Li Partiti Politici, l’Antica Pasticceria Vono

Li Partiti Politici, l’Antica Pasticceria Vono
Matrimuoni fhatti ncasa.
 
Procedìmu pe’ la Villa Comunali e la Chjiesa Matrici, pe’ Via Duomu, duva esista ancora la rinomata Durcerìa e Pasticcerìa Bar de Manueli Vonu (Lucciu).
Chista attività artigianali si tramanda de lu capostipiti Giovambattista Vonu, de lu 1800, cuomu afferma lu slogan pubblicitariu . . . “Una dolce tradizione di famiglia che dura sin dal 1800”. Li specialità de durci artigianali a basi de’ ammienduli sunu puru ojia richjiamu, no’ sulu pe’ li curinghisi, ma puru pe’ li fhorestieri chi in’occasioni de’ li fhiesti natalizi, venanu mu s’accattanu lu fhamosu Torroni artigianali de . . . Lucciu.
Lu ricordu chi mi resta de stu barra è puru ligatu a la sala biliardu, quasi riservata, a li genti . . . buoni, de’ Curnga.
Mo’, cuomu na’ vota, ajiu voglia mu mi vivu nu bellu cafhè e mu mi mangiu nu durci . . . intantu vorìa mu ti parru de’ li tradizioni Politichi curinghisi.
Hai mu pienzi ca l’argomentu de conversazioni prefheritu e cchjiù frequenti pe’ l’uomini, riguaravanu propri la politica, ‘nta qualsiasi postu, de la chjiazza a lu barra, ggha lu varvieri e . . . puru supra lu postu de lavoru. Soprattuttu l’argomenti chi riguardavano la politica locali eranu sentuti e partecipati, ma no’ si evitava mancu de’ parrara de’ politica nazionali e internazionali . . . no ni scordamu ca Curnga happa consiglieri Provinciali, Deputati e Senaturi, chi nesciru propri nta Curnga. Li sezioni de’ li partiti politici nazionali de l’epoca – Democrazzia Cristiana, Partitu Comunista e Movimentu Sociali – havìanu la sedi propriu ‘nta la chjiazza principali o, perlomeno s’affacciavano cu nu barcuni, e ‘nta li periodi de’ campagna elettorali, de li vari barcuni, era n’avviciendamentu continu de “comizi” destinati a la popolazioni chi affollava la chjiazza.
 
Eranu momenti chi coinvolgìanu tutti li curinghisi, ma puru momenti ‘ncui li rapporti tra curinghisi appartenenti a partiti politici diversi si esasperavanu, soprattutto a l’elezioni amministrativi. 
‘Nta l’anni, governaru Curnga sia li Comunisti, sia li Democristiani e puru li Socialisti.
Attualmente lu comuni è governatu de’ na lista autonoma.
‘Nta li tiempi de’ cui ti stajiu parrandu, nta Curnga nc’eranu vari gruppi a sfondu sociu-politicu cuomu: lu Martin Luter King, lu Centru Sociali Kennedi, lu Gruppu Giovanili Comunista, la Stella Rossa, l’ARCI, lu Gruppu d’Azioni Cattolica, l’ACLI e ‘ncun’attru chi mo’ no’ mi ricuordu. Tutti cu lu scopu mu coinvolgianu li guagliuni curinghisi ‘nmodu mu si rendunu attivi e mu si interessano puru de’ li problemi politici e sociali.
Nu particolari coriusu . . . la sezioni de lu Movimentu Sociali, ‘nta l’anni de cui ti stajiu parrandu, fhù l’unica chi si attrezzau de Televisioni, cu lu scopu mu guadagna ‘ncunu tesseratu pe’ lu futuru politicu de lu partitu, e li siri era possibili assistìra a li trasmissioni in’onda cu nu modestu contributi de’ sordi.
. . .  li fhurbi no’ mancavanu mai! ‘nta lu scuru, mentìanu ‘nta lu piattinu de’ l’offerti, ‘ncuna cosa chi fhacìa lu stessu sgruscjiu de’ li sordi.
