Nu Parmientu: Tra racina, vindigna e vinu

Nu Parmientu: Tra racina, vindigna e vinu
 
. . . Mo’ tornamu nta lu passu pe’ continuara lu giru versu la parti cchiù avutta de’ lu paisi, ma giramu de’ sutta la via.
No’ ‘nc’eranu tanti attività luongu sta strata, anzi, sunu puocu chigghi chi io mi ricuordu. Mi ricuordu u “Parmientude Don Pierinu Perugino, la prima casa chi si trova ‘nta la curva chi separa Corsu Garibaldi de’ Via Roma.
Hai pemmu sai ca la vigna, assiemi a li Livari, era la coltivazioni cchiù ‘mportanti e produttiva pe’ lu paisi pe’ cui, duranti lu periodu chi si vindignava o si cogghjianu l’alivi, era nu continu andirivieni de’ ciucci chi arrivavanu de’ li campagni diretti a li parmienti e viceversa, o a li Fhrantoi.
Li posti duva si trovavanu li vigni, ojia convertiti ‘nta suoli edificabili, eranu Salici, Trimalu e Grigghu e chigghi cchiù distanti Cerzitu e Fhiegu. Zzappara vigna era nu lavoru pisanti e ‘mpegnativu, pecchì no ‘nc’eranu mezzi meccanici, tuttu era fhattu a manu e, ‘nta certi periodi si fhatigava de’ bruttu, fhina a quandu no’ si arrivava a la vindigna chi si fhacìa ‘nta lu periodu tra fhini settembre-iniziu misi de novembre.
La vindigna, nonostanti la fhatiga, era considerata na jiornata de’ fhesta, tantochi nta sta jiornata, era concessu puru a li cchiù picciuli nommu vannu a la scola.
Lavoravanu puru igghi distribuiendu acqua e sbacantandu panara chjini de zzuppi de’ recina, ‘nta li cuofhini, chi venianu pua portati de’ li ciucci a lu parmientu pemmu venanu pischijiati.
Lu trasportu venìa fhattu, ‘nbasi a la distanza de’ la località duva si trovava la vigna rispettu a lu parmientu, e venìa fhattu cu li carri trainati de Vua, si eranu distanti, oppuru nta cuofhini e cu li ciucci.
Lu jiuornu de’ la vindigna era stabilitu mbasi a la dusponibilità de’ lu parmientu, pe’ cui, era ‘mportanti mu si prenota ‘ntiempu.
Cuomu pe’ la metitura, puru la vindigna era soggetta a la solidarietà de’ lu “lavoru comuni” pecchì parienti, amici e vicini de’ casa, cuomu puru li ciucci de’ parienti e vicini, si associavanu a la vindigna, dedicandu la jiornata de’ lavoru, cosa chi venìa pua renduta quandu si nvertianu li parti. Duranti lu trasportu a lu parmientu si usava, ‘nsegnu d’amicizia, offrira ‘ncunu grappu de recina a li mastri chi lavoravanu davanti la porta de’ la putifha. Mi ricuordu chigghi chi pischijiavanu la recina, chi a piedi nudi, pischijiavanu la recina supa lu parmientu e supa a certi tavuluni ‘mbicinati l’unu all’attru, ‘nmodu tali ca lu mustu potìa sculara ‘nta la vasca suttastanti ammienzu a li fhessuri de congiunzioni. Ccà, restava pe’ ‘n’intera nottata prima mu si proceda a la spremitura de’ li fhrusti usandu lu Torchjiu.
Era, ed’è credenza - forse vera - ca lu culuri de lu vinu dipenda de’ lu tiempu de fhermentazioni de’ lu mustu nta li fhruschi, pertantu era necessaria na bona esperienza pemmu si ottena na bona qualità de vinu. Lu mustu venìa misu ‘nta li varrili chi li ciucci, sempre disponibili, lu portavanu fhina a lu catuojiu duva, lu proprietariu lu mentìa ‘nta li vutti, duva riposava e fhermentava fhina a lu fhamosu jiuornu de San Martinu - 11 Novembre – chi, cuomu dicìa nu fhamosu proverbiu, “ogni mustu diventa vinu”.
