Tagghjiuoli e Nucigghji de Capud’annu

Tagghjiuoli e Nucigghji de Capud’annu
Li buchi duva si conservava lu Ranu.
 
Si lu jiuocu de’lu carriciegghu era fhattu de’ fhigghjiuoli spericolati, nd’havìa n’attru chi fhacìanu li fhigghjiuoli cchjiù fhurbi e smalizziati, chi ‘nci consentìa mu acchjiappanu l’acciegghi.
Era la Tagghjiola.
Venìa fhatta cu nu piezzu de’ fhierru zincatu, no’ troppu fhinu e ne’ troppu gruossu, sagumatu nmodu mu si duna la fhorma giusta. Certi vuoti venìa fhatta de’ nu manicu de’ catu de’ zincu, chi era propri lu fhierru ideali mu si po’ fhara.
Si piegava pemmu si fhacia lu manicu, pua si dassava nu piezzu dirittu duva si sistemava la molla, e si continuava fhaciendu n’arcu e tornandu n’attra vota supra lu manicu.
L’iniziu e la fhini si ncorcinijiavanu ‘nmodu mu si chjiuda la fhorma.
A parti si preparava la parti curva de’ la stessa dimenzioni de’ la parti curva fhatta prima, e pua si fhissava a la parti fhissa dui ganci.
La molla si costruia a lu momentu usandu l’azzaru chi si ottenia vrusciandu nu copertoni de’ machina.
Cchjiù giri si fhacianu, e cchiù fhorta era la tagghjiola tantu chi, havìa mu si stacia attienti quandu si armava nommu nci pizzicava ncunu jiditu.
Quandu si armava la tagghjiola, si apirìa la parti mobili, si fhissava a lu fhermu supra lu fherrettu chi tenia la civatula, e si ammucciava mentiendu terra de’ supra pe’ tala mu si ammuccia a la vista de’ l’acciegghi.
Si usava ligara la tagghjiola cu nu piezzu de’ corda a nu piernu, fhissatu nterra, pe tala nommu si perda ncasu s’acchjiappava ncunu miegghuru o ncunu acciegghu cchjiù gruossu.
Quandu l’acciegghu pizzulava, la tagghjiola scattava, si chjiudìa de’ scattu, e ntrappulava l’acciegghu chi no’ potìa cchjiù volara.
Li tagghjiuoli s’armavanu la matina priestu cu na civatula, e li posti eranu chigghj duva l’acciegghj trovavanu ncunu verma mu mangianu, duva nc’era terra smovuta o lavurata, pecchì nta sti posti, nda trovavanu de cchjiù.
 
Triccannali, lu Varrancu e lu cafhuni de’ Gurniegghi, eranu li posti duva si armavanu li tagghjiuoli, pecchì nta sti posti, li passari, li pettirossi e li miegghura, fhjiundijiavanu. 
Li uortura vicini a chisti posti, l’attiravanu ancora de’ cchjiù, pecchì nc’era ogni sorta de’ fhruttu e de’ virdura.
 
Era n’attrezzu chi si portava arriedi soprattuttu quandu si jia ncampagna mu s’aiutanu li genitori mu zzappanu o mu arramanu la vigna o mu fhanu ncun’attra cosa anzi, eranu propi li patri chi armavanu spessu li tagghjiuoli nta li posti chi miegghjiu canuscìanu.
Puru igghji, “Armavanu li Tagghjiuoli”.
 
Lu dispiettu chi de’ cchjiù si fhacìanu tra li giovanotti, eranu propi chigghi mu s’arrobbanu tra igghi li tagghjiuoli, o mu nci pigghjianu l’acciegghj già pigghjiati a li tagghjiuoli, a l’amici chi l’havianu armati.
Si diventava spessu nimici a morta pe’ sta cosa, pecchì st’azioni, si venìa a sapira subitu o quasi subitu, e no’restava mai ‘mpunita.
 
Nu jiuocu chi ambeci unìa li fhigghjiuoli e li rendìa cchjiù movienti, era lu Ciolè, na rota de fhierru tundu o nu circhjioni de’ bricichetta mbuttatu cu nu piezzu de’ lignu pe’ tutti li strati de’ lu paisi, e puru fhora de’ chistu.
 
