Li Ricamatrici de’ via Nazionali

Li Ricamatrici de’ via Nazionali
Cchjiù ca fhorgiari, artisti de’ lu fhierru
 
Mo’, simu supa a Via Nazionali e ni stacìmu dirigiendu verzu lu Spizzu, duva fhinimu tuttu lu percorzu, tornandu ‘nta lu postu de’ duva havìamu partutu. Guarda, sutta sta curva, chjiamata Curva de’ Cumba, de’ duva si po’ vidìra nu panorama magnifhicu, ‘nc’era la fhorgia de’ Mastru Micu Lo Russu, ricordata puocu, ma duva si fhatigava de’ notta a notta.
La fhorgia era a lu pianu terra de’ la sasa duva stacìa mastru Micu, puocu visibili de’ la strata principali, ma duva ‘nc’era nu spiazzu davanti duva venìanu ligati e ‘mperrati Ciucci e Cavagghi.
E’ inutili mu ti dicu ca oltre a ‘mperrara ciucci e cavagghi si fhacìanu puru serraturi, tripoda cucchjiari e tant’attri cuosi.
Ancora cchiù sutta de’ sta fhorgia, ‘nta na casa isolata, mi ricuordu vagamente la presenza de’ nu “Peggharu”, ma mi sfuggia lu nomi de’ la perzuna chi fhacìa stu lavoru.
Mo’, simu vicini a lu Spizzu, ma ‘nta sti casi sutta strata, misi a fhila una doppu l’attra, ‘nc’eranu li signorini chi racamavanu, e mentre ricamavanu guardavanu la strata de’ duva li giuvanotti passavanu sperandu mu vidanu e mu sunu visti de’ sti signorini chi ricamavanu.
Ricamavanu li sorelli D’amicu (‘Ngiuanna e Maria), chi emigraru pua ‘nta l’America assiemi a li fhrati Micu e Giuanni; fhimmini seri ed’educati, ma ricamavanu puru attri signirini chi però no’ mi ricuordu li nomi, e chi si jiungìanu ‘nta sta casa, pemmu ricamanu o mu si mparanu mu ricamanu, sutta l’uocchjiu vigili de’ la “Maistra”.
 
Nu perzunaggiu caratteristicu chi abitava supa sta fhila de’ casi, era cumpara Rosaru Mazzotta, n’omoni, orgogliosu de’ igghu stessu, chi si dedicava a la mandra de’ Crapi, chi pasculava nta li dintuorni de’ lu paisi senza dara fhastidiu a nugghu.
Era de’ caratteri giocosu, ma rispettosu verzu tutti; fhrischjiettava sempre e cantava sempre na canzuni de’ guerra, “Il Piave”, a vuci avutta quandu, a passu de’ Bersaglieri, scindia ‘nta la chjiazza doppu havìra però sistematu li Crapi, distribuitu lu Latta, e na duru jiornata de lavoru.
Era unu de’ chigghi chi, nta lu paisi, cunzignava lu Latta a domiciliu. Cu nu Catariegghu d’alluminiu e cu na misura de’ quartu de’ Litru appriessu, abbottijiava a la porta de’ li clienti sua, e cunzignava lu quantitativu de’ latta richiestu.
Era nu perzunaggiu socievoli, de’ bona induli chi ncunu, bonariamente, tentava mu pigghjia ‘ngiru cuomu combattenti de’ guerra.
Quandu ncunu nci dicia ca havìa partecipatu a la disfatta de’ Caporettu, nci tenìa mu dicia ca igghu, chiggha Battaglia no’ la cumbattìu, ma ca havìa cumbattutu e partecipatu la Battaglia de’ lu Piave, duva nci impediru a l’esercitu Austro-Ungaricu, mu avanza anzi, lu costringiru a la ritirata, e a la fhirma de’ l’Armistiziu e quindi a la fhini de’ la guerra.
Una de’ li cchiù ‘mportanti fhuorgi de’ Curnga, fhu chista chi si trova ancora all’iniziu de’ lu Spizzu e chi appartena ancora a la fhamigghjia de’ li Grassi (Mastru Micu, Mastru Giuanni, Mastru Vitu e Mastru Carru).
Havìa fhorse li clienti cchjiù numerosi rispettu a tutti l’attri Fhorgiari, soprattuttu tra li proprietari de Ciucci, ma puru de’ Vacchi e Vua de’ mperrara, pecchì all’epoca, venianu sfruttati sia cuomu mezzu de’ trasportu ca cuomu mezzu de’ lavoru, mu si lavuranu li tierri, soprattuttu chigghi chi si trovavanu nta posti dirupati, duva li Trattori no’ potìanu arrivara.
 Li nominai tutti pecchì, cu prima cu doppu, tutti fhatigaru ‘nta sta fhorgia.  Nta la realtà, sta Fhorgia era de’ Mastru Ntoninu Fhrijia, chi si trovava puocu cchjiù sutta luongu la via Ospiziu, accattata de’ Mastru Lia Grassu, cu lu scopu mu avvìa a stu mistieri lu fhigghjiu Micu, chi havìa già fhatigatu de’ Fhorgiaru, nta la Fhorgia de’ lu Zziu Vutu Fhrijia, chi si trovava ‘nta lu Passu.
 