‘Nta curga comunque, no’ tutti rispettavanu chista data; li Mmaculatisti per’esempiu, perciavanu li vutti l’8 Dicembre, jiuornu de’ la Mmaculata. Nu particulari . . . pe’ la recina jianca, chi matura prima, la vindigna venìa anticipata a settembre, ‘nmodu de havìra prontu lu vinu pe’ la terza dominica d’ottobri, quandu a curnga, cuomu già ti dissi, ‘nc’è la fhera de’ la Mmaculata, e ‘nta li fhamosi Bettuli, lu vinu nuovu, si consumava assiemi a specialità cuomu: baccalà fhrittu, alivi scacciati e suffrittu de majiali.
La Fhalignamerìa de’ Via Roma e li Barracchi de’ Mara
 
‘Nchianandu pe’ Via Roma si ‘ncuntravanu tanti attri putifhi e Mastri de’ valori, e ammienzu a chisti ‘nc’era Mastru Vinanzu Cannella, nu fhalignami chi era canusciutu soprattuttu pecchì protagonista de’ ‘na tradizioni curinghisi de’ cui vuogghjiu mu ti parru.
Mastru Vinanzu Cannella assiemi a Mastru Nicola Venezianu, era canusciutu ‘nta Curnga pecchì, fhù unu de li primi chi cominciaru a costruira Barracchi a lu Mara de’ Curnga quandu, a la fhini de’ l’anni ‘50 e ‘nta l’anni ‘60 e ‘70 si sostituiru li Capandi de’ Fhilici chi eranu puocu sicuri e scommidi, cu li Barracchi de’ lignu, pe’ li curinghisi chi passavanu l’estati a la Prajia de’ Curnga.
 ‘N’abitudini chi li curinghisi havienu acquisitu de’ tiempu immemorabili, de’ quandu si costruianu na Capanda a lidu de mara, e si trasferianu mu puonu godìra tuttu lu benesseri chi portava lu sula liuni.
E’ na pagina de’ storia locali chi va ricordata.
. . . St’annu, jiamu a mara? Era la domanda chi continuamente li fhigghjiuoli ‘nci fhacianu a li mammi pe’ tuttu lu viernu, e si diventava cchiù ‘mpazienti quandu si mbicinava lu misi de’ Majiu e la chiusura de’ li scuoli nta lu misi de’ Giugnu.
Era la cosa chi tutti aspettavanu, puru li Nanni pecchì, a mara, potianu placara li doluri reumatici cu li Stufhi de’ rina, chi si potianu fhara arriedi a li capandi, duva la rina vrusciava de’ cchjiù. (Eranu fhuossi preparati a matinata, cu na pala, e verzu menzijuornu, quandu la rina s’avia scarfatu per bene, li viecchi si cumbogghjiavanu cu nu linzuolu, si sdrajiavanu e venìanu cumbogghjiati cu la rina vruscente pe’ na bona menz’ura.
 Eranu propri li Miedici de’ chigghi tiempi chi ordinavanu chista terapia e, sentiendu lu pareri de’ cu li praticava, eranu veramente nu toccasana, si sentianu de’ lu tuttu ringiovanuti.
Lu scindira a mara era precedutu de’ na lunga serie de’ preparativi chi avìanu mu si assorvanu e chi riguardava, cui pe’ na cosa, cui pe’ n’attra, tutti chigghi chi decidianu mu vanu a mara.
Li fhigghjiuoli venianu portati ggha unu de’ li tanti Varvieri presenti ‘nta Curnga, ed’eranu li primi a cui venianu tagghjiati li capigghi a zeru, pecchì lu rientru a lu paisi, era previstu armenu doppu nu misi. Eranu ‘ndaffarati li fhimmini, mammi de’ fhamigghjia, chi preparavanu, tra tanti attri cuosi, una o dui fhurnati de’ Pana e attrettanti de’ Viscottina cu lu fhinuocchjiu; venianu scegghjiuti li cassaluori e li commidi chi havìanu mu si portanu a mara, compresi li piatti, li mbruocchi, li cucchjiarini e li curteggha, chi mpaccavanu per bene, nommu si ruppanu duranti lu viaggiu.