‘Ncunu venìa puru piscàtu, e allora venìa spubbricatu d’avanti a li presenti, ma nugghu vinna mai cacciatu fhora de’ la sezioni.
Propi ccà accantu a lu Barra ‘nc’era n’attru scarparu “Furciniti”.
Quandu smettìu de fhatigara, la putifha passàu a lu fhigghjiu Micu chi la trasformau ‘nta na sartorìa e chigghu chi vidi lavorara ojia, è lu fhrata cchjiù picciulu, Mastru Arcangilu Furciniti, chi conservàu ‘nta l’anni “l’arti de lu cusira” cusiendu ancora ojia abiti supa misura.
Jiendu pe’ via Duomu, ‘nc’era l’Ufficiu Postali.
Fhù direttu pe’ tantu tiempu de’ la Signora Angila Cefhaly, originaria de’ Curtali, e successivamente de’ attri curinghisi (Colafati, Paonessa, Paola). L’unicu Postinu era Nuzziatu Bianca, canusciutu miegghjiu cuomu “Nuzziatu”, era bravu mu usa lu Telegrafu ed’era nu Maratoneta eccezionali. Penza ca a chigghji tiempi, lu postinu svolgìa lu lavoru de consegna de la posta a peda, e no’ sulu ‘nta lu paisi, ma puru ‘nta li frazioni, sia a la muntagna ca a la marina.
Lu postinu assorvìa a nu’ compitu ‘mportanti, considerandu ca la littara, soprattuttu s’arrivava de’ l’America, rappresentava lu mezzu de’ comunicazioni principali si no’ l’unicu ‘nta certi ambienti.
La posta arrivava sempre a lu stessu orariu nta li vari rioni, pe’ cui, tutti chigghj chi havìanu fhigghj chi fhacìanu lu militari o familiari emigrati, aspettavano a Nuzziatu supra lu scaluni, o la porteggha de’ casa e Nuzziatu, pensandu a lu statu d’animu de’ cui stacìa in attesa de’ posta, sbentulava la busta de luntanu non’appena abbistava lu destinatariu.
Cu certi perzuni scherzava fhaciendu cridìra ca ‘nci havìa arrivatu ‘ncuna cosa de ‘mportanti mentri mbeci si trattava de’ ‘ncuna busta pubblicitaria.
Propi de fhrunti a la posta, ‘mpienu centru abitatu, ‘nc’era lu fhrantojiu . . . “u troppitu” . . . mu si macìnanu l’alivi, de’ Don Micu Lo Russu.
Era nu troppitu vecchjia manera pe’ cui, doppu la macinatura de’ l’alivi, havìa mu si inchjianu li cuoffi cu la pasta prodotta (spuorti a forma circolari), mu si disponanu supra nu carrellu cu n’assi verticali centrali, ‘ntramezzati cu dischi d’acciajiu” fhina a quando no’ si arrivava a la cima de’ l’assi.
Si mentìa pua sutta la Pressa pe’ la spremitura fhinali.
Era nu continu jira e venìra de’ ciucci carrichi de’ sacchi de’ alivi chi arrivavano de’ tutti li campagni vicini, pecchì li curinghisi, havìanu tutti na’ rasula de’ terra coltivata ad’ulivari.
Tutti li operazioni preliminari a la macinatura vera e propria, venìanu fhatti tutti a manu o . . . a fhorza de’ vrazza, era necessaria quindi na bona manud’opera.
L’uogghjiu de’ spremitura venìa ricogghjiutu ‘nta na tinozza e ccà, l’addettu pe’ competenza provvedìa, cu’ n’appositu piattu de landia mu separa l’uogghjiu chi galleggiava supra l’acqua.
Tuttu venìa fhattu sutta l’uocchiu vigili de’ lu patruni de la macinatura. Ojia, li Macini e la Vasca de contenimentu, si trovanu all’ingressu sud de’ lu paisi, sutta n’arvuru, ricordandu a tutti lu lavoru principali de’ la popolazioni de stu paisi.