Era lu jiuocu prefheritu de’ li fhigghjiuoli tra li nova e sedici anni, e si lu portavanu adduvedè, a tutti li parti duva jianu.
Quandu si nescìa mu si accatta ncuna cosa pe’ la mamma a lu negoziu, era la scusa bona mu si fhacia nu giru cu lu ciolè, accussì cuomu era nu ricattu quandu havìa mu si cumbincia ncunu fhigghjiuolu mu si manda a ncuna vanda chi no’ volìa mu vajia.
 No’ nc’era strata duva no’ nc’era ncunu chi girava cu lu ciolè fhaciendu lu corridori spericulatu anzi, si fhacianu spedizioni pe’ Santu Pietru, fhaciendu cincu chilometri a jira e cincu a tornara, tuttu de’ corsa, tornandu a lu paisi prima possibili, e … senza sosti.
Era propi chista la spida chi si fhacìa tra cumpagni de’ jiuocu e, logicamente vincìa chigghu chi arrivava prima e ‘nci mentìa menu tiempu de’ tutti.
No’ ti nda fhara meravigghjia si ti dicu ca tuttu chistu si fhacìa doppu nu pomeriggiu de’ jiuocu a lu palloni, pecchì è la verità.
Tutti assiemi, si chjiudìa la jiornata cu nu giru pe’ li strati de’ lu paisi cu lu ciolè, e nugghu dissa mai ca si sentìa stancu pecchì havìa fhujiutu.
Ti ricuordu sulu n’urtima cosa chi li cotrari de’ sti tiempi fhacìanu volentieri, puru pecchì, de’ certi punti de vista, rendìa ‘ncuna cosa.
Era n’usanza de’ tutti li cotrari de curnga chi, lu jiuornu de’ Capudannu, a matinata e quandu ancora era scuru, abbussavanu a li puorti de’ li casi vicini o de’ li parienti, sulu pemmu si fhanu l’aguri, a gridati, de’ “BUONU CAPUDANNU”.
Pe’ l’occasioni, tutti si fhacìanu na Mazzareggha de’ lignu, fhatta fhara de’ nu fhalignami, e cu chista pistavanu a li puorti fhina a quandu li patruni non’apirianu e nci dunavanu ncuna cosa pe’ l’aguri ricivuti.
La scena si svolgìa sempre ‘mpiena notta cu li scurrucciamienti de’ li mali capitati chi, eranu obbligati mu si risbigghjianu, mu apirinu la porta e mu fhanu trasira intra li cotrari, pemmu nci puonu dunara nucigghji, nuci, ma soprattuttu scadi, chi eranu na risorza mportanti e la cosa cchjiù gradita de’ li cotrari.
  Sulu rari vuoti si ricivianu ‘nrigalu sordi, e si chistu succedìa, si verifhicava sulu davanti a la presenza de’ nu parente strittu.
Li nucigghji eranu puru prefheriti, pecchì cu chisti, si potìa jiocara ‘nta nu largu qualsiasi de’ lu paisi, cu l’amici, propi a Nucigghji, costruiendu castelli (Totari, tri nterra pe’ fhormara la basi e una misa supra), e usandu la nuciggha cchjiù randa cuomu Mbagghu, pemmu si jiettanu nterra cchjiù totari possibbili de’ chigghji misi njiuocu.
Lu jiuocu consistìa mentiendu nu certu numaru de’ totari nterra, disposti a forma de’ quatratu o de’ rombu, sorteggiara cui havìa mu tira pe’ primu, e cu la perzuna chi nescìa chi tirava lu mbagghu ‘nta na certa posizioni, favorevuli a lu tiru successivu supra li totari.
Lu patruni de’ lu mbagghu cchjiù luntanu havìa dirittu mu tira pe’ primu supa li totari armati, ed’eranu li sua tutti chigghji chi rescìa mu jietta nterra.
 
