Lu Palazzu de’ Vivacqua Tra storia vera e storia cuntata.

Lu Palazzu de’ Vivacqua
Tra storia vera e storia cuntata.
 
Mo’, dassamu Pruscinu e jiamu ‘nta la zona avutta de’ lu paisi, de’ duva si vidanu panorami ‘ncantevoli e duva si domina tutta la chjiana de’ Sant’Eufemia e si vidanu tutti l’isuli cu lu stromboli ‘nta mara.
Li primi dui puorti supra la sinistra, ‘nchjianandu pe’ Santu Ruoccu, eranu la casa e la sedi principali de’ la Setturìa, de’ proprietà de’ Don Pietru Gullu.
Propi de’ st’ufficiu, chi si trovava sutta la casa de’ Don Pietru, doppu la guerra, partìanu l’Uscieri pemmu pignoranu chigghi povari cristiani chi no’ potìanu pagara li tassi; ma l’ufficiu s’affollava puru de’ penzionati de’ guerra e dipendenti comunali, mu si paganu jiornati de’ lavoru, o lu “Carupana” chi era a caricu de’ lu Statu Talianu.
‘Nchjianandu ancora cchjiù supra, s’arriva a l’incrociu de’ la Posta Vecchjia, cu na’ strata chi porta a Natraccola, n’attra a Santu Ruoccu, n’attra ancora a San Giuseppe e l’urtima a la ‘Ndolerata.
 
Supra la destra ‘nc’è lu Palazzu Fherraru, na’ casa randa e ‘mponenti, chi appartena a la stessa fhamigghjia, e duva, pe’ tantu tiempu, lu Dottori Don Pasquali Fherraru, discendenti de’ lu cchjiù fhamosu Dottori Fherraru, Profhessori Ordinariu de’ Medicina e Chirurgìa all’Università de’ Messina, fhacìa lu Miedicu Condottu.
 
‘Nta stu crucivìa, ‘nc’eranu quattru putifhi: tri generi alimentari a nu custurieri chi tagghjiava puru capigghi e fhacìa varvi.
Lu locali chi ni vena de’ fhrunti, era la putifha de Mastru Nicolinu Corsini, custurieri ma puru varvieri.
 
