Nu mistieri tuttu particolari: custurieri a domiciliu.

Nu mistieri tuttu particolari: custurieri a domiciliu.
Li Scuoli Elementari
 
Puocu cchiù avanti, subbitu doppu la curva, mi ricuordu nu personaggiu chi svolgìa nu mistieri tuttu particolari.
Era ‘mpratica nu Custurieri chi lavorava a domiciliu.
Ti spiegu miegghjiu.
Ti dissi già ca ‘nta Curnga ‘nc’eranu tanti fhimmini chi tessìanu a lu Tilaru e producìanu tanti trusci de’ tila oltre ca de’ sita e de’ attri fhibri naturali.
Lu Custurieri Mastru Bestianu Terranova, era ‘n’espertu de biancherìa intima (Cammisi de linu chi era l’indumentu cchiù intimu de’ li fhimmini, mutanti pe’ uomini e fhimmini, canottieri pe’ uomu, ecc.); jia a la casa de’ li clienti, pigghjiava, cu tutti li precauzioni possibili e cu la massima riservatezza li misuri, tagghjiava ggha stessu, la quantità de’ stoffa utili pemmu realizza quantu ‘nc’era statu commissionatu de’ lu trusciu chi ‘nci venia misu a disposizioni,  si ‘nda jia a la putifha, e cusìa chigghu chi havìanu stabilitu.
Cu lu passara de’ lu tiempu, stu mistieri sparìu completamente pecchì lu progressu portau li mutanti pre-confezionati, de’ miegghjiu qualità e chi miegghjiu s’adattavanu a l’esigenzi de’ li perzuni.
Verzu l’inizi de’ l’anni ‘50, pe’ li strati ancora non’asfaltati, circolavanu fhurgoni carrichi de’ stu tipu de’ biancheria, vindiendu e assorviendu ad’ogni bisuognu de’ li perzuni e de’ li fhamigghji.
A Mastru Bestianu, vinna accussì a mancara lu lavoru, ma no’ si dunau pe’ vintu pecchì s’i nd’ammentau n’attru, chigghu de’ Mbrellaru, chi fhù puru redditiziu, e chi svolgìu pe’ parecchjiu tiempu, fhiniendu cu chistu fhara, fhina a la penzioni.
 
Mo’, ‘ncuntramu ‘n’attra Sartorìa, chiggha de Pileggi chi, cu nu stuolu de discipuli chi l’aiutavanu fhaciendu ‘ntralandi e supramani, cusìa abiti pe’ la fhesta e cavuzzi de’ fhustagnu, pe’ lavoru, ’nquantità ‘ndustriali, e ‘nta lu cchiù brevi tiempu possibili.
L’abiti cusuti ‘nta lu modu artigianali de’ li vari custurieri, richiedìa competenzi adeguati sia pe’ tagghjiara la stoffa ca pe’ cusira.
Ogni mastru usava trucchi personali e si dedicava cu cchiù attenzioni a li rifhinituri, pecchì eranu propri chisti chi distinghuianu na confezioni de’ n’attra, ed’era chistu chi decidia la scelta de’ nu mastru rispettu a n’attru.
 Li Sarti eranu li mastri chi havìanu cchiù discipuli de’ tutti l’attri mistieri, e puru cchiù fhrequentati de’ li personaggi cchjiù ‘mportanti de’ lu paisi, forze pecchì li discurzi si potìanu sia fhara ca sentira, senza rumuri de’ macchinari chi li potìanu disturbara.
A d’ogni modu, trasianu puliti e nescìanu puliti, no’ si allordavanu.
De’ Primavera e, fhina tuttu l’Autunnu, quandu lu tiempu era buonu, sia lu Mastru ca li discipuli, si portavanu la seggia o lu bancu, davanti a la porta e fhatigavanu all’apertu no’ sulu pe’ respirara miegghjiu rispettu a cuomu si respirava, ‘nta la putifha, ma puru mu si potìa risparmiara l’energìa elettrica necessaria mu s’illumina l’ambienti chi, spessu, oltre a la porta d’ingressu, non’havìa mancu na’ fhurnesta pemmu trasa luci o mu si cangia l’aria.