Bastava nu puocu de’ mira, nu puocu de’ “culu” e na bona coordinazioni, pemmu risulti lu vincituri.
Si restavanu mpiedi attri totari, tirava lu jiocaturi successivu, e si continuava fhina a quandu tutti li totari non’eranu nterra.
De solitu, vincìa cui havìa lu Mbagghu cchjiù randa e … cu era cchjiù fhortunatu.
Cu volìa mu mbrogghjia, bucava cu la punti de’ nu curtiegghu la nuciggha cchjiù randa, nci cacciava cu nu piezzu de’ fhierru fhilatu tuttu l’internu, e la inchjia de’ pagghini de’ chjiumbu, abbundanti ‘nta curnga, pecchì tanti eranu li cacciaturi ‘nta stu paisi.
A conclusioni, mbugghavanu cu cira o cu na scada lu bucu esternu, e lu mbagghu diventava ‘nfallibbili.
Cu rescìa mu mbrogghjia e nommu si fhà scoprira, risultava sempre vincituri; cui ambeci venìa scopertu ‘nta la magagna, venìa de’ tutti ‘ndicatu cuomu ‘mbrogghjiuni, e venìa esclusu de’ lu jiuocu.
Doppu sta descizioni, tornamu n’attra vota a lu percorsu chi staciemu fhaciendu, e caminamu fhina a quandu non’arrivamu a la scinduta de’ lu Spizzu.
‘Nta lu largu de’ lu spizzu, ntuornu a la fhuntana, nc’eranu tri scarpari nta lu spaziu de’ puocu metri l’unu de’ l’attru.
Lu scarparu Joele, lu scarparu Mastru Lia Grassu cu lu fhigghjiu ‘Ntoninu (puru ca fhacìanu spessu attri lavori), lu scarparu Pomparelli, puru Maestru de’ Musica.
Mastru Fhilici dirigìa la Banda misicali chi havìa ereditatu de’ lu zziu Maestru Alfredu, fhamosu compositori de’ Marci pe’ Bandi.
La Banda si esibìa ‘nta li Fhiesti Patrunali e religiosi, puru ’nta li paisi vicini, nonché ‘nta accompagnamenti fhunebri, quandu li fhamiliari de’ lu muortu, richiedìanu l’accumpagnamentu cu la Banda.
Ormai, è inutili mu ti dicu ca ‘nta sti putifhi si acconzavanu scarpi de’ ogni tipu e si ‘nda fhacìanu attri de’ sana pianta, chi si usavanu pe’ tutti l’occasioni. Speru ca lu capiscìsti.
Mo’ ti parru de’ na cosa chi, nta li tiempi difficili de’ lu Fhascismu, venìa usati mu s’ammuccia lu ranu de’ na possibili requisizioni ‘nomi de la Patria, mentre ‘nta annati cchiù tranquilli, mu si conservanu li simienti pe’ la simina successiva: eranu fhuossi abbastanza fuondi. Dui de’ chisti si trovavanu propri a la scinduta de’ lu Spizzu, puocu cchiù sutta de’ lu spiazzu duva si trova la fhuntana, e venìanu usati de’ tuttu lu vicinatu, usanduli nta lu modu chi ti spiegai.
Eranu fhuossi abbastanza fhuondi, e li pareti venìanu isolati cu pagghjia assulicchiata, bella tosta, ncorcinijiata a ruogghi abbastanza luonghi, e appojiati a li pareti nmodu mu si evitava lu contattu direttu de’ li sacchi de’ ranu o de’ attri prodotti, cu li pareti stessi.
Venìanu cumbogghjiati per bene e ammucciati a la vista de’ tutti tantu ca, si non’ieri de’ lu vicinatu, no’ potivi immagginara mancu ca esistianu chisti buchi.
L’artigiani de’ Curnga, lavoraru tantu chi resciru mu sostenanu l’intera economia de’ lu paisi, e li fhalignami, li fhorgiari, li varvieri, li tessitrici, li meccanici, li sarti, li sartini, ecc., sperandu ca no mi scordai de’ nugghu, lavoraru pe’ igghi e pe’ tutta la comunità.
Accussì, puru sta ruga era chjina de’ chisti attività, cu la presenza de’ la sarta Pomparelli, de’ la tessitrici Donna Cuncettina Bianca, de’ lu fhorgiaru Fhrijia Vitu, e de’ lu fhalignami Gugliotta, chi cangìau cchiù vuoti postu de’ lavoru, spastandu la fhalignamerìa ‘nta posti diversi.
St’artigiani lavoravanu fhatigandu de’ l’attività propria ‘nta la casa o, ‘nta locali chi fhacìani parti de’ la casa stessa, ‘nta Catojia.
A li tiempi de’ cui ti stajiu parrandu, la jiornata lavorativa cominciava priestu, e lu ribiegghu de’ lu fhorgiaru chi mortegghijiava lu fhierru cavuddu e de’ lu fhalignami chi schjianava e serrava tavuli e tavuluni, no’ dunau mai fhastidiu a nuggha fhamigghia vicina, e nugghu denunciau mai a nugghu pe’ chisti fastidi, pecchì tutti eranu coscienti ca sti rumuri fhacianu parti de’ li mistieri e ca havìa mu si lavora mu si porta avanti la fhamigghjia.