Chistu fhu possibbili pecchì Mastru Ntoninu era già anzianu e prossimu a la penzioni, e puru pecchì no’ nci dispiacìa mu ceda la Fhorgia a cui havìa la voglia mu continua a fhatigara cu stu mistieri.
‘Nta sta putifha si fhacìa de’ tuttu e si producìa tuttu chigghu chi era possibbili produrra ‘nta na fhorgia.
Si ‘mperravanu Ciucci e Cavagghi, si Tosavanu, si ‘mperravanu li Vua, si fhacìanu fhoccigghjia, runchi, s’affilavanu curteggha ma soprattuttu si fhacìanu accietti pe’ li tanti Putaturi presenti ‘nta Curnga, ma puru pe’ li perzuni normali, chi li usavanu mu tagghjianu ligna pe’ lu fhocularu, presenti nta tutti li casi.
Lu fhocularu de’ nta li casi non’era sulu lu Riscaldamentu de’ la casa, ma era lu fhornellu duva si cucinava e si preparava lu pranzu de la jiornata.
L’operi cchiù prestigiosi eranu li Barcuni e li Canceggha de’ fhierru chi fhacìanu ‘nta sta fhorgia e chi puru ojia, girandu pe’ lu paisi, si puonu ancora ammirara cuomu operi d’arti de’ chisti manufhatti.
Tanta bravura nci volìa quandu, de’ nu piezzu de’ fhierru grezzu, havivi mu costruisci n’accetta pe’ Putaturi. Semplici sulu a dira, ma abbastanza complicatu de’ fhara, pecchì l’uocchjiu, la Testa de’ l’accetta (a fhorma de Trapezio), havìa mu s’adegua a li dimenzioni de’ l’accetta stessa chi si volìa fhara. (Nta l’uocchjiu, venìa mpilatu lu manicu de’ lignu de’ l’accetta). Pua, havìa mu si duna la fhorma de’ cugnu, bella spilata e de’ profhilu triangolari, e la parti fhinali, havìa mu era dura e tagghjiente accussì mu po’ tagghjiara cu lu minimu sporzu fhisicu.
Nu perfettu alliniamentu tra manicu e accetta, fhacianu de’ lu Mastru, n’intendituri e nu randa espertu d‘Accietti.
La cosa cchjiù difficili era comunque chiggha fhinali, chi consistìa ‘nta la “Tempera” de’ l’accetta, nmodu mu si renda dura e resistenti.
 
