Lu Mulinu Elettricu E la Pompa de’ Benzina ‘nta lu Passu.

Lu Mulinu Elettricu
E la Pompa de’ Benzina ‘nta lu Passu.
 
Tornammi n’attra vota ‘npiazza Mmaculata, e prima mu ti la descrivu, vuogghjiu mu ti parru de unu de’ li primi Mulini a energia elettrica: chigghu de’ Mastru Lia Mazza.
‘Mpratica, parecchi rughi de’ Curnga havìanu lu mulinu, pecchì ‘nta la chjiana e’nta li campagni vicini, si producìa tantu ranu e tantu ‘ndianu e luppini che, a la fhini, giustifhicavanu la presenza de’ tutti sti mulini.
Donn’Antuoni Bonelli, ‘nta lu libbru “Curinga recupero di storia e di vita sociale”, dicìa ca ‘nta lu territoriu de’ Curnga, la presenza de’ lu Turrina ‘nda consentìa parecchi azionati ad’acqua (dudici tra sponda destra e sinistra), tri, eranu azionati cu lu motori a scoppiu, mentre attri sette, tra Curnga e Acconia, eranu azionati a energia elettrica.
Ojia, su’ tutti fhora usu, soprattuttu chigghi ad’acqua de’ cui restaru sulu mura viecchji chi è difficili puru ‘ndividuara, e puru chigghu de’ cui ti stajiu parrandu, nonostanti era azionatu ad’energia elettrica, fhù puru abbandunatu de’ parecchiu tiempu, cumbogghjiatu ‘mparti de’ spini e de iervi, mentre n’attra parti fhu ricostruita e adibita a casa.
A Tri Cannali, ‘nd’avìa n’attru, de’ Mastru Pietruggiuanni Peruginu, alimentatu cu nu motori a scoppiu, ma lu stessu proprietariu ‘nd’avìa n’attru a San Giuseppe, azionatu a energia elettrica.
Ojia no’ sacciu mu ti dicu si ‘nd’hava ‘ncunu chi è ancora fhunzionanti ‘nta lu paisi de’ Curnga.
Difronte a stu mulinu, ‘nc’era la fhalignamerìa de’ Mastr’Argantuoni chi, si ti ricuordi, t’havìa già parratu quandu cominciammi chistu percorsu.
‘Nta stu locali puocu cchiù avanti, fhacìa varvi mastru Battista Calvieri, chi era canusciutu ‘nta Curnga ‘nta l’anni ‘40 - ’50, e chi spessu, era costrettu mu si fhà pagara cu ova, poseggha o attri prodotti chi venìanu de’ la campagna.
All’iniziu, occupava na’ Barracca de’ ‘nta lu Passu, pua si trasferìu ‘nta lu locali de’ sua proprietà, chi si trovava propri sutta la casa duva abitava.
Io, mi la ricuordu cuomu na perzuna semplici e bona vestuta, educatu e sempre sorridenti chi, pe’ li tiempi difficili chi si stacìanu attraverzandu, non’era puocu.
Lu Passu o Chjiazza da’ Mmaculata; ti cuntai già la storia de stu postu e de’ cuomu de’ nu cafhuni, si trasformau ‘nta na chjiazza.
Lu negoziu de generi alimentari chi si trova a la destra nostra nchjianandu pe’ Via Nazionali, è chigghu de’ Giuseppe Peruginu, commercianti e ‘mprenditori, chi portau avanti cchjiù de’ una attività, e nci rescìu nta tuttu chigghu duva misa manu.
Nu Mulinu, nu Panifhiciu, nu Mulinu de’ proprietà de’ lu patra, de cui ti parrai puocu fhà, e ancora prima, na Concia de piegghji, vicinu a Triccannali; fhuru chisti certi attività chi portau avanti.
Pe’ urtimu, lu negoziu de’ Generi Alimentari chi si trova ccà, a la nostra destra, e chi fhù prima a San Giuseppe e doppu nta lu chjianu de San Fhranciscu.
Giuseppe Peruginu havìa nesciutu a Belo Horizzonte, nta lu Brasili, ma arrivau a Curnga quandu era ancora cotraru.
Vena premiatu de’ la Camera de’ Commerciu de’ Catanzaru, cu na Medaglia e nu Diploma, duva nci venianu ricanusciuti li meriti pe’ havìra portatu avanti, pe’ quarantuottu anni, l’attività de’ Commercianti.
No’ ti parrai ancora de’ lu “Muru de’ lu Passu”, na’ serie de’ gradìni distanti tra igghi de’ nu paru de’ metri e collegati cu tri tubi nivuri e gruossi, chi servienu de’ protezioni, mu evitavanu ca ‘ncunu, distrattu o mbrijiacu, potìa cadira de’ sutta.
Lu muru partìa de’ duva li strati si dividanu ‘nta una chi va’ verzu Tri Cannali e ‘nta n’attra chi preceda pe’ la Chjiazza, davanti l’abitazioni de’ Donna Fhrancisca, pe’ fhinira a la curva arriedi a la Chjiesa.
Li mura non’havìanu tutti la stessa fhorma, pecchì certi, eranu mura semplici, mentre attri, chigghi chi affacciavanu ‘nta la chjiazza, eranu a forma de’ sedili e, pe’ chistu, venìanu usati de’ li curinghisi cuomu puntu de’ ritrovu e passatiempu.
Lu muru a forma de’ sedìli, fhinìa ndirezioni de’ duva comincia la Chjiesa, ‘nmodu mu dassa cchjiù spaziu pe’ la strata.
Era lu postu de’ riposu e lu puntu d’incontru de’ li perzuni chi, a gruppi, si assettavanu e discutìanu de’ politica, de’ sport o, semplicemente, mu guardanu li fhimmini chi jianu o chi nescìanu de’ la Chjiesa.
Puru li cotrari si ‘ncuntravanu supra a chisti mura de’ sta chjiazza, chi era viva già de’ prima matìna, soprattuttu ‘nta lu periodu de’ la Novena de’ Natali o de’ lu misi Marianu dedicatu a la Mmaculata.
La Novena de’ Natali comunciava quandu era ancora scuru, ‘nmodu mu ‘nci dunanu la possibilità a li zzappaturi, sia de’ seguira li funzioni religiosi, sia mu puonu coprira la jirnata de’ lavoru ‘nta la campagna. Ligavanu lu ciucciu già mbardatu, a li sbarri de’ fhierru chi dividìanu li mura, seguianu la fhunzioni religiosa, e pua partianu pe’ la campagna mu rifhundanu vigna o mu raschjianu livari.
Li primi anni chi arrivai ‘nta l’America, ncuntrai tanta difficoltà mu scrivu a li genitori mia, e puru igghi l’havìanu, pecchì havìamu fhrequentatu sulu li primi anni de’ scola elementari, e pe chistu, quandu scrivìa na’ littara mu ‘nci comunicu cuomu stacìa e chi stacìa fhacìendu, era nu problema.
Nonostanti tuttu, li dui o tri buoti all’annu chi rescìa mu lu fhazzu, rescìa mu dugnu notizzi e mu ‘nda ricìvu, e accussì mi ‘mpurmava puru de’ cuomu stacìa cangiandu lu paisi.
No’ littari scritti de’ patrima o mamma ma, de’ perzuni amici e fidati, chi provvedìanu mu li scrivanu, o mu li lejianu pe’ contu loru, chi doppu tantu tiempu arrivavanu a destinazioni.
Fhù accussì chi sappi ca, ‘nta sta chjiazza misaru lu primu distributori de’ benzina pe’ machini chi, ‘nta l’anni ‘60 cominciaru a popolara puru lu paisi de’ Curnga, accattati de’ chigghi perzuni cchjiù ricchi e chi si lu potìanu permettira.
 
