Lu Palazzu Russu e la Scola d’Avviamentu

Lu Palazzu Russu e la Scola d’Avviamentu
 
La storia de’ stu palazzu è de’ chigghi stori chi volanu carrieri carrieri, chi passa de’ vucca a vucca ma chi a la fhini, ha na bona dosi de’ verità.
Lu Palazzu Russu si chiama accussì pecchì esternamenta fhu pittatu cu pittu russu. Era de’ proprietà de’ li Vivacqua, e mi cuntaru ca fhù propi Don Fherdinandu Bevilacqua, chi ccà intra, sistemau donna Giuditta Palermu, pecchì l’avìa misu ‘ncinta. Happaru na fhigghjia chi chjiamaru Bettina (Palermu), chi era bellissima, e chi si spusau cu Don Basiliu Peruginu, e de chistu matrimuoni nescìru quattordici fhigghji. Non’era chista però la storia chi volìa mu ti cuntu, ma semmai chiggha de’ lu Palazzu chi, pe’ certi verzi, fha parti de’ la storia de’ Curnga. Ti dicu subitu ca ‘nta l’anni happa diverzi destinazioni d’usu: li catojia a lu pianu terra, mi li ricuordu cuomu dui auli de’ scola elementari, mentra li piani superiori, de’ duva si goda nu panorama ‘ncantevoli, mi cuntaru ca ospitaru la prima Scuola d’Avviamentu Profhessionali, chi diventau pua la Scola Media “G. Marconi.  Chigghi curinghisi chi arrivaru ‘nta l’Anerica doppu de’ mia e chi happi modu mu li ‘ncuntru, mi cuntaru ca sta scola havìa Laboratori cu banchi de’ lavoru sistemati ‘nta li catojia scuri ma, abitabili, chi appartenianu puru igghi a lu stessu palazzu. Happi modu tramiti st’amici, mu canusciu nu puocu de’ storia de’ sta scola, ricanusciendu ca chista fhu n’eventu chi dassau ricordi chi no’ si puonu cancellara e dunau opportunità de’ studiu a curinghisi chi, diverzamenta, pe’ li tiempi difficili chi si vivianu, non’era possibili havira.
Io, e tanti attri cuomu a mia, no’ puotti sfruttara st’opportunità pecchì havìa già emigratu, e fhorze, puru ca era a Curnga, no’ la potìa sfruttara lu stessu pecchì era già randa mu frequentu sta scola.
Li primi classi fhuru ‘mpatti fhatti cu tanti giuvini curinghisi chi havìanu già superatu l’età pe’ frequentara la scola Media.
Fhigghjiuoli semplici, ma ‘nc’eranu puru giovanotti, quasi uomini, chi frequentaru chista scola, pecchì doppu chi havìanu fhinutu la scola elementari, s’havìanu fhermatu e s’havìanu dedicatu a la campagna o a unu de’ li tanti mistieri chi ‘nc’eranu ‘nta curnga.
L’arrivu de’ sta scola Media ‘nta lu paisi cumbincìu parecchi genitori mu mandanu li fhigghji mu la fhrequentanu, ‘nmodu mu puonu sfruttara tutti quanti l’opportunità chi la scola ‘nci potìa dunara.
‘Npratica, la scola era d’Avviamentu Profhessionali chi avviava l’alunni verzu nu mistieri, ‘mpatti, li Laboratori, eranu veri e propri officini duva si potìa limara lu fhierru, e fhalignamerii duva si serravanu e si lavuravanu ligna, cu limi e sierri e attri attrezzaturi chi non’havìanu nenta de’ mbidiara a li putifhi presenti ‘nta lu paisi.
 
A la scola si studiava l’Educazioni Tecnica e l’Educazioni Artistica oltre a Officina de Lignu e Officina de lu Fhierru; pe’ li fhimmini si studiava l’Economia Domestica.
Cu n’esami integrativu, era possibili accedira a li Scuoli Superiori, e continuara li studi conseguiendu Diplomi e Laurei.
Sembra ncredibili, ma de chista opportunità, vinnaru fhora profhessionisti bravi, e capaci nta vari mistieri (Elettricisti, Idraulici, Meccanici), ma puru Maestri, Nsegnanti, Miedici, Ngegnieri, Abbucati, chi sunu ancora na fhorza-lavoru ‘mportanti pe’ Curnga, ma puru orgogliu pe’ tutta la popolazioni de’ stu paisi.