Ti la ricuordi chiggha fhotografìa duva ‘nc’eranu li scolari de’ na classi elementari de’ Curnga chi ti fhacìa vidira ‘nta l’America?
Chiggha classi fhacìa scola propri supra sta via, propi ‘nta stu locali chi ojia è nu garaci.
 
Chiggha fhotografìa mi commòva ancora e, pe’ mia, resta na cosa chi no’ si cancella de ‘nta la menta.
Ogni vota chi mi capita mu la guardu, mi venanu a mente tanti ricordi e mi venanu li brividi guardandu li scolari chi affettuosamente, stanu ‘ntuornu a la Maestra.
Li masculiegghi eranu vestuti cu nu grambiali nivuru e nu collettu jiancu ligatu cu nu nastru puru igghu jiancu o celeste; nu numaru romanu cusutu supa lu grambiali, dicìa la classi chi stacivi frequentandu. Li fhimminiegghi, pe’ mu si distinguanu, si vestianu puru igghi cu nu grambiali nivuru e nu collettu jiancu, ma lu nastru chi ligava lu collettu, era rosa.
‘Nta la fhotografìa chi custodisciu gelosamente, ‘nci sunu certi fhigghjiuoli cu li capigghi tagghjiati a zeru, e la necessità, non’era pemmu seguanu la moda de’ lu momentu, ma mu si difhendanu de li Piducchji chi, spessu, ‘mpestavanu tutti li fhigghjiuoli de’ li scuoli ‘nta l’anni ‘40 e ‘50.
L’auli de’ la scola elementare eranu cotojia illuminati cu na lampadina, certi vuoti senza mancu na fhurnesta pemmu si fha cangiara l’aria, chi era sempre puzzolente.
L’aria era irrespirabili pecchì, nonostanti lu controllu supa l’igieni personali chi fhacìa lu maestru o, la maestra, quasi tutti si limitavanu mu si lavanu sulu l’essenziali pecchì, li casi de’ Curnga non’eranu attrezzati de’ doccia o de acqua corrente. L’acqua era sempre puocu pecchì havìa mu si pigghja a li fhuntani de’ lu paisi. Li scuoli, non’eranu cuomu chigghi de’ ojia, cu corridoi luonghi e fhurniesti de tutti li parti, chi la rendanu bella luminosa, cu lavagni mpenduti a li mura, accussì cuomu sunu chigghi chi potìmu vidira ‘nta li scuoli moderni de’ ogni paisi o ‘nta la televisioni.
Si trovavanu nta stanzi de’ casa o ‘nta catòjia scuri, illuminati cu na lampadìna, chi si trovavanu ‘nta li vari rioni de’ lu paisi, e chi eranu fhatti de’ 30 o 40 fhigghjiuoli, cu lavagni appojiati supra nu’ tripiedi, e banchi de’ lignu a dui posti cu dui buchi usati de li scolari pemmu appojianu lu calamaru mu puonu scrivìra. La pinna a sfera havìa nesciutu de’ puocu (1945) e, cu la potìa havìra, era consideratu nu’ privileggiatu pecchì, tutti l’attri, scrivìanu cu l’inchiuostru usandu la pinna cu’ lu pinninu e, guai si macchjiavi lu fhuogghjiu de’ lu quadernu pecchì . . . eranu bacchettati ‘nta li mani nudi de’ li scolari distratti e disordinati. Nommu si macchjiava lu fhuogghjiu de’ lu quadernu, fhacìa parti de’ la disciplina de’ li scolari. Li scuoli a Curnga si trovavanu a tutti li rioni de’ lu paisi, ma li classi li fhacìanu no’ ‘nmodu mu vanu sulu chigghi de’ lu stessu rioni, ma venìanu mandati fhigghjiuoli de’ estrazioni sociali diversa. Capitava accussì ca ‘nta na classi si trovava lu fhigghjiu de’ lu professionista, mbiscatu cu lu fhigghjiu de’ nu zzappaturi e de’ nu mastru artigianu.