Li clienti sua eranu l’uomini chi abitavanu ‘nta li dintuorni però, propi pecchì era nu bravu custurieri, havìa clienti chi arrivavanu de’ tutti li rioni de’ lu paisi nonostanti, ‘nta Curnga, ‘nc’eranu custurieri a no’ fhinira.
Supa la sinistra, nu generi alimentari chi, cuonu tutti, vindìa puru quaderni, pinni e attrezzi vari pe’ la scola.
Era la putifha de’ Lo Russu.
Era nu passaggiu obbligatu pe’ tutti chigghi scolari chi havìanu mu s’accattanu quaderni, matiti, gommi, pinnini e lu ‘nchjiuostru mu si inchjianu lu calamaru pemmu puonu scrivìra, standu attienti nommu macchjianu lu quadernu sinnò . . . eranu bacchettati.
De fhronti a stu negoziu ‘nd’havìa n’attru, chi prima ospitava la fhalignameria de’ Mastru Umbertu Vonu.
Quandu sta putifha si trasferìu ‘nta n’attru locali, Gullu Giuseppa misa n’attru negoziu de’ generi alimentari. La stessa attività svolgìa Bettinuzza Peruginu, chi gestìa lu negoziu de’ generi alimentari sutta la casa sua, ma chi si trovava puocu cchiù avanti.
La presenza de’ tutti sti putifhi, chi vindianu tutti li stessi cuosi, si spiegava pecchì a Natraccola, ‘nc’eranu dui classi elementari, e a Santu Ruoccu, ‘nta lu Palazzu Russu, ‘nd’avìa ancora attri.
Li clienti cchiù affezionati eranu propriu li scolari, chi eranu obbligati mu passanu propriu de’ sta strata e chi accattavanu sempre la cosa de’ l’urtimu momentu, magari chiggha chi mancava, jiendu a la scola.
Sagghjiendu pe’ San Giuseppe, si potìa vidira Mastru Lia Peruginu chi fhatigava ‘nta la putifha sua duva mona ‘nc’esta nu garagi, a la sinistra de’ l’arcu de’ li Fherrari.
Era nu personaggiu caratteristicu pecchì, puru quandu fhatigava, tenìa la pippa ‘nta la vucca, ma puru pecchì fhu nu Socialista chi no’ rinnegau mai la fhede ‘nta lu partitu. Era soprannominatu Sbuggha Pippi, propri pecchì no’ dassava mai de’ fhumara la Pippa.
Li fhigghji fhimmini partecipavanu all’economia de’ la fhamigghjia, tessiendu de’ notta a notta ‘nta lu Tilaru.
‘Nchjianandu pe’ lu Palazzu Bevilacqua mi ricuordu lu Mulinu e lu Panifhiciu de’ Giuseppe Peruginu.
L’adduru de’ lu papa fhriscu lu sentivi de’ luntanu, e puru ojia chi passaru tanti anni, si ‘nci pienzu, hajiu la sanzazioni ca sientu ancora chiggh’adduru.
Era lu Pana appena spurnatu e nu mistu d’adduri e de’ rumuri chi, nonostanti tuttu, fhacìa sempre piacira sentira e no’ disturbava a nugghu. Lu ribiegghu de’ lu mulinu signifhicava fharina e quindi Pana fhriscu, pitta, viscottina, e l’adduru ti sullevava, soprattuttu a tutti chigghji chi lu Pana no’ si lu potìanu accattara.
Li tiempi de’ cui ti stajiu parrandu, no’ fhuru fhacili pe’ nugghu, ma nonostanti tuttu, la gente campava dignitosamente.
Jiendu avanti mu arrivamu a lu Palazzu Bevilacqua, si ‘ncuntra prima la Chjiesa de’ San Giuseppe fhatta costruira ‘nta lu 1650 de’ lu Dottori Don Micu Coletta.
 Na’ Chjiesa de’ rioni, fhatta acconzara de’ lu Parrucu Donn’Antuoni Bonellu, duva si celebra la Missa sulu ‘nta lu jiuornu de’ San Giuseppe (19 Marzu) .
Mo’, arrivammi ‘nta lu chjianu de’ Vivacqua de’ duva pua ammirara nu panorama magnifhicu. 
Vuogghjiu mu ti cuntu nu puocu de’ storia chi riguarda puru stu palazzu e la fhamigghjia chi l’abitau, pecchì pienzu ca a sta fhamigghjia e a stu palazzu è ligata puru na’ parti de’ storia chi riguarda Curnga e li curinghisi.
Lu Palazzu fhina a l’anni ‘70 era de proprietà de’ li Vivacqui, una de’ li fhamigghji cchiù prestigiosi e ricchi de’ Curnga; ojia è de’ proprietà de’ lu Comuni de’ Curnga chi provvedìu mu lu sistema e mu lu adibiscia, ‘mparti, a Museu Artigianali.
Lu pianu de’ supra, hava saloni chi s’affaccianu ‘nta la chjiazza e de’ li barcuni si po’ vidira nu panorama muzzafhiatu chi domina la Chianura de’ Sant’Eufhemia, e quandu lu tiempu è serenu, si vida puru lu stromboli e tutti l’isuli Eoli.
Belli sunu l’affreschi a lu suffittu, fhatti de’ dui pitturi Pizzutani: Carmelu Zimatori e Diegu Grillu, zziu e niputi.
Lu Palazzu e fhattu supa a dui piani, e ha nu numaru consistenti de’ stanzi; certi su adibiti a magazzini, attri a cucina mentre la maggiorparti sunu saloni de’ rappresentanza, cu giardinu e Terrazzu, de’ duva si goda nu panorama ‘ncantevuli.
L’affhreschi de’ li suffitta fhuru fhatti de’ Ziamatori e Grillu.
Supa sti dui Pitturi, appi modu mu mi ‘mpurmu, e scoprivi ca fhiciaru operi ‘nta parecchi chjiesi de’ la calabria e no’ sulu.
Li notizi chi rescivi mu ricuogghjiu li trascrissi supa nu fhuogghjiu ‘nmodu mu li pua canuscira miegghjiu puru tu.
 