 
Sulu ricurdi, spessu ligati a chigghu chi sentìvi dira, propi pecchì ‘nta chist’anni mi ‘nda jivi a la Merica ‘ncerca de’ fhortuna.
Superatu lu Palazzu Russu, doppu appena nu centinaru de’ metri, s’arrivava subitu in ‘ncampagna, duva ‘nc’eranu vigni e livari, coltivati a la miegghjiu de’ li proprietari zzappaturi curinghisi.
No’ ‘nc’era sta strata chjiamata circonvallazioni chi porta subitu all’uscita de’ lu paisi, sutta Santu Lia, vicinu a lu Suncurzu, ma carrijiola chi portavanu de’ na parti verzu Salici e Grigghu e de’ l’attra verzu Rivenzinu e ‘Ndolerata, chi sunu nta la parti cchiù avutta de’ lu paisi. Ccà, si trova puru la Casa de’ riposu Maggiori Sebastianu Perugino, e tanti attri attività artigianali chi, cuomu li ‘ncuntramu, ti li cuntu. Io ti puortu de’ la vecchjia strata chi de’ Santu Ruoccu, porta a Rivenzinu, pecchì nta stu postu, nc’era e nc’è ancora la Casa de Riposu Maggiori Peruginu. ‘Nci tiegnu mu ti cuntu nu puocu de’ storia de’ sta casa de’ Mendicitàe, e mu ti descrivu, a la bona, quala sunu l’origini. La “Casa de’ Riposu” nescìu de’ n’idea de’ lu Maggiori Sebastianu Peruginu chi, doppu havìra dedicatu la vita a la Carriera Militari, chi ‘nci dunau tuttu, cuomu igghu stessu dicìa, decidìu mu torna a lu paisi, mu rigala parti de’ tutti l’averi sua, nmodu mu si costruiscia na “Casa de’ Riposu” pe’ l’anziani.
De cristianu combintu e de’ fherventi praticanti, ligatu a la “Confraternita de’ lu Carminu”, nta lu pienu de’ li sua fhacoltà mentali e ‘nta lu massimu de’ li cumbinzioni sua, decidìu mu ‘nci dassa all’Ente Comunali d’Assistenza de’ Curnga, lu terrenu duva havìa mu si costruiscia n’Ospiziu de’ Mendicità pe’ li perzuni cchjiù bisognosi de’ lu paisi de Curnga, e de’ chistu, havìa mu era presidente, de’ dirittu, lu Priuri de’ la Congregazioni de’ Maria Santissima de’ lu Carmelu.
Accussì havìanu decidutu, e accussì fhù fhattu; ‘nfatti, a l’inizi de l’anni ’50, la volontà de’ lu Maggiori Peruginu fhù realizzata, e la Casa de’ Riposu, accussì costruita, fhu affidata a li Suori Fhranciscani de’ lu Signuri de’ Caltanissetta chi, cu amuri e dedizioni, garantiru na dignitosa ospitalità sia a li anziani de’ Curnga sia a chigghji chi arrivavanu de’ attri località de’ la Calabria.
Li primi ospiti de’ sta struttura fhuru: Ngianna Ielapi de’ Filaderfia, Angila Lo Russo de’ Curnga, Maria Cuncetta Russo de’ Curnga, Paulo Russu de’ Montepaoni, Giuanni Zangaru de’ Curnga, Bettina Zarola de’ Curnga.
Ojia, la struttura originali è cadenti, ma nda costruiru n’attra chi costituiscia lu fhjiuri all’occhjiellu pe’ tutta la comunità de’ Curnga.
 
Li Ruoti de’ Carru e la Casa Colonica
 
Doppu chi passammi de’ Rivenzinu e superammi la Casa de’ Riposu Maggiori Peruginu, arrivammi nta lu rioni de’ la Ndolerata, chjiamatu de’ stu modu pecchì ‘nta stu rioni è presente la Chjiesa, dedicata a sta Madonna, fhabbricata sembra, ntuornu a lu 1850.
A la ‘Ndolerata fhatigava Mastru Nicola Curradu, fhalignami specializzatu mu fhacia Ruoti de’ Carru e de’ Birocci, tirati de’ Vua o de’ cavagghi.
Operazioni pe’ nenta fhacili, pecchì li vari parti chi componianu la rota, eranu abbastanza difficili sia mu si fhanu ca mu s’assemblanu.
La parti cchjiù delicata era lu Mozzu, ma puru li Raggi e lu circhjiu esternu non’eranu fhacili de’ realizzara e assemblara.
