Via Nazionali: Nu Monumentu a li Fhimmini?

Via Nazionali: Nu Monumentu a li Fhimmini?
Attività scordati o sparuti de lu tuttu.
 
Mo’ ti puortu pe’ Via Nazionali e sicuramente hai modu mu ti meravigghji de’ quantu putifhi e negozi ‘ncuntramu pe’ sta via, duva si fhatigava sempre senza nu minutu de’ sosta.
Lu primu mastru chi si ‘ncuntrava era lu Scarparu Pizzonia chi lavorava ‘nta sta carrera, arriedi a la chjiesa de’ la Mmaculata.
Nu catuojiegghu scuru, cu l’attrezzi basi de’ lavoru, e tantu lavoru de’ fhara pe’ tutti chigghi chi ‘nci portavanu lu scarpi de’ conzara o pe’ chigghi chi li scarpi li volìanu fhatti nuovi de’ lu tuttu.
Cu stu lavoru, chi portatu avanti cu tanta dignità e profhessionalità, Mastru Fhranciscu Pizzonia, rescìu mu campa e mu fha campara ‘nmodu dignitosu tutta la fhamigghjia sua, chi era puru numerosa.
Supra la strata principali ‘nc’era “Mastru Cicciu” (Bianca Francesco), chi fhacìa lu stagninu.
Nu saldaturi de’ rami chi scarfava supra nu luci ‘mpocatu cu na ventula a manuvella e chi usava mu salda landi, costruiendu olieri, lantierni, giarri e contenitori de’ ogni tipo e dimensioni. Lu patra era propi lu ‘Mbastaru, chigghu chi fhacìa ‘mbasti pe’ li ciucci e li muli chi ‘nc’eranu ‘nta Curnga, e li fhacìa ‘nta nu suttascala sutta la casa duva abitava. Arrivati a stu puntu, potariamu continuara pe’ via Garibaldie e arrivara a Pruscinu, oppuru nchjianara pe’ lu Spizzu, duva ‘ncuntrarìamu dui mulini ad’acqua chi io però, no’ mi li ricuordu mai funzionanti.
Pe’ mo’ procedimu pe’ la strata principali e pua, quandu superamu Santu Ruocciu e lu Chjianu de l’Aria, scindimu n’attra vota pe’ lu centru storicu de’ lu paisi, e passamu puru de lu Spizzu, chi fhù lu rioni cchiù anticu e chi ‘nci dunau addirittura l’origini a Curnga.
Donna Rina Genovesi, era n’abili Sarta chi era ‘ngradu mu cusa abiti sia pe’ uomini ca pe’ fhimmini. Fhatigava de’ sula ‘nta la casa sua e cusìa abbiti de qualità chi eranu de’ tutti apprezzati.
De’ chista fhimmina, mi resta sulu nu vagu ricuordu, e tranni ca cusia stoffi, no’ sacciu mu ti dicu de cchiù.
Duva ojia ‘nc’esta lu Monumentu all’Emigratu, opera de’ lu Maestru Fharina de Muntirussu, a li tiempi mia ‘nc’era la ’ fhalignameria cchiù attrezzata de’ Curnga. Prima mu ti parru de’ sta fhalignamerìa, vorìa mu ti parru de’ li monumenti in generali, pecchì mi domandai sempre cuomu mai, no’ si nda fhicia mai unu dedicatu a li Fhimmini.
L’uomu penzau mu fhacia monumenti pe’ li caduti ‘nguerra, pe’ l’emigrati, Busti e targhi pe’ perzuni illustri, ma no’ penzau mai mu ‘nda fhacia unu pe’ li fhimmini, casalinghi e mammi de’ fhamigghjia.
Lu dicu pecchì hajiu n’immaggini de’ fhimmina chi, de’ quandu nescìa a quandu morìa, no’ fhacìa attru ca mu penza mu si realizza, prima cuomu signorina e pua cuomu migghjiera e cuomu mamma, no’ risparmiandusi nemmenu quandu ‘nc’eranu de’ fhara lavori de’ uomini.
Pemmu ti fhazzu capiscira miegghjiu, ti cuntu qual’era la vita de’ li fhimmini de’ li tiempi mia, e no’ ti parru de’ na fhimmina in particulara ma de li fhimmini in generali chi, ‘nta lu paisi nuostru e ‘nta tutti l’attri de’ la Calabria, era la normalità e no’ nu casu eccezzionali.
La fhimmina doppu lu matrimuoni e doppu chi havìa assorvutu a tutti li doveri de’ novella sposa, ammienzu a cui ‘nc’era puru lu stara a la casa pemmu si ricivanu li visiti de’ parienti ed’amici, soprattuttu de’ chigghi perzunu chi no’ potturu jira a lu matrimuoni, e chi ancora ‘nci portavanu li rigali, ripigghjiava lu lavoru giornalieru sia a la casa sia ‘nta la campagna.
