Cunti de povertà e de Cooperativi

Cunti de povertà e de Cooperativi
 
Ciucci e Fhorgiari, fhurniesti e Fhalignami, alivi e Macinini, Ranu e Mulini, Linu e Tilari, Stoffi e Sarti, Libbra e Bibblioteca, Analfabeti e Scuoli, Panni luordi e Fhjiumari, ma. . . nta l’anni chi precediru l’urtima guerra, fhami a tutti li parti, sofferenzi curpurali e . . . stienti.
Chistu è quantu ni tramandaru a vuci tutti chigghi chi ni precediru.
Cuomu si puonu capiscira ojia li sofferenzi a cui venìanu sottoposti e chi patìanu li fhimmini quandu jienu mi cogghjianu alivi, o quandu curavanu la tila, o quandu si dedicavanu a li fhaccendi de casa chi continuavanu cu lu dunara de mangiara a li conigghji, a li gagghini e a lu majiali pe’ fhinira cu la cura de li fhigghji sia picciuli ca randi.
Pe no’ parrara de chigghi a cui eranu suggetti l’uomini obbrigati mu van unta li campagni de la marina a peda o nciucciu mu fhatiganu cu la zzappa de matina a sira, cu la fhatiga fhinali mu si ricogghjianu a la casa, ancora a peda, nchjianandu pe la sagghjiuta de curnga.
 Scavuzzara vigna, siminara lu ranu, chjiantara li bietuli o lu ndianu, tirara bietuli, putara l’alivari o la vigna, arramara o nzurfarara la vigna, zzappara l’uortu pemmu si po’ metìra, vindignara e cogghjira li fhrutti vari ncuntrandu ancora fhatìga supra fhatìga.
La fhami si cumbattìa propi fhatigandu soprattuttu ncampagna, e cu non’avìa nu piezzu de terra de zzappara, o no sapìa mancu mu fhacia nu mistieri chi potìa rendira ncuna lira, era destinatu mu patiscia la fhami, e affruntara la jiornata dijiuni, non’era fhacili pe nugghu.
Avìa mu s’aguzza l’ingegnu mu si po’ superara la jiornata a panza chjina, pecchì si chistu succedìa, si potìa penzara a lu jiuornu doppu e a li jiornati successivi.
Mo ti cuntu chigghu chi mi cuntaru chigghi chi chisti tiempi li vivìu, e ti parru de perzunaggi capaci mu aguzzanu l’ingegnu resciendu mu si inchjianu la panza e mu risorvanu li problemi de la jiornata.
Nteressanti la storia de nu sartu-varvieri (D.G.(?)) chi, disponiendu de lu strittu necessariu, o quasi, mu fhacia varvi e mu cusa cavuzzi, si nda jia a matinata a la marina mu trova li massari chi stacìanu gghana, sperandu mu fhacia ncuna varva o mu nci cencanu mu cusa nu paru de cavuzzi.
Era nu custurieri-varvieri a domiciliu, ma cu nu scopu precisu, chi ciercu mu ti fhazzu capiscira n’attru puocu.
Na varva fhatta sutta na fhicara o sutta nu cievuzzu, cu nu rasuolu azzannatu, cu acqua pigghjiata de nta nu fhuossu, senza sapuni de varva e sanza tuvagghjia de ncuogghu, rendìa cchiù de quantu potìa rendira la stessa varva fhatta nt ana putifha o a la casa. 
Nugghu portava sordi nta la tasca puru pecchì no tutti nd’avìanu sordi, e soprattuttu quandu si pasculavanu li vacchi all’apertu, nta li campagni de la marina, quindi, la varva si pagava cu li prodotti de la terra: poseggha, ciciari, luppini, e virduri d’ogni manera.
 
Chigghu chi sembra nu svantaggiu, era mbeci nu vantaggiu pe’ D. G. (?) pecchì li ciciari e la poseggha chi ricivìa pe paga, no si pisavanu mai, ed’era sempre cchiù de chigghu chi potìa accattara cu li sordi chi potìa avìra si benìa pagatu cu sordi, e pe de cchiù, ricogghjia patati, cipugghi, pipi e tuttu chigghu chi producìa l’uortu de la masserìa.
Ed’eranu tanti li cuosi chi si fhacìanu nta chisti uortura.
 
