Escursioni a la “Pignara” “Lu Bagnu sutta la Briglia de Riola”

Escursioni a la “Pignara”
“Lu Bagnu sutta la Briglia de Riola”
 
Mo’, doppu chi ti cuntai tuttu de quand’era io cotraru, e ti descrivivi tutti li perzunaggi e li posti de li tiempi mia e de mia abbandunatiormai de tiempu, vuogghjiu mu m’assiettu a una de chisti panchini nuovi de lu Passu pemmu guardu e mu pienzu supa a tuttu chigghu chi trasformau nteramenta lu paisi mio.
Si hai voglia mu mi sienti ancora, ti puozzu fhara notara ncun’attra cosa caratteristica de stu paisi, chi riguarda soprattuttu la compormazioni de lu paisaggiu chi, nmassima parti, restau nta certi rughi, accussì cuomu eranu nta l’origini.  Nescìu ammienzu a dui fhjiumari, cuomu si dicia quandu si parra de la Mesopotamia, Curnga pigghjia fhorma partiendu de lu Spizzu, Gallicinò, ammienzu propri a dui fhjiumari, chiggha chi scinda d’arriedi a lu spizzu, e chiggha chi passa sutta la chjiazza de la Mmaculata, ormai sicchi tutti de li dui, e continuau mu si allonga e mu si stenda a fhorma de terrazzi, guardandu sempre de cchjiù verzu lu Golfu de Sant’Eufhemia.
Nescìru accussì la ruga de la Petrachjiana, sutta lu muru de Orlandu; la Ruga de Sanfranciscu, sutta lu muru de Pruscìnu; la ruga de Sutta la via e de Gurniegghji, supa lu muru de Sutta la via e sutta a chigghu de Natraccola. Supa a tutti sti mura sorgìru attri Rughi cuomu chigghu de la Gabina supra a lu stessu muru de la Gabina, o chigghu de San Giuseppa e Santu Ruoccu chi sorgìru supa li mura de Pruscìnu e de Natraccola. Sunu cchjiù recenti li rughi de la cinconvallazioni e puocu menu recenti chegghu de lu Chjianu de l’Ari, zona chi si trova all’avuttu de lu paisi, cchjiù o menu chianeggianti, e cchjiù adatta a li nuovi costruzioni ncimentu armatu chi hanu mu rispundanu ojia a certi esigenzi, chi pe’ li casi de li tiempi mia, non’eranu necessari.
Casi ncimentu armatu, Villini cu li garagi e giardinu ntuornu chi spessu diventa l’uortu ntuornu a la casa, utili pe’ chjiantara pumadora, lattuchi, fhinocchjia, o ncuna fhicara, pirara, prunara e, tuttu chigghu chi si po’ conzumara all’istanti ed’è de immediata utilità cuomu l’acciu, vasilicò e petrusinu.
Li tiempi sunu diverzi de chigghi vissuti de mia, nta l’usanzi ma puru nta li modi de campara cu esigenzi tutti diverzi, e no’ cchjiù essenziali cuomu chigghji de li tiempi mia ma esagerati e sempre cchjiù esagerati nta sti tiempi chi stacimu viviendu.
Ti cuntai de pranzi fhatti de sula verdura cogghjiuta pe strata, mbiscata chu poseggha coltivata mpropriu, accussì cuomu ti parrai de Scadi chi assorvìru a la fhunzioni alimentari nmodu essenziali e sustanziusu, a li suppressati e a li sozzizza chi eranu, de annu ad’annu lu cumpanaticu chi si mangiavanu, supa lu postu de lavoru, li zzappaturi e, no’ sulu igghi.
Ojia, Ristoranti de prima categorìa, aperitivi e antipasti a basi de prosciutti, fhormaggi e fhrutti de mara, possibilità mu si sciegghjia lu primu piattu de mara o de muntagna, sicundi piatti de pisci o de carni jianca o russa, nzalata de lattuchi e caroti o de pumadora, vinu de qualità e chi custa l’ira de ddio, e lu durci a la fhini cu lu cafhè servutu a lu tavulinu.
Cui si penzava mai cuosi de stu generi quandu era difficili mu arrivi a la sira e d’avìra mangiatu?
Cui si potìa penzara mai ca si potìa fhara colazioni a lu Barra cu cappuccinu a cornettu servuti a tavulinu?
La matìna si mangiava la suppa cu cafhè de uorjiu, ntostatu e macinatu de li mammi nuostri, bravi mu curanu la tostatura chi si fhacìa cu na fhressura cumbogghjiata e nu sportellu chjiusu a molla, e na manuvella pe’ girara nommu si vrascìa l’uorjiu mentre si ntostava.
Nonostanti tuttu, si criscìa belli fhuorti e pronti pe’ qualsiasi tipu de lavoru, soprattuttu de chigghu manuali e de fhara ncampagna.
Quandu li cotrari eranu libari de mpegni de lavoru o de scola, era na libbara uscita pe’ tutti, e li guagliuni si divertianu fhaciendu jiuochi puru pericolosi, scarandu nta li campagni vicini arraffandu fhicu, cerasi, lattuchi e tuttu chigghu chi nci venìa pe’ li mani distruggiendu l’uortura de chigghi povari zzappaturi.
A lu primu cavuddu de li misi de Majiu e de Giugnu, li guagliuni si nda jianu a la fhjiumara de turrina mu si fhanu lu primu bagnu nta la gibba, sutta la briglia de Rijiola.
Ed’era nu fhujia fhujia nta li carrijiola de Rijiola cu li dovuti fhermati a la Pignara pe’ cogghjira pignuoli, a la fhicara zifhula de Triccannali o a cerasi napulitani nta lu Zziu Vitu.
Certi vuoti eranu propi jiuochi pericolosi e lu fhattu ca nu fhigghjiuolu s’annegau propi fhaciendusi lu bagnu sutta la Briglia de Rijiola, cunferma quantu ti stajiu cuntandu.
Giulu De Vitu, lu fhigghjiu de lu mannugghu, nu cotraru de quindici – sidici anni, reastau sutt’acqua pe’ li correnti chi no’ nci cunsentiru mu nchjiana supra mu pigghjia fhjiatu.
Giulariegghu, s’annegau de chistu modu e fhu portatu a galla de Ninu Gaudinu, all’epoca graduatu de Marina Militari, nta chigghi jiuorni de licenza a Curnga, chi si ligau sutta li mascigghi cu na corda longa, si tuffau sutt’acqua, ligau lu muortu de nu peda e lu portaru fhora acqua.
 