La mugghjiera si dedicava sia a li fhaccendi de’ casa ca a li lavori de’ campagna duva no’ ‘nci volìa la fhorza de’ l’uomu.
Li fhimmini eranu la benzìna principali pe’ fhara fhunzionara na’ fhamigghjia, e ‘nc’era de’ fhara tantu lavoru duranti la jiornata sia ‘nta la casa ca ‘nta la campagna quandu lu richjiedìa.
‘Nta la casa è facili ‘mmagginara quantu chiffara ‘nc’era pe’ na mamma de’ fhamigghjia, ma fhora de’ la casa, ogni jiuornu e tutti li jiuorni ‘nc’era de’ pigghjiara l’acqua de’ li fhuntani pubblici pecchì, a lu novanta pe’ cientu, l’abitazioni de’ li curinghisi non’havìanu l’acqua ‘nta la casa.
 ‘Nc’era pua de’ lavara li panni, sia chigghi picciuli ca chigghi  randi e pe’ chistu, havìa mu si vajia a la fhjimara (a curnga si jia a Rizza (sambuni), a Rupa o semplicementi a Triccannali), de’ fhara la spisa, accattara tuttu chigghu chi non’era possibili producìra ‘mprorpiu, e tra l’attru, ‘nta lu periodu de’ metitura, de’ vindigna, de’ cogghjira l’alivi o de’ l’erva medica, la fhimmina havìa mu cucina a la casa e pemmu porta ‘ncampagna, all’ura de’ pranzu, nu piattu cavuddu e tantu vinu buonu a tutti chigghi chi fhatigavanu de’ li primi uri de’ l’arva.
Quandu la terra de’ lavurara era puocu e li livari bastavanu sulu pe’ la fhamigghjia, allora la fhimmina era ‘mpegnata ‘mprima perzuna pemmu liga li spichi de ranu e pemmu cogghjia l’alivi chi portava a lu fhrantojiu mu producia l’uogghjiu pe’ la fhamigghjia.
Hai mu sai ca la fhimmina, la matina si izzava prima de’ l’uomu pecchì havìa mu appiccia lu luci e mu prepara na vivanda cavudda pe’ lu maritu, chi era spessu la pasta scarfata o la verdura scarfata chi havìa restatu de lu jiuornu prima. Havìa mu prepara puru lu serviettu o stavajiuccu, cu nu’ piezzu de’ pana e de’ cumpanaticu, chi servia mu sostituiscia lu pranzu quandu la terra o lu lavoru era luntanu de’ la casa e non’era possibbili tornara pemmu mangia.
Pana abbondanti e Fhrittati de’ ova fhrischi, sardi salati, fhormaggiu, alivi scacciati o sutta sala, baccalà fhrittu e attru, era chigghu chi de’ solitu si portava arriedi lu capu fhamigghjia quandu jia luntanu mu fhatiga. Tuttu lu mangiara, era cumbogghjiatu ‘nta nu stavajiuccu abbastanza randa e ligatu cu n’azzuombu.
Era chistu lu serviettu o lu stavajiuccu de’ lu pranzu de’ la jiornata.
Oltre all’uomu, ‘nta certi fhamigghji ‘nc’eranu attri vucchi de sfamara: lu puorcu, chi dunava la carni pe’ lu viernu, la crapa chi dunava tutti li jiuorni lu latta pe’ li fhigghjiuoli cchiù picciuli, li conigghji e li gagghjini, puru igghi ‘mportanti pe’ la carni e l’ova, e a chisti animali havìa mu si penza prima ancora mu si risbigghjianu li fhigghiuoli cchiù picciuli, pe’ cui la mamma riservava la miegghjiu cura. Lu lavoru de’ la matinata no’ fhinìa ccana, pecchì havìa mu prepara la vrodata pe’ lu puorcu cu li rimasugghji de’ lu pranzu de’ lu jiuornu prima e cu canigghjia; havìa mu ‘nci duna lu ‘ndianu a li gagghjini e pampini de’ caciaru e iervi de’ campu a li conigghji.
Quandu si risbigghjiavanu li fhigghjiuoli, li mammi ‘nci preparavanu la suppa de’ latta o de uorjiu, cu tantu pana de’ casa spezzettatu de’ intra. Li fhigghjiuoli cchiù randiciegghi venianu mandati a la scola e li mammi, pe’ na bona menza jiornata potìanu stara tranquilli; pe’ lu riestu, havìanu mu si arrancianu o portanduli arriedi, oppuru cunzignanduli a li nanni.
La pulizzia de’ la casa si fhacìa subitu pecchì spessu, la casa, cuomu potisti vidìra guardanduli de’ l’esternu, si riducìa a na sula stanza, duva si fhacìa tuttu e duva dormianu tutti li componenti de’ la fhamigghjia.
Nu’ catuojiu era la staggha pe’ lu ciucciu e pe’ tutti l’attri animali domestici.
‘Nc’eranu pua li fhaccendi cchiù ‘mpegnativi, quala la preparazioni de’ lu pana, de’ cocìra ‘nta lu fhurnu a ligna cu fhraschi, de’ cui ogni casa era dotata.