Quandu la varva nci la fhacìa a cchjiù massari, ncuntrati pe casu (?), allora D. G. si ricogghjia la sira a la casa cu nu bottinu de ciciari e poseggha chi potìa sfamara pe n’annata intera tutta la fhamigghjia sua.
Sperimentatu ca chistu fhara rendìa parecchjiu, annu pe annu e settimana doppu settimana, si fhacìa sempa lu solitu giru anzi, si portava cu igghu la fhigghjia pemmu l’aiuta mu si porta a la casa chigghu chi ricigghjia e s’attrezzava de ciurmieggha pemmu li po’ miegghjiu trasportara.
 
Nu dittu paisanu dicia:
 “Fha cchjiù na Viertula ca na Masserìa”
 
N’aneddutu particulara.
Nu jiuornu, mentre fhacìa lu solitu giru de li massari, unu de chisti nci commissiona nu paru de cavuzzi nuovi pemmu si li menta quandu jia ncampagna mu guarda li vacchi ma, non’aviendu lu metru e na carta pemmu pigghjia li misuri, nci prumisa ca nci li fhacìa lu stessu teniendu a menta la stazza fisica de lu massaru, e chistu era pe igghu sufficienti.
Quandu li cavuzzi eranu cusuti, si precipita a la marina pemmu nci li cunzigna a lu massaru chi nci l’avìa commissiunatu nta la campagna duva passava de solitu la jiornata.
Quandu lu vitta, lu salutau e subbitu lu massaru nci dissa si nci fhacia la varva ca l’avìa longa.
Nta lu solitu modu, senza sapuni e senza tuvagghjia e cu nu rasuolu azzannatu chi portava sempre nta la tasca, nci fhacia la varva e pua nci duna la solita ricompenza:
“Na jiunta de poseggha gialineggha, na jiunta de poseggha jianca, na jiunta de ciciari, na jiunta de cannellinu, na jiunta de borlotti, na jiunta de . . . . e lu ciurmiegghu era chjinu” .
Cuntientu de quantu avìa ricivutu, si scorda de li cavuzzi chi avìa cusutu, e doppu chi salutau e si prumisuru mu si vidanu a la prossima vota, si misa ncamminu pe lu paisi mu si ricogghjia a la casa.
Avìa già caminatu pe nu bellu piezzu de strata quandu, all’intrasattu si ricordau de li cavuzzi chi si stacìa portandu n’attra vota a la casa semza mu nci li cunzigna a lu massaru chi avìa salutatu de puocu e chi nci l’avìa ncaricatu.
Tuttu cumpusu, torna arriedi pemmu nci li cunzigna e si ripresenta a lu massaru sbentulandu li cavuzzi nuovi chi s’avìa scordatu mu nci cunzigna.
Puru ca eranu all’apertu, lu costringia mu si li prova pe’ vidira cuomu nci stacìanu de ncuogghu. Si menta arriedi de n’arvuru e si li menta restandu cuntientu de l’opera chi avìa fhattu lu mastru.
Senza mu si guarda a lu specchjiu, dissa can ci stacìanu buoni e lu mastru confermava diciendu ca “nci stacìanu a pinnellu”.
Lu fhattu venìa spessu ricordatu de mastru D. G., no’ tantu pe chigghu chi avìa ricivutu pe paga quantu pecchì avìa cusutu nu paru de cavuzzi chi nci stacìanu nu pinniegghu senza avìra mancu na misura.
Non’era l’unicu chi campava d’espedienti pecchì, tutti li mastri de tutti li mistieri, preferìanu mu sunu pagati no’ cu sordi ma cu li prodotti de la campagna pe’ l’opera prestata.
E’ famosa na poesia chi nu poeta paisanu nci dedica a na fhimmina mportanti de curnga de cui, nta chigghu chi già ti cuntai, mi sentisti parrara. Donna Melia, mugghjiera de don Fhrancisc’ Antuoni Vivacqua, chi appartenìa a la fhamigghjia cchiù fhamosa de curnga, era la fhimmina a cui era dedicata chista poesia, pemmu la ringrazzia de tutti li vuoti chi nci dunau nu piezzu de pana quandu avìa fhami.

8 Ottobre 1927

Alla morte di una nobile Signora

D. Amelia Romeo

Pietosa povertà a cui non invano

L’obolo chiedevi a quella Pia Signora

E la gentile benefica sua mano

Ti prodigava dolcemente ogn’ora.