La Tempera era ed’è n’operazioni chi si fhà supa a li materiali metallici, riscaldanduli e rifhriddienduli cchjiù o menu velocemente, ‘nmodu mu si renda cchjiù duru e resistenti all’usura.
Doppu chi si rende ncandescenti la parti tagghjente de’ l’accetta, si menta nta l’acqua o nta l’uocchjiu de’ machina, cchjiù vuoti e nta tiempi adeguati, ‘nmodu de’ ottenira la durezza voluta.
Era l’esperienza de’ lu mastru chi sostituia sia lu termometru ca lu cronometru, mu misura la temperatura e lu tiempu, e de’ chistu, nescìa fhora n’accetta bella e pronta pe’ l’usu.
L’operazioni era diffhicili pecchì, no’ rispettandu lu tiempu utili mu si rifhridda, l’accetta si potìa spaccara e potìa presentara spaccaturi, diventandu tantu dura chi si potìa ruppira a lu minimu sporzu, mandandu all’aria tuttu lu lavoru fhattu.
Nu buonu risultatu fhinali, era nu vantu pe’ lu Mastru, chi nci potìa portara notorietà, cchjiù lavoru e attri clienti.
 
 
Fhjunda, Pizzicu e Mazzicu
 
Doppu chi ti parrai pe’ sommi capi de’ quantu era difficili pe’ nu Fhorgiaru costruira n’accetta, vuogghjiu mu ti parru de’ la Putatura de’ l’arvuri e de’ li vantaggi chi chista apportava sia a li pianti ma puru a li fhamigghji chi trovavanu ‘nta li fhraschi e ‘nta li ligna, na risorsa mportanti mu s’appiccia lu fhocularu e riscaldara la casa de’ viernu, ma soprattuttu mu si prepara de’ mangiara.
Fhorse no’ nci cridi, ma de’ chista operazioni ‘nda traianu vantaggiu puru li cotrari chi sfruttavanu st’occasioni pemmu trovanu li strumenti de’ nu jiuocu de’ cui ti parru n’attru puocu.
La Puta era na’ tradizioni pe’ li curinghisi chi, armenu na’ vota ogni dui anni, fhacìanu putara li Livari ‘nmodu mu si ringiuvaniscianu li pianti e mu rendanu ancora de’ cchiù.
L’attrezzi de’ li Putaturi eranu fhatti de’ accietti de’ diverza dimenzioni e de’ diverza utilità, e mu si fhanu e mu si rendanu ancora cchiù tagghjienti, eranu propi li Fhorgiari chi acconzavanu e affilavanu st’arnesi.
A la putatura eranu ‘nteressati puru li guagliuni, sia fhimmini ca masculi, pecchì de’ chista, havìanu a disposizioni materiali pe’ li jiuochi chi prefherianu.
Mentre aiutavanu mu si sistemanu li mazzi de’ fhraschi ‘nta li vari magazzini, nta li catojia e davanti a la casa, controllavanu pemmu trovanu dui bastuni chi potìanu essere utilizzati cuomu “Mazzicu e Pizzicu”, mu li puonu usara pe’ stu jiuocu.
Lu nomi de’ stu jiuocu varia de’ regioni a regioni e puru de’ zona a zona.
Lu nomi veru de’ stu jiuocu è: lu jiuocu de la Lippa, e ha origini chi risalanu addirittura a lu XV seculu. E’ diffusu ‘nta vari nazioni europei, e tra chisti, periodicamente, si svolgianu tornei agonistici.
 
Li dui Bastuni, doppu chi s’havìanu scorciatu cu curteggha, cacciandu tutti li ramiegghi chi no’ servìanu e tutti li noduli, si tagghjiavanu a la lunghezza giusta ed’eranu accussì pronti mu si jioca a lu Mazzicu e a lu Pizzicu.
 
Vistu ca ti parrai de’ nu jiuocu d’attri tiempi, vuogghjiu mu ti spiegu cuomu si jiocava de’ li parti nuostri e ti anticipu dicienduti ca si potìa jiocara ‘nta nu spiazzu cchjiù o menu randa e d’ cchjiù perzuni contemporaneamente, ma si prefheria jiocara ‘ndui o a coppia, mentiendu a confrontu dui squatri ognuna fhatta de’ dui jiocaturi.
 