De li tiempi de’ cui ti stajiu parrandu e, a nui no’ tantu luntani, lu pana si fhacìa ‘ncasa, ‘nta lu cocipana, e datu ca era nu lavoru ‘mpegnativu e chi ‘nci volìa tantu sapira fhara, ti vuogghjiu spiegara tutti li fhasi operativi de’ lavorazioni.
La sira prima chi havìanu mu fhanu lu pana, li fhimmini si precuravanu lu lievitu chi attru non’era ca nu piattinu de pasta de’ pana, e datu ca sta pasta havìa mu si rinnova ogni jiuoru pe’ nommu s’acitijia e pe’ nommu fhà la crosta, li fhimmini si lu scangiavanu tra de’ igghji fhaciendusi accussì nu fhavori riciprucu.
Mi ricuordu li testuali paruoli: Và ggha cummara Mariuzza (?) e dinci mu ti ‘mpresta lu lievitu ca domana ‘nci lu tornamu bellu fhriscu; era chistu lu cumandu de’ li mammi a li fhigghji quandu ‘nc’era de’ preparara li cuosi mu si fhà lu pana.
De’ prima matìna, quasi ‘nta la notta, li fhimmini preparavanu la levatina, chi servìa pemmu s’allievita tutta la pasta de’ cui si fhacìa lu pana, chi potìa essere de’ fharina jianca, oppuru   de’ fharina ‘ntegrali, (‘nta stu casu lu pana era chigghu de’ bruniettu). Fharina e lievitu venìanu ‘mpastati ‘nta la majiggha, cu li mani, e pressata cu li pugna chjiusi, mentiendu tanta fhorza, fhina a quandu la pasta non’era bella morbida e omogena. Doppu sta lavorazioni, si dassava lievitara cumbogghjiata sutta na cuverta, e pua venìa schjianata. Si tagghjiava nu’ piezzu de’ pasta, la quantità giusta ‘mbasi a la fhorma chi si volìa fhàra, e si sagumavanu li cugghuri, li panietti, li pitti e li pani rotundi o a fhiloni.
 
Li vari fhurmi de’pana, venìanu misi in’ordini e si appojiavanu supa na tavula sparmata de’ fharina, ‘nmodu nommu ‘mpingìanu, e si cumbogghjiavanu cu na tuvagghjia jianca. De’ viernu, quandu fhacìa fhriddu, si usavanu puru cuvierti de’ lana nmodu mu mantanianu meigghjiu lu cavuddu, e mu s’allevitavanu prima de’ li dui uri circa chi ‘nci volìanu.
Mentre lu pana allevitava, s’appicciava e si preparava lu fhurnu chi havìa mu si trova cavuddu a lu puntu giustu e a lu momentu giustu.
Preparara lu fhurnu mu si cocìa lu pana, non’era semplici pecchì havìa mu si sa’ preparara. Li fhimmini cchiù anziani, eranu chigghji chi dunavanu li direttivi giusti a li fhimmini cchiù giuvini. Quandu lu fhurnu era prontu e havìa raggiuntu lu gradu giustu de’ caluri pe’ cucinara lu pana, cu lu grastiegghu e cu lu cagghjipu si tiravanu li vrasci verzu la vucca de’ lu fhurnu, e si pulizzava la basi eliminandu tutti li vrasciu e la cinnara chi s’havìa fhormatu. Cu la Pala si ‘mpurnava lu pana ajiutati de na’ parente stritta, o de’ na vicina de’ casa.
Li panietti venìanu ‘mpurnati pe’ primi e pua, a scalara, tutti l’attri panettiegghi cchjiù picciuli, fhina ad’arrivara a li pitti, chi venianu ‘mpurnati vicini a la vucca de’ lu fhurnu.
Na’ pitta, ‘nci aspettava all’aiutanti, soprattuttu si chista era na’ vicìna de’ casa e strana a la fhamigghjia; a la casa mia, la prima pitta ‘nci toccava sempre a nannima pecchì era iggha chi ajiutava.
Cu lu timpagnu de’ fhierru, dotatu de’ dui manici puru igghji de’ fhierru, si chjiudìa la vucca de’ lu fhurnu e s’aspettava mu si còcia lu pana. Li fhimmini, de’ tantu ‘ntantu, s’affacciavanu nta lu fhurnu, mu controllanu la cottura e mu movanu li panietti, soprattuttu chigghji chi si cocìanu pe’ primi. Fhinuta la cottura, lu pana vinìa spurnatu e sistematu, ancora fhumanti, ‘nta la cista, chjiamata propri cista de’ lu pana pecchì servìa sulu pe’ sta cosa.