Quandu Ntoninu tornau supa la Navi Garibaldi a la Maddalena nta la Sardegna duva igghu era associatu, davanti a tuttu l’equipaggiu ndivisa e schierati supa la Navi, ricevìu n’encomiu de parti de lu Comandanti, chi fù na giusta ricanuscenza pe’ tuttu chigghu chi avìa fhattu.
Li scarati nta li campagni de Curnga, no’ si limitavanu a lu sulu bagnu nta l’acqua fhridda de la fhjiumara de Turrina, ma si divertianu arrobbandu fhicu, lattuchi, cerasi, arangi, e tuttu chigghu chi si trovavanu sutta li mani.  Sti posti diventavanu campi de jiuocu e posti de sfida, certi vuoti pericolosi e assurdi.
Nchjianara supa la Pignara de ijiola, ad’esempiu, era na cosa chi sembrava a tutti mpossibili, me pe’ certi scavuzzacuogghji era na cosa possibili, nchjianandu supa na livara vicina a la Pignara, zumpava mu s’aggrappa a na rama de pinu e pua, cuomu na gatta, nchjianava fhina a la cima scotulandu tutti chigghi pigni chi, de nterra, era mpossibili jiettara nterra a corpi de piscunati.
Tena presenti ca la Pignara, no’ criscìa a lu stessu modu de li livari, ma era avutta cinquanta – sessanta metri, e si cadivi de ggha supa, t’ammazzavi cuomu nu fhissa.
 