Eccu . . . propi davanti a nui ‘nc’è la Chjiesa Matrici, de l’aspettu imponenti e dedicata a Sant’Andria Apostulu, Patronu de’ Curnga. Li notizi de’ Archiviu fhanu risalira sta costruzioni a lu 1600 mentre ‘nta lu 1769 esistìa de’ certu la Chjiesa de’ Sant’Andria. Fhu distrutta de’ lu Terremuotu de lu 1783 e pua ricostruita de’ li curinghisi devoti a Sant’Andria chi, puru ‘nta stu casu, cu na catìna umana, nta lu trattu chi risala de’ lu fhiumi fhina a la Chjiesa e cu lu “passamanu”, provvedìru a tuttu lu materiali necessariu pe’ la costruzioni. Mi ricuordu l’Acciprieviti Bianca e lu Parrucu de’ l’anni ’50 Donn’Antuoni Bonellu chi, cu amuri arricchìu l’interni de’ marmi pregiati e de’ sculturi de notevoli ‘mportanza. De recenti fhu lu Parrucu Don Leonardu Diacu a fhara restaurara l’interni cercandu puru mu li porta a lu viecchjiu aspettu (modificati de nu precedenti restauru). No’ restaurau la fhacciata esterna pecchì lu Viscuvu lu trasferiu.
Na fhabbrica de’ “osti pe’ coni gelatu” era attiva ‘nta stu locali de fhronte a la Villa Comunali, efficienti e produttiva pe’ li Barra locali e de’ li paisi vicini.
L’attività, chi pe’ li tiempi era sicuramente all’avanguardia, era de’ proprietà de Giuseppe Sgruomu.
Mo’ tornamu ‘nta la Chjiazza Armandu Diaz, pecchì ti vuogghjiu ricordara attri attività chi si trovavanu supra lu latu oppostu a chigghu chi già ti descrissi. Lu Barra de’ “Tommu”, la Varverìa de’ “Mastru Bebè”, lu Tabacchinu de’ Battistinu Curradu e la cantina de la fhamigghjia De Summa, tutti attività de’ rilievu.
Lu Barra de’ Tommu (De Sandu Tommaso) era lu ritrovu de li giuvini chi passavanu lu tiempu libaru jiocandu a lu Bigliardinu o a lu Flipper. A lu Barra era collegatu ‘nfatti la sala dedicata a li jiuochi pe li fhigghjiuoli (Bigliardini de’ Calciu Balilla e Flipper). Accaniti sfidi personali si svolgianu cu relativi e numerosi spettatori chi sostenianu l’unu o l’attru amicu, ‘mpegnatu ‘nta chigghu momentu.
La Varverìa de’ “Mastru Bebè” rappresentava puru lu postu de ‘ncontru pe’ l’appassionati de’ Calciu. De’ nu confrontu de modi de’ penzara, venìanu fhora discussioni accaniti a mienzu a na confusioni de’ vuci chi si sovrapponianu, pecchì ognunu . . . havìa o volìa havìra ragiuni.  Tutta st’animazioni fhinìa sempre in’amicizia mentre “Mastru Bebè” continuava ‘mperterritu a fhara varvi e a tagghjiara capigghi. N’attru negoziu particolari era lu Tabbacchinu de’ Don Ciccinu Mirenda gestutu pua de lu niputi Battistinu Currado. Attrezzatu no’ sulu cuomu Tabacchinu ma puru cuomu profhumerìa, articuli de’ rigalu, cartoleria e attrezzatura pe’ “Machini fhotografici”. Lu negoziu havìa n’aspettu signorili ed’era bellu e . . . ordinatu. A “Don Ciccinu” appassionatu de’ fhotografìa, havìmu mu lu ringrazziamu pecchì, si ‘nci sunu ancora ojia fhotografì panoramici supra a Curnga, chi rigrardanu propri l’anni ’50, fhotu de’ perzuni e de’ eventi mportanti, chisti, li fhicia propri igghu, “don Ciccinu”. Grazzi.
