Gurniegghi e lu Cinema Diana

Gurniegghi e lu Cinema Diana
 
Mo’ ni sedimu a sta panchina d’avanti a la Madonna, e ti cuntu n’attra stuora divertenti chi riguarda lu Cinema Diana e chi si trovava propri ggha, a li primi dui puorti supa la stata chi ‘nchjiana verzu la Chjiesa. Prima però ajiu mu ti cuntu la vera storia de chistu postu, accussì cuomu la vitti io ‘nta l’anni che era ancora nu guagliuni.
Io mi ricuordu stu postu cu nu cafhuni duva venìanu jiettati tutti li mundizzi chi producìanu li curinghisi. Mi ricuordu li spazzini chi, de chigghi tiempi, cu nu Carriettu trainatu de nu Mulu, giravanu lu paisi, lu scupavanu, e svotavanu li cassoni de’ lignu, ‘nta lu carriettu, e quandu era chjinu, scindìanu e jiettavanu li mundizzi “‘nta lu cafhuni de Gurniegghi”.
La strata era cchjiù stritta de’ chiggha chi è ojia, cu nu muru a fhorma de sedili chi si trovava ‘nta la curva, davanti a la Madonna, e duva li giovanotti si assettavanu aspettandu li signorini chi passavanu pemmu vannu a la scola de ricamu ggha li Monachi, a Santu Lia. A la fhuntana, chi non’era bella cuomu è mo’, s’aspettavanu li fhimmini chi jianu a la fhuntana mu inchianu li Bumbuli d’acqua pe’ la fhamigghia.
Spessu era propi chista la scusa giusta chi trovavanu li fhigghji mu cumbincianu li mammi pemmu li fhànu jira a la fhuntana. Era accussì possibili ‘ncuntrara lu fhidanzatu, ma no’ sempre jia tuttu dirittu pecchì, bastava mu ‘nc’era n’estraniu o nu vicinu de’ casa mu rovina l’incontru e mu si riducia tuttu a sguardi languidi e occhjiati strani.
Tuttu chistu, valìa pe’ tutti l’attri fhuntani chi si trovavanu sparzi ‘nta tuttu lu paisi cuomu: Triccannali, Natraccola, Chjianu de l’Aria, Spizzu, Passu, ecc. ed è propri ‘nta sti posti chi parecchi guagliuni s’innamuraru e pua si spusaru.
 
Mo’, cuomu pua vidìra, chistu postu diventau na’ Villa, tutta chjina de’ arvuri e bella ordinata, e mi cuntaru ca fhù costruita quandu a lu sindacu, l’Amministrazioni Provinciali, ‘nci offriru la possibilità mu sistema lu Cafhuni de Gurniegghi.
Fhù propri accussì chi, supra a tutta la terra riportata mu si inchjia lu cafhuni, nescìu fhora sta villa, e all’umbra de’ chisti arvuri, parecchi curinghisi, durante lu caluri estivi si rifhriscanu.
‘Nta l’anni ‘50, esistìa ‘nta curnga lu Cinama Diana accussì cuomu esistìa nu cinima a Santu Pietru, e unu cchjiù randa e cchjiù ‘mportanti a Maida.
Chigghu de curga era de proprietà de’ Condellu, cedutu pua a li fhratelli Attanasi (Basiliu e Peppinu) ed’era fhrequentatissimu, puru ‘nta lu periodu chi li fhilm chi portava non’eranu grande cosa.
Li fhilm de Totò eranu chigghi chi richjiamavanu cchiù gienti ma puru chigghi de Zorru, de Guerra, Western o Romanzi cuomu li Miserabili, Giulietta e Romeu e attri, venìanu seguiti cu interessi.
Totò, Gasmann, Tognazzi, Raf Valloni, Steve Reeves, Sergio Fantoni, eranu l’attoti cchiù noti de’ chigghi tiempi.
Li film venìanu pubblicizzati de’ lu Vandieri de lu paisi, chi girava pe’ li strati, si fhermava ogni cinquanta, cietu metri e, a gridati dicìa lu nomi de’ lu film chi si proiettava la sira o li siri successivi. ‘Nc’eranu manifhesti mpingiùti mura mura, suprattuttu ‘nta la chjiazza e ‘nta li posti cchjiù fhrequentati de’ li curinghisi pe’ catturara l’attenzioni, l’interessi e mu si cumbincianu mu vannu a lu cinama.