Zimatore Carmelo - Pizzo, 16/07/1850 - Pizzo 20/03/1933
 
Pittore e decoratore insigne senza dubbio fra i più bravi che la città abbia avuto, vero maestro nell’arte dell’affresco e del ritratto. Studiò pittura a Firenze ove fu per breve tempo allievo di Michele Gordigiani, pittore di corte, dal quale apprese la tecnica del ritratto assimilandone i segreti dei chiaro-scuri e le vaporose delicatezze dei volumi.
Sempre a Firenze, si diplomò in disegno ed ebbe, per la precoce bravura, il riconoscimento di maestro.
Dopo molti anni di lavoro in Toscana, si trasferì in Calabria divenendo ben presto famoso e conteso dalle chiese del Meridione.
 
Altri suoi pregevoli lavori si trovano nelle chiese di Pizzo, nella Certosa di Serra San Bruno, a Fabrizia, a S. Andrea Ionio, a Polistena e in centinaia di altri luoghi sacri del Meridione.)
 
Grillo Diego - Pizzo, 26/01/1878 - Pizzo, 23/06/1963
 
Valente pittore e decoratore, nipote dell’artista Zimatore, studiò a Napoli ove ebbe famosi maestri come Michetti e Palizzi.
Diplomatosi in quell’istituto di Belle Arti, ancora giovane, si stabili a Pizzo ed iniziò a lavorare assieme all’ormai conosciuto zio con il quale decorò centinaia di luoghi sacri della regione.
La qualificata coppia di artisti fu circondata da una schiera di promettenti allievi desiderosi di apprendere tecniche e segreti dell’arte classica.
Dipinse paesaggi e nature morte ma soprattutto affrescò, con buoni dipinti, un gran numero di chiese fra le quali ricordiamo: La certosa di S. Stefano del Bosco, l’abside della chiesa matrice di Rosarno e la volta della stessa dipingendo la leggenda della Madonna Nera, le cattedrali di Mileto ed Andria, la collegiata di Pizzo, la matrice di Seminara, di Moliterno (Potenza), di Berna, di Gimigliano, Fabrizia, Serra San Bruno, S. Andrea Ionio, ecc. Fu maestro nell’affresco, nel restauro e nell’arte della decorazione.
 