Li scuoli de’ lu periodu chi li frequentài io, li ricuordu quasi tutti: ‘nd’avìa una Sutta la Via duva ‘nsegnava la Maestra Balbu; dui a Na’ Traccola duva ‘nsegnavanu lu Maestru Sgruomu e la Maestra Minniti; tri a Santu Ruoccu, a lu Palazzu Russu duva ‘nsegnavanu lu Maestru Carru Piru, lu Maestru Anania e lu Maestru Aloisi, l’urtima era sutta la casa de’ lu Maestru Terranova, chi era sia lu Maestru ca lu proprietariu de’ lu locali.
‘Nd’avìa sicaramente tanti attri ma, chisti sunu chigghi chi io mi ricuordu, puru pecchì na scola potìa cangiara de’ n’annu a n’attru, sia spostandusi de’ nu postu a n’attru, sia modifhicandu li dimensioni de’ lu locali, magari cu cchiù luminosi, e cu’ fhurniesti.
Era na’ scola duva lu rapportu umanu era la cosa cchjiù mportanti, e ogni maestru o maestra, cercava mu instaura cu li scolari sua.
Non ‘nc’era la Televisioni e puru li giornali arrivavanu a lu paisi cu tanta difficoltà. Chigghu chi nui fhigghjiuoli potìamu apprendira, era tuttu chigghu chi potìamu vidìra e toccara, e chi potìanu ‘ncuntrara durante la jiornata ‘nta lu paisi, lu riestu dipendìa de’ lu Maestru.
Mi ricuordu lu giornale “Il Tempo” chi lu maestru mio accattava tutti li matìni chi, pe’ nui scolari, sembrava na’ cosa ‘mpossibili potìra lejira tutti chigghi pagini scritti, soprattuttu pecchì sapìamu quantu era difficili pe’ nui lejira na pagina de’ libru chi era scritta sulu ‘mparti cu tanti fhiguri ntuornu.
Li Maestri, armenu na’ vota all’annu, portavanu li scolari ‘ngita, a Santu Lia Viecchjiu, mu puonu scoprira la natura, ‘cuntrandu licierti, fhormiculi e acciegghi chi abbundavanu duranti lu percorsu.
Li fhimminiegghi, cogghjianu li fhjiuri de’ campu de’ rigalara a la Maestra, o a lu Maestru chi, quandu si tornava ‘nta la scola, li depositava a li piedi de’ lu Crucifhissu ‘mpendutu supra la cattedra.
‘Nta chisti occasioni, li classi venìanu accoppiati ad’attri classi, ed’eranu li Maestri chi, ‘mbasi a chigghu chi bolìanu mu fhanu duranti l’annu scolasticu, stabilianu sia cuomu sia quandu si potìanu fhara chisti giti.
Naturalmenta si fhacìanu a primavera, quandu lu tiempu era serenu, no’ fhacìa fhriddu e no chjiovìa.
 Mi ricuordu puru la fhesta de’ l’arvuri e lu corteu de’ lu dui Novembre riservatu a li scolari de’ la quinta, chi, in silenziu assolutu e tutti composti, si partìa de’ la Chjiesa Matra e si arrivava a lu Cimiteru, duva l’Acciprieviti donn’Antuoni Bonellu, dicìa la missa a suffraggiu de’ li muorti.
Li giti scolastici eranu organizzati ‘nta lu modu cchiù severu possibili; li scolari caminavanu ‘mpila pe’ dui, tieniendusi pe’ manu, tutti ‘nsilenziu fhina a quandu no’ si arrivava a la perifherìa de’ lu paisi.
De’ chistu puntu in avanti, li scolari eranu liberi mu guardanu e mu parranu tra igghi, ijiendu a la ricerca de’ ‘ncuna cosa curiusa.  Tutti li movimenti havianu mu eranu visibili a lu Maestru, chi era sempre prontu mu spiega descriviendu chigghu chi incuriosiva li fhigghjiuoli. Quandu si tornava a la scola, la disciplina era ancora cchiù rigida de’ l’andata, pecchì li Maestri ‘nci tenìanu mu fhanu vidìra a tutti chigghi perzuni chi si ‘ncuntravanu pe’ la strata, ca li scolari eranu educati e diligenti, quantu lu Maestru pretendìa.
Hajiu mu ti dicu comunque, ca l’istruzioni a Curnga e ‘nta lu meridioni in generali, soprattuttu all’iniziu de’ lu 1900, non’happa na’ normali evoluzioni ma ‘ncuntrau tanti difficoltà.