Lu locali venìa utitlizzatu puru pe’ attri eventi particolari e pe’ attività teatrali cuomu la rappresentazioni de’ li fhamosi Fharzi de Don Mariu Fhrijia.
Pe’ la prima rappresentazioni de’ la fharza, don Mariu, affittava lu Cinama Diana pe’ una o cchjiù siri e, a pagamentu, richjiamava tanti gienti, soprattuttu li perzuni cchjiù curiosi pemmu canuscianu li fhatti de la fharza chi vertìa sempre o quasi sempre supa li personaggi de’ spiccu chi tantu havianu a chi fhara cu la vita sociali e politica curinghisi.
Si pigghjiavanu ‘ngiru certi verità e certi personaggi, e spessu, pe’ chisti gratuiti ironii, si criavanu inimicizi tra perzuni ritenuti amici de tant’anni.
Tieni cuntu ca tutti l’attori de chisti fharzi, chi si trasformavanu puru ‘nta attrici, eranu tutti curinghisi, ed’era chistu n’attru motivu de’ divertimentu, cu tanti “attori” (?) curinghisi a lu sbaragliu.  Li Fharzi, scritti tutti de’ Don Mariu Fhrijia, venìanu preparati cu “l’attori” ‘nta li fhriddi sirati de’ viernu, ‘nta catojia, a tarda sira, cu nu buonu bicchieri de’ vinu a lu fhjiancu, mu li potìanu pua rappresentara ‘mpubblicu, ‘nta lu periodu de’ Carnilevari. Li Costumi, li Sceni e tuttu quantu riguardava la fharza, eranu tutti creazioni de’ l’autori Don Mariu. Fhisarmuonichi, Chitarri e Tamburri, eranu li strumenti musicali d’accumpagnamentu ‘nta chisti occasioni; a tuttu chistu, quandu si jia pe’ li strati, s’accumpagnava lu fhrastuonu immancabili de’ li tanti cotrari chi, immancabili, accumpagnavanu li “Fharzi de  Don Mariu”. Era ‘n’eventu.
Lu Cinama Diana era frequentatu de’ tutti, fhigghjiuoli compresi, e duranti la projiezioni   era possibili sentira commenti a vuci avutta, ironici, supa la scena chi si stacìa svolgiendu, chi distraìa l’attenzioni de’ lu pubblicu cchjiù attentu presenti e chi ‘nta certi momenti, provocava rabbia pe’ no’ potira godìra ‘mpienu la scena projiettata.
Capitava puru ca, ‘nta li momenti de chiù animazioni, l’operatori Attanasi, ‘nterrompìa la projiezioni cu lu scopu mu po’ placara l’animi e riportara li spettatori a lu silenziu mu si po’ miegghjiu apprezzara la scena e la trama de’ lu film.
Lu gestori, no’ pe’ errori, ma pe’ semplici divertimentu, era puru capaci mu projetta pe’ primu, lu sicundu tempu de’ lu film, e pua, lu primu tempu de’ lu stessu film. Capitava puru ca la correnti elettrica si ‘nda jia pe’ parecchiu tiempu, interrompiendu accussì la projezioni, e quandu chistu capitava, eranu tanti l’improperi, certi spiritosi e attri ironici e pisanti, ‘ndirizzari tutti cuntra li gestori de’ l’ENEL chi, a sentira, diventava n’attru cinama ‘nta lu cinama stessu, chi fhacìanu sgascìara de’ li risati li presenti.
Tutti, ‘nta sti momenti, diventavanu attori de igghi stessi, e approfhittandu de’ lu scuru e de’ lu fhattu ca no’ potìa essere ricanusciutu, venìanu tirati fhora ‘mpensabili ironii e verità no’ canusciuti chi, eranu puru sottolineati de’ applausi a scena aperta de’ li presenti. E’ inutili mu ti dicu ca, certi perzuni, stanchi de la fhatiga manuali de’ la jiornata, capitava mu s’addormentava duranti la projiezioni, e a la fhini de lu spettaculu, havianu mu li risbigghjianu mu si puonu ricogghjira a la casa.