Tornandu a la storia de’ lu Palazzu chi ti stacìa cuntandu, ti dicu ca l’affreschi cchiù randi e cchiù ‘mportanti si trovanu ‘nta li tri saloni de’ rappresentanza, ma ‘ndava puru ‘nta la cammara de’ pranzu e ‘nta la cucina.
Mi ricuordu n’Attaru a lu pianu superiori, ma mi dissaru ca, mentre restauravanu e trasformavanu certi stanzi, demoliru st’angulu de preghjiera, e costruiru a lu postu sua, gabinetti.
Na cosa assurda, n’OBBROBRIU, na stupidata fhatta de’ l’Architettu progettista e pe’ lu direttori de’ li lavori.
Nta stu scempiu chi fhiciaru, jiungiu puru la Soprintendenza de’ li Beni Culturali, pecchì no’ sappa, nta st’occasioni, ricanuscìra, no’ tantu lu valori artisticu de’ st’opera, ma semmai lu valori morali chi st’Attaru si portava arriedi.
Pe’ la posizioni, la dimenzioni e lu prestigiu de’ la fhamigghjia de’ li Vivacqui, stu Palazzu, pe’ lu populu de’ Curnga, era nu rifherimentu, pecchì vidìanu ‘nta sta fhamigghjia chigga chi potìa dunara lavoru. Eranu generosi, pecchì sfamaru tutti chigghi chi, pe’ fhami, bussaru a lu portuni de’ stu Palazzu.
Pe’ ricordu de’ la sosta de’ Giuseppe Garibaldi a Curnga, chi dormiu propri ‘nta stu Palazzu, quandu vinna lu niputi ‘nta lu 1961, vinna scoperta sta lapidi chi ricorda propi chistu eventu.
Lu Palazzu è tantu randa chi li piani ‘nferiori eranu usati cuomu magazzini pe’ lu Ranu, pe’ lu Vinu e soprattuttu pe’ l’Uogghjiu chi li Vivacqui producìanu ‘nta lu Frantojiu chi si trova all’urtima porta supra la destra de lu palazzu.
Eranu gruossi proprietari e havìanu possedimenti de’ tutti li parti; havìanu tanta arrobba, d’essere la fhamigghjia cchiù ricca de’ lu paisi, la fhamigghjia chi vitta tra li sua discendenti puru nu Podestà, ‘nta lu periodu de’ lu regimi Fhascista.
Puru lu Macininu de’ proprietà è storicu, pecchì fhu unu de’ li primi chi fhunzionau a corrente elettrica. All’iniziu macinava sulu li alivi chi arrivavanu de’ la propietà sua chi era tanta, e chi pemmu si potìa ‘ndividuara, era necessaria la cartina geografica de’ la Calabria.
Fhavareggha, Ruzziegghu, fhiumi amatu, Serini . . . e tanti attri, eranu, no’ semplici proprietà, ma distesi de’ livari, de’ vigni chi no’ finienu mai, fhrutteti e masserii chi fhuru la ricchezza e chi fhiciaru la fhortuna luoru.
Si a tuttu chistu ‘nci jiungi li mandri de’ piecuri, vacchi, puorci e attru, ti pua rendira cuntu de’ quantu potìa essere ricca sta fhamigghjia, chi annomava tra li capostipiti “Fherdinandu, Micu, Fhranciscu Paulu e Fhranciscu Antuoni”.
L’iniziu de lu ‘900 e lu periodu fhascista no’ fhù fhacili pe’ nugghu, e Curnga non’era a lu riparu de’ sti malanni.
La terra non’era de’ tutti, ma appartenìa sulu a li gruossi proprietari, e li gienti campavanu de’ manuvalanza giornaliera chi si fhacìa ‘nta li campagni de’ chisti proprietari.
Si rifhundianu li vigni, si putavanu li vigni e l’alivari, si cogghjianu l’alivi, si vindignava e si zzappava l’uortu e . . . sempre e sulu fhatiga de’ vrazza chi ‘nci rendìa puocu a li povari contadini, obbligati a ‘stu lavoru de’ zzappa.
Era nu’ scegghjia scegghjia tra l’uomini fhorzuti chi potianu zzappara ‘ncampagna, e de’ sti lavori venianu scartati chigghi chi rendienu puocu e chigghi chi fisicamente non’eranu granchè, pecchi ‘nc’era de’ zzappara, e de’ zzappara fhuondu.
Quandu si cominciau ad’emigrara, li campagni si spopolaru pecchì la zzappa no’ rendìa pe’ quantu era la fhatica, e accussi la gente si ‘nda jia ‘nta l’America, a lu Belgiu, ’Nfrancia o a lu Nord Italia.
 
‘Nta stu periodu li gruossi proprietari cominciaru mu si rimogghanu, pecchì zzappaturi no’ si ‘nda trovava, ed’allora chigghu chi era prima lu guardianu de’ li tierri o lu massaru de’ li mandri, diventaru cirunari, cu li tierri concessi a mità, cu l’obbligu de’ parti de’ lu cirunaru mu li coltiva, e cu l’impegnu mu si divida a mità chigghu chi si producìa. Si stabilìa na specie de’ cuntrattu, spessu supa la parola e cu na stringiuta de’ mani, cu cui chigghu chi si producìa si dividìa a mità tra lu proprietariu de’ la terra e chigghu chi la coltivava.
Venìanu ceduti a mezzadrìa tuminati de’ terra, e supa a chisti, oltre a lu ranu, ‘ndianu, ciciari e attru, venìanu allevati mandri de’ vacchi, piecuri e puorci, cu la condizioni però, ca sulu unu supa a cincu puorci allevati era de’ lu Mandranu.
‘Nta stu tipu de’ cuntratti havìanu la miegghjiu sempre l’uomini cchiù fhuorti, chigghi cchiù promettenti fisicamente, cu attri paruoli, chigghi chi potìanu garantira cchiù fhorza e quindi cchiù lavoru e cchiù produzioni.
Li lavori de’ li campi obbligavanu spessu li zzappaturi a sosti fhorzati pecchì, quandu lu tiempu non’era buonu e chjiovìa, li campagni si ‘mpantanavanu e no’ si potìa zzappara e, ‘nta chisti occasioni, li cantini e li Bettuli de’ Curnga eranu chjini de’ gienti.
 