La Cantina de’ la fhamigghjia De Summa ‘nta la Chjiazza Armandu Diaz, era n’attru ritrovu pe li curinghisi chi ‘nci piacìa mu jiocanu a li carti. Era sempre apprezzatu lu vinu de’ produzioni fhamiliari, ma puru la possibilità de’ jiocara a li carti fhora, all’apertu e cu lu pubblicu presenti era apprezzatu.
All’angulu de la Chjiazza supra la sinistra ‘nc’era lu Consorziu Agrariu gestitu de’ Donn’Angilinu Curradu, ma ‘nrealtà era n’accozzaglia de prodotti chi svariava de li generi alimentari a l’attrezzi agriculi a li piantini e simienti pe’ l’uortu.
Lu Negoziu havìa puru n’ingressu supra a Corsu Garibaldi.
Luongu sta’ carrera chi sagghjia de lu negoziu de’ Pacileu e quindi a li spagghi de la Chjiazza, ‘nc’era lu negoziu de’ alimentari de’ la fhamigghjia Sorrenti.
Li tri suluri Sorrenti, svolgianu puru l’attività de’ durcieri supra commissioni.
Hai mu sai ca na’ vota, li matrimoni, li battesimi e li Criesimi, venìanu festeggiati ‘ncasa (sulu nseguitu, ‘ncunu usava la palestra de’ la scola elementari o la sala parrochiali), pe’ cui era necessariu provvedira a la preparazioni de’ lu necessariu pe’ lu rinfhrescu doppu la cirimonia de’ la Chjiesa. Durci d’ammienduli, d’annici, a la vaniglia ma soprattutto lu “pana de’ spagna”, venìa de sti perzuni preparatu ‘ngrandi quantità, pe’ pua offrìra a lu momentu de’ lu ricevimentu.
Lu Pana de’ Spagna curinghisi, non’è chigghu cu cui si fhanu li torti ojia, ma ha na’ lavorazioni particolari, e sulu puocu perzuni chi si puonu defhinira maestri, sunu ‘ngradu mu lu producianu.
No’ contena lievitu ma sulu tanti ova, puocu zzuccaru e fharina e pua … tanta fhorza e lavoru de vrazza.
L’impastu vena misu ‘nta appositu fhurmi e cuottu ‘nta lu fhurnu a ligna. Venanu fhora certi cugghuri dorati de’l’aspettu spettacolari.
Chistu Pana de’ Spagna, tagghjiatu a fietti, venìa offertu a tutti li ‘mbitati, fhatti assettara ‘nta li vari stanzi, de ‘mprovvisati cammarieri chi li servìanu cu “‘nguantieri” curmi de’ durci e liquori.
Lu gruppu de’ li “vivituri”, si ‘nda jia ‘mbeci ‘nta la cucina o ‘nta la cantina, duva l’aspettavanu cisti chjini de’ “Nicatuli” (assai simili a li fhrappi carnevaleschi) e abbundanti vinu locali.
 
Custurieri, Scarpari E Troppitari
 
De seguitu nc’è la putifha de Scarparu de Mastru Peppinu Sorrenti, na costruzioni isolata e rialzata rispettu a lu pianu stradali principali, cu lu bancu de lavoru misu vicinu a la porta pemmu vida miegghjiu. Lu locali s’affaccia ‘nta la chjiazza Armandu Diaz e, de lu postu de lavoru, si potìa vidira tuttu chigghu chi succedìa ‘nta sta chjiazza. Lu proprietariu, responzabili de la sezioni de lu Movimentu Sociali, fhù pe’ tantu tiempu chigghu chi apiria la sezioni, riferimentu pe’ li guagliuni pecchì, cuomu t’havìa già dittu, era l’unicu postu fhornitu de Televisori e quindi ritrovu pe’ tutti chigghi chi, la Televisioni no’ l’haviamu, e ierumu tanti.