Sguardi malizziusi
Tra giovanotti e signorini nnammurati.
 
Nta tuttu chigghu chi ti cuntai, no’ ti parrai ancora de’ li rapporti chi nc’eranu tra fhamigghji e fhamigghji, cuomu no’ ti parrai de’ la vita de’ li giovanottini chi, non’haviendu nent’attru ca lu palloni e li jiuochi ‘nfantili de’ cui ti parrai; si trovavanu tra de’ igghi e diventavanu amici spontaneamente, ‘nmodu sinceru accussì cuomu ojia no’ succeda cchiù.
Li giovanotti, amici tra de’ igghi, ajiutavanu li fhamiliari nta li lavori de’ la campagna, passijiavanu assiemi, si scangiavanu opinioni, jiocavanu e si stimavanu voliendusi bene, cuomu fhussaru fhrati.
Quandu cominciavanu mu amoreggianu, eranu interminabili l’attesi e li passijiati pe’ na certa ruga fhina a quandu no’ si rescìa mu si vida chiggha chi si considerava la nnammurata, armenu pe’ n’attimu.
No si potìa passijiara masculi e fimmini, cu manu ‘nta la manu nta la chjiazza, accissì cuomu succeda ojia tra nu giovanottu e chiggha chi magari potarìa diventara la fhutura migghjiera.
E allora li sguardi si riservavanu tutti pe’ la Dominica quandu si jia a la missa e quandu d’arriedi na colonna, ammucciati a l’uocchji de’ li genitori e de’ l’acciprieviti, si guardava all’ammicciuni, senza essera visti, la cotrara, fhaciendu cenni d’intesa e sguardi languidi chi fhaciendu nnammurara na cotrara.
Mi ricuordu guagliuni appojiati a nu muru o seduti supra nu scaluni, aspettara mu si apirìa n’attimu na fhurnesta o, d’arriedi a chista mu si vidìa passara la guagliuna chi era lu motivu de’ l’attesa, e sulu chistu fhara, bastava mu si sentanu fhelici e … nnammurati.
Li cchiù coraggiosi, nommu si fhanu scoprira de’ li genitori de’ la zzita, o de’ li vicini de casa, a piscunati ruppianu li lampadini de’ li lampioni chi illuminavanu la strata la notta, e la presenza de’ lu zzitu, venìa segnalata de’ na sicaretta appicciata nta lu scuru.
Troppu limitazioni e proibizioni all’eccessu, cu controlli diretti o indiretti supa li fhigghjiuoli fhimmini, tantu de’ proibira la cchiù picciula libertà. Tremenda e penosa era l’attesa de’ viernu, quandu fhacìa fhriddu e chjiovìa, arripatu a na porta cu la solita speranza mu s’affaccia a la fhurnesta la nnammurata. Spessu, li guagliuni ligati de stritta amicizia, si spostavanu de’ nu postu all’attru e si guardava lu riuggiu cronometrandu lu tiempu d’attesa ‘nta na determinata ruga, pecchì no’ potìa essere de’ menu la fhermata successiva chi, rigorosamente, havìa mu era guala a chiggha precedenti e a tutti li successivi. Eranu li fhermati fhatti duva ognunu havìa interessi pe’ na cotrara chi abitava ggha e, a rotazioni, vinìa soddisfatta la necessità de’ tutti chigghi chi facìanu parti de’ lu gruppu.
Capitava puru ca li posti duva si trovavanu li vari fhidanzati, si trovavanu luntani tra de’ igghi, e accussì, duppu na passijiata bella longa sutta la via, lu gruppu havìa mu si sposta a Natraccola, o la lu Chjianu de’ Vivacqua o addirittura a Rivenzinu o lu Chjianu de’ l’Aria e chistu si fhacìa cu tanta semplicità e tanta spenzeriatezza.