No’ si cuntavanu, ’nta lu scuru e duranti la prijezioni, li rutti e li scorreggi, chi ‘nfastidianu e chi spessu venìanu fhatti volontariamente, pemmu si urta la suscettibilità de’ attri spettatori presenti, chi reagìanu cu jiastimi e rimproveri ‘mpronunciabili.
Duranti la projezioni si mangiavanu Luppini, Castagni, Nuci, Scadi, Caramelli, Nocciolini Americani e attru, dassandu a fhini spettaculu lu pavimentu chjinu de scuorzi d’arangi e mandarini e tanti attri porcherì. Quandu la programmazioni prevedìa nu film de’ na certa ‘mportanza, allora eranu presenti puru li “autorità” de’ lu paisi (Miedici, Fharmacista, ‘mpiegati, Maestri, ‘nsegnanti, ecc.) chi occupavanu esclusivamente l’urtima fhila de’ poltroni, pemmu evìtanu possibili lanci de’ fhrutta, chi fhinìanu sempre ‘nta la testa de’ li spettatori ‘nconsapevuli chi occupavanu li primi fhili.
Lu Santuariu de lu Carminu e li Prigessuoni de’ Curnga
 
Mi sembra ca sti storielli chi a puocu a puocu ti stajiu cuntandu, ti stanu ‘nteressandu o è sulu curiosità?
Fha lu stessu, sia si tratta de’ interessi, o de sula curiosità, pecchì puru la curiosità contribuiscia mu allarga li conuscenzi.
Mo’ jiamu, e visitamu lu Santuariu, ma ti ricuordu ca pe’ strata, ‘ncuntramu puru lu postu duva ‘nc’era la fhorgia de’ li fhratelli Vonu.
Li fhratelli, Micu, Cicciu e Pietru Vonu, fhuru fhorgiari de’ qualità, li primi chi usaru lu Magghjiu, artistici de’ lu fhierru, chi fhiciaru barcuni e canceggha chi, ancora ojia, si puonu vidira pe’ li strati de curnga.
Pietru e Micu, li cchjiù randi, si trasferiru ‘nta l’anni ’50 ad’Acconia, continuandu a fhara sempre lu stessu mistieri, ma chi si rinnovaru e si ‘ngrandìru, e ancura ojia resista chista attività, nonostanti fhuorgi si nda vida sempre de’ menu.
Eranu li fhorgiari cchiù evoluti, pecchì sapìanu usara lu magghjiu, ‘n’attrezzu chi aumentava e velocizzava lu lavoru, cu lu vantaggiu ca si fhacìa menu fhatiga.
L’attività è puru ojia gestita de li fhratelli Vonu ma, si tratta de li dui eredi, fhigghji de’ Mastru Pietru e de’ Mastru Micu.
‘Ncima a sta scalinata, ‘nc’è la Chjiesa de la Madonna de lu Carminu, chi fhù costruita ‘nta lu 1629, cuomu riportatu ‘nta li carti de la Chiesa, e fhu promossu a Santuariu ‘nta lu 1952, propriu ‘nta lu periodu chi io, era ancora nu fhigghjiuolu.
 Puà notara ca la Chjiesa è decorata a stuccu lucidu e doratu a foglia, opera puru chista, de’ l’Architettu e Pitturi Agostinu Guzzi de Miglierina.
Lu portuni de brunzu, è opera de’ lu Maestru Giuseppe Fharina de’ Muntirussu, è fhu fhattu ‘nta lu 1981, cuomu documenta la data stampata a li piedi de’ lu portuni stessu.
Caratteristica de’ stu Santuariu, è la presenza de’ n’ossariu sutta la chjiesa stessa, accessibili sulu de’ l’esternu, chi ricogghjia tra li tanti muorti, chigghi de’ li Religiosi chi costruiru e dunaru vita a chistu Santuariu.
Ti puozzu dira ca io, assiemi ad’attri e ‘mpresenza de’ Donn’Antuoni Bonellu, lu visitai; trasimmi intra cu na lampadina tascabili, mu vidimu cuomu è fhattu.