Si jiocava a li carti e si vivìa vinu a no’ fhinira, e quandu ‘ncunu havìa vivutu cchiù de’ lu giustu, si mbrigava pe’ nente, chi spessu havìaniu mu ‘ntervenanu li Carbinieri.
 
Li cantini eranu comunque li posti duva potìvi trovara nu zzappaturi e cuntrattara cu chistu na’ jiornata de’ lavoru, o addirittura pe’ ‘n’intera stagioni, pecchì era de’ uomini chi havìa bisuognu la terra, pecchì, de’ macchinari agriculi ancora no’ si ‘nda parrava e si ‘nc’era ‘ncunu trattori era puru assai.
Mo’ ti cuntu nu’ fhattariegghu chi a mia mi lu cuntaru perzuni anziani, chi canuscìanu la storia de’ Curnga, o pecchì l’havianu vista o pecchì l’havìanu sentuta.
Li Vivacqua, quandu li tiempi eranu veramente difficili, pe’ la fhami chi si palijiava, e li pestilenzi chi no’ si potìanu dibellara, happaru la fhortuna chi nci giràu ‘ntuornu, e chi li misa a lu riparu de’ ogni dannu.
 
Eranu li tiempi ‘ncui la chjiana de’ Sant’Eufhemia non’era ancora binifhicata, e quandu li paludi de’ la marina fhacìanu storia pe’ la malaria e li pestilenzi chi si diffondìanu ‘nta la popolazioni.
Na pestilenza havìa distruttu quasi interamente tutti l’allevamenti de’ lu territoriu catanzarisi e ‘mparticolari de’ chigghu lametinu.
Malaria e ‘nsetti de’ ogni tipu, havìanu contribuitu a la distruzioni de’ gran parti de’ li raccolti e havìanu ammazzatu puru gran parti de’ l’animali d’allevamentu.
No’ morianu chigghi de’ li Vavacqua pecchì happaru l’accortezza mu allevanu vacchi, piecuri, gagghini e tutti l’attri animali de cortilih assiemi a nu buonu numaru de’ puorci.
Fhuru propi chisti chi, scavandu mu trovanu patati e radici de’ mangiara ‘nta lu terrenu sabbiosu de’ li Serini, postu duva si trovavanu chisti allevamenti, dissodavanu lu terrenu distruggiendu nida e ova de’ parassiti chi morianu inevitabilmenta.
 
Chigghu chi si ferifhicau ‘nta attri posti, no’ si verifhicau ‘nta l’allevamentu de’ Vivacqua, consentiendu a chisti, terreni rigogliosi e allevamenti sani chi pottaru fhornira de’ carni tutti li paisi vicini fhaciendu la fhortuna de’ sta fhamigghjiai.
Nu proverbiu dicia:
E’ propi veru ca l’acqua scurra tutta verzu mara.
 