Mu si jioca era necessariu disponira de’ dui o de’ nu sulu bastuni, (lu Mazzicu) luonghi settanta ottanta centimetri, e de’ n’attru piezzu de’ lignu cchiù picciulu (lu Pizzicu) appuntutu de’ tutti li dui parti.
Si potìa jiocara ‘ndui o a coppie. Lu jiuocu a dui prevedìa nu circhjiu disegnatu ‘nterra de’ nu metru de’ raggiu o puocu cchiù, cu nu jiocaturi misu nta stu circhjiu, e chi havìa mu difhenda cu lu mazzicu, cercandu mu evita ca lu Pizzicu, lanciatu de‘ l’attru jiocaturi verzu de’ igghu, cadìa all’internu.
Lu jiuocu diventava cchiù difficili quantu cchiù randa venìa fhattu lu circhjiu de’ difhendira.
 
Lu jiocaturi cu lu Mazzicu si mentì anta lu centru de’ lu circhjiu, e havìa mu difhenda st’aria, cercandu mu alluntana cu lu Mazzicu, cchiù luntanu possibili lu Pizzicu chi ‘nci lanciava l’attru jiocaturi.
 
Lu jiuocu era cchjiù difficili pe’ cu stacìa ‘nta lu circhjiu mu difhenda ca pe’ chigghu chi lanciava lu Pizzicu, accussì cuomu si fhacia ‘nta lu Basebball, a sicundu de’ la dimenzioni de’ lu circhjiu de’ difhendira.
 