La disposizioni e l’attrezzi usati ‘nta li locali, richiamanu li viecchji usanzi de sepoltura. Ti descrivu brevemente n’ambienti chi era fhorse lu cchiù significativu: “lu culaturi”.
‘Nc’era na fhossa bella fhonda ‘nta lu centru de la stanza de’ fhorma circolari, mentre a li pareti ‘nc’eranu sedili de petra duva a fhorma de’ gabinettu, duva venianu ligati li muorti pemmu s’asciucanu: lu bucu centrali de li sedili, havìa la fhunzioni mu ricogghjia li sculi organici ‘nta lu puzzu. Mu stanu seduti, li muorti venìanu ligati a certi canci fhissati a lu muru. Li condizioni particulari de’ l’ambienti, umidu e puzzolenti, portavanu lu corpu a la cancrena e si sbacantava accussì de’ tutti l’intestini chi cadìanu nta lu puzzu.
Nu munziegghu de ossa, senza segnu d’appartenenza, occupava la stanza vicina . . .
Muru a muru cu la Chjiesa, ‘nc’era la casa de li Monachi chi, oltre ca mu si dedicavanu a la preghiera, dirigianu lu “laboratoriu de ricamu” e na scola materna chi all’epoca si chjiamava “asilu ‘nfantili”.
Lu laboratoriu era fhrequentatu de signorini chi si ‘mparavanu l’arti de’ lu ricamanu; si fhacìanu comunque, lu corredu chi portavanu ‘ndota, a lu momentu de’ lu matrimuoni.
Ogni fhamigghjia, a costu de’ tanti sacrifhici, provvedìa a la Dota pe’ la fhigghjia, fhutura Sposa.
L’asilu de’ li Monachi, assiemi a chigghu Parrocchjiali, fhicia criscira li fhigghjiuoli de’ curga, guidati ed’educati, grazzi a la pacienza e la capacità d’accogghjira de’ li Monachi Fhranciscani.
Ojia, li Monachi si occupanu sulu de’ la Casa de Riposu de’ cui ti parru cchiù avanti.
 
Ogni annu, lu 16 lugliu si fhesteggia la Madonna de lu Carminu, cu na serie de’ fhunzioni religiosi e cu nu Monacu Carmilitanu chi li presidia. Lu 7 lugliu comincianu li fhunzioni chi precedanu la fhesta: la Novena. Nova jiuorni de’ preghiera e celebrazioni de’ Missi, ma soprattuttu de’ “Priedichi supra lu messaggiu de Maria” chi abitualmente, vida na partecipazioni numerosa de’ carmilitani e chi fhina cu la veglia de’ la vijila de’ lu 15 lugliu. Lu jiuornu de’ la fhesta, si porta prima la Madonna a la chjiesa Matra, e pua, ‘nta lu tardu pomeriggiu, si svolgia la prigessuoni chi porta la Statua pe’ tutti li strati principali de’ lu paisi.
Quandu arriva a Rivenzinu comincia mu fha scuru, e la Madonna si fherma a la Ndolerata mu nci permetta, oltra a nu puocu de’ ripuosu, la sistemazioni de’ l’illuminazioni a la Statua.
N’attra sosta mportanti, si fhacia nta la chiazza principali . . . la Statua venìa appojiata supra lu parcu, e lu Predicaturi Carmilitanu chi seguìu tutta la Novena, concludìa cu nu Panagiricu de’ ringrazziamentu a la Madonna.
Chista prigessuoni, puru a li jiuorni nuostri, vida na randa partecipazioni de’popolu, ed’è suguita soprattuttu de’ l’emigrati chi tornanu propri ‘nfhunzioni de’ sta fhesta.
Ad’ogni casu, è na fhestività sentuta da parti de’ tutti, e la devozioni a sta Madonna è ‘mponente, . . . l’emigrati curinghisi ‘nta lu Canada fhesteggianu puru igghi lu 16 lugliu cu na prigessuoni simili a chista. ‘Nta la prigessuoni, arriedi a la Madonna, ‘c’è puru Santu Lia, pecchì la fhesta de’ stu santu, cada lu 20 de’ lugliu.
A lu rientru de’ la prigessuoni, si proceda a lu sorteggiu de’ “l’abbitinu de la Madonna de lu Carminu” . . . nu scapolari chi ognunu vorìa mu si porta a la casa doppu la fhesta.