Mi cuntaru ca Fhranciscu Antuoni, de’ Podestà, fhù lu cchiù ‘mportanti componenti de’ chista fhamigghjia. Havìa nu Cavagghu e nu Cucchieri (don Cicciu Grillu de’ origini Pizzutani) e havìa puru na carrozza chi chjiudìa ‘nta stu locali d’avanti a lu palazzu, e chi, mancandu li machini, lu portava a tutti li parti duva volìa mu vajia.
Fhranciscu Antuoni Vivacqua, si spusau cu donna Amelia Romeu e de’ stu matrimoniu nesciru sette fhigghjiuoli.
Antonio (che sposa Giulia Stillitano da Pizzo) la loro figlia Franca sposa un Baldari.
Elisa (che sposa il Deputato Renda da Nicastro) senza prole.
Orsolina (che sposa un certo De Stefano da Girifalco)
Bettina (che sposa Ercole Massara da Monterosso)
Bernardo (rimasto celibe)
Ferdinando (che sposa donna Esterina da Vibo Valentia)
Bonaventura (che sposa la vedova dell’avv. Mancuso, una certa Pugliese Angela e dalla cui unione nasce Bernardino (successivo quasi unico erede di zio Bernardo) ed Amelia divenuta poi moglie del dott. Lazzaro da Catanzaro.
Questa, per sommi capi, la genealogia di questa ricca famiglia curinghese.
 
Lu Pirruocciulu de’ Mastru Nicola Rondinelli
Troppita, Tilara e Fhorgiari de’ Santu Ruoccu
 