Si scangiavanu li posizioni quandu lu Pizzicu cadìa interamenta all’internu de’ lu circhjiu disegnatu.
Si si fhermava supra la linea, allora lu difhensori havìa possibbilità mu rialluntana lu pizzicu, fhaciendulu girara ‘nta l’aria e pistandulu a lu vuolu cu cchiù fhorza possibbili ‘nmodu mu si manda cchiù luntanu possibbili.
Chigghu chi lanciava lu Pizzicu, si l’ammucciava arriedi li spagghi pe’ tala nommu si fhà vidira de’ l’avversariu nta chi modu stacìa lanciandu lu Pizzicu (de travierzu, pe’ drittu, rotandu, saltellandu) ‘nmodu mu ‘nci renda difficili a l’avversariu mu lu colpiscia.
Quandu si jiocava ‘ncoppia, ogni squatra era fhatta de’ dui jiocaturi. Dui difhendianu dui buchi fhatti ‘nterra, e dui lanciavanu lu Pizzicu de’ na parti all’attra sperandu ca l’avversariu sbagghjiava.
Li fhuossi eranu picciuli rispettu all’attru jiuocu, de’ decia – quindici centimetri, chi era la sede de’ lu Mazzicu, ed’eranu misi a sia o sette metri l’una de’ l’attra.
Chigghi chi lanciavanu lu Pizzicu, havìanu mu si mbicinanu lu cchiù possibbili a la buca, e si scangiavanu de’ postu sulu quandu la distanza de’ lu pizzicu era ‘nferiori a nu parmu de’ manu de’ la Buca.
Ogni vota chi succedìa chistu, li jiocaturi si scangiavanu la posizioni: cu difhendìa havìa mu lancia, e cu lanciava lu pizzicu havìa mu difhenda cu lu Mazzicu.
La posizioni cchjiù mportanti era chiggha de’ la difhesa cu lu Mazzicu, pecchì l’attri dui jiocaturi havianu de’ ricogghjira lu pizzicu che venia sbattutu a distanza, spessu esagerata rispettu a li basi, ed’era nu jira avanti e arriedi chi, a la lunga, stancava.
Mentre venìa recuperatu lu Pizzicu, chigghi cu lu Mazzicu jienu avanti e arriedi tra na buca e l’attra, cuntandu li passaggi, e cercandu mu arrivanu a lu numaru stabilitu a iniziu jiuocu (ad es. 500), standu attienti, durante l’assenza, nommu l’avversariu mentìa lu pizzicu ‘nta la buca.
Ogni vota chi chistu si verifhicava, li jiocaturi havìanu mu si scangianu de’ postu.
Ogni rioni havìa lu campu o li campi de’ jiuocu, accussì, diventaru fhamosi lu “Chjianu de’ Menzalora”, La Villa, lu Passu, Pruscinu, la Ndolerata, Rivenzinu, lu Chjianu de’ Vivacqua, Natraccola, la Petra Chjiana, la Serra de’ Cianciu, lu Spizzu, la Gabbina, Gurniegghi, Santu Lia, San Franciscu, lu Chjianu de’ l’Aria e li Pigghi, e tutti li rioni de lu paisi, pecchì, li machini no’ circolavanu anzi, nd’havìa tantu puocu, chi lu periculu pe’ li fhigghjiuoli era ridottu a lu minimu.
Capitava puru chi, jiocandu a lu Mazzicu e Pizzicu, si ruppìa ncunu vitru de’ ncuna fhurnesta vicina, e quandu succedìa, eranu mazzati da parte de’ li genitori per tutti, senza però ca i danni subiti, opportunamente rimborzati, mentianu ‘ndiscussioni l’amicizza tra fhamigghji.
Si stu jiuocu era chigghu prefheritu de’ li fhimmini, ma fhattu puru de’ li masculi, chist’urtimi giravanu ammienzu a li fhraschi pemmu trovanu na fhurcheggha mu si puonu fhara la fhjiunda, cioè l’arma chi cunsentìa mu s’ammazza ncunu acciegghu e ncuna licerta nta li campagni vicini a lu paisi.
Si ligavanu dui strisci de’ lastica de’ camaradaria de’ bricichetta, nu piezzu de’ sola morbida, ed’era fhatta l’arma cu cui su jia a licierti.
Era n’abitudini fhormara li squatri chi si mentianu ‘ncompetizioni pemmu ammazzanu cchiù licierti possibbili, e ‘nta sta gara, vincìa chiggha squatra chi ‘nd’havìa ammazzatu de’ cchiù.
Eranu spedizioni veri e propi, cu na perzuna chi havìa mu trova li pietri de’ dimenzioni giusta de’ usara cuomu munizioni, e n’attru chi portava nu piezzu de’ fhierru fhilatu duva venìanu ‘mpenduti li licierti ammazzati.
Li pietri li cercavanu li fhigghjiuoli cchiù picciuli, mentre lu capu banda era chigghu chi havìa dimostratu d’havìra la mira cchiù precisa rispettu a tutti l’attri.
Eranu veri e propi stragi chi si fhacianu ‘nta Riola, a Terrata, a lu Varrancu, a Santu Lia, a Trimalu e a Salici, duva si ‘ncuntrava sempre ‘ncunu chi zzappava l’uortu.
Nta sti momenti, quandu ncunu sentìa fhami e volìa mu mangia ncuna cosa, allora “si scarava” ‘ngruppu, e no’ ‘nc’era uortu chi si potìa sarvara, soprattuttu chigghji duva no’ nc’era, ‘nta chigghu momentu, lu patruni. Ed’allora mandarini, arangi, cerasi, fhicu, lattuchi, fhinocchjia e tuttu chigghu chi la stagioni offrìa, costituia lu pranzu de’ lu momentu pe’ tutti.
Certi vuoti venìanu sorpresi de’ lu patruni ed’allora eranu doluri pe’ tutti, pecchì bastava mu si ‘nda ricanuscia unu, pemmu si ricompona l’interu gruppu de’ scaraturi.
Pe’ certi fhigghjiuoli, tornara a la casa era nu’ problema pecchì spessu, oltre ca denunciatu a li Carbinieri, venìa ammazzatu de’ palati de’li genitori, sulu pecchì s’havia alluntanatu de’ la casa oppuru pecchì tornava luordu e chjinu de’ terra, cuomu s’avissa jiutu mu zappa.
Eranu schjiaffi educativi chi no’ fhiciaru mala a nugghu anzi, aiutaru sempre li fhigghjiuoli mu criscianu miegghjiu e ‘nta lu rispettu de’ la legge.
Carriceggha e Tagghjiuoli
 