Ti puozzu dira ca, tanti attri lavori ordinari, straordinari e stagionali venìanu fhatti de’ li fhimmini de’ na vota, ojia, no’ sacciu si si fhanu ancora. Tra tutti chisti ti ricuordu la sarza de’ pumadora, e puru tant’attri cunsiervi de’ tant’attri cuosi de’ mangiara, mu si puonu gustara ‘nta lu viernu, chi si producìanu ‘nta l’uortu e chi eranu l’alimentazioni principali de’ l’estati.
Li ortaggi, prodotti ‘nta l’uortu, venìanu cunzervati ‘nmodu diverzu: li malangiani e li pipi, per esempiu, doppu lavati e tagghjiati a strisci, venìanu misi ‘nta nu salaturi jiungiendu agghjiu, ariganu, fhinuocchjiu servaggiu, e misi sutta pisu (Ammazzarati).
Fhora, a li fhurniesti e a li Barcuni, venìanu ‘mpenduti li fhicundiani e soprattuttu li pipariegghji vruscjienti, ‘mpilati cu fhilu e cu la gugghjia, e a fhorma de’ collana. Si guardi, e ‘nci fhai casu, sicuramenta ‘nda vidi ‘ncuna puru ojia de’ chisti collani. Cu’ li malangiani e cu li pipi randi tagghjiati a strisci sottili, si fhacìa la giardiniera tenienduli pe’ ‘ncunu jiuornu a muogghu ‘nta l’acìtu; pua si jiungianu agghjiu, pipareggha vruscente e ariganu, e si pressavanu ‘nta li boccacci de’ vitru.
Si combogghjianduli de’ uogghjiu d’alivi, e si chjiudianu.
Capiscisti ca li fhimmini de’ na vota eranu specializzati mu fhanu stu tipu de’ provvisti, chi si mangiavanu ‘nta li misi ‘nvernali, ed’eranu spessu lu cumpanaticu, pe’ chigghji chi lavoravanu ‘nta la campagna.
‘Nta li casi curinghisi, la pasta cu lu sucu de’ pumaduoru è, e fhù sempre lu piattu cchiù ‘mportanti. A partira de’ tiempi antichi, la sarza de’ pumaduoru ‘mbottigliata, e la cunzerva de’ pumadora pe’ li salami, venìa preparata ogni fhini estati e ‘nta tutti li fhamigghji de’ qualunque cetu. Li fhimmini, mammi de’ fhamigghjia, aiutati de’ li parienti e de’ ‘ncuna vicina di casa, lavoravanu quintali de’ pumadora, chi ridotti ‘nsarza, venìa ‘mbottigliata e gugghjiuta ‘nta na coddara, nmodu mu si sterilizzanu li bottigli e mu si conserva pe’ luongu tiempu, senza fhara la muffa.
N’attru modu mu si conservanu li pumadora era chigghu mu si siccanu a lu sula liuni, e mu si fharciscianu cu la sarda.
Li pumadora venìanu tagghjiati a dui, cacciati li simienti, salati e misi a lu sula pe’ diversi jiuorni, mu si siccanu, cuomu si fhacìa cu li fhungi o cu li scadi, pua, venìanu conzati cu ariganu, agghjiu e pipareggha, e misi ‘nta nu boccacciu; si cumbogghjiavanu cu nu fhilu de uogghjiu e si chjiudianu ermeticamenta.
Certi vuoti, li fhimmini, assiemi all’attri all’agghjiu e all’ariganu, ‘nci mentianu nu piezzu de’ sarda salata ‘nta lu mienzu e, de’ stu modu, diventavanu na’ delizia.
‘Ncalabria, ‘nta certi zoni (Nicastru e Sambiasi), chista usanza resista ancora, pecchì sunu ritenuti cuosi spizziusi, chi si offranu a l’amici ‘nta ‘ncuna scampagnata, ma, na vota, eranu lu cumpanaticu de’ li gienti cchiù poveri.
Mo’ ti parru de’ la cunzerva de’ pipi pecchì era la cchiù lavurata e la cchiù ‘mportanti pe’ quandu si preparavanu li sozzizza, li suppressati e li Capicoggha de’ la carni de’ lu puorcu crisciutu sutta la casa.
Chista cunzerva de’ pipi venìa fhatta cu pipi russi belli carnusi chi, tagghjiati, cacciati li simienti e salati, venìanu gugghjiuti ‘nta na coddara supa nu fhocularu cu ligna, e quandu si riducianu a na’ poltiglia, si sculavanu e si passavanu a lu sitacciu, a lu stessu modu de’ la sarza de’ pumadora.
Si mentìa ancora supa lu fhuocu pemmu s’evapora l’acqua chi ancora era contenuta, e si renda sempre cchiù denza.
Comu pua vidìra, tantu havìanu de’ fhara ‘nta la casa li fhimmini de’ na’ vota, specie d’estati, mu preparanu e mu cunservanu provvisti pe’ lu viernu. Puru li scadi fhacianu parti de’ li cunziervi, pecchì na vota, era chista la fhrutta prefherita, e ‘nta certi fhamigghji, lu cumpanaticu pe’ eccellenza era chistu.