Sti scapizzacuogghu esistienu de vieru, ed’eranu conziderati cuomu eroi pe’ tuttu le gruppu de cumpagni sua, pecchì era chigghu chi quandu si trovava supa la pignara, jiettava nterra pigni pe’ tutti, e tutti eranu cuntienti no’ penzandu minimamenta a lu periculu a cui si jia ncontru.
 N’attra cosa eranu mbeci li partiti a li carti chi si jiocavanu propi sutta li fhicari, mentiendu mpaliu nu centinaru de fhicu, ricogghjiuti de li dui chi perdianu la partita e mangiati doppu fhattu lu Patruni e Sutta.
Sti perzunaggi de cumandu “Patruni e Sutta”, venìanu fhatti usandu ancora cu li carti napulitani.
Seguiendu li reguli de jiuocu, ogni jiocaturi izzava de lu mazzu de carti e facìa vidira l’urtima carta chi stabilìa, mbasi a lu valori massimu, cui tra li jiocaturi avìa mu duna li carti pe’ lu patruni.
Chigghu chi nescìa, dunava quattru carti l’unu, ed’ognunu avìa mi s’ingegna mu fhacia fhrusciu o ppuru primera.
Si fhacìanu dui giri de dunata, cu li jiocaturi chi potìanu scartara li carti chi no’ nci servianu e riciviendu lu stessu numaru nta lu giru doppu.
Lu fhrusciu o la primera cchjiù avutta stabilìa cui era lu Patruni, chiggha chi era de puocu cchjiù vascia, decidìa mbeci lu Sutta.
Si fhacìanu accussì sia lu Patruni, sia lu Sutta e gestìanu tutti li fhicu chi s’avìanu jiocatu.
Chigghi chi avìanu perdutu la partita no’ potìanu nemmenu mangiara na fhicu mentre li cogghjianu, e si li potianu mangiara mbasi a l’offerta e l’assenzu de lu Patruni e de lu Sutta.
Quandu li perdituri nescìanu Patruni e Sutta, si vendicavanu e si mangiavanu tutti li fhicu cogghjiuti de igghi.
Certi vuoti nc’eranu rivalità e inimicizzi tali chi portavanu lu Patruni mu si mangia tutti li cientu fhicu njiuocu, dunandu a lu sutta sulu la Bibita, chi potìa consistira nta na fhicu, o menza o addirittura nu muorsu, sulu pe’ assaggiu.
Maturava la vendetta quandu li perdituri nescìanu Patruni e Sutta, e si mangiavanu tutti li fhicu senza mu nci nda dunanu una all’avversari.
Ricogghjiuti de igghj e de igghji mangiati, era la vendetta perfetta.
Li rivalità de coppia, portavanu puru a lu totali cunzumu de lu fhruttu de parti de lu Patruni, senza mancu nu minimu assaggiu pe’ lu sutta, si no’, sulu chigghu previstu de lu jiuoci.
Lu piejiu succedìa quandu nta lu miegghjiu arrivava lu patruni de la fhicara e de la terra duva si stacìa jiocandu a li carti.
Nta sti occasioni era nu fhujia fhujia de tutti li parti chi, nta lu giru de puocu minuti si ritrovavanu titti nta n’attru postu, luntanu de lu primu, e duva si ripigghjiava a jiocara cuomu si nenta fhussa successu.
S’era necessariu, ri ricogghjianu n’attra vota li cientu fhicu nta stu nuovu postu, e si ricominciava de duva restaru.
Spessu tutti sti scarati si concludianu a la sira, quandu ognunu tornava a la casa, cu na mazzijiata da parti de li patri, quandu venìanu mpurmati de chigghu chi avìanu fhattu de parti de chigghu chi nci avìa rimisu li fhicu o li lattuchi o attru.
Lu jiuornu doppu, tuttu tornava cuomu prima, cuomu si nenta era successu.
Mi cuntaru, e vuogghjiu mu ti cuntu, nu fhattu a lieta conclusioni chi si verifhicau quandu de lu Ponta passau lu Giru d’Italia e chi si concludìu nmodu particolara.
Non’era sicura l’ura de passaggiu de li ciclisti de lu Ponta, chi arrivavanu de Reggiu Calabria e si dirigianu verzu Catanzaru, duva si concludìa la tappa de la jiornata.
 