L’analfabetismu era diffusu ‘nta tutta l’Italia e ‘nta lu Meridioni era ancora de’ cchiù accentuatu, pecchì l’insegnamentu no’ rescìa mu ‘ncida ‘nmodu signifhicativu, soprattuttu ‘nta li paisi picciuli cuomu Curnga.
La storia dìcia ca la scola cominciau a migliorara verzu lu 1904 cu la riforma Gentili e Salvemini, quandu vinna ‘mpostu a li cotrari mu frequentanu la scola fhina a dudici anni d’età, chi prevedìa puru nu corsu popolari de’ quinta e sesta classi.
Sta riforma ‘mponìa a li Comuni mu creanu scuoli fhina a la quarta, e mu sostenanu li scolari economicamente cchiù povari, pecchì lu Statu risarcìa li Comuni cchiù povari.
‘Nta lu 1911 la scola elementari, chi era prima gestita de’ li Comuni, diventa nu’ serviziu statali, e lu Statu paga puru li stipendi a li maestri elementari, ‘nmodu mu regolamenta e mu controlla miegghjiu l’istruzioni ‘nta li paiseggha chi eranu li cchiù disagiati, cu na miegghjiu organizzazioni de’ la scola.
Purtroppu, scoppiau la Prima Guerra Mondiali, e tuttu diventau cchiù difficili. La storia de’ la fhormazioni scolastica ‘nta Curga a partira de’ lu 1900 è tutta particolari pecchì, cuomu ogni picciulu paisi, sia pe’ mancanza de’ sordi chi li Comuni non’havìani sia pe’ li strati de’ comunicazioni chi mancavanu o, eranu tutti sdarrupati, no’ si fhacìa scola mai ‘nmodu regolari.
Li stessi Maestri scarzijiavanu e puru igghi chi havìanu de “fhormara”, non’eranu pua tantu fhormati culturalmente.
Non’era fhacili mu si trova nu’ Maestru pemmu fhà scola ‘nta nu paisi picciulu e disagiatu cuomu Curnga.
L’attri paisi non’eranu miegghjiu de’ nui. La maggior parti de’ li perzuni, si ‘mparava mu lejia e mu scriva jiendu arriedi a li Monaci e a li Prieviti chi de’ solitu, no’ si limitavanu mu dicìanu la missa li Dominichi e li fhiesti cumandati, ma si dedicavanu puru a l’istruzioni scolastica pe’ chigghi chi volìanu mu si ‘mparanu mu lejianu e mu scrivanu.
Fhuru dui Prieviti, Michienzi (?) e Lo Scerbo (?), de’ origini curinghisi e de’ tutti canusciuti chi, cu pacienza certosina, dedicavanu bona parti de’ la jiornata pemmu ‘mparanu li fhigghjiuoli sia mu lejianu ca mu scrivanu, soprattuttu a chigghi chi havìanu cchjiù voglia.
Certi genitori ‘nci affidavanu li fhigghji a chisti dui personaggi ‘nmodu tali mu verifhicanu si eranu o menu portati verzu lu studiu, e ‘nta la maggior parti de’ li casi, l’esitu era sempre positivu, o ad’ogni casu, sufficienti mu sunu ‘ndirizzati e mu si ‘mparanu mu lejianu e mu scrivaniu, puru ca fhacìanu scarampampuli.
‘Nta Curnga, mu approfittanu de’ chista occasioni, no’ fhuru tanti, ma nemmenu puocu.
Unu de’ chisti fhù Mastru Miliu, compusantaru de Curnga ‘nta l’anni ‘40 - ‘50, uomu umili ma ‘ntelligenti e parecchiu ‘ntraprendenti.  
Frequenta li lezioni de’ chisti dui Prieviti e si ‘mpara accussì sia mu lejia sia mu scriva, cosa chi era ‘mportanti pe’ li tiempi chi si stacìanu attraversandu.
Tieni presenti ca puocu eranu li perzuni chi sapìanu mu scrivanu la fhirma propria supa nu’ documentu, e chistu era spessu ‘mportanti vistu ca, assiemi a lu segnu de’ la crusi chi rappresentava la fhirma de’ l’analfabeti, ‘nta documenti ‘mportanti, era necessariu puru la fhirma de’ nu’ testimuoni, o nu garanti, mu havìanu validità legali.