   Avvezzo tu a quello obolo quotidiano

   Tendi la carità chiedere ancora

   Ma nel palazzo un cambiamento strano

   Purtroppo scorgerai che ti addolora

Col solito sperare Sali le scale

E il passo muoverà verso la porta

Tutto è silenzio nelle grandi sale

   La serva che di te si sarà accorta

   Presa dal pianto e rimanendo male

   Ti cennerà che la Signora è morta.

   Giuseppe Vono

Custurieri de fhamigghjia, jia a lu palazzu cu lu fhrata e li fhigghji, puru igghi custurieri, pemmu nci cusanu l’indumenti chi nci servianu pe tutta la fhamigghjia de li Vivacqua, chi era abbastanza numerosa.
Abiti buoni pe ricevimenti, sia pe fhimmini ca pe uomini, abiti de lavoru e pe la campagna vinianu cusuti de chisti perzuni e portati a lu palazzu prima possibili, cu li provi de misura chi si ripetianu cchiù de lu dovutu, no sempre necessari, ma chi si tiprtianu no pe la necessità de misurara ma pe la presenza a lu palazzu duva donna Melia, porgìa sempre ncuna cosa de mangiara no sulu pe cui era presente ma puru pe chigghi chi stacìanu a la casa.
Quandu morìu donna Melia, pe gratitudini, lu sartu-poeta nci dedica una poesia, chi quasi nugghu ancora canuscia, nsegnu de riconscenza e osannandu la bontà de chista perzuna.
Chisti dui fhatti, bastanu de suli pemmu fhanu capiscira quala era lu problema nta chisti periodi, ma hai mu sai ca curnga, avìa puru n’elencu de perzuni, fhattu de li miedici curanti de l’epoca, chjiamatu Elencu de li povari, sostenuti de ncunu modu de lu comuni ma puru de organizzazioni chi operavanu fhora de l’amministrazioni.
Quandu fhuru assegnati li terreni comunali de lu cannitu cu lu dirittu de coltivazioni, de suli no bastavanu pecchì nci volìanu li simienti pemmu si puonu portara a produzioni.
Ranu, Uorghjiu, Luppini, Ndianu e. . . havìa prima mu si siminanu pemmu si potianu pua ricogghjira ncuna cosa, e chisti simienti no tutti li avìanu. 
Si fhicia pe chistu lu Munti de lu ranu, nta lu palazzu de li Vivacqua, duva li zzappaturi chi avìanu la terra mu siminanu, doppu chi avìanu presentatu domanda, jianu pemmu si pigghjianu li simienti cu l’impegnu ca a la metitura votavanu sia chigghu chi s’avìanu pigghjiatu ca lu nteressi maturatu, puru chistu cu ranu nuovu. 
 Fhaciendu de stu modu, lu Munti de ranu si rinnovava annu doppu annu, e cu l’interessi, cacciati li spisi, si vindìa lu ranu chi era de cchiù a li mulini de lu postu chi lu macinavanu fhaciendu fharina chi vindìanu direttamente a li clienti oppuru a li fhurni pemmu fhanu lu pana chi vindìanu a li vari putifhi.
 
Chigghu chi la coperativa guadagnava venìa spartutu propi a li perzuni scritti nta l’elencu de li povari chi li miedici avìanu scrittu.
Cu disponìa de chistu poteri era la direzioni de la coperativa chi, onestamente e a lu chiaru de luna, nci dunava a tutti ncuna cosa, puru a chigghi chi no nd’avìanu dirittu ma, chi soffrìanu la fhami.
 
Ti cuntai na vota de li buchi duva s’ammucciava lu ranu e duva si conservavanu li simienti mu si mantenianu buoni e disponibili pe l’annati successivi.
Nta lu palazzu de li Vivacqua, ndava quattru nta l’ingressu e attri si trovavanu sia a lu latu diestru ca a lu latu sinistru de lu pianu terra de lu stessu palazzu.
 
Eranu propi nta chisti buchi chi si cunservavanu li sacchi de ranu de lu munti, cu l’addettu chi provvidìa, annotandu ogni cosa, mu distribuiscia li vari quantitativi a tutti chigghi chi avìanu fhattu richiesta.
Li primi chi penzaru mu fhanu la coperativa, e la successiva (la Concordia), fhuru:
lu patruni de casa don Bernardu Bevilacqua (de cui partìu la prima idea),  de lu dottori Zimatori, de l’Acciprieviti Bianca, de lu profhessori Ananìa, de Brunu Frijia, de don Battista Lo Scerbu, de lu notaru Panzareggha, de lu dottori Perugini, de don Pietru Gullu, de lu maestru Sgruomu, de don Battista Gaudinu (segretariu contabili de la coperativa), de mastru Tittu Cefhaly, de don Brunu Serrau, e de lu magazzinieri Micu Grassu addettu puru a la spartizioni, e ad’attri chi però nta chistu momentu no mi ricuordu.
 