 
Nu bellu gruppu de giovanotti appassionati e tifosi de Bartali e Coppi, de prim’ura, si partiru de Curnga e scindiru a lu Ponta aspettandu lu passaggiu de li ciclisti de stu postu, cuntienti pecchì potìanu vidira pe’ n’attimu, Bartali e Coppi, li cchjiù fuorti ciclisti de lu periodu e l’iduli delu momentu de tutti li guagliuni.
Arrivaru troppu priestu, e vistu ca nc’era de aspettara, unu de la cumpagnìa decidìu mu li porta nta igghu a fhicu.
Tutti cuntienti e senza periculu, cominciaru a nchjianara supa la fhicara malangiana e a mangiara fhicu, puru pecchì si mbicinava menzijiuornu e cominciava a venira fhami.
Chigghu chi havìa mu era na scarata senza periculi, de nu momentu a n’attru diventau nu periculu generali pecchì arrivau lu patruni, e cominciau mu jiastima e mu si la pigghjia cu tutti.
Si misa a lu pedali de la fhicara e nd’acchjiappau a dui approfhittandu ca ognunu cercava mu scappa senza mu s’accorgia ca a lu pedali nc’era lu patruni. No’ li pistau cuomu ognunu s’aspettava ma dicidìu mu li chjiuda nta la caseggha duva dassava l’attrezzi de lavoru, e mu li dassa ggha intra na jiornata ntera.
Arrivau menzijiuornu, passaru li corridori, si nda jiru tutti e chisti dui, ancora chjiusi, ncamati e sanza possibilità mu puonu scappara, chjiusi nta la caseggha. Quandu lu patruni fhinìu de zzappara, a sira tarda, jiu a la caseggha e fhinarmenta liberau chigghi dui povari disgrazziati, cu la raccumandazioni nommu si fhanu cchjiù vidira de chigghi parti e cu la certezza ca venìanu mpurmati li fhamigghji.
Inutili mu ti dicu cuomu fhinìu chista jiornata, pecchì pua de sulu immagginara ca no’ potianu essere ca mazzati, a scopu educativu e correttivu pe’ nu comportamentu cchjiù adeguatu a li reguli de lu vivara civili.
Na jiornata chi avìa mu era de fhesta, si concludìu mbeci senza potìra vidìra ne’ Coppi ne’ Bartali e soffriendu pe’ na jiornata chjina la fhami.
 Senza volìra essera scostumati, vuogghjiu mu fhinu cu na massima chi nta sti casi è propi ndicata:
restaru cu lu culu ruttu e. . . senza cerasi”.
 
Attri jiuochi de cotrari:
La Campana, Lu Zzugghu
A lu Ppà, Giru d’Italia, Sbatta muru.
 
La mancanza de’ giornali e de Televisioni, portava li guagliuni, cotrari cumpresi, ammienzu a la strata, ma no’ pecchì stacianu a lu sbandu, ma pecchì ammienzu a la strata, cu puocu o . . . nenta, rescianu mu si divertanu ammentandu jiuochi pe’ passara lu tiempu ncumpagnìa, sereni, tranquilli e, all’apertu. Jiocara era nu modu mu si criscia e mu si stacia assema a l’attri cotrari, puru igghji disposti mu passanu nu puocu de tiempu libaru ncumpagnia. Li jiuochi de lu tiempu cangiavanu cu l’età de li cotrari, si era masculu o fhimmuna, e a la disponibilità d’oggetti de jiuocu chi, pe’ determinati jiuochi, diventavanu l’oggettu contesu nta lu jiuocu stessu. Mi spiegu miegghjiu spiegandu cuomu fhunzionavanu li vari jiuochi.
 
La Campana
Lu jiuocu prefheritu de’ li fhimminiegghi, era chigghu de’ la “Campana”. Pe’ li fhimmini, era sufficienti nu muorzu de’ terra pianeggianti pemmu si po’ disegnara supra, cu nu piezzu de’ stracu, o de ciaramidu ruttu, certi quatrati o rettanguli numerati, chi eranu li basi adduva havìa mu si fhacia cadìra la staccia, na petra cchjiù o menu chjiatta, pe’ pua jira mu si ripigghjia, zumpandu supa nu peda, o appojianduli tutti e dui nterra, a sicundu de la fhorma de la campana e de la numerazioni de li caselli, senza toccara li righji chi delimitavanu li casiegghji stessi. Nta sti casi, si pagava la pena, chi consistìa nta la sospenzioni temporanea de li jiuocu, cediendu lu postu a l’attra jiocatrici de lu gruppu costituitu all’iniziu attraversu lu Tuoccu.
Ogni recuperu dela Staccia chi venìa lanciata prima, havìa mu si concluda cu nu ritornu a la prima caseggha, a chiggha de partenza.
Venìa considerata puru penalità, na possibili caduta quandu si attraversavanu li vari rettanguli, oppuru quandu s’appojiava na manu nterra tentandu mu si ristabiliscia l’equilibriu, o ancora quandu la staccia cadìa supa una de li righji chi delimitavanu la Campana.
Li rettanguli disegnati nterra, tutti numerati, havìanu mu si superanu tutti senza n’errori e diciendu a vuci avutta quala de chisti si stacìa superandu.
Lu giru pe’ superara tutta la campana disegnata nterra, si ripetìa numaru doppu numaru, fhina a quandu una de lu gruppu de’ jiuocu, no’ rescìa mu li supera tutti senza mu commetta mancu n’errori.
Si cangiava cu na’ sicunda, terza ed’eventuali attra jiocatura, ogni vota chi una de igghji, duranti lu passaggiu, commettìa n’errori de chigghji ditti.
La Campana potìa essere cchjiù o menu randa, cuomu puru li rettanguli, mbasi a lu spaziu de cui si disponìa.
La disposizioni dipendìa sulu de li decisioni de lu gruppu de jiuocu; si pua nta lu spiazzu nc’era già na Campana disegnata, allora si utilizzava chista senza mu si modifhica e senza perdira tiempu mu si nda disegna n’attra.
 
