi n’anno (Don Enzo Puia e Don Mimmo Baldo fhina a Majiu 1985);
  • N’attra presenza pe’ puocu cchjiù de nu mis (Padre Bruno Costantino fhina a mità Giugnu 1985);
  • Si continuau cui n’attra sostituzioni pe’ suli tri misi (Don Guerino Giugnu – Agustu 1985);
  • Nci fhu la presenza pe’ sia anni de (Padre Giovanni Cosentino de Agustu 1985 ad’ Agustu 1991);
  • Si cangìau pe’ n’attri nove anni cu (Don Gigi Juliano de l’Agustu 1991 fhina a fini annu 2000);
  • Lu Viscuvu no’ cangiau comportamentu nemmenu quandu arriva unta Curnga Don Leonardo Diaco (de lu 14-1-2001 a lu 23-9-2008), de chigghu chi sembrava n’attri acciprieviti Bonelli, destinatu Parrucu a vita de Curnga. Inchjiu la Chjiesa cuomu negghu de tiempu rescìu mu inghjia, e avìa ricogghjiutu tutti chigghi guagliuni chi giravanu senza na meta nta lu paisi.
Lu Viscuvu si lu portau nta Nicastru e nci affidau la Parrocchjia de’ Santa maria Maggiori.
  • Arriva pe’  suli tri anni Don Giuseppe Critelli (de lu 3-9-2008 a lu 31-10-2011), puru chistu fhù cangiatu;
  • Pe’ dui misi, li curinghisi restaru senza Prieviti; dicìa missa quandu servìa, lu Prievit de Santu Pietru.
  • Arrivau, a la fhini, ed’è ancora ojia reggenti, lu Parroco Don Pino Fazio (de lu 4-12-2011 a . . . ).
Sunu chisti li decisioni chi pigghjiauru a la Diocesi de Nicastru
 
Chisti sunu li fhrutti de tuttu stu jira e venira de prieviti chi criau scuntentizza nta tutta la popolazioni chi no’ rescia mu trova na guida spirituali.
Si capiscia ca no’ nci po’ essere cchjiù nu donn’Antuoni Bonellu, chi de tutti li piecuri ad’igghu affidati, sapìa tuttu e soprattuttu canuscìa a tutti.
 
Petruzzu  mio, chistu non’è progressu.