Uomini a cui nci va ricanusciutu lu meritu ca si mpegnaru direttamenta e lavoraru ngegnandusi mu portanu avanti lu paisi.
Ca a patira e a soffrira la fhami eranu tanti lu dimostra puru lu modu de campara de certi perzuni, assuggettati a lu sacrifhiciu e obbrigati a campara ncondizioni disastrosi e puocu dignitosi.
 
L’anni de lu ’36 e . . . cuntuorni, chi ncunu chjiamau malannati, fhuru anni de fhami tremenda, e puru ca sunu anni luntani de chisti chi stacimu viviendu, ha mu li ricordamu lu stessu, no’ pe nostalgia, pecchì nui no ncierumu, ma pe ricordara certi ditti chi ni fhuru tramandati e chi si usanu ancora ma chi no canuscimu mancu l’origini.
Quantu vuoti, parrandu dicimu: “chi casa scommida”; nu dittu chi ha origini propi nta chist’anni de fhami e de sofferenza quandu, na fhamigghjia campava, si criscìa e si moltiplicava nta na stanza no tantu spaziusa, e cca dintra si fhacìanu tutti li cuosi chi si potìanu fhara nta na casa de fhamigghjia.
Lietti chi occupavanu quasi tuttu lu spaziu de la stanza, cu tri pietri chi fhacianu nu tripuodi duva ncera na cassalora pe cucinara e cu lu cucinatu mangiatu de tutti, assettati ognunu supra lu liettu, e mangiandu tutti assiemi.
Bastava mu ti sdigghazzi li scarpi (pe cu l’avìa), mu ti stiendi arriedi e pemmu ieri già prontu mu t’addormienti e mu ti ripuosi pemmu sini fhriscu lu jiuornu doppu.
Quandu li fhamigghji eranu fhatti de parecchi fhigghjiuoli, li cchjiù randiciegghi venìanu ndirizzati all’uortu, cu la zzappa mu chjiantanu e mu abbivaranu poseggha e pumadora. 
E nta la campagna nc’eranu pogghjiara chi diventavanu la casa pe chigghi perzuni addetti a la cura de l’uortu chi nci venìa affidatu.
Pratica, certi zzappaturi non’eranu nemmenu li proprietari de li tierri chi zzappavanu pecchì chisti appartenianu sempra a li soliti fhamigghj ricchi de curnga cuomu: li Vivacqua, li Panzareggha, li Perugini, e accussì diciendu.
Li Perugini eranu li proprietari de li Nucari, de la Cruceggha, de lu Gurnali, de lu Feudu, de Sambuni e. . . tutti terreni duva abbundava l’acqua e rendianu pe chistu ogni bena se ddio.
Eranu tenuti mproduzioni de li zzappaturi de curnga chi si dedicavanu anima e cuorpu a sta terra.
Li pumadora de sambuni eranu na specialità particulari, cuomu ojia sunu conziderati li cipugghi de Tropea, o li Pumadora de belmonti o lu Vinu de Ciro, na cosa chi è ligata a lu postu ed’è puru pregiata.
 