Jiuocu de la corda.
 
N’attru jiuocu de fhimmina, era chigghu de la Corda.
Chistu jiuocu potìa essere fhattu de suli, fhattu quindi pe’ sulu divertimentu, oppuru si potìa jiocara ngruppu.
Si potìa jiocara puru ntrì, stabiliendu la possibili rotazioni nta lu jiuocu stessu.
In’ogni casu, nc’eranu sempre dui fhimminiegghji chi fhacìanu girara la corda fhaciendu percurrira circhji belli randi, mentre n’attra zumpava propri mentre la corda nci passava de sutta li piedi.
Quandu ntercettava la corda, sbagghjiava, e a stu sbagghjiu nc’era lu scambiu de postu tra chigghji chi jiocavanu; una de chigghji chi fhacìa girara la corda pigghjiava lu postu de chiggha chi havìa sbagghjiatu. S’usava spessu cantara certi fhilastrocchi duranti li saltelli de la corda. Mpratica si ripetìanu nomu de fhrutta (Pero, Arancio, Nespolo e Melo), pecchì a ogni nomi, era associatu lu nomi de na perzuna de chigghji chi stacìanu jiocandu.
Una de chisti trasìa njiocu sulu quandu chiggha chi zumpava, ntercettava la corda propri mentre stacìa pronunciandu lu nomi de la fhrutta ad’iggha associatu.
 
Palla a muru
 
Mi ricuordu n’attra fhilastrocca recitata mentre si fhacìa rimbalzara ripetutamente na palla cuntra nu muru, cu na sula manu, ma puru cangiandu manu duranti la stessa partita.
Si recitava: Palla pallina, dove sei andata, dalla nonnina, cosa hai portato un’altra pallina, dove l’hai messa, nella taschina, falla vedere, eccola qua.Si la palla cadìa mentre si recitava sta fhilastrocca, cangiava jiocaturi. Nta n’attra versioni de stu stessu jiuocu, ogni jiocaturi, mentre si lanciava la palla cuntra lu muru, havìa mu esegue tutta na serie de azioni ditti nt ana sequenza rigorosa e a ritmu costanti. Cui sbagghjiava la sequenza de la tiritera o nci cadìa la palla nterra, havìa mu si fherma e mu nci cunzigna la palla a n’attru jiocaturi. Lu jiocaturi recitava: Mi muovu – (si lancia la palla moviendu lu corpu), Standu fhiermu (si lancia la palla senza mu si mova), Senza ridara - (si lancia la palla evitandu mu si rida mentre l’attri provanu mu ti fhanu ridira), Cuonu peda - (si lancia la palla izzandu nu peda), Cu na manu - (si lancia la palla cu na sula manu),
Cu Battimanu - (si lancia la palla sbattiendu li mani),
Zigu – Zagu – (si lancia la palla e sbattanu li mani davanti e d’arriedi), Cu nu baciu – (si lancia la palla e si manda nu vasu), Tuocco terra – (si lancia la palla e si sbattanu li parmi de li mani nterra), La rituocco – (si lancia la palla e la tuoccu de’ nuovo), Mulinellu – (si lancia la palla e giru nu vrazzu), Violinu – (si lancia la palla e si fhà fhinta ca si sona lu violinu), Sutta gamba – (si lancia la palla de sutta n’anca).
 