Li fhuochi d’artificiu chiudanu li fhesteggiamenti religiosi, pua seguanu chigghi de’ chjiazza, cu complessi bandistici o de musica moderna chi rallegranu la sirata.
Na curiosità . . . a li tiempi mia, de’ lu diciassette mpua, si cominciava a scindira a la prajia de’ mara.
Sempra a lu stessu santuariu sunu preposti attri prigessuoni mportanti cuomu chiggha de’ la Dominica de’ pasqua cu Cristu Risortu, e la prigessuoni de Santa Lucia, chi si fhacia lu 13 Dicembre, partiendu sempre de sta Chjiesa de’ lu Carminu.
Caratteristica puru chista prigessuoni, pecchì la Statua de’ Santa Lucia è preceduta de’ na fhigghjiola vestuta propi cuomu la Santa, portandu supra na manu nu piattinu cu l’uocchi.
La presenza ‘nta curga de’ dui congrecazioni, Mmaculata e Carminu, criau tanti rivalità presenti ancora ojia, chi si accentuavanu soprattuttu nprossimità de’ li fhesteggiamenti . . . si valutava addirittura la presenza numerica a la prigessuoni, calculandu puru lu tiempu de percorrenza de’ nu trattu de strata! . . . eranu sempre ‘ncompetizioni!
. . .  lu carmelitanu guardava cu astio lu mmaculatista … e viceversa.
Dicu eranu, pecchì pienzu ca ormai tuttu si ridimenzionau e li nuovi generazioni si prestanu puocu a chisti schieramenti religiosi. Pe la congrega de’ la Mmaculata sunu dui l’appuntamenti mportanti chi si concludanu sempre cu la Prigessuoni: l’8 de’ Dicembre e lu misi Marianu.
Vena puru celebrata na fhestività fhranciscana, chiggha de’ Santa Rita. Ricuordu nu particolari . . . duranti la fhunzioni si assistia a la pioggia de petali de ruosi; no’ sacciu si chistu ritu dura ancora.
Pe’ la fhesta de’ la Mmaculata, si cominciava sempre cu la Novena, ma la particolarità de’ sta fhesta era, no’ tantu la fhunzioni, chi era sempre la stessa, quantu pe’ l’orariu ‘ncui sti fhunzioni si tenianu: a li quattru de’ matina si sentianu li rintocchi de’ li campani chi chiamavanu li fhedeli, e la Chjiesa si inchjia de’ gienti, tanti fhina a quantu ‘nda capìa.
Quandu fhinìa la fhunzioni, ognunu tornava a la casa sua chi, spessi vuoti, ancora dormia. Tanti Zzappaturi, eranu già pronti, ‘nta lu fhriddu ‘nvernali, mu pigghjiavanu la strata de’ la campagna duva l’aspettava na jiornata de’ fhatiga.
L’urtimu jiuornu de’ Novena, la fhunzioni si fhinìa cu na prigessuoni rionali, illuminata de’ li candili chi portavanu li fhedeli e chi consentianu mu si gira pe’ li carrieri vicini, ancora addormentati.
Spessu li fhigghjiuoli e li giuvinastri accumpagnavanu li genitori a la novena, ma a la fhunzioni prefherianu lu jiuocu de’ la cavagghina o de’ la seggha, ‘nta la chiazza davanti a la chjiesa.
Lu jiuocu de’ la seggha era chigghu cchiù crudeli rispettu a lu cavagghina, pecchì prevedìa mu si savutta supra li spagghi de la squatra avversaria . . . Piegati una arriedi dell’attru, teniendusi de l’amicu chi lu precedìa, ‘nmodu mu si fhorma n’appoggiu solidu e resistenti. Avianu mu resistanu a lu pisu de’ l’avversari chi, a turnu, unu doppu l’attru, savuttavanu supra.
Si la squatra chi fhacìa d’appoggiu rescìa mu resista fhinu a la fhini de’ lu conteggiu stabilitu all’iniziu de’ lu jiuocu, li ruoli si scangiavanu. Lu scopu era chigghu mu si sovraccarica l’elementu cchiù deboli de’ la catina avversaria, ‘nmodu mu cedanu e mu si riproponanu cuomu squatra vincenti. Si perdìa, puru quandu la squatra chi zumpava, no’ rescìa mu si tena in equilibriu supra l’avversariu e unu, toccava terra puru cu nu sulu peda.