Pemmu producia li Pumadora de Sambuni, don Basiliu Perugini, proprietariu de sta terra, misa nu colonu, nu certu Lo Bertu de Curnga, chi pemmu assorva miegghjiu a chistu compitu, si fhacìa aiutara de lu fhigghjiu Tumasi, ormai giovinottiegghu, ci dormia addirittura a Sambuni, nta lu Pagghjiaru de Sambuni, accuntentandusi de chigghu chi offrìa lu postu.
A lu paisi jia sulu pe ncuna fhesta, a Natali, a Pasqua, a la Fhrera de la Mmaculata, lu sidici Lugliu e ncuna Dominica, de attru, Tumasi, non’avìa bisuognu.
Si fhacìa de tuttu, poseggha, fhagiolini cavuli, lattuchi, fhinocchia ma, soprattuttu si fhacianu li “Pumadora de Sambuni”.
Nu jiuornu, quandu li primi pumadora cominciarunu a vazzijiara e ncunu era prontu mu si cogghjia, lu patra de Tumasi liscegghjiu, li misa nta nu panaru e ncaricau lu fhigghjiu mu nci li porta a lu patruni don Basiliu, a lu palazzu Perugini. Tumasi povariegghu, era tantu lu tiempu chi no jia a lu paisi chi no sapìa duv’era lu palazzu ed’allora, lu patra, cu pacienza nci spiegau duva avìa mu vajia e chi avìa mu fhacia mu nci porta lu panaru de pumadora a lu patruni don Basiliu.
Nci dissa: arrivi a pruscinu, trasi nta lu portuni e nchjiani la scala chi ti truovi supra la destra. Bussi a la porta chi ti truovi de fhrunti e vidi ca ti apira na servitura, Nnci dici ca sini Tumasi
Lubiertu ca igghu capiscia e ti fha trasira.
Tumasi fhicia propi accussìna: domandandu, domandandu, arrivau a Pruscinu, trasìu nta lu portuni chi nci avìa indicatu lu patra, nchjianau la scala e bussau a la porta.
Quandu la serva apiriu la porta e vitta li pumadora nta lu panaru, tutta cuntenta e a vuci avutta dissa: “Signurinu, Signurinu, arrivaru li pumadora de Sambuni”.
Tu sini Tumasi, dissa don Basiliu, ed’igghu accunsentiu. Vieni trasa, vieni cu mia, e doppu chi attraversau nu corridojiu luongu lu porta unta la cucina pemmu sbacanta lu panaru chjinu de pumadora.
Tumasi era sturdutu e allibbitu de tutti chigghi stanzi chi havìa vistu e, senza virgogna, si rivorgiu a don Basiliu e nci dissa: “Signurinu, chi casa scommida chi aviti”, pecchì, nci rispundìu don Basiliu.
A la casa mia, “basta mu alluonghi na manu pemmu pigghji na cosa, ccà, sulu mu sbacantati nu panaru aviti mu fhaciti cientu metri de caminu”.
 
(A casa mia, basta allungare na manu e pua pigghjiara qualsiasi cosa, ccà, sulu mu sbacanti nu panaru depumadora, havìti mu fhacìti cientu metri (rifheriendusi a lu corridoiu luongu).
La scena si concludìu cu nu sorrisu e cu na’ carizza chi, Don Basili nci fhicia a Tumasi, chi era ancora spaventatu de tuttu chigghu chi havìa vistu.
Stu fhattu, lu cuntava Don Basili, cu discrezioni, ed’era nu motivu mu si fhanu quattru risati, quandu si ncuntrava cu l’amici mu mangianu assema quandu s’ammazzava lu puorcu.

Li primi Postali chi arrivaru nta Curnga.
 