No’ cu la machina cuomu succeda ojia ma, a peda e sulu a peda, macinandu chilometri supra chilimetri, ncoraggiati sulu de’ chidda leggera speranza de’ na picciula ma mportanti visioni.
Li possibilità pe’ li fhidanzati mu si potìanu vidira eranu puocu: a la Missa de’ la dominica, a lu Catachismu, a li fhiesti cumandati duva si fhacìanu li prigessuoni e li fhiesti de’ chjiazza, li posti duva li signorini jianu mu si mparanu mu tagghjianu, mu cusanu e mu ricamanu, e pe’ urtimu li fhuntani de’ lu paisi duva li signorini venìanu mandati de’ li mammi, cu li dovuti raccomandazioni, mu pigghjianu acqua de’ vivira pe’ la casa. Rari vuoti ncuntravi ‘ncuna signorina a passeggiu verzu la perifherìa de’ lu paisi accussì, Santu Lia era lu postu duva li signorini jianu ggha li Monachi mu si mparanu mu ricamanu, Gurniegghi era la fhuntana duva si pigghjiava l’acqua pe’ vivira accussì cuomu era la fhuntana de’ lu Passu, de’ Natraccola o attra, e nta st’occasioni, lu fhidanzatu de’ turnu, lu cchiù de’ li vuoti, era ggha presenti, sempra ad’aspettara la fhidanzata.
sorgìanu liti tra zziti quandu ncunu de’ li fhidanzati era assenti o no’ si presentava a l’appuntamentu, e ‘nta sti casi ntervenianu sempre l’amici, li vicini de’ casa, chi diventavanu li messaggeri, portandu mbasciati o bigliettini scritti. Lu Catachismu era frequentatissimu pe’ la soddisfazioni de’ l’Acciprieviti de’ l’epoca, ed’eranu affollati pecchì li Catechisti eranu spessu li signorini fhidanzati. No’ nc’eranu telefhoni ‘nta li casi e nemmenu telefhonini, e accussì l’unicu modu mu si vidanu e mu si parranu era la presenza de perzuna ‘nta nu determinatu luogu e ‘nta nu determinatu momentu, oppuru lu messaggiu scrittu mandatu tramiti l’amica fidata. Mi ricuordu serenati fhatti a lu chiaru de’ luna, soprattuttu quandu era prossimu lu fhidanzamentu de’ intra ed’era ... certu.  Cu Chitarri, Fhisarminichi e Mandulini, e cu cantanti mprovvisati, sutta la fhurnesta de’ l’amata o vicinu a l’abitazioni de’ chista, si cantavanu canzuni d’amuri appassionati chi fhacìanu nnammurara ancora de’ cchiù li fhidanzati rendienduli ancora cchiù uniti.  Li Chitarristi e Fhisarmonicisti, quandu no’ facìanu parti de’ la cricca de’ l’amici, venìanu pagati pemmu assolvanu a lu compitu de’ accumpagnaturi musicali e spessu, pemmu si fha canuscìra de’ la nnammurata, cantava puru l’interessatu, magari stonandu ‘ncuna nota, ma vogliosu mu si fha ricanuscira de’ la zzita. L’accumpagnamentu non’era sulu musicali pecchì fhiaschi de’ vinu, pana e suppressati, chi diventavanu spessu la paga pe’ li sonaturi pe’ l’opera prestata, rallegravanu ancora de’ cchiù la cumpagnia e accussì la musica diventava cchjiù cavudda e appassionata.
Quandu ncuna Serenata non’era gradita, soprattuttu de’ li genitori de’ iggha, la stessa serenata diventava na rissa e nu scambiu verbali de’ paluori offensivi e no’ sulu, pecchì catati d’acqua, no’ sempre potabili, venìanu jiettati ‘ncuogghu de’ li cantanti. Sti situazioni de’ cuntrastu, eranu sulu scaramucci chi portavanu a li famosi fhujitini chi si concludìanu però pacifhicamente cu lu matrimoniu. A la fhini, cuomu nta li fhavuli cchiù famosi, tutti vivianu “Fhelici e Cuntienti”.