La scelta de’ lu tipu de’ lignu, chi havìa mu era robustu e resistenti, era una de’ li tanti cuosi de’ fhara, e puru la lavorazioni de’ li vari parti era abbastanza complicata.
Tuttu chistu diventava abbastanza semplici ‘nta li mani esperti de’ Mastru Nicola pecchì, non’adoperava sulu l’attrezzatura adeguata mu lu po’ fhara, ma havìa puru chiggha esperienza e manualità chi, nta sti casi era necessaria, e. . . no’ tutti l’havianu.
Li parti de’ lignu non eranu sufficienti de’ suli mu fhanu l’intera rota, pecchì ‘ncera lu Circhjiuni de’ fhierru de’ fhissara esternamente.
Chistu venìa fhattu ‘nta la fhorgia vicina de’ li canati, Mastru Vitu e Mastru Battista Mazza, chi na vota ricivuta la commessa, provvedìanu mu fhanu lu Circhjiuni.
Na vota fhattu, provvedìanu tutti assema, mu lu muntanu supa la rota de’ lignu, rendiendula accussì ‘ndistruttibbili.
 
Certi cuosi si fhacìanu a lu tuornu de’lignu, attri si fhacìanu cu accetta, scarpeggha, chjianuozzi e raspi, mentra lu circhjiuni venìa muntatu cu l’aiutu de’ lu fhorgiaru, pecchì havìa mu si fhacia a cavuddu, e mu si rifhridda immediatamente, ‘nmodu mu si fhacia aderira perfettamenta a lu lignu de’ lu circhjiu esternu de’ lignu.
A la fhini, si mentianu li chjiova, a cavuddu, chi fhissavanu defhinitivamenta lu circhjiuni cu la rota; fhinìa accussì l’opera.
N’attru fhalignami notu ‘nta Curnga era Mastru Nicola Venezianu chi, ‘nzema a lu fhrata Mastru Giuanni, contribuiu no’ puocu a l’edilizia curinghisi, fhaciendu fhurniesti, puorti e puortuni pe’ casi de’ nova costruzioni.
La fhigura de’ lu Carpentieri, perzuna chi si interessava de’ ‘mpalcaturi pe’ nuovi costruzioni edilizi, venìa ‘nterpretata per bene de’ tutti li dui fhatelli, puru ca, sulu unu de’ li dui si dedicau a stu mistieri fhina a lu penzionamentu.
Mona ti puortu a lu Chjianu de’ l’Aria, e scindimu pua pe’ via Nazionali fhina a lu Spizzu chi, si ti ricuordi buonu, decidimmi nomu percurrimu quandu ierumu ggha vicini.
Ti cuntu attri stuori de’ attri perzonaggi e ti fhazzu mu vidi li posti a cui resta ligata tutta la vita de’ quand’era nu fhugghjiuolu.
Na cosa chi no’ puozzu mai scordara, era la Crita jianca chi ‘nc’era sia a lu Chjianu de’ l’Aria, sia a li Pigghi, ca ‘nta tutti li dintuorni.
La strata principali, denominata ojia Via Vincenzina Fhrijia, era de’ terra battuta, fhatta cu vricciu de’ fhjiumara, sanza conietti pemmu si fhà scurrira l’acqua chjiovana, e cu puocu casi costruiti ‘nta sta zona de’ paisi.
Mi ricuordu la casa e la Masseria de’ lu Massaru Giuanni Zangaru e chiggha de’ Vinanzu Anania chi, ‘nta na staggha vicina, tenìa li Vacchi e li Vua.
Mi ricuordu la casa de’ Battista Curradu (Stivalina) supra lu latu oppostu, autista de’ Don Bernardu Vivacqua; seguianu la casa de’ Mastru Nicola Lo Russo e chiggha de’ mastru Nicola Larizza, vascia e picciula ma, cu ‘mpergulati de’ fhravula e uortu, duva Mastru Nicola coltivava lattuchi, pumadora e ortaggi de’ ogni tipu.
La casa de’ cumpara Franciscu De Vito (Cerasu), l’Officina de’ li fhratelli Sgruomu, nu Parmientu arriedi lu Campu sportivu, dui casi ammucciadi ammienzu l’arvuri de’ li Surrienti e de’ Panzareggha rispettivamente, e la Casa Colonica. Tuttu chisti eranu li casi chi si trovavanu ‘nta lu Chjianu de’ l’Aria, no’ nd’havìa attri.