Guarda, niputi mio, supa sta muntagneggha a 380 metri supra lu livellu de lu mara, nc’è curnga, chi ava ormai circa 6800 abitanti, e de stu postu, potisti notara ca si domina tutta la chjianura de Santa Eufhemia.
Ojia a lu paisi pua arrivara de cincu punti diverzi, seguiendu li strati chi arrivanu de lu Suncurzu pe cchigghi chi arrivanu de Muntisuoru, de Vibu o de lu Pizzu;
De la scinduta de la Muntagna chi si congiungia cu la strata chi arriva de Santu Pietru, pe tutti chigghi chi arrivanu de Jacurzu o de Fhiladerfia;
De Sambuni, pe chigghi chi venanu da Santu Pietru e arrivanu a lu Chjianu de l’Aria;
De la strata de lu Mundizzaru pe chigghi chi arrivanu de Nicastru o de la Stazioni de Maida e chi porta vicinu a la caserma vecchjia;
De arriedi a lu Campu chi nchjiana de lu mundizzaru e pua nescia arriedi a lu Comuni;
De l’incrociu cu la strata de Rivenzinu chi nescia a lu Polivalenti e chi nchjiana de lu mundizzaru.
Tutti strati asfaltati e buonu pe li machini chi passanu ma puru de fhara a peda pecchì su belli illuminati puru de notta.
Non’era de stu modu a li tiempi de cui stacimu parrandu e chi si rifheriscianu a l‘anni de doppu l’urtima guerra pecchì, no’ nc’era la strata chjiamata circonvallazioni, accussì cuomu no’ nc’era, o eranu sulu carrijiola duva passavanu sulu li ciucci, li muli e li cavagghi mu jianu a Salici o a Trimalu, li strati de lu Mundizzaru e chiggha d’arriedi lu Campu denominata San Giovanni Precursori.
 Puru pecchì li mezzi de trasportu eranu sulu li Ciucci, li Muli e li Cavagghi e chisti, avìanu mu portanu li patruni sulu nta la campagna duva avìanu de zzappara la terra, e sulu pe’ certi perzuni avìanu mu li portanu a lu Pizzu o a Nicastru.
Pe cui avìa mu parta Sordatu pemmu fhacia lu Militari, o mu emigra, bastava mu s’arriva a la Stazioni, mu si pigghjia nu trenu pemmu s’arrivava a Napuli, pe chigghi chi avìanu mu partanu pe l’America, o pennu vannu a Roma o Milanu o ad’attri posti.
Ti dissi già ca nta l’anni ’40 e ’50, li machini chi nc’eranu nta curnga si potìanu cuntara supra li jidita de na manu e de machini agriculi si nda vidìa ancora de menu.
Pe no parrara de Postali chi ti potìanu portara a Catanzaru, a lu Pizzu o a Nicastru pemmu accatti ncuna cosa o mu sbrighi ncuna fhaccenda.
Li merci si portavanu cu li Trojini, Carrietti tirati de Muli, chi portavanu a Curnga Sala, Pasta, Fharina, Sicaretti o materiali de lavoru cuomu Lignami, Cuojiu, Cimentu, Fhierru, Sola pe scarpi e tuttu chigghu chi consentìa a li mastri locali mu portanu avanti lu lavoru o l’attività chi svolgìanu.
La Storia dicia ca li Postali de linea, a Curnga mancavanu de lu tuttu fhina a lu 1913 quandu, pur unta Curnga arrivau lu primu Postali pe Catanzaru.
Si capiscia de nu scrittu de lu Dottori Sebastianu Serrau, Priuri de la Chjiesa de la Mmaculata, chi propi nta chist’annu scriva ca happa mu allonga la quarta Barracca de lu Passu, mu la trasforma nta Garagi, pemmu si menta lu Postali che arrivava de Catanzaru percorriendu la tratta Catanzaru-Curnga.
Allargau la porta e si allongau de la parti de arriedi nmodu mu trasa lu Postali, e accussì fhù fattu.
 