De’ l’attru latu, fhatigava de Custurieri, Giulu Bretti, cu tanti discipuli (P. Jelapi, G. Fhruci, P. De Datu, M. Molinaru), chi l’aiutavanu mu porta avanti lu lavoru. Si mparau lu mistieri mentre fhacìa lu militari diventandu n’espertu de tagliu e cucitu, e chistu l’ajiutau parecchiu nta l’attività pecchì nci portau tanti attri clienti.
No’ mi puozzu scordara tutti li putifhi chi ‘nta puocu metri, si ripetianu e chi fhacìanu tutti la stessa cosa.
Tri custurieri e tri scarpari e tra chisti, Mastru Cicciu Bretti chi fhatigava de’ scarparu ‘nta lu locali sutta la casa sua.
 La sartorìa de Mastru Vicenzinu Lo Russu, ammienzu a tutti, era chiggha chi avìa cchjiù lavoru de tutti.
Lu lavoru era tantu chi spessu, pemmu rispetta li tiempi de’ consegna, nci cercava all’amicu ‘Ntuoni Buragina, puru igghu custurieri, cu la putifha vicinu a la sua, si potìa usara la machina de cusira sua, pemmu po’ fhinira ntiempu li lavori.
’Ntuoni Buragina, emigrau pua ‘nta l’america, e l’attività nci restau a mastru Arcangilu Votta chi, a l’attività de sartu, affiancau chiggha de’ varvieri, chi nci rendìa puru de cchiù.
‘Ntuoni Buragina, oltre mu era nu buonu custurieri, era puru nu buonu musicanti, e pe’ chista passioni, venìa spessu de’ l’amici pigghjiatu ‘ngiru.
‘Nci rimproveravanu ca s’havìa mparatu mu sona lu strumentu, cu li spartiti de lu Maestru Dominicu Sgruomu, puru igghu musicanti, chi abitava supra la putifha sua, e chi era nu veru maestru de’ Musica.
 
Si dicìa ca lu Maestru sgruomu e ‘Ntuoni Buragina, eranu separati de nu solajiu malandatu, fhattu de travi e scandali chi traballavanu mentiendu paura. Lu pavimentu era fhattu cu cavuccirogna e supa a chista vinìanu fhrabbicati li mattuni.
Tra mattuni rutti e scandali malandati, la casa e la putifha si vidìanu a vista e, ammienzu li fhessuri apierti, a lu Maestru Sgruomu ‘nci cadìanu li spartiti chi fhinìanu propri ‘nta la putifha de ‘Ntuoni Buragina, chi s’impossessava de’ chisti, e si li studiava fhinu a quandu no’ rescìa mu li sona a la perfezioni cu lu strumentu.
Emigràu pua ‘nta l’America, ma de stu personaggiu resta na’ raccolta de’ Poesì “Le Rimenbranze” che, mi dissaru ca si po’ trovara puru ‘nta la Biblioteca Comunali.
Na putifha ‘mportanti era chiggha de’ li pezzi de ricambiu pe’ bricichietti e motu, chi a l’epoca, eranu li mezzi cchiù diffusi ‘nta lu paisi; era gestitu de Vitu Mazza e de li fhamiliari.
 
Lu negoziu stacìa chiusu pe’ gran parti de la jiornata, pecchì li proprietari abitavanu vicinu, e cu volìa ‘ncuna cosa, bastava mu fhrischjia o mu chiama de sutta la fhurnesta, ca ncunu de la fhamigghjia arriva subitu mu serva lu clienti.
 
 
 
Simu ormai supa la strata chi porta a Gurniegghi.
Scindiendu, supra la destra, n’attru scarparu: Mastru Peppinu Senesi, chi lavorava, cuomu tutti l’attri scarpari, ‘nta nu locali sutta la casa sua e de’ sua proprietà. No’ ti meravigghjiara si mo’ no ti parru de lu mistieri chi svolgìa Mastru Peppinu, ma vuogghjiu mu ti parru de’ lu personaggiu ca è cchiù ‘mportanti.