Eranu jiuochi semplici e ‘nfantili, ormai sulu ‘nta li ricordi, ma de certu, tutti si divertianu.
Ma li ricorrenzi religiosi no’ fhinanu ccà.
Lu 2 Lugliu cada la fhesta de’ la Madonna de’ la Grazzia.
Hai mu sai ca ‘nta Ruzziegghu, circondata de’ livari, ‘nc’è na chjiesiceggha chi risala a l’inizi de’ lu 1500, dedicata a la Madonna de la Grazzia. Fhu fhatta ricostruira de’ Puolita Ruffu, mugghjiera de Nicola Ruffu, doppu lu tremendu terramuotu de’ lu 1783.
La devozioni de’ sta Madonna richjiama tutt’ojia tanti fhedeli chi arrivanu de’ tutti li paisi vicini, Jicurzu, Maida, Santu Pietru, Curga, Acconia, Muntisuoru, . . . puru a peda, mu si renda omaggiu a sta Madonna Miracolosa.
Lu pomeriggiu de’ la vijila, pe’ li strati chi portanu a la Grazzia è fhacili, ancora ojia, mu ‘ncuntri chisti gruppi de’ perzuni chi, ‘mpreghiera arrivanu a la chjiesa la sira, e si fhermanu mu partecipanu a la tradizionali nottata.
De’ curga, era tradizioni jira a peda, scindiendu de’ ruzziegghu attraversu carrijiola de’ campagna, ed’era l’occasioni bona mu si provanu li primi fhicu, li primi pira e pe’ li guagliuni, nu fhrischjiettu pe’ rigalu o magari nu palloni accattatu propriu a la fhera de’ la Grazzia.
Mi ricuordu ca na vota, de’ cotraru, jivi puru io cu mamma, e no mi stancau la caminata ma . . . la siti . . . sutta la calura de’ lu sula cocente de li primi de’ Lugliu.
 
Mi ricuordu nu poveru cristu chi, sfruttava l’arzura de’ la genta, mu vinda acqua chi tenìa ‘nta nu varrili, cumbogghjiatu e tenutu a lu fhriscu, sutta nu mazzu de’ fhilici, a lu prezzu de’ cincu liri a bicchieri . . .
In pratica pe’ li curinghisi, non’era tantu pisanti lu percorsu de’ l’andata, quantu chigghu de’ lu ritornu chi evvenìa sutta lu sula de’ lugliu e . . . de’ ‘nchjianata, pe’ cui era obbligata la sosta “a la fhuntana de’ ruzziegghu” chi, nonostanti fhornìa acqua chi sapìa de . . . terra, rescìa mu rifhrisca e mu disseta tutti li passanti.
Puru a li tiempi de’ ojia, coinvolgia nu gran numeru de’ devoti, chi arrivanu sempre de’ li paisi vicini.  Si popolau puru de’ tanti emigrati de’ culuri, chi sfruttanu la fhesta mu vindanu l’oggetti cchiù strani pemmu puonu guadagnara ncuna lira.
Cuomu pua notara, curnga happa, e conserva ancora grandi tradizioni religiosi ma, cu tristezza, no mi ricuordu mai na randa fhesta pe’ lu Santu Patronu de’ Curinga “Sant’Andrea”.
Sulu na Missa . . .
All’epoca de cui ti stajiu parrandu, era Parrucu donn’Antuoni Bonellu chi ‘nci tenìa puocu mu porta li santi pe’ li strati de’ lu paisi anzi, era spessu ‘ncontrastu cu li Priuri de’ li congreghi chi, de parti loru, no’ volianu mu rinuncianu a li prigessuoni chi ‘nci toccavanu e non’eranu mancu disponibili mu accurcianu lu percorsu stabilitu de’ la tradizioni.
‘Nta l’urtimi anni, li prieviti chi si susseguiru, cuomu riconoscimentu a lu Patronu, sembra ca istituiru oltre a la Missa, puru la . . . prigessuoni.