Lu Zzugghu”
 
Li stessi posti potìanu essere occupati de li cotrari masculi, pemmu jiocanu a lu Zzugghu.
Si disegnava na linea nterra cchjiù o menu diritta, e supa de chista si sistemavanu li Zzugghi, piezzu de stracu o de ciaramidu ruttu abbastanza picciulu de dimenzioni, de solitu, unu pe’ ogni jiocaturi.
Ogni jiocaturi, non’havìa sulu lu Zzugghu de mentira mpila, ma disponia puru de na “Staccia”, n’attru piessu de mattuni chjiattu.
Mu si stabiliscia cui havìa mu tira pe’primu, si fhacìa a lu tuoccu tra li vari jiocaturi, e, spagghi a li zzugghi, si lanciava la Staccia cchjiù o menu luntana de li zzugghi stessi.
Havìa dirittu mu tira pe’ primu, chigghu chi havìa lanciatu la staccia cchjiù luntanu sia rispettu ali zzugghi ca rispettu a li cumpagni de jiuocu. Si trattava mona mu si pigghjia la staccia de duv’era posizionata, e cu chista tirara supa li zzugghi, cercandu mu nda jietta cchjiù possibili, sfruttandu magari n’effettu dominu.
Vincìa lu jiuocu chigghu chi rescìa mu nda jietta nterra de cchjiù rispettu a tutti l’attri jiocaturi.
 
Lu Ppà
 
Nu jiuocu chi jia de moda tra li masculiegghi, era chigghu mu si jioca a Buttuni, de cammisa, de cavuzzi o de cappotti.
 
Ognunu disponìa e mentìa njiuocu li Buttuni sua, unu pe’ vota o, cchjiù Buttuni a la vota a sicundu de’ l’accordi tra jiocaturi.
Doppu lu solitu Tuoccu, chigghu chi nescìa, havìa acquisitu lu dirittu mu jioca pe’ primu. Si disponianu li Buttuni supra nu gradinu de scala, ma puru nterra, supa a lu cimentu o supra nu mignanu, e si cominciava a jiocara. Lu prepostu, havìa mu cerca mu capovolgia lu versu de lu Buttuni, semplicemente cu nu sbuffu d’aria, fhattu cu la vucca e mandatu cu fhorza, cu li ganghi unchjiati e la vucca quasi chjiusa, propri suprali Buttuni.  Chigghji chi rescìa mu capovolgia, eranu tutti li sua; pigghjiava lu postu sua, quandu chigghu chi precedìa, no’ rescìa mu nda capovolgia nemmenu unu. 
Pua capiscira c anta stu periodu e pe’ chistu jiuocu, puru li buttuni havìanu l’importanza sua e spessu, cu perdìa, sacrifhicava puru chigghi de li cavuzzi o de la giacchetta chi portava ncuogghu nta chigghu momentu. Nc’eranu puru li varianti de’ stu jiuocu, nta lu senzu ca li Buttuni, potianu essere sostituiti de Tappi de’ Birra, chjiamati tappi corona, o addirittura deli primi fhigurini de Jiocaturi de’ Palloni de chigghi tiempi. Puru lu modu de jiocara potìa essera diverzu pecchì a lu sbuffu, si sostituia la manu misa a coppa, chi venìa sbattuta nterra, vicinu a la fhigurina, a li Buttuni o a li Tappi de Birra, nmodu ca chisti, cu lu movimentu d’aria, si potìanu capovolgira.
 