Simu ancora ‘nta lu rioni de’ lu Spizzu chi diventau fhamosu puru pe’ la scinduta de’ duva si lanciavanu li carriceggha chi si usavanu tantu ‘nta lu periodu de’ cui stacimu parrandu.
Tra li vari jiuochi d’attri tiempi, a parti chigghi de’ cui ti parrai, nd’havìa attri, chi eranu cchjiù pericolosi rispettu a chigghi.
Vuogghjiu mu ti li cuntu, mu ti fhazzu capiscira ca la fhantasìa, la malizzia e la spruntatezza no’ mancava nta li giovanotti de’ na vota.
Lu carriciegghu era nu strumentu pericolosu.
Era fhattu cu na tavula longa nu metru o puocu cchjiù lunga, cu dui assi, unu d’avanti e n’attru d’arriedi, cu chigghu davanti nchjiovatu ammienzu la tavula nmodu mu po’ fhunzionara de’ sterzu, e tri o quattru ruoti de lignu fhissati supa all’assi.
Quandu lu carriciegghu era fhattu cu tri ruoti, la rota d’avanti venìa muntata nmodu mu po’ girara sia a destra ca a sinistra, a sicundu de’ duva la sterzava lu guidaturi.
La scinduta de’ lu Spizzu era lu postu ideali pemmu si parta cu lu carriciegghu pecchì non’havìa mu si mbutta cuomu nta la chjianura, ma ciolava de’ sulu.
Parecchi strati de’lu paisi eranu ancora de’ terra battuta, ma supa a chigghji chi eranu asfaltati, nc’era sempre ncunu gruppu d’amici chi si divertìanu cu lu carriciegghu. Li carriceggha cchjiù randi, portavanu tri o quattru fhigghjiuoli tutti nziemi e, cchjiù randi eranu e cchjiù pericolosi diventavanu pecchì aumentava lu pisu e nci volìa cchiù tiempu e cchjiù fhorza mu si puonu fhermara.
Li fhreni, eranu li scarpi chi si stricavanu supra l’asfaltu o nterra, e pe’ cu no’ l’havìa, eranu veramente “cazzi amari”.
Si fhrenava sempre de’ menu pecchì nugghu volìa mu conzuma li scarpi de’ chistu modu, ma certi vuoti no’ si potìa fhrenara pecchì li scarpi, lu guidaturi, mancu l’havìa e, fhrenara scavuzzu; pua immagginara quantu era dolorusu.
La Via principali venìa attraversata tutta, de’ Cacamuogghu a Gurniegghi, e certi vuoti fhina a lu Suncurzu passandu pe’ sutta la Via o pe la Chjiazza, Armandu Diaz, cu sti carriceggha chi volavanu cuomu lu vientu.
Cu lu passara de’ lu tiempu, li carriceggha diventaru sempre cchjiù veloci, pecchì li ruoti de’ lignu vinnaru prima fhoderati cu nu piezzu de’ cammara d’aria o de’ copertoni, e pua vinnaru cangiati cu cuscinetti a sfera de’ machina o de’ camiu, chi li meccanici de’ lu postu rigalavanu.
Li ruoti de’ lignu rivestuti de’ gumma, si conzumavanu menu e duravanu de’ cchjiù, ma diminuianu puru lu rumuri chi fhacìanu mentra gitavanu nterra o supra la strata asfaltata.
Carriceggha piccirigghi venìanu fhatti de’ li patri pe’ li fhigghjiuoli cchjiù picciuli, ma chisti, venìanu adoperati sulu ‘nta la casa, cuomu fhussa nu giocattulu.
‘Nta sti casi, li ruoti venìanu fhatti cu li fhorticchjia de’ lu fhusu chi usavanu li nanni pemmu fhilanu la lana, senza magari mu si ‘nd’accorgia.
Pe’ li strati de’ lu paisi no circolavanu machini chi potìanu mentìra ‘mpericulu chigghji chi giravanu cu li carriceggha; eranu ambeci li caduti de chisti, chi provocavanu grascinati a li dinocchjia e a li vuvita, chi fhacìanu abbuscara na sarva de’ mazzati quandu si tornava a la casa.