Cu li scadi si preparavanu li crucietti, cioè scadi cu la nuci de’ intra, oppuru ammienduli, chjiusi e ‘mpurnati.
Eranu la scingomma de’ na vota ed’era na’ vera prelibatezza.
Nommu fhazzu mu ti ‘ncrisci, no’ ti parru de’ tanti attri cuosi chi li fhimmini fhacìanu pecchì, oltre a li lavori ordinari de’ casa, Tessianu a lu tilaru, mu ‘nci fhanu la dota a li fhigghji fhimmini, Rigamavanu, Rappezzavanu li cavuzzi sciancati ‘ncampagna, preparavanu la Rami pe’ la vigna, nzurfaravanu, spalagravanu, e attri cuosi.
Sì sicuramente d’accordu ca, bastarianu sulu li cuosi chi t’elencai mu si po’ dira ca, nu monumentu a la fhimmina, havarìa mu si fhacìa ‘nta tutti li posti duva, armenu una de’ chisti fhatigau.
Tornamu mona a la fhalignamerìa chi si trovava a lu postu chi ojia occupa lu monumentu a l’Emigrati.
La curva de’ la Gabina, havìa cuomu prima casa la fhalignamerìa de’ Mastru Peppa Serrau e de’ Mastru Battista Cefaly.
Nu’ continu martegghijara e nu’ fhrastuonu de’ macchinari pemmu si settanu tavuli e mu si ‘ncjiovanu, costruiendu puorti, fhurniesti, Tavuli de’ cucina, Scaffali e quant’attru.
Li Mobili d’arredamentu de’ li casi de’ Curnga, venìa costruitu propi de’ li fhalignami nuostri, e chisti dui Mastri, eranu tra li miegghjiu.
De’ chigghi tiempi, no’ ‘nc’era trafficu de’ Machini pe’ li strati, pe’ cui, certi lavori li fhacìanu puru davanti a la putifha, e si potìanu puru appojara tavuli e tavuluni a lu muru mu s’assulicchjianu e mu diventanu ancora cchiù resistenti de quantu già eranu.
Pe’ Fhalignami, eranu li miegghjiu Mastri chi ‘nc’eranu ‘nta Curnga, e pe’ chistu eranu de’ tutti ricercati soprattuttu pe’ fhara mobili de’ casa.
Lu rettifhilu chi segua, mi lu ricuordu, de’ fhigghjiuolu, chi non’era ancora asfaltatu, e mi ricuordu puru quandu l’asfaltaru pe’ la prima vota.
Mi ricuordu a “Gina”, nu camiu viecchjiu, chi portava la catramma, e ‘nda portava tanta, chi a stentu caminava de’ sagghjiuta.
Lu passavi puru a peda.
Tra fhigghjiuoli si fhacìa a mazzati pemmu ni ‘mpendimu a la sponda d’arriedi, sulu pe’ lu gustu mu ni fhacìmu na’ rafhata. E avogghjia mu gridava e mu jiastimava l’autista, pecchì d’arriedi era sempre chjinu. Li fhigghjiuoli cchiù spregiudicati aspettavanu Gina a Gurniegghi, e già de’ ccana, si ‘ncroccavanu fhina a la fhermata.
Dui puorti, dui negozi e nu sulu patruni: Mastru Ntuoni Orlandu.
Lu primu negoziu era de’ fherramenta, duva si vindìa de’ tuttu e duva li mastri de’ Curnga, jianu mu accattanu chigghu chi ‘nci servìa pe’ lu lavoru. Lu sicundu, chi comunicava cu lu primu tramiti na’ porta interna, era de’ “generi alimentari”, e tutti li dui venìanu spessu servuti de’ una sula perzuna.
Quandu Mastru Ntuoni non ‘nc’era, pecchì havìa jiutu a lu Pizzu mu si rifhorniscia d’arrobba, allora era la mugghjiera Donaruzza chi, doppu chi si sistemava la casa, scindìa ‘nta la putifha, e servìa a tutti, cu tantu sapìra fhara. Quandu eranu presenti tutti de li dui, la mugghjiera, servìa lu negoziu de’ l’alimentari, mentra Mastru ‘Ntuoni chigghu de’ li fherramenta.
Puru ca ‘nc’era tanta concorrenza tra putifhari, ognunu lavorava onestamente, senza ‘nterferira cu l’attri, e tutti si stimavanu e si volìanu bene.
 
‘Nchjianandu pe’ Pruscinu, mi ricuordu lu primu postu duva era la Putifha de’ fhalignami de’ Mastru Lia Peruginu, chi si spostava spessu de’ nu postu a n’attru, trovandu cuomu urtima sistemazioni, lu locali vicinu a San Giuseppe, accantu all’arcu de’ Fherraru, e vicinu a la casa sua.