Verzu la scinduta de’ Don Cesari, si ‘ncuntrava la casa de’ Migliarese, Gugliotta, De Dato, chiggha de’ cumpara Giuanni Zarola e chiggha de’ Mastru Bestianu Terranova, chigghu chi fhacìa lu sartu a domiciliu de’ cui ti parrai ‘nta n’attra occasioni, chigghu, mu capisci miegghjiu, chi fhicia puru lu Mbrellaru.
La casa de’ li Cesari, era na villa, circondata de’ arvuri e chi si trovava nta na posizioni nvidiabili.
‘Nta stu periodu, era abitata de’ Don Cesare Cesariu, Ispettori onorariu pe’ l’antichità e belli Arti, chi scrissa nu libru supra a Curnga: – Itinerari Calabresi, Gruppo Gesualdi editore Tip. La Rapida, 1966 – Roma.
Sta zona era abbastanza isolata de’ lu riestu de’lu paisi, pecchì ‘nc’era troppu Crita, e cominciau mu si popola sulu ‘nta l’anni ‘50, quandu costruiru prima l’INA Casa, e pua l’Edifhiciu Scolasticu.
L’Istitutu Casi Popolari, era n’nte chi costruia casi, e pua li assegnava a cui havìa fhattu richiesta, ma a chigghi chi ‘nd’havìanu dirittu, ‘nbasi a na gradatoria fhatta de’ parti de’ lu comuni.
Li primi Assegnatari fhuru: famigghia Abatino, famigghia Dedato, famigghia Facciolo, Famigghia Sestito, Famigghia Gaudino, Famigghia Piro e, pe’ rinuncia de’ est’urtima, la famigghia Lugarà.
Sta zona de’ lu paisi era ‘mpestata de’ Crita, e ‘nta lu viernu, quandu chjiovìa, diventava tuttu na’ paludi, cu acqua stagnanti diffusa de’ tutti li parti, chi era difficili attraversara.
L’acqua era tanta e stagnava pe’ tantu tiempu chi, li Asgassari e li ranuocchji, li vidivi fhinu a mienzu la strata, e la sira fhacìanu nu concertu de’ cra-cra, chi no’ fhinìa mai, e chi ‘nci assocìau lu soprannomi de’ li cra-cra, a tutti chigghi chi stacìanu e chi abitavanu ‘nta sta zona.
La scinduta de’ Don Cesari, chi ojia è bella sustenuta cu mura de’ cimentu armatu ed’è puru asfaltata, a li tiempi de’ cui ti stajiu parrandu, era nu veru e propriu carrijiuolu, chi costeggiava nu cafhuni, e chi era difficili passara.
De’ viernu era nu’ percursu ad’ostaculi, cu gibbi d’acqua e cu piscuni chi avivi mu canusci per bene, ‘nmodu mu appuoji li piedi de’ supra pemmu pua scindira o ‘nchjianara de’ sta strata.
La strata bbona chi portava ‘nta sta zona, era via Nazionali, chi de’ lu Spizzu ti conducìa fhina a lu chjianu de’ l’Aria, postu duva fhinianu l’abitazioni de’ lu paisi de’ Curnga.
Lu Campu Sportivu, pe’ li curinghisi, esistìu sempre, ma ‘mpratica, cangiau cchiù vuoti ‘nta l’anni, pecchì fhù allargatu e recintatu, soprattuttu all’iniziu de’ l’anni ‘50.
Io mi lu ricuordu senza recinzioni, cu tanta erva e tanti spini, chi però no’ rescìanu mu fhermanu la voglia de’ jiocara de’ li fhigghjiuoli e de’ li giovanotti de’ chigghu periudu, chi si divertianu cu nu palloni de’ gumma e, sulu successivamente, cu nu palloni de’ cuojiu.
Lu Campu era l’orgogliu de’ lu paisi de’ Curnga pecchì, nuggh’attru paisi de’ lu circondariu l’havìa, soprattuttu cu l’erva, cuomu li campi buoni. Non’era lu Stadiu Militari de Catanzaru e nemmenu lu San Vitu de’ Cosenza, ma era nu’ campu chi li curingjisi sapparu sfruttara pecchì jiocaru cu tutti li paisi vicini, e parteciparu, già ‘nta l’anni ‘40, a li primi campionati Propaganda organizzati de’ la Lega Calciu Calabrisi, fhacìendu de’ Curnga nu paisi canusciutu e, soprattuttu cu na squatra temuta de’ tutti.