Mi dissaru ca all’iniziu, fhu Mastru Vitu Frijia chi ‘nci provau mu menta sta nova attività, cu la Shell, ma chi, nonostanti havìa ricivutu già li colonnini, chi tenìa chjiusi ‘nta lu catuojiu, e sbrigatu tutti li carti mu lu po’ fhara, no’ si fhicia nenta, pecchì no’ si misaru d’accordu cuomu havìanu mu si spartanu li sordi, e quindi rinunciau.
Troppu lavoru e puocu guadagnu, accussì sicìa Mastru Vitu.
 
Puocu tiempu doppu, ‘nci provàu Don Marcu Cristianu, unu de’ Santu Pietru, spusatu a Curnga e chi, dotatu d’iniziativa ‘mprenditoriali, rescìu duva Mastru Vitu havìa fhallitu.
Don Marcu, era tantu abili e capaci, chi rescìu mu menta nu’ Bar, mu avvìa nu’ Panifhiciu e a la fhini rescìu mu porta puru lu distributori de’ benzina ‘nta Curnga.
Rescìu puru mu attiva nu’ Frantoiu a lu biviu, a lu Ponta, chi ancora ojia, gestitu de’ lu fhigghjiu Fhrancu, diventau n’attività d’avanguardia, ed’è nu “fhjiuri all’occhjiellu” pe’ tutti li curinghisi.
Don Marcu, cu la Benzina, superati li primi difficoltà, piazzau tri colonnini e na cabina ‘nta lu centru de’ lu Passu, nonostanti li gienti eranu contrari, pecchì la chjiazza, cu sti “Zzugghi” nta lu mienzu, perdìa tutta la bellezza.
Nu chioscu a lu centru e li colonnini a lu latu, una pe’ Benzina Super, n’attra pe’ Benzina Normali e l’urtima pe’ la Miscela pe’ l’Api e li Motu, chi superavanu de’ gran lunga li machini presenti ‘nta lu paisi.
L’Apa, pe’ li curinghisi era cchiù utili de’ la machina, pecchì venìa usata puru comu mezzu de’ trasportu pe’ tutti chigghi cuosi chi si producìanu ‘nta la campagna e chi prima trasportavanu, cu tanta fhatiga e cu tanta pierdita de’ tiempu, cu li Ciucci.
L’anni ‘60 fhuru anni de’ benessere pe’ tutti e mu fhai benzina o miscela ‘nta lu Passu, era pe’ tutti na’ necessità.
 
De sta chjiazza sparìru comunque na Cruci e na bella Tradizioni.
Na Cruci randa, fhissata nterra, a lu latu diestru nesciendu de’ la chjiesa, misa tra la Fharmacìa e la chjiesa stessa, nmodu però nommu ‘mpediscia lu passaggiu pe’ la strata vicina, era nu simbulu e nu rifherimentu ‘nta lu jiuornu de’ li Parmi, quandu ognunu sbattìa la Parma, fhatta de’ fhraschji de’ livara, supra la Cruci, e chi pua distribuia, ramu pe’ ramu, ‘nta la vigna, ‘nta li livari, ranu siminatu o ndianu chjiantatu, o attru, cu l’auguriu ca chistu potìa portara n’annata bona.
Na fhila de’ arvuri, tutti allineati per bene davanti a li Barracchi de’ lu passu, completavanu e abbellianu sta chjiazza.