Venìa coinvoltu puru lu Mastru Fhalignami scegghjiutu pemmu fhacia la Barracca, pecchì havìa pemmu accatta li chjiova chi avìa mu adopera mu ‘nchiova li tavuli. La sira de’ la partenza tutti eranu ‘ndaffarati pemmu carricanu supra lu Camiu, o lu Carru, tutti li arruobbi necessari a la permanenza a Mara, e fhinuta tutta sta fhrenesìa, si partìa, ‘mpiena notta, pemmu si arriva a la Prajia cu lu scuru, a matinata. S’arrivava a mara a li primi luci de’ l’alba, e immediatamente cominciava l’odissea pecchì havìa mu si portanu tutti li cuosi de’ duva scarricava lu Camiu (lu Piazzali) fhina a lu postu, scegghjiutu tiempu prima cu nu cartellu, duva havìa mu si fhacia la Barracca.
La Barracca si fhacìa seguiendu proceduri precisi; si no’ si fhacìanu li fhuossi, no’ si potienu fhissara li Murali nterra, e senza murali no’ si potìanu nchiovara li tavuli. Si scavavanu allora fhuossi fhuondi armenu nu’ metru, duva venìanu fhissati, ben allineati e a giusta distanza, li Murali.
Supa li Murali, venìanu ‘nchiovati li tavoli pemmu si fhormanu li pareti de’ la Barracca. Li fhuossi duva si mentìanu li murali, venìanu squatrati e fhatti no’ a casacciu, ma seguiendu reguli precisi ‘nmodu nommu fhà brutti fhiguri puru lu Mastru.
Si la Barracca si costruia fhora squatru, lu Mastru venìa sprubbicatu nta la chjiazza, e pe’ parecchiu tiempu venìa indicatu cuomu nu Mastru ‘mprovvisatu.
Mu si squatra la Barracca e pemmu si evitavanu brutti fhiguri, si pigghjiava nu fhilu luongu, e si fhacìanu tri azzomba supra a tri dimenzioni diversi.
Li tri dimenzioni, apparentamente ‘nsignificanti, costituianu li tri lati de’ nu triangulu rettangulu, chi venìa appojiatu ‘nterra mentiendu tri ligniceggha in corrispondenza de ogni azzuombu.
Era chjiamata la “Terna Pitagorica”, chi ogni mastru si vantava mu canuscia, ed’eranu li tri numeri (3 - 4 - 5) chi formanu li lati de nu triangulu rettangulu, chi ha dui lati de 3 e 4 metri mentre lu latu cchiù luongu misura 5 metri.
Non’era necessariu usara lu liviegghu pemmu si disponanu perfettamente in orizzontali li tavuli, pecchì bastava mu si guarda l’orizzonte supra lu mara pemmu s’ottena chistu; era mbeci necessariu decidira la pendenza de’ li Landi o Teloni, verzu lu Mara o verzu la Muntagna, pemmu si fha scurrira l’acqua chjiovana.
La scelta venìa fhatta mbasi a lu “sentutu dira”, cioè a l’esperienza de’ li viecchj prajiuoti, cuomu ognunu si sentìa d’essere.
L’urtima operazione era chiggha de’ sistemara li Landi de’ cuvertura o, pe’ cui l’avìa, lu Teloni, chi cumbogghjiava tutta la Barracca. Chista soluzioni havìa lu vantaggiu mu mantena cchiù fhrisca la Barracca sutta lu sula liuni durante la jiornata ma, havìa contemporaneamente lu svantaggiu ca si potìa sciancara quandu tirava vientu fhorta de’ mara chi, ogni fini stagioni, si presentava puntuali, mentiendu a rischiu tutti li perzuni chi l’occupavanu la prajia.
 
Quandu si fhinìa de’ ‘nchivara, era compitu de’ li fhimmini pemmu pulizzanu l’iervi e li pietri pumici all’internu de’ la Barracca, e mu sistemanu a propriu piacimentu li lietti e li casci all’internu de’ la Barracca fhinuta, cu tuttu lu mangiara chi contenianu.
La Cucina s’appojiava a la Barracca, e si costruia de’ la parti verzu la Muntagna.
Era fhatta cu Fhurchi e Pali de’ Livara stagionati, e cu canni ligati cu fhierru fhilatu o cu ligari.  Si cumbogghjiava cu Fhilici o cu fhraschi tagghjiati arriedi a lu Rimboscamentu, duva criscianu ed’eranu a disposizioni de’ tutti. Li Stuoj de’ cannizzuoli, ancora non’esistianu.