Lu fhazzu pecchì, ‘nta stu casu, Mastru Peppinu, cchiù ca nu scarparu, era n’uomu ‘mpegnatu ‘nta la politica, e de’ politica si interessau pe’ luongu tiempu.
Era nu Socialista convintu, segretariu de la sede locali de lu Partitu, e fhu puru Consiglieri Comunali ‘nta l’anni ‘50.
Ti stajiu parrandu quindi de na perzuna colta, crisciutu puru igghu sutta la scola de lu Maestru Sestitu, personaggiu storicu de Curinga, e de’ igghu ereditau la passioni pe’ la lettura e pe’ la Poesia in particolari, chi lu attraìru tantu chi lu portaru mu nda scriva tanti puru igghu, decantandu ‘nta chisti l’amuri, l’onestà e lu lavoru.
Stacimu arrivandu ‘nta lu regnu de li Troppìti.
Guarda, ‘nta menu de’ 50 metri, ‘nd’avìa due gestiti de la fhamigghjia Anania e de la fhamigghjia Peruginu.
Si ti ricuordi, ’nd’aviemu ncuntratu n’attru vicinu a la Chjiesa Matra e mo’, addirittura dui ‘nta puocu distanza l’unu de l’attru, e ‘nta lu centru de’ lu paisi.
Mu capisci miegghjiu quantu ti stajiu fhaciendu vidira, hajiu mu ti parru de quantu si producìa ‘nta la chjiana de’ Curnga e soprattuttu de’ quantu offrìa lu territoriu circostanti, tuttu chjinu de’ livari.
Hai mu sai ca ‘nta la marina de’ Curnga e ‘nta la gran parti de’ la chjiana de Sant’Eufemia, si coltivava ‘ngran parti Ranu, Bietuli, Linu, Ndianu, Ciciari e Poseggha chi garantianu a li proprietari e a li zzappaturi, nu buonu sostentamentu.
 
Tuttu succedìu doppu la Bonifhica de la Chjiana, fhatta de lu Governu Fhascista, chi prosciugau li zoni paludosi e li rendìu tutti coltivabili pe li contadini de’ Curnga, e de tutti li paisi limitrofhi cuomu Maida, Santu Pietru, Sambiasi e Nicastru.
Si chjiantavanu Bietuli chi venìanu portati a lu Zzuccarifhiciu de Sant’Eufemia, ranu ‘ngrandi quantità, chi venìa macinatu a li mulini chi ‘nc’eranu puru ‘nta Curga, poseggha, ciciari e fhavi chi venìanu usati ‘nta svariati modi e chi sfamavanu fhamigghji interi.
‘Nta l’anni ‘60, cu l’arrivu de’ Trattori cchiù moderni e la chiusura de’ lu Zzuccarifhiciu de’ Sanrt’Eufemia, parecchi proprietari decidiru mu cangiano tipo de’ coltivazionie e dedicaru gran parti de lu territoriu a la coltivazioni de’ ortaggi e fhrutta, de’ vindìra a li mercati de’ lu Nord e de’ lu centru Europa.
Nonostanti chistu, li livari, no’ fhuru mai abbandunati anzi, ‘nda venìanu chiantati de cchiù, soprattuttu ‘ncollina duva stacianu li curinghisi, li petrisi, li maidisi; tutti paisi chi pruducìanu randi quantitativi de uogghjiu.
Campuluongu, era la piantagioni de’ livari cchjiù estesa de’ lu territoriu, vicinu a la Chjiesa de’ la Grazzia, era na’ fhonte inesauribili de pianti de’ livara, certi addirittura secolari, ma chi producianu alivi a no’ fhinira. Li Troppita macinavanu li alivi de’ lu postu duva si trovavanu, e fhunzionavanu ad’acqua o a energia elettrica o a trazioni animali, a sicundu de’ duva si travavanu.