 
La situazioni è dubbiosa pecchì, nc’era sulu nu postali chi arrivava sulu fhina a Maida e no’prolungava la corsa fhina a Curnga (?).
Li machini chi nc’eranu nta Curnga ntuornu a l’anni ’40, eranu chiggha de li Vivacqua, de lu notaru Panzareggha, chiggha de lu Setturi don Pietru Gugghu e sulu doppu parecchiu tiempu arrivaru chigghi de Jacintu Lo Russu e chiggha de don Peppinu Maruncelli chi diventau pua machina de noleggiu pe Curnga.
Don Peppinu Maruncelli e Jacintu Lo Russu, si pigghjiaru la pantente sutta lu servizzu Militari, e na vota congedati de lu Militari, la cunbertiru nta Patenti de guida civili, nmodu mu puonu guidara machini pe li strati senza mu sunu fhermati e arrestati e mu si trovanu na fhatiga duva servia unu chi sapìa mu porta la machina.
Maruncelli, prima mu fhacìa lu Noleggianti, guidava la machina de li Vivacqua accumpagnandu li patruni adduva volìanu mu vanu. Jacintu ambeci, la machina si l’accattau pe l’affari sua e portava gienti de Curnga a Maida, pemmu puonu jira a Catanzaru, oppuru mu si presentanu a la Pretura, chi si trovava propi a Maida, mu sbriganu ncuna pratica.
La machina non’era nu lussu ma nu mezzu de lavoru utili mu porta gienti de nu postu ann’attru quandu nd’avìanu bisuognu.
Maida era lu postu duva li gienti jianu pecchì, oltre ca mu puonu pigghjiara lu Postali pe Catanzaru, nc’era la Pretura duva avìa mi si presenta tutta chiggha genta chi avìa mu risorva ncuna quistioni de leggi. Quandu fhuru asfaltati li strati de la Provincia, puru Curnga potta godìra de lu servizzu de lu Postali de Nicoletti chi portava a Catanzaru passandu pe tutti li paisi chi ncuntrava duranti lu viaggiu cuomu: Santu Pietru, Maida, Jacurzu, Curtali, Cilifharcu, Borgia, San Floru, Roccelletta de Borgia, Catanzaru Marina, Catanzaru Sala e Catanzaru. Lu Postali partìa ale 4,50 la matìna e arrivava a Catanzaru no’ prima de li 8,50.
Tena presenti ca li strati non’eranu cuomu chigghi de ojia.
Nc’era na corza de ritornu chi partìa de Catanzaru verzu li 14,00 pemmu arriva a Curnga no’ prima de li 17,30 passandu de li stessi paisi de l’andata.
Arrivava puru cchiù tardu, e lu motivu non’era dovutu a lu postali ma a l’abitudini de l’Autista chi, pe strata, si mbrijiacava.
Ti cuntu chigghu chi ntisi cuntara.
Supa a tutti li Postali nc’era l’autista e lu fhattorinu, chigghu chi guidava lu postali e chigghu chi staccava li biglietti de viaggiu quandu nchjianava ncunu passeggeru cha avìa mu vajia de nu paisi a n’attru.
L’Autista avìa l’abitudini mu viva vinu e, ad’ogni paisi duva si fhermava, scindìa e si vivia armenu nu bicchieri de vinu, e viviendu a cilifharcu, viviendu a Curtali, viviendu a Jacurzu e a tutti l’attri fhermati, a la fhini era mbrijiacu tuostu e non’era cchjiù ncondizioni mu guida lu postali e mu lu porta a fini corza.
Fhaciendu de stu modu no’ sulu si perdìa tiempu ma puru la sicurezza de li passeggeri era mpericulu e a nente servìanu li raccumandazioni de lu fhattorinu chi lu pregava nomu viva cchiù vinu pecchì igghu continuava lu stessu.
La risposta era sempre la stessa: “no’ ti proccupara tanru la strata, lu postali, la canuscia e camina de sulu”.
Nu jiuornu lu fhattorinu, vistu ca l’autista no’ sentìa de nuggha ricchji e continuava mu viva e mu si mbrijiaca, decidìu mu scinda a Maida e mu lu dassa sul unta l’urtimu trattu de strata.
De stu jiuornu mpua, l’autista capiscìu ca chigghu chi stacìa fhacien du era pericolosu e cominciau nommu viva cchiù duranti lu viaggiu, addirittura rescìu mu si caccia lu vizzu de lu tuttu o, perlomenu quandu era a la guida de lu postali.
Verzu la fhini de l’anni ’50 e a l’iniziu de l’anni ’60, si rivoluzionau tuttu lu sistema de li Postali chi portavanu de Curnga verzu tutti l’attri parti e, quandu arrivau lu Postali chi portava a Sant’Eufhemia, risolvìu parecchi problemi.
Li risolvìu sia pe chigghi chi havìanu mu pigghianu lu trenu ca pe chigghi chi avìanu mu vanu ncampagna mu fhatìganu nta li tierri de lu cannitu, de la gghjioca e attri posti chi si trovavanu propi a la marina.
Era lu Postali de li fhratelli Vicienzu e Vitu Mazza, chi partia de la chjiazza e jia a Sant’Eufhemia passandu pe lu Ponta, Cerzitu, Serini, Cannitu, Ghhjioca e Poligunu e depositandu ad’ogni fermata, zzappaturi, vrazzaruoli e normali passeggeri.
Attrezzi de lavoru a spalla, tra zzappi, runghi, fhoccigghjia e accietti, chi venìanu ligati a lu bagagliajiu, serviettu o viertula, chi si trovava supra lu postali e duva si nchjianava cu na scala ripiegata e ligata cu fhierrufhilatu a lu portabagagli stessu, na viertula o nu serviettu pemmu si porta arriedi lu mangiara de la jiornata, e tutti ncampagna mu si tiranu Bietuli o mu si sbarbanu, mu si simina lu ranu o mu si meta, mu si chjiantanu o mu si cogghjianu pumadora, mu si chjianta o mu si sbroccia ndianu oppuru mu si fhanu attri lavori manuali.
 