Hai mu sai ca, mentre si tagghjiavanu li fhraschi arriedi lu rimboschimentu, ognunu cercava mu trova puru ncuna Fhjialona chi, sutta sti fhraschi havìanu la tana duva s’ammucciavanu e campavanu serenamente.
Era lu giocattulu prefheritu de’ li fhigghjiuoli, e la fhjialona si la portavanu ovunque, puru nta l’acqua, quandu si fhacìanu lu bagnu. 
Ojia, arriedi a la pineta, ‘nci sunu aziendi, vivai e piantagioni a produzioni ‘ntensiva, chi producianu fhrutta e verdura chi vena mandata nta tutti li mercati d’Europa.
Li fhraschi, a la fhini de’ la stagioni estiva, no’ si vrusciavanu supa la spiaggia cuomu si vrusciava la restuccia, ma si mbasciabanu a mazzu e si portavanu a la casa, a Curga, pecchì eranu na’ risorza chi servia mu u si fhacia lu pana e mu si gugghjianu li pumadora pe’ la sarza.
Pe’ parecchi fhamigghj de’ zzappaturi de’ Curga, lu jira a mara era na’ commidità, pecchì si trovavanu cchiù vicini a la terra de’ proprietà o cu dirittu de’ coltivazioni, chi zzappavanu.
A lu Cannitu si trovavanu li tierri chi havianu ottenutu cu lu dirittu de’ coltivazioni, ma puru chigghi chi eranu de’ proprietà si trovavanu cchiù vicini pecchì, la Chiana, Mudduni, Laganiegghu, Cannitu e Serini, eranu vicini a lu mara, e ‘nta sti terreni producianu ogni bene de’ Ddio.
La sira, quandu li zzappaturi e li massari arrivavanu cu lu Ciucciu o lu Cavagghu a la Barracca, portavanu de’ tuttu: fhicu malangiani, zubbigghu, pruna, pira, maluni, e pumadora chi, fhatti ‘nzalata, ricrijiavanu e saziavanu ogni famigghjia.
 ‘Nc’era puru cu a Mara si portava lu puorcu, ‘ncunu pollo e ‘ncuna gagghina, sia pe’ l’ova ca pe la carni chi potianu havira senza mu vanu mu l’accattanu a la Vuccerìa chi, a mara, mancu nc’era.
Puru chisti cuosi eranu na risorza ‘mportanti, ed’eranu pe’ tutti.
L’uovu sbattutu ‘nci lu dunavanu a li fhigghjiuoli malandati de saluti, ma l’usu de’ scangiara arrobba chi arrivava de’ la campagna, era na’ tradizioni chi rendìa ancora cchiù amici e rispettosi li vicini de’ Barracca. Cuomu si puonu scordara chigghi fhressurati de Pipi e Patati, chigghi Vrasciuoli de’ Patati, li Malangiani chjini cu ova, suppressati e pruovula, chigghi Maluni e tutti chigghi pruna e pira chi li mammi vicini de Capanda o de Barracca si scangiavanu quasi tutti li juorni.
Era na’ sorta de’ aiutu reciprucu chi si manifhestava tra tutti li vicini, nugghu esclusu.
Era nu modu de’ campara quasi primitivu, senza corrente elettrica e quindi senza Radiu o televisioni, cu’ l’acqua de’ vivìra pigghjiata a na “Sena” chi venìa fhatta a iniziu stagioni cu tutti li bagnanti de’ lu stessu rioni chi spalavanu la rina. Puru chista era ‘n’usanza de’ li curinghisi, chi costruianu na Sena pe’ ogni rioni, ’nmodu mu puonu disponira de’ acqua potabili sia pe’ cucinara ca pe’ usu igienicu.
Ti cuntu mo’ cuomu venianu costruiti li Seni e ti spiegu la tecnica usata pemmu si realizza chistu postu duva li Prajiuoti jianu, cu bumbuli, damigiani, bidoni e contenitori vari, pemmu pigghjanu l’acqua potabili. Venìa scavata na’ fhossa enormi, arriedi a la longa fhila de’ Barracchi e Capandi, chi si stendìa de’ Randaci a Turrina, cu opera manuali gratuita de’ parti de’ tutti li vicini, e de tutti chigghi chi prevedianu ca la potìanu usara.