Giru d’Italia
 
Li Tappi Corona de li Birri, e li pallini de Vitru coloratu, venìanu usati nta lu jiuocu de lu Giru d’Italia.
Puru nta stu jiuocu si trattava de disegnara supra la strata nu percorsu chi prevedìa na partenza, nu giru cchjiù o menu luongu e tortuosu, na curva a circhjiu cu na muntagneggha de terra chi fhormava n’ostaculu, e chi girandu ntuornu stabilia lu percorsu de ritornu chi consistìa nta lu percorrira, a la mberza, chigghu de l’andata.
Lu percorsu, vistu ca li strati non'eranu tutti sfaltati, prevedìa nu percorsu largu no’ cchjiù de vinti – trenta centimetri, cu la carreggiata limitata de nu murettu de terra, e chi eraobbligatoriu pe’ tutti attraversara senza nescira fhora la delimitazioni.
A mara, supra la Rina, lu percorsu si costruia tirandu de li piedi nu cumpagnu de jiuocu, sedutu nterra, e strascinatu nterra fhormandu curvi e rettifhila chi costituianu lu percorsu de lu giru.
Lu Tappu de Birra o la Pallina de Vitru, venìa mbuttatu cu na zzicchettata cioè, cu lu jiditu mediu cuntrappostu alu pollici e fhattu scattara cu fhorza mbasi a lu percorsu chi si volìa raggiungira.
L’abilità consistia propri unta chistu, cioè sapira calibrara la fhorza nmodu nommu si fha nescira delu percorsu lu tappu de birra, e superara na curva a gomitu cu adeguata prudenza.
Si vidìa propri cca l’abilità de lu jiocaturi pecchì, si tirava fhorta, lu tappu potìa nescira de la pista, e si succedìa chistu, havìa mu si fherma pe’ nu giru inter unta lu postu chi occupava prima de l’infrazioni. Vincìa, cu rescìa mu copra l’interu percorsu prima de tutti l’attri concorrenti. Capisci ca, a fhini jiornata o a fhini partita, quandu lu tracciatu era fhattu supra la rina, e l’attrezzu era na biglia devitru, lu jiditu mediu era ndolenzitu e spessu nivuru, pe’ li grumi de sangu chi si fhormavanu sutta l’unghjia.
 
Lu Jiuocu de lu Batti Muru
 
Li cotrari cchjiù ntraprendenti e chigghji cchjiù spregiudicati, eranu soliti fhatigara cu li Mastri Fhrabbicaturi, portandu lu Catariegghu de cavucci supra li spagghi, pe’ tala mu si guadagnanu ncuna lira.  Jianu puru santera santera cogghjiendu alivi chi cadianu nta li spini, mu si ricogghjia lu “Chilocciu”, cioè chigghu quantitativu d’alivi chi cadianu ammienzu a li strati de’ campagna chi, rivinduti, fhruttavanu sordi. Si scarava a fherra viecchji e a lattini d’alluminiu, e puru chisti, rivinduti, fhruttavanu sordi.
Nta la Villa, nta lu Passu, a San Pranciscu o ad’attri pari, era solitu ritrovarsi pemmu si jioca a Batti Muru.
È evidenti ca no’ tutti si lu potìanu permettira, puru pecchì la maggior parti de sti “commercianti mprovvisati” nta fherra viecchji, nta alivi e alluminiu, i sordi chi guadagnavanu, prefherianu mu si li spendanu accattandu giornalini.
In’ogni casu, tutti chigghji chi jiocavanu a stu jiuocu, eranu consapevuli ca potìanu puru perdira chigghu chi havìanu guadagnatu fhatigandu.
Si ndividuava nu muru adeguatu, si fhacìa a lu tuoccu tra li vari jiocaturi, e a chigghu chi nci nescìa, nci toccava mu jioca pe’ primu.
Sbattìa li sordi a lu muru nmodu mu li fhà cadìra cchjiù luntanu possibili de lu muru stessu.
A stu fhara, si dedicavanu, a turnu, tutti li jiocaturi, e a la fhini vincìa chigghu chi havìa resciutu ma fhacia cadira li sordi chjiù luntanu de tutti l’attri.
Stu jiuocu, fhinìa spessu cu lu piantu de chigghu chi havìa perdutu.
L’alternativa a lu jiuocu a Muru, era chigghu de lu sguazzu a lu vuolu. Nu jiocu chi si jiocava ndui, unu chi sguazzava, e l’attru chi cercava mu ndivina la posizioni deli sordi doppu che eranu sguazzati sonoramente e jiettati nterra.
Diciendu Testa o Cruci prima chi l’avversariu fhinia de’ sguazzara, si concludìa la jiocata ricogghjiendu ognunu li sordi chi si trovavanu nta la posizioni dichiarata de Testa o, de Cruci, accussì cuomu si trovavanu.
Nc’eranu sempre li stessi possibilità de vincita o de perdita pecchì li possibilità eranu sempre dui, o Testa o Cruci, era quindi la fhortuna e l’abilità de manijiara li sordi chi stabilia ccu vincìa e cui perdìa.