Li perzuni chi si lu potìanu permettira, a la partenza conzumavanu lu cafhè a lu Moka Bar, mentre l’attri, nzonnigghjiati, s’assettavanu e si risbigghjiavanu man manu chi s’arrivava a lu postu de lavoru.
Era nu viaggiu cu la guida turistica ncorporata pecchì nc’era sempre ncunu chi commentava sia la fhermata sia ogni passeggeru chi nchjianava o scindìa de lu Postali. 
Dicìa: Simu a Gurniegghi e facìmu la prima fhermata pe’ ncunu chi vo’ mu si inghjia na Bumbula d’acqua fhrisca.
La prima fhermata era a Gurniegghi, a la fhuntana, mu si inchjianu na mbumbula d’acqua mu si rifhriscanu duranti la jiornata.
Mentre lu Postali si fhermava, nc’era sempre ncunu chi si raccumandava a la Madonna de lu Carminu misa nta la coneggha vicina, mu po passara na jiornata senza mali strapunti.
Simu a lu Suncurzu, e ancora lu sula ha de nescìra. Dicìa ncunu.
Viaggiandu verzu la Marina, li primi luci de lu jiuornu si cominciavanu a vidira quandu lu Postali rallentava pemmu supera la curva de Vurzina.
Na curva a gomitu chi mpegnava sia Vicienzu chi guidava ca lu postali stessu chi avìa mu menta sutta sterzu mu po superara st’ostaculu e mu po’ proseguira oltri.
Li commenti no finìanu mai, pecchì nc’era cu sputtìa e nc’era cu parrava a vuci avutta pemmu tena risbigghjianti li zzappaturi chi avìanu mu scindanu nta nu deteminatu postu.
Si nc’è ncunu chi ava mu scinda, arrivammi a lu  Ponta.
Quandu s’arrivava a la Nazionali, ncunu, soprattuttu li zzappaturi chi fhatigavanu ggha li Vivacqui, cominciavanu a scindira pemmu vannu a lu Casinu e pemmu pigghjianu destinazioni a lu lavoru de la jiornata. Passatu lu Ponta, eranu fhermati ogni cientu metri pe cui avìa mu vajia a lu cerzitu, a la chjiana o nta li livari de cuntrada Callipu a lu Fhinicchjiaru.
Ncunu ricordava: Simu a li Serini, vicinu a lu Mara, a Scarciu e a Mudduni.
Quandu lu Postali arrivava a li Serini, la muntagna chi si vidìa de luntanu era tingiuta de russu pe lu sula chi doppu nu puocu sorgìa, e tra sta fhermata e la successiva de lu Cannitu, lu Postali si svotava quasi completamenta de chigghi zzappaturi chi jianu mu siminavanu o mu metanu chigghu chi avìanu siminatu nta li tierri ottenuti cu dirittu de coltivazioni.
Restavanu supa lu Postali sulu chigghi chi avìanu mu vanu a lu Poligunu, viccinu a lu postu duva ojia nc’è l’aeroportu de Lamezia Terme, chiggha zona destinata sempre a la coltivazioni de li Bietuli.
Nta lu postali, a stu puntu, restavanu sulu chigghi perzuni chi avìanu mu partanu pe posti ancora cchiù luntani pigghjiandu nu trenu mu arrivanu a Napuli, Roma o Milanu pemmu studianu, o pemmu si fhanu visitara de ncunu specialista miedicu, o pe sulu jira a Sambiasi o Nicastru mu s’accattanu chigghu chi a Curnga ancora no si potìa trovara.
Ti ricuordu ca li jiornati de li zzappaturi curinghisi venìanu scanditi puru de sti cuosi semplici chi lu viaggiu offrìa, e tuttu si ripresentava nta lu viaggiu de ritornu, quandu caminandu pe’ la strata si fhacìanu nchjianara chigghi stessi perzuni chi avìanu ggha, scindutu la matina stessa.
Na battuta scherzusa, nu scambiu de viduta supa la jiornata passata fhatigandu cu l’amìcu sedutu vicinu, bastava certi vuoti mu ti cunsula e mu ti fha superara cu allegrìa la stanchizza de la jiornata de fhatìga.
L’arrivu nta la chjiazza, mentìa fhini a la fhatìga de la jiornata, od’ognunu tornava a la casa, godiendusi la fhamigghjia sua.
Fhù nta l’anni ’60 e. . . ncun’annu cchjiù doppu chi Curnga e tutti l’attri paisi fhuru dotati de Postali de tutti li generi, de Fhoderaru, pemmu portanu li studenti nta li scuoli superiori de Vibu o di chigghi de Nicastru.