Pe’ testimuoni, Mastru Miliu, era fhattu apposta, pecchì si offrìa volentieri mu lu fhacia, gratuitamente.
Era ‘ngradu mu scriva ‘mportanti relazioni pe’ la Procura de’ Maida, e mu fhà chistu, si dimostrau abilissimu e competenti.
Chistu personaggiu, assiemi a lu fharmacista e a lu Prieviti de’ paisi, fhù pe’ luongu tiempu puntu de’ riferimentu pe’ li mammi de’ li curinghisi chi havìanu ‘ncunu fhiggjiu emigratu ‘nta l’America.
Jianu mu trovanu chisti perzuni ogni vota chi avìanu de’ scrivira ‘ncuna littara, oppuru mu si fhanu lejira chigghi chi ‘nci arrivavanu, e chistu era nu favori chi si offrìa gratuitamente ‘nta la maggior parti de’ li casi.
Certi vuoti, li mammi mu si sdebitanu, ‘nci rigalavanu ova, poseggha, uogghjiu o fharina chi, de’ chigghi tiempi, eranu l’alimenti basi de’ nutrimientu.
Tiempi veramente diffhicili.
 
Nu Scarparu Maestru de’ vita:
(Mastru Nicola Granatu).
 
‘Nta Curnga tutti canuscìanu a Mastru Nicola Granatu, scarparu de’ profhessioni, de’ tutti stimatu sia pecchì era nu “bbuonu mastru”, sia pecchì ti fhacìa sgascìara de’ li risati.
Era nu veru Mastru, soprattuttu “de’ Vita”.
Havìa la putifha Sutta la Via, nu’ solitu sgabbuzzinu a pianu terra, cu lu solitu bancu de’ lavoru misu cchiù vicinu possibili a la porta de ingressu, pemmu po’ vidira miegghjiu chigghu chi stacìa fhaciendu.
Na’ generazioni chi rispiarmava supra a tuttu, e lu risparmiu era nu modu de’ campara pe’ cui, pe’ igghi, la corrente elettrica era nu’ sprecu e cuomu tali jia risparmiata, puru a rischiu mu si pata lu fhriddu. Quandu non’era possibili fhara chistu, allora si appicciava na’ lampadina chi pendìa de’ lu suffittu, chi arrivava a nu parmu de’ lu bancariegghu, cumbogghjiata cu nu cartuni a ‘mbutu, ‘nmodu mu concentra la luci tutta su chigghu chi stacìa fhaciendu e nomu ‘nci sbatta ‘nta l’uocchji.
Scarpi de’ conzara e conzati, cu fhurmi marteggha e piezzi de sola ‘ncatastati ‘ntuornu a lu bancariegghu de’ lavoru ‘nmodu mu sunu cchiù fhacilmente spezionati pe’ l’usu de’ li tanti riparazioni chi avìanu de fhara.
Lu bancariegghu non’era pe’ tutti lu stessu e de’ la stessa fhorma pecchì ‘nc’eranu scarpari chi l’avìanu cu lu pianu d’appoggiu rotundu, attri de’ fhorma quatrata, ma tutti avìanu scanzii fhatti cu listiegghi, ‘nmodu mu si separavanu li chjiova picciuli de’ li randi, li simiggi de’ li spinguletti, de’ l’attacci ecc., mentre lu spacu, li ‘nziti e la pici usata mu si renda cchiù resistente lu spacu pe’ cusìra li tomaji, eranu tenuti ‘nta lu tiraturi principali chi era riservatu sulu a lu mastru.
Li curteggha luonghi e affilatizzi, quandu no’ venìanu utilizzati, si ‘mpilavanu ‘mbeci ‘nta nu grupu, sutta lu tiraturi pecchì era troppu pericolosu mu si tenanu supra lu bancariegghu.