Mi ricuordu sulu Tavuli e Tavuluni appojiati a nu muru de’ la Putifha, nu Bancu de’ lignu supra la destra trasiendu e sutta na fhurnesteggha, cu chjianuozzi e scarpeggha de’ diverza dimenzioni appojiati supra stu bancu, e ciarciegghi a no’ fhinira, ‘nterra, chi venìanu accaparrati de’ li vicini e de’ li fhorgiari, pecchì eranu utili mu s’appiccia la fhucina, o lu luci a lu fhocularu, chi era presente ‘nta tutti li casi de li curinghisi.
Seguìa la Putifha de’ Don Brunu Davuli. Puru igghu havìa dui negozi comunicanti, unu de’ generi alimentari, chi gestìa personalmente, e n’attru de’ fherramenta, chi era gestitu de’ lu niputi Marcellu Marrella.
Penzandu a chista Putifha, mi tornanu ancora a menta chigghi fhila de’ pasta luonghi e nivuri, contenuti ‘nta nu scatulu de’ cartuni, e vinduti a pisu, fhili pe’ fhilu, e ‘ncartati sulu de’ la parti de’ duva s’havìanu de pigghjiara cu li mani e mu si portanu a la casa. Puru la Pasta curta era de’ lu stessu culuri, ed’era contenuta ‘nta sacchi de’ duva si pigghjiava cu na Sassula, mu si pisa supra la vilanza.
Venìa sempre ‘ncartata, e havìvi mu stai attientu nommu ti cadìa pe’ strata, mentre ti la portavi a la casa, pecchì ancora, no’ ‘nc’eranu busti, ne’ de’ carta e ne’ de’ plastica.
Ojia, la legge no’ permettarìa cchiù na cosa de’ stu generi.
‘Nu fhorgiaru
‘Ncuntramu ancora n’attru fhorgiaru: Mastru Pietru Buragina, chi cu la putifha sutta la casa sua, mperrava Ciucci e Muli, affilava curteggha e fhacìa Tripoda, Palietti Accietti e tanti attri cuosi.
Nu’ via vai, quandu era lu periodu mu s’ammazzanu li puorci, mu s’affilavanu li curteggha, e nu tintinnara de’ marteggha quandu s’affilavanu li fhoccigghjia quandu era lu periodu de’ la metìtura.
Si pistavanu fherra russi, mu si fhanu Tripoda, Serraturi, calascindi chi venìanu usati ‘nta l’edilizia de’ li mastri de’ turnu.
A li piedi de’ la nchjianata de’ lu Carvaru, ma supa la strata principali, a sinistra, si trovava l’Ufficiu de’ Collocamentu, gestitu de Don Vicienzu Michienzi.
Si trasìa nchjianandu dui scalini, e si jia nta st’ufficiu pe’ cercara l’occupazioni de’ la jiornata o, magari, chiggha de’ la vita, cu la garanzìa mu si è trattati, nta nu nuovu lavoru, cu tutti li normi e li reguli previsti de la legge.
Li contributi pe’ la penzioni eranu la cosa cchjiù mportanti chi, ognunu cercava mu si garantiscia, pe’ potìra aspirara ad’havìra na penzioni na vota chi si raggiungìa l’età prevista de’ la legge.
Mo’, arrivammi ‘mpiazza Marconi, de’ tutti li curinghisi chjiamata “chjianu de’ Pruscinu”.
Pua notara lu Palazzu Perugini, chi esta sta costruzioni chi si trova supra la destra nostra.
Na Chjiazza chi happa ‘mportanza, pecchì ‘nci fhù la fharmacìa, prima mu si nda vaia ‘nta lu Passu, la Satturìa, quandu era ancora na socetà privata, lu primu centralinu telefhonicu, gestutu de’ mastru Eziu Costarelli, nu Mulinu de li fhratelli Sorrenti (Peppa e Gustinu), nu Generi alimentari gestutu de’ Malacari e lu Studiu de’ lu cchiù ‘mportanti e famosu dottori chi Curnga si potìa vantara: Lu Dottori Fhortunatu Perugini. Sembra ieri ma, passaru tant’anni.
N’attra cosa chi mi ricuordu e chi ospitava sta Chjiazza, era la putifha de’ Scarparu de’ Mastru Pasquali Jelapi, chi si trovava ‘nta nu locali de’ lu Palazzu, e chi si arrivava ‘nchjianandu chiggha scala chi ancora resista a tutti l’intemperi.
De’ chiggh’attra scala supra la destra, s’arrivava a la Satturìa, duva lavoravanu Gaudinu e Majellu, e duva li curinghisi jianu mu paganu la Terraggera e attri tassi comunali.
Prima, la Setturia, si trovava sutta la fharmacìa chi era ccà, supra la sinistra nostra, vicinu a la casa duva abitava Don Vicenzinu Lo Russu, personaggiu canusciutu pecchì fhacìa la Guardia Municipali.