Chigghi chi si trovavanu vicinu a la fhjiumara de’ la Grazzia e de’ Turrina, fhunzionavanu ad’acqua, mentre chigghi a trazioni d’animali (Cavagghi, Ciucci, Vua e Muli), si potìanu trovara a tutti li puntuni de lu paisi, compresa l’aperta campagna.
Quandu arrivàu la corrente, parecchi si trasformaru ad’energìa elettrica, mentre tanti attri fhuru costretti pemmu chiudanu l’attività pecchì no’ potianu cchjiù competira cu li nuovi arrivati.
 
‘Nta Curnga ‘nc’eranu parecchi troppiti e, ammienzu a chisti ti puozzu ricordara chigghu de’ Don Ferdinandu Vivacqua, (a lu chianu de Vivacqua), de’ Don Battista Lo Scerbu (sutta a lu chianu de Vivacqua), de’ Nicolinu Diacu (sutta lu chianu de Vivacqua), de’ li fhratelli Peruginu (Gurniegghi), de’ Panzareggha Fhranciscu e Giuseppe (Natraccola), de’ Don Micu Lo Russu (‘nta la Villa), de Vinanzu Anania (Gurniegghi) ma, chigghu cchiù viecchjiu chi mi ricuordu, era chigghu de Mastru Vitu e ‘Ntoninu Fhrijia chi era vicinu a Triccannali.
Mi dissaru ca fhinìu de’ lavorara quandu si passau a li troppita azionati a energia elettrica, ma io mi lu ricuordu sempre fhiermu, cu na fhurnesta rutta de duva si potìa vidìra all’internu na viti de lignu, dui colonni puru de lignu, chi servìanu cuomu pressa de’ spremitura, e na vasca zincata a troncu de’ conu cu dui enormi ruoti de’ granitu, chi giravanu trainati de’ l’animali de’ turnu, mu macinavanu l’alivi.
Cu lu passara de’ lu tiempu, diventau na vera e propria discarica, puru pecchì lu tettu no’ fhù mai sistematu, e a lungu andara si distruggiu completamente. Ojia, è misu a nuovu ma, cu fhunzioni diversi de’ chigghi originali, è nfatti, nu garagi. Mi cuntavanu ca era bona cosa mu si è buoni amici de’ li fhrantoiani si si volìa nu quantitativu de uogghjiu superiori e de’ bona qualità nfatti, bastava mu si fherma prima de lu dovutu la molitura, pemmu si dassa la “pasta” cchiù grossolana e pemmu si ottena pua na resa de’ uogghjiu minori. Li clienti quindi, eranu miegghjiu servuti ‘nbasi a lu livellu de rispettu e d’amicizia chi rivolgìanu a lu fhrantoianu durantu tuttu l’annu.
Prima mu tornamu a la casa, vuogghjiu mu ti fhazzu vidìra nu panorama stupendu e lu Santuariu de’ lu Carminu de’ cui migghi vuoti mi sentisti parrara quandu ierumu nta l’America.
Prima, ammiramu chista Madonna e lejia puru tu la scritta, pecchì ha tantu signifhicatu, soprattuttu pe’ nui chi fhummi emigrati, e pe tutti chigghi chi la matìna si spostanu mu vannu mu lavoranu fhora de lu paisi.
“Figlio qui mi son posta per esserti guida nel cammino sorreggere le tue speranze, consolare i tuoi dolori, come sol può fare Tua Madre.”
Sta bella fhrasi, la scrissa Don Vittoriu Penna, nta lu 1954, quandu era lu Patra Spirituali de’ li Confratelli Carmilitani.
L’acqua de’ sta fhuntana, chi vidi a lu fhjiancu de’ sta Madonna, fhrisca e dissetanti, servìu ‘nta l’anni cusà quantu perzuni, chi si fhermavanu mu inchjianu li mbumbuli o pemmu abbivaravanu lu ciucciu, fhedeli cumpagnu de’ viaggiu e de’ lavoru, quandu jianu o tornavanu de’ lu lavoru de’ la campagna.