Trovata l’acqua, prima si mentianu cutigghji de’ mara cchjiù o menu gruossi duva s’appojiava lu primu tubu, pua, supa de’ chistu venìanu posati l’attri tubi de’ cimentu, misi unu supa de’ n’attru, cu chigghi cchiù vasci immergiuti, armenu 80-90 centimetri ‘nta l’acqua stessa.
Sagghjiendu verzu l’avuttu, li tubi venìanu ‘ncastrati tra de’ igghi e cunturnati de’ rina ‘nmodu de’ rendìra la colonna cchiù stabili possibili. Tuttu chistu fhinu a quandu no’ si arrivava quasi fhina a lu livellu de’ la strata.  Doppu chi si risettava tutta la notta, era pronta pe’ l’usu.
L’acqua, prima pemmu arrivanu li Pompi a Manuvella, venìa ricogghjiouta cu nu chiccariegghu attaccatu a na Canna longa, ma tantu longa fhina a quandu no’ si arrivava all’acqua a lu fhondu de’ li tubi.
Mu si inchjia nu commidu non’era immediatu anzi . . . era abbastanza luongu e fhaticosu cuomu longa era puru la fhila d’attesa.
A Mara, puru lu luci usatu mu si cucina era ottenutu cu ligniceggha ricogghjiuti supra la spiaggia, duva venìa depositata de’ lu mara duranti lu viernu, quandu si agitava e doppu chi eranu ccà portati de li fhiumi Amatu, Turrina e Randaci, chi si trovanu a li limiti estremi de’ la prajia de’ Curnga.
Li fhiumari stessi eranu na’ ricchezza pecchì, oltra a li ligna chi portavanu, venìanu sfruttati pemmu pe’ piscara Angigghi chi, a migghjiara li popolavanu.
Na’ pisca chi era de’ parecchi praticata pecchì era fhacili mu si menta in’attu. Bastava mpatti na’ cordeggha ligata a na’ canna de’ na parti, e de’ l’attra ligandu nu mazzu de’ Viermi de’ terra.
 Si apirìa nu mbrella a rovesciu, e l’angigghi chi si ncorcinijiavanu a li viermi, si piscavanu jiettanduli gghad’intra; lu jiuocu era fhattu.
A cui ‘nci piacia mu pisca, e soprattuttu nci piacianu l’angigghi, li siri li passava a Turrina o a Randaci, piscandu angigghi.
Chigghi chi si nda ‘ntendìanu de’ cchiù, piscavanu l’angigghi cu la Pipirìa, na’ ligara mbilenata, chi si pistava e si dassava ‘nta l’acqua a muogghu. Lu brodu chi cacciava sta pianta, s’assorbìa l’ossiggenu de’ l’acqua, e l’angigghi, sturduti, venìanu a galla.
Bastavanu sulu li mani o la tinagghjia de’ l’engigghi mu s’acchjiappanu, ed’eranu quantitativi ‘ndustriali.
Chista tecnica, puru ca era proibita de’ la legge fhorestali, venìa spessu adoperata, ... ed’eranu angigghi pe’ tutti.
Doppu lu bagnu, non ‘nc’era lu shampu o tuvagghj all’urtimu gridu, e nemmenu Mbrelloni tutti culurati ma, linzola tessuti a lu tilaru, ligati a dui o quattru canni pe’ fara umbra e stara a lu fhriscu de’ lu sula liuni, e tuvagghji e linzola pe’ li fhimmini cchiù grassi, mu si asciucanu doppu lu bagnu ‘nta l’acqua limpida de’ lu mara nuostru.
Li servizi igienici, fhacianu completamente schifhu.
Eranu li generazioni chi fhacìanu umbra “cu nu linzuolu e dui canni”. Hajiu mu ti cuntu però de’ n’uomu picciulu picciulu, chi no’ facìa mala a nugghu, chi lu chiamavumu “Carmelu Vecchia” e chi girava, ‘nta lu periodu estivu, supa la spiaggia de’ curnga e . . . dintuorni.
Nugghu sappa mai quantu anni potìa havira e forse, nemmenu igghu lu sapìa cu precisioni, era certu d’età avanzata e si presentava annu doppu annu, sempre ‘nta li stessi condizioni, cu la stessa fhacci scarnata de’ rughi, sempre cchiù profhondi, sempre cu la stessa disinvoltura e la stessa struttura fisica, cuomu si pe’ igghu lu tiempu s’avìa fhermatu.