Tornamu a li Fhrantoi de’ cui ti stacìa parrandu prima mu apirimu chista brevi parentesi de’ storia locali.
Si n’affacciamu de’ stu muru, propi cca sutta, ‘nc’eranu dui Troppita: chigghu de’ Nicalinu Diacu e chigghu de’ Don Battista Lo Scerbu.
Lavoravanu muru a muru e no’ ‘nci fhù mai rivalità tra li proprietari chi fhacìanu la stessa cosa, ma chi si rispettaru sempre tutti de’ dui.
Addirittura, a Natraccola, ‘nd’havìa n’attru Macininu, de’ proprietà Fhranciscu e Giuseppe Panzareggha e tutti fhatigavanu a gettu continu, jiuornu e notta, tanta era la quantità de’ alivi chi arrivava ‘nta determinati annati, de’ li livari de’ Curnga.
Si scindimu decia metri, ‘nta chiggha carrereggha sutta strata, si po’ vidira lu postu duva fhatigau pe’ tantu tiempu Mastru Peppinu Peruginu (lu Tirannu), n’attru fhalignami de’ Curnga.
Cu passava pe’ la strata sentìa sulu lu rumuri de’ la serra chi tagghjiava tavuli e, ‘nta li belli jiornati, si vidianu li tavuli appojiati a lu muru, ‘nmodu mu si assulicchianu rendiendu cchiù pregiatu e cchiù duru lu lignu.  Perzuna seria e randa lavoratori, puru ca non’era tantu avuttu de’ statura.
Dui soluri, dui Tilara e dui Tessituri. Fhuru li sorelli Serrau, Maria e Laura, chi, cuomu tutti l’attri, fhatigavanu de notta a notta, tessiendu cuvierti de’ ogni tipu fhaciendu de’ stu lavoru la profhessioni luoru.
Tessianu, no’ pe’ igghi, ma pe’ terzi perzuni, tessiendu cuvierti de’ corredu pe’ fhigghjiuoli de’ maritu.
Cuvierti, linzola, asciucamani e tuvagghji de’ tavula, chi venìanu pua rigamati cu l’iniziali de’ nome e cognome de’ li proprietari, e a li tuvagghji venienu fhatti li fhrangi azzombandu fhila chi pendìanu de’ li dui lati.
‘Nchjianandu pe’ Santu Ruoccu, si ‘ncuntravanu dui Fhorgiari: li fhratelli mastru Giuseppe e mastru Vicienzu De Nisi.
Dui fhatigaturi de’ lu fhierru chi si aiutavanu l’unu cu l’attru.
Quandu unu de’ li dui preparava li fherra pe’ ‘mperrara ciucci, l’attru preparava lu zzocculu de’ lu ciucciu, cacciandu lu fhierru viecchjiu e accurciandu l’unghjia mu si sistema lu nuovu.
Fhaciendu d’accussì, potìanu fhatigara de’ cchiù e fhara perdira menu tiempu a li clienti.
Quandu arrivaru li Saldatrici e lu paisi comincìau mu si popola de’ macchinari, li fhorgiari fhuru costretti mu s’adeguanu, pecchì li Ciucci eranu sempre de’ menu, ma si costruianu cchiù casi, e li fhorgiari si trasfhormaru “armandu solietti” pe’ lu cimentu armatu.
‘Nta stu viculu chiusu, ‘nc’era n’attra Tessitrici, Teresina Curradu chi, cu mani fhatati, tessìa puru iggha de’ matina a sira cuvierti de’ ogni tipu.
De’ li mani de’ sta tessitrici nesciru tanti Paramenti Sacri, tuvagghji pe’ Attaru de’ chjiesa, paramenti pe’ Prieviti mu dicianu Missa.
Stu tipu de’ lavoru era cchiù delicatu rispettu a tutti l’attri pecchì, ‘nci volìa abilità e competenza e chisti, ‘nta li tessituri curinghisi, no’ mancau mai e no’ nci mancaru a nugghu.
Mo’ ti cuntu de’ la fhalignamerìa de’ Mastru Nicola Rondinelli.
Era fhorse l’unica chi havìa lu tuornu mu si lavura lu lignu, e cu chistu producìa Mozzi pe’ ruoti de’ Carru, Mortara pe’ pistara Sala Gruossu, diffhusu ‘nta li tiempi de’ cui ti stajiu parrandu, e Pirruocciula pe’ fhigghjiuoli.
Ti sembra stranu ma, lu Pirruocciulu, doppu lu palloni, era lu jiuocu cchjiù apprezzatu de’ li fhigghjiuoli de’ curnga.
Venìa fhattu fhunzionara cu na’ cordeggha ‘ncorcinijiata de’ la punta a la cima de’ lu pirruocciulu, possibilmente ammogghjiata, pemmu aderiscia miegghjiu e de’ cchiù.
Lu modu mu si lancia lu pirruocciulu era diverzu, e cangiava de’ perzuna a perzuna. Certi usavanu lu “tira lazzu”, attri lu “supra mani, attri ancora lu “sutta manu”; lu tira lazzu era lu modu cchjiù semplici ed’era usatu de’ li principianti, de’ li cotrari chi s’accattavanu lu pirruocciulu pe’ la prima vota.
Li cchjiù esperti de’ Pirruocciula, jiocavanu sempre a “supra manu”, ed’eranu ‘ngradu mu lu fhanu girara tantu fhorta chi si sentìa runzìjiara (lu sienti cuomu runzijia, dicìa compiaciutu lu patruni) e girava tantu, chi certi fhigghjiuoli si stancavanu puru mu lu guardanu.