Sutta la Setturìa ‘nc’era lu primu centralinu telefhonicu pubblicu, nu postu duva potìvi prenotara na’ telefhonata pemmu chjiami nu parente emigratu, oppuru mu aspietti na chjiamata de’ li parienti emigrati. Doppu chi lu gestori t’avvisava, ti presentavi e aspettavi cu pacienza la sospirata telefhonata chi spessu, no’ portava buoni nuovi.  Mastru Eziu, fhu unu de’ li primi gestori de’ centralini Telefhonici. De’ la parti de’ sutta stu muru supra la sinistra nostra, ti puozzu dira ca si trovavanu n’attri dui attività. Nu’ Scarparu, supra la sinistra scindiendu pe’ la Petra Chjiana, Mastru Antuoni Catanzaru, e l’attra, supra la scinduta chi porta all’Arcu de Tavanu, e chi era la Vuccerìa de’ Mastru Pasquali Mazzotta. Sta Vuccerìa, chi successivamente si trasferìu ‘nta lu Passu, pigghjiau lu postu de’ lu fhruttivendulu Buragina. (Siecri)
L’attività chi animava sta chjiazza, era lu Mulinu de’ li fhratelli Sorrenti (Peppa e Gustinu). Unu de’ li primi Mulini fhunzionanti cu’ l’energia elettrica e chi macinava de’ tuttu, soprattuttu ranu chi arrivava de’ la marina e de’ li campagni de’ proprietà. Nu’ rumuri de’ macchinari chi macinavanu ranu, e chi ti ‘nzurdava de’ prima matìna mu fhanu fharina, era chigghu chi sentivi passandu de’ sta Chjiazza, pe’ jira a la Satturìa, mu si va a la scola a Natraccola o a Santu Ruoccu, oppuru mi si fhanu visitara de’ lu Dottori Perugini. Nugghu si lamentau mai pe’ stu fhrastuonu prodottu de’ lu Mulinu, pecchì la genta capiscìa, ed’era rispettosa de’ lu lavoru de’ l’attri.
Supra lu latu oppostu a lu muru de’ Pruscìnu, lu negoziu de’ generi alimentari de’ Malacari, chi vindìa puru attrezzatura pe’ la scola (quaderni, pinni, album ed’attru) a li scolari chi passavanu de’ stu postu pemmu vannu a la scola.
La specialità canusciuta e ricordata puru ojia de’ li curinghisi de’ na certa età, era lu Baccalà, chi sapìa ammogghjiara cuomu nugghu attru sapìa fhara nta Curnga.
Vaschi de’ zincu e ricambiu de’ l’acqua pigghjiata a la fhuntana vicina de’ Pruscinu, fhacìanu diventara chigghi chiappi salati de’ Baccalà, piezzi prelibati e apprezzati de’ tutti. Mi ricuordu puru lu “Bovoloni”, nu biscottu cu ccicculata chi, mangiatu cu li scadi chi inghjianu la cartera de’ lignu de’ ogni scolaru, ti portavanu ‘mparadisu e sostituienu adeguatamente lu paninu chi si mangiava a menza matìna ‘nta la scola.
Succedia ca ‘ncunu cotraru s’accattava ggha igghu lu paninu, ma la maggior parti, dui affietti de’ pana si li portava de’ la casa sua. Venìanu inchjiuti cu suppressata curinghisi o cu pruovula locali, ma ‘nci mentìanu puru fhrittati de’ ova, preparati a matinata de’ li mammi pe’ li fhigghji.
Mi cuntaru ca tiempi prima de’ chigghj de’ cui ti stajiu parrandu, mpendutu a nu muru, all’avuttu de lu palazzu, nc’era nu contenitori de’ fhierru, chi contenìa la testa de’ nu delinquenti de’ lu postu, nu Briganti (?), nu certu Peppazzu (?).
Pura fhantasia, leggenda o verità?
È certu ca li fhigghjiuoli chi passavanu de gghana pemmu vanu a la scola a Natraccola o a Santu Ruoccu, passavanu cu la paura, pensandu propri a stu contenitori chi contenìa na testa.
N’urtima cosa chi mi ricuordu, è ca nta na stanza de’ lu Palazzu Perugini, vinna ospitata na classe de’ prima o de’ sicunda elementare.
 
Lu Sapuni de’ casa.
 
Parrandu de’ li vari attività de’ fhimmini, evìtai volontariamente mu ti parru de’ lu Sapuni de’ casa, primu pecchì no’ si tratta de’ nu lavoru chi si fhacia tutti li jiuorni, sicundu pecchì nta chista attività nci vò tanta abilità e tanta esperienza, chi no’ tutti li fhimmini havìanu.
Chiggha mu si prepara lu sapuni de’ casa, utilizzatu mu si lavanu panni, ma puru pe’ pulizzì personali pe’ chigghi chi no’ si potìanu accattara li sapunetti profhumati, era n’attività chi si fhacìa armenu na vota all’annu.
Li sostanzi riciclati (uogghjiu fhrittu e residui de’ uogghjiu (murghi)), eranu li risorsi principali chi, mbiscati cu n’adeguatu quantitativu de Putassina e acqua, gugghjiuti nta na Coddara, fhornianu propri lu Sapuni de’ casa.