Tutti tiravanu a ‘ndivinara, e pe’ certi havìa 70 anni, pe’ attri 80 o addirittura 90 e passa; nugghu sappa mai la vera età de chist’uomu.
 
Era comunque n’uomu sensibili, chi suscitava tanta tenerezza ed’era pe’ chistu coccolatu de’ tutti e de’ tutti sostenutu.
Cui ‘nci porgìa nu piattu de’ pasta, cu ‘nci rigalava nu’ viscottinu o nu’ piezzu de’ pana, cui na pruppetta o na vrasciola cui nu pumaduoru, oppuru fhrutta de’ stagioni.
No’ ‘nci mancau mai nenta e pe chistu capiscìu, ca supa la spiaggia de’ curnga, havìa trovatu tanta generosità nta li curinghisi, chi ‘nci consentìa mu passa tutta la stagioni estiva supa sta prajia.
No’ dunau mai fhastidiu a nugghu, pecchì sappa stara sempre a lu postu sua; dormìa cumbogghjiatu cu na cuverta chi si portava sempre arriedi e cu nu cuscinu fhattu cu la rina o supa la pagghjia e, sulu rari vuoti sutta cuvierti decenti.
Pe’ tutti avìa sempre na’ bona parola e a tutti ‘nci dunava buoni cunsigghji.
Era sempre accerchiatu de’ cotrari e igghu ‘nci cuntava avventuri chi patìu ‘nprima perzuna a lidu de mara, tra lu Pizzu e Falerna, duva igghu era solitu girara. Havia nu serviettu ligatu a na canna chi si portava supra na spaggha, mentre cu n’attra canna scarmunijiava ‘nta li cuosi chi cacciava lu mara cercandu ‘ncuna cosa chi potìa mangiara o ‘nci potìa essere utili.
Pe’ li fhigghjiuoli cchiù picciuli, era lu terrori, no’ pecchì era servaggiu o malu, ma pecchì esteticamente bruttu, e li mammi l’aizzavanu cuntra quandu no’ volianu mu mangianu.
Chiamu “Vecchia” dicìanu, e ti fhazzu portara cu igghu, e chistu, de’ sulu, bastava mu si cumbincianu e mu si rendanu cchiù cumprenzivi li fhigghjiuoli.
N’attru personaggiu chi arrivava puntuali supa la spiaggia de’ Curga, era “Lu Zziu Paulu”.
Nu marinaru chi arrivava cu la barca de’ lignu e, a vela, e si fhermava pe’ tutta la stagioni supa lu litorali. L’ospitalità e la bontà de’ li curinghisi, lu costringìa mu passa tutta la stagioni a Curnga pecchì a chisti, ‘nci vindìa li pisci chi piscava e ‘nci proponìa giri mbarca a tutti chigghi chi ‘nci havìanu datu de’ mangiara durante la jiornata.
Mi dissaru ca l’usanza de’ ijira a mara cu li barracchi, chi durava de’ tantu tiempu, si fhinìu a la fhini de’ l’anni ’70, quandu lu Statu, pe’ mezzu de’ la Capitanerìa de’ Puortu, mu difhenda lu demaniu de’ costruzioni abusivi e mu promuova lu turismu locali, decidìu mu menta fhini a chista usanza sdarrupandu li povari Barracchi cu la fhorza e cu li ruspi. Si havìa ripigghjiatu l’usanza rispettandu certi condizioni nta l’anni successivi, ma ormai, fhiniu de’ lu tuttu.
Attri tiempi.
Era la fhesta de lu sedici Lugliu chi stabilìa li vacanzi de’ li curinghisi, pecchì doppu la fhesta, tutti si trasferianu a mara, dassandu lu paisi completamente o quasi completamente vacanti, pe’ tuttu Lugliu e bona parti de’ lu misi de’ Agustu.
A chigghi tiempi si potìa godìra de’ acqua chjiara e limpida e de’ aria pulita e salutari ojia, chistu non’è cchiù possibili, pecchì l’inquinamentu rovìnau sia la spiaggia ca l’acqua de lu mara.
Peccatu.