Mu si costruiscia nu paru de’ scarpi, era troppu complicatu: mi ricuordu ca si partìa de’ na tomaia, cchiù o menu dura e cchiù o menu flessibbili scegghjiuta de lu clienti de’ nu campionariu ‘mpendutu a nu chjiuovu, e la scelta avvenìa ‘mbasi a lu tipu e all’usu chi havìa de’ fhara quandu eranu fhinuti, scegghjiendu puru la sola chi, pe’ dui o tri uri si dassava a muogghu ‘nta l’acqua ‘nmodu mu ammorbidiscia e mu si potìa lavorava miegghiu.
Era lu Mastru chi na vota tagghjiati li vari parti chi formavanu la tomaia, prima cusìa a manu li vari parti e pua, supa la fhurma, cusìa nu piezzu de cuojiu, lu guarduniegghu, chi la cunturnava tutta quanta.
A parti, venìa preparata la sola chi, ancora vagnata, venìa pistata supa na’ fhurma de’ fhierru appojiata supra li dinocchja, cu nu mortiegghu a testa larga, n‘nmodu mu si renda ancora cchiù cumpatta e resistenti.
Na’ vota pistata, si rifhilava a forma de’ pianta de’ peda, de’ dimenzioni adeguati a lu numaru de’ peda chi lu patruni misurava ma, cu li dovuti abbondanzi   pe’ li rifhinituri fhinali.
 
L’operazioni continuava cusiendu la tomaia cu la sola, e l’operazioni era abbastanza delicata pecchì avìa mu si stacia attienti nommu si rovinava la tomaia.
Supra la soletta venìa praticata na’ scannalatura chi avìa mu ammuccia lu spacu cusutu cu lu guarduolu.
Mu si fhacia la scannalatura, ‘nci volìa maestrìa e abilità pecchì, non’era fhacili mu si rifhila diritta e cu la dovuta profhondità.
 
Pe’ chista operazioni de’ cusitura fhinali, venìa usata la liesina cu l’occhjiellu, e lu spacu fhortifhicatu cu la pici; lu mastru provvedìa sia mu cusa ca mu chjiuda la scannalatura, concludiendu accussì l’opera cchjiù ‘mportanti.
Li rifhinituri eranu riservati puru a lu mastru, pecchì ‘nci volìa arti pemmu si rifhiniscia nu paru de scarpi: havìa mu si rifhila la sola, mu si ripassa cu la raspa tuttu lu bordu esternu, prima cu chiggha a grana grossa e pua cu chiggha a grana cchiù fhina, si stricava cu la pici e si fhinìa lucidandu li scarpi cu cromatina de’ culuri adeguatu.
Quandu si trattava de’ scarpuni o de’ scarpi pe’ fhigghjiuoli stramazzi, a li scarpi venìanu mpingiuti l’attacci (certi chjiova cu la testa larga), e l’urtima lucidata venìa fhatta spessu cu grassu de’ puorcu siccatu.
Quandu li scarpi eranu fjinuti, era na’ fhesta, ma lu mastru venìa spessu pagatu doppu la metitura, quandu puru lu zzappaturi potìa disponira de’ ‘ncunu sordu.
Mastru Nicola, era na’ perzuna chi parrava e chi discutìa cu tutti, e si divertìa mu dicia la sua supa a tuttu chigghu chi l’attri fhacìanu, e fhaciendu chistu, si divertìa e fhacìa divertira.
Era religiosu ma, comunista, sempra ‘ncontrastu cu li prieviti, pecchì de’ chisti, non’havìa la minima fhiducia.
Mi ricuordu quandu cuntava ncuna fhattariegghu, pecchì lu fhacìa sempre ridiendu, soprattuttu quandu ‘ncintravanu li prieviti.
Quandu a Pasqua l’acciprieviti Bonellu ijia ‘ngiru mu benedicia li casi, passava puru de’ la putifha sua, e igghu, a tutti l’amici nci cuntava diciendo: “si passa e bbò mu la benedìcia, la benidìcia, sinnò a mmia, chiggha umidità chi mi serva?”.
Fhinìa sempre cu la benedizzioni de’ la putifha de’ Mastru Nicola, pregandu cuomu tutti l’attri, fhaciendu capiscìra ca de’ chigghu chi dicìa, non’era de’ lu tuttu conbintu.
Tra lu prieviti Donn’Antuoni Bonellu e Mastru Nicola, ‘nci fhu sampre tanta stima e tantu rispettu.