Fhù ‘nta l’anni cinquanta, cu l’Amministrazioni de’ Don Carru Piru, chi lu campu fhù recintatu e chjiusu cu nu muru a Blocchi, ‘nmodu mu potìa essere omologatu e mu si potìanu disputara li partiti chi, la Lega Calciu, havìa ristrutturatu ‘nta categorì.
Tanti vittori, e la gente si divertìa a lu campu, l’unicu postu duva era possibili scordara pe’ nu puocu, tutti li problemi chi, ‘nta stu periudu, preoccupavanu li fhammigghji de’ Curnga e no’ sulu.
La Guerra havìa fhinutu de’ puocu e li fhigghjiuoli, cchiù libari e spenzierati, potìanu fhinarmente jiocara liberamente a lu palloni. No’ sempre era possibbili disponìra de’ lu campu randa, pecchì li Vacchi de’ lu Massaru Giuanni o de cumpara Fhranciscu, chi abitavanu gghà vicinu, pasculavanu ‘ndisturbati supra stu terrenu, duva l’erva abbundava ed’era bella rigogliosa.
Non’era fhacili mu s’alluntananu accussì cuomu non’era fhacili cumbincìra li Massari mu li caccianu pecchì, a nu pasculu vicinu e gratuitu, non’era fhacili rinunciara.
Cui jiocava, era conzideratu sulu nu’ Pierditiempu. Ogni tantu ‘ncunu jiocaturi cadìa propi supra na Mmerda de’ Vacca, ma non ‘nc’era problema, pecchì la fhuntana de’ lu Chjianu de’ l’Aria gghà vicina, e ‘nta li gibbi d’acqua ‘ntuornu a lu campu, si trovava la quantità d’acqua utili mu si sciacqua e mu si lava la mmerda de’ ‘ncuogghu.
L’urtima casa de’ lu paisi, era la Casa Colonica, fhrequentata ‘nta lu pariudu Fhascista e usata de’ chisti cuomu Campu-Scola pemmu fhormanu li Balilla.
Costringìanu li fhigghjiuoli mu fhanu ginnastica, utili “a lu fhisicu e a la menta”, accussì cuomu dicìa nu slogan de’ chistu periudu. La Casa Colonica, nta l’anni successivi a lu Fhascismu, fhu abitata de’ la fhamigghjia Sgruomu (Mimì, Rinu, Bernardu, Ntuoni).
Puru ccassupra ‘nc’era nu piezzu de’ terra cchiù o menu chjianu, duva si potìa jiocara a lu palloni, ma lu postu duva li fhigghjiuoli venìanu dirottati mu puonu jiocara quandu arrivavanu li randi, era chigghu duva ojia ‘nc’è lu Birillu, chi, a li tiempi mia, era terrenu comunali, e chi era buonu puru mu si jioca a lu palloni.
 ‘Nc’era nu stuolu de’ fhigghjiuoli e cotrari chi volìanu mu jiocanu ‘nta lu campu principali, ma mu si po’ fhara, non’era fhacili.
Lu fhacìanu li cchiù randi pecchì, pe’ igghi, arrivara pe’ primi, non’era segnu de’ occupazioni de’ lu campu pe’ cui, cu la duvuta prepotenza, li cchiù picciuli eranu sempre costretti mu si spostanu supa lu campiciegghu vicìnu e mu dassanu libaru lu campu cchjiù randa.
‘Nta l’incrociu tra Via Nazionali e Via Matre Vincenzina Frijia, ‘nc’era l’Officina de’ Rinu e Mimì Sgromu.
Na’ Barracca enormi cumbogghjiata de’ lamieri zincati, e cu all’esternu parcheggiata costantementi, na’ Trebbia e n’Imballatrici, usati sulu ‘nta lu periudu estivu mu si trebbia lu Ranu de’ la marina de’ Curnga o de’ li muntagni vicini e lu Paisi.
‘Nta chista officina mi ricuordu nu’ Trattori, na Motu Guzzi, Bricichietti e Machini chi si trovavanu gghana pemmu puonu essere acconzati de’ l’esperti meccanici.
A li pareti ‘nc’era ‘mpendutu de’ tuttu: Copertoni de’ Bricichietti, Cammaradari, Catini de’ Bricichetta e tutti l’attrezzi, Chjiavi ‘nglesi, pinzi, cacciaviti e tinagghj, utili pemmu si puonu acconzara li vari mezzi.