Tutti li periodi eranu buoni mu si jioca a lu pirruocciulu, ma a Curnga, era la fhera de’ la Mmaculata chi li fhigghjiuoli aspettavanu cu ‘mpazienza, mu si lu puonu accattara, pecchì li fherari chi arrivavanu de’ Serra San Brunu, oltre a Majigghi, menzaluori e Sieggi portavanu puru li pirruocciula.
Li pirruocciula cchjiù pregiati, eranu comunque chigghi de’ Mastru Nicola Rondinelli, pecchì eranu li cchiù curati e li cchiù resistenti, pecchì fhatti cu lignu duru, lu cchiù duru chi nc’era ‘ncircolazioni.
Doppu chi s’accattava lu pirruocciulu, havìa mu si trova nu fhorgiaru pemmu si menta la Vombara de’ fhierru, ‘nmodu mu si renda cchjiù pericolosu e mu gira de’ cchjiù.
Li fhigghjiuoli cchiù picciuli e cu no’ potìa mentìra la Vombara, risolvìa lu problema cu n’Attaccia chi si precurava fhacilmente ggha unu de’ li tanti scarpari chi ‘nc’eranu ‘nta Curnga.
 Chigghi chi mentianu li vombari, eranu spessu li discipuli, l’apprendisti de’ putifha, chigghi chi lavoravanu a la fhorgia, e ‘nta chisti occasioni, si fhacìanu parecchi amici.
L’espertu de’ pirruocciula ‘nta la fhalignamerìa de Mastru Nicola Rondinelli, era lu fhigghjiu Lia, chi de’ nu piessu de’ lignu, ‘nta lu giru de’ na ura ‘nda producìa parecchi, unu arriedi de’ n’attru, tutti supra nu stessu lignu.
Havìa comunque mu hava a n’attru cu igghu, pemmu ‘nci gira lu tuornu, chi era ancora a manuvella.
Lu Passu, la Villa, u’ chjianu de’ Menzalora o qualsiasi attru postu de’ lu paisi, era buonu mu si fhanu li gari de’ pirruocciulu, cu lu jiuocu de’ “cu va’ sutta”, cu chigghu chi perdìa, chi rischiava seriamente mu lu perda.
Lu jiuocu cchiù ‘nvoga ‘nta Curnga era propri a “cu va sutta”.
Lu modu mu si scegghjia tra li vari jiocaturi cu havìa mu sta sutta, eranu diversi. Si potìa scegghjira fhaciendu a lu tuoccu, oppuru si mentìa sutta, lu Pirruocciulu chi si fhermava prima de’ tutti, ‘nta n’unicu giru de’ prova tra li vari concorrenti. Na vota stabilitu cu havìa mu si menta sutta, l’attri, a turnu, tiravanu cu cchiù fhorza possibili supa lu pirruocciulu chi era ‘nterra, cercandu mu lu ruppanu prima possibili o mu lu rendanu inutilizzabbili. Tutti ‘nci provavanu mu lu colpiscianu mentre tiravanu, cui no’ ‘nci rescìa, cu destrezza, uniendu li jidita indici e mediu, lu pigghjiavanu de’ nterra e lu jettavanu supra a chigghu chi era ‘nterra.
‘Nc’eranu jiocaturi chi eranu esperti mu fhjiaccanu pirruocciula, e chistu spessu, costringìa ncunu mu si ‘nda vajia a la casa ciangiendu.
Na vota chi lu pirruocciulu era supra lu parmu de’ la manu si dassava cadira supa lu pirruocciulu de’ l’avversariu chi era ‘nterra.
Lu jiocaturi chi sbagghjiava mu tira lu pirruocciulu o no’ rescìa mu tocca chigghu de’ l’avversariu, pe’ tanti vuoti quantu si avìa stabilutu all’iniziu, allora taccava ad’igghu mu pigghjia lu postu de’ l’avversariu, mentiendu ‘nterra lu pirruocciulu sua.
N’attru tipu de’ jiuocu, consistìa mu si spingia lu pirruocciulu chi stacìa ‘nterra, fhina a nu bucu chi venìa fhattu prima de’ cominciara a jiocara (era la meta de’ raggiungita).
A lu pirruocciulu chi arrivava a la meta, a turnu e supa la parti superiori, venìanu dunati tanti corpi (sempre sicundu quantu vuoti s’havìa stabilutu all’iniziu de’ lu jiuocu), dunati cu fhorza e cu la punti de’ la vombara.
Lu scopu era chigghu mu si spacca a dui lu pirruocciulu de’ l’avversariu.
Era propi ‘nta chisti occasioni chi si vidìa la vera amicizia tra dui jiocaturi pecchì, cu era nu veru amicu, fhacìa de’ tuttu nommu ruppa lu pirruocciulu de’ l’amicu.
Lu fhavori si ricambiava appena si presentava l’occasioni. ‘Nc’eranu chigghi chi havìanu lu pirruocciulu de’ riserva, chi usava propri ‘nta chisti occasioni, propi pemmu evitanu mu ‘nci spaccanu lu pirruocciulu cchjiù pregiatu; eranu li pirruocciula accattati a la fhera de’ la Mmaculata, chigghji chi arrivavanu de’ Pulìa.
Lu pirruocciulu diventava spessu nu giocattulu chi ti potìa fhara ciangira, capaci mu spacca e mu rovìna lu pirruocciulu de’ n’amicu, usandu propi la punti de’ fhierru de’ la vombara.
Pe’ nu fhattu de’ chisti, si diventava spessu “nimicu a morta”.