Era la precisioni de’ lu dosaggiu de’ sti dui ‘ngredienti mentre gugghjìanu ‘nta la Coddara, chi permettìa, a la fhini, mu s’ottena nu buonu Sapuni de’ casa.
Fhara lu sapuni, richiedìa esperienza, pecchì manijiara e mbiscara quantitativi de’ acqua e putassina, sostanza chi servìa mu si fhà solidifhicara lu sapuni, non’era na cosa semplici pecchì, la troppa putassina, fhacìa trasbordara lu sapuni de’ la Coddara tenuta supa lu luci; e l’acqua jiungiuta, servìa propri nommu si fhà trasbordara.
Quandu si decidìa la jiornata pe’ fhara st’operazioni, si mentìa la Coddara supa nu Tripuodi e sutta s’appiciava lu Luci nmodu mu si fhanu gugghjira li murghi, chi, guardanduli, non’havìanu nu bellu aspettu.
Eranu nivuri e puzzolenti, e certi vuoti puru acidi ed’emanavanu na puzza nsopportabili.
A li murghi si jiungia l’uogghjiu fhrittu e puru grassu rancidu de’ puorcu chi no’ si utilizzava cchjiù. Mentre la coddara gugghjìa, si girava costantemente lu sapuni cu nu manicu de’ scupa, e si jiungìa chjianu chjianu la Soda, chi lu fhacìa abbuffara.
Quandu unchjiava assai, era necessariu jiungira acqua, divacata cu nu catu nta la coddara, e accussì, si vasciava lu livellu de lu sapuni.
Lu segretu era puru chigghu mu si sapa regulara lu luci sutta la Coddara, e sapìra controllara la cottura.
Li fhimmini esperti, ricanuscianu quandu lu sapuni era troppu Putassusu (troppu soda), e chi qunindi havìa mu si jiungia nu puocu d’acqua; oppuru quandu era ancora lisciu (cu troppa acqua), ed’era necessariu jiungira soda.
Manijiandu manijiandu, si fhormava lu sapuni, cangiandu culuri diventandu grigiu scuru e a la fhini bellu jiancu.
Si capiscìa ca lu sapuni era prontu quandu, mentiendu lu manicu de scupa ammienzu la coddara in verticali, chistu restava fhiermu e no’ scivulava versu lu bordu de’ la coddara.
Signifhicava ca era de’ consistenza giusta, e potìa garantira na bona sapunatura a li cuosi chi si volìanu lavara.
Quandu lu sapuni era bellu cremusu e senza grumi, si cacciava de supa lu tripuodi e si dassava riposara pe’ tutta la notta.
La matìna doppu, si potianu vidira miegghjiu li risultati.
Cu la manu appujiata nta lu centru de la coddara, si vidìa si sì era solidifhicatu, o si era ancora muogghu.
Si lu risultatu era perfhettu, lu sapuni galleggiava nta la coddara ammienzu a la Lissìa.
La Lissìa era l’acqua nivura chi addurava, o puzzava, de’ Soda, ma chi venìa usata mu si smacchjianu li panni cchjiù luordi, chigghj cunduti e nzuppati de’ uogghjiu e grassu (strofhinacci e stavajiucchi).
Si no’ diventava duru, si dassava ancora nu puocu mu s’induriscia, ma si no’ quagghjiava ‘nta li quarant’uottu uri, allora volìa dira ca ncuna cosa havìa jiuta storta, e ca havìa mu si storna, mu si rifhacia de’ nuovu.
Lu Sapuni pigghjiava la fhorma de’ la coddara duva s’havìa fhattu, e na vota chi si havìa ntostatu, havìa mu si tagghjia nta piezzi cchjiù picciuli e cchjiù maneggevoli.
Nta st’operazioni intervenianu l’uomini chi, cu fhorza e usandu lu Liccasapuni, curtiegghu luongu e tagghjiente, lu tagghjiavanu a pezza, e pua lu posavanu supa a na tavula mpenduta a lu suffittu, ‘nmodu mu s’affumica e mu s’asciuca ancora de cchjiù.
A lungu andara, si fhormava na’ fharineggha supra li pezza de’ sapuni, ma diventava cchjiù leggeru e cchjiù maneggevuli.
Havìanu d’aspettara armenu nu misi prima mu lu puonu utilizzara.
Nu ricordu chi ancora resista nta la testa mia, è chigghu de nannima, Donna Cuncetta Mazza, chi fhaciendu lu sapuni, happa la sportuna mu nci schiccia na guccia de’ Lissia ‘nta n’uocchjiu, propriu mentre stacìa manijandu la coddara.
Lu risultatu, fhù chigghu ca Donna Cuncetta, sportunatamenta, perza n’uocchjiu.
Ojia, sti cuosi sembranu cuosi d’attri tiempi, e li Coddari, Murghj, Putassina e attru, diventaru termini chi fhuru de’ tutti scordati, accussì cuomu fhu scordatu lu sapuni de’ casa.