De la Pischerìa a lu Moka bar

De la Pischerìa a lu Moka bar
 
Dassamu Chjiazza San Franciscu e jiamu verzu la Chjiazza principali de’ Curnga: Chjiazza Armandu Diaz.
De seguitu a la macelleria, ‘nta l’anni ’50 – ’60 de cui ti stajiu parrandu, ‘nc’era nu rivindituri de’ pisci “a Pischeria”, no’ sempre aperta, mentre de fhronti ‘nc’era la Sartorìa de mastru Dominicu Panzarella, chi fhacìa puru lu Varvieri.
Era na’ putifha abbastanza randa e havìa nu bancuni bellu randa de’ lavoru, na’ machina de cusira e ‘nfondu, la poltrona cu tuttu l’occorrente pemmu fhà varvi e mu tagghjia capigghi.
Subitu doppu Vicu Belledonne, lu Tabacchinu de Pietru Piru chi prima, vindìa sulu sicaretti ma cu lu passara de’ lu tiempu diventàu puru cartolibreria e distribuia li bomboli de’ lu gas.
Prima stu negozio era a lu pianu terra de lu Palazzu de li Serrai, propri fhaccimprunti a duva su trova mona.
Fhaccimprunti ‘nc’era lu negoziu de’ “Don Peppino Ciliberti” duva, cuomu era solitu fhara ‘nta li paisi picciuli, potìvi accattara sia tessuti ca articuli de’ Merceria e puru Valori Bullati (Marchi de’ Bullu e Carta Bullata).
Lu negoziu era puocu illuminatu, cu nu bancuni de’ vendita randa supra la sinistra cuomu si trasìa, cu na serie de scaffali avutti fhina a lu suffittu chjinu de’ stoffi, e na vitrina a destra, chjina de’ articuli vari. Si volivi mu emigri nta’ l’America, havivi mu ti rivolgi propri a Don Peppinu si volìvi mu ottieni lu Vistu e lu Passapuorto mu pua partira. Disponira de’ lu Passapuortu, era considerata na cosa randa, nu serviziu chi sulu Don Peppinu sapìa dunara, pecchì eranu tanti ‘nta chigghu periodu chi eranu senza lavoru e chi volìanu mu emigranu ncerca de’ na’ vita cchjiù dignitosa sia pe’ igghji ca pe’ la fhamigghjia chi eranu costretti mu abbandunanu.
Chistu è chigghu chi fhici puru io cinquanta anni fhà e mi ritiegnu fhortunatu pecchì, a differenza de attri, happi la possibilità mu tiegnu unita la fhamigghjia mia.
. . . Quantu gienti partiru dassandu li fhigghjiuoli ‘nta li fhasci pe’ mu li ritrovanu randi e cu la varva! . . .
 
Doppu chistu largu, supra la destra, ‘nc’era nu negoziu de fhrutta e verdura chi ojia sarìa consideratu lu miegghjiu negoziu pe’ la qualità de li prodotti chi vindìa.
Era lu negoziu de Don Brunu Russo.
Mi ricuordu la fhila de’ perzuni chi aspettavano lu turnu mentre Donna Maria (mugghjiera de’ Don Brunu) cu na vuci chjiara e squillanti e cu buoni manieri, rescìa ‘nta quattru e quattr’uottu, mu disbriga a tutti senza mu ‘nci fha pisara l’attesa a li clienti.
Eccu, chista è Chjiazza Armandu Diaz, la chjiazza cchiù ‘mportanti de’ lu paisi, lu postu duva si ‘ncuntravanu li zzappaturi, contadini e artigiani mu si cuntrattavanu lu lavoru de’ lu ijuornu doppu.
Si ‘ncuntravanu pe’ na partita a li carti a lu Moka Bar, oppure doppu chi havìanu assistutu a la Missa de’ la Dominica ‘nta la vicina Chjiesa Matrici. Lu postu duva si aspettava lu Postali mu si po’ scindira a la Marina duva ‘nc’eranu li tierri de’ proprietà de’ li curinghisi e duva si fhacianu li coltivazioni de’ ranu, bietuli, uorghjiu ecc.
Ogni porta chi si affacciava supra sta’ chjiazza era n’attività commerciali (Cantini, Varvieri, Bar, Putifhi de’ Generi Alimentari).
  Lu primu locali ospitava la Varverìa de’ Micu Lo Russo, n’ambienti ‘ndirizzatu politicamente a Sinistra e pe’ chistu, l’argomentu de conversazioni duranti l’operazioni de’ rasatura, cadìa sempre supra la politica.
Propi de’ lu confrontu de l’idei chi avvenìa ‘nta sti putifhi, spessu venianu fhora li proposti chi venìanu pua riportati ‘nta li Consigli Comunali, duva si decidìa lu fhuturu de lu paisi.
De seguitu nu negoziu de Generi Alimentari particolari nquantu era l’unicu duva si potìanu accattara tutti li ‘ngredienti mu si puonu preparara e fhara li durci ‘ncasa.
Lu portava avanti “donna Rosina a Conara” chi cu tantu sapira fhara e cu tanta competenza, puru iggha brava pasticcèra, sapìa mu accogghjia e mu cunzigghjia pe’ lu miegghjiu fhara, tutti li clienti.
Cuomu tutti li fhimmini fhatigaturi curinghisi, puru donna Rosina no’ si concedìa n’attimu de’ riposu e mentre aspettava lu prossimu clienti li mani sua no’ stacìanu fhiermi . . . uncinettu e fhilu eranu sempre a portata de’ manu.
No’ perdìra tiempu era propriu la caratteristica sua, chi si potìa notara puru ‘nta lu modu de’ caminara . . . “jia sempre de’ fhretta”.
Lu “Moka Bar” era nu locali all’avanguardia ‘nta l’anni ’50 pecchì havìa la sala biliardu separata de lu locali principali duva si potìa ijocara puru a li carti. Già all’alba, cu si trovava ‘nta la chjiazza, de’ passaggiu mentre jia a lavoru, o mu aspetta lu postali mu scinda a la Marina, venìa attiratu de’ lu profhumu de lu cafhè chi si diffondìa pe’ tutta la Chjiazza e li dintuorni.  Cangiau spessu gestori passandu de’ manu a manu: de don Peppinu Sgruomu a Michielangilu Ciurleu a Vicienzu Anellu ma pùa, cangiau attività e no’ fhù cchiù nu Bar.
‘Nta li periodi cchiù floridi era frequentatissimu e mi ricuordu na negghjia de’ fhumu chi stagnava gghàintra, soprattutto la sira e li dominichi, quandu li ijocaturi de’ carti cu nu corteu de’ spettatori ntuornu, jiocavanu pe’ uri e uri . . .  fhina a li nottati.
La Cabina Telefhonica e li Negozi de li Pacilei.
 
Subitu doppu lu Bar, mo’ ‘nc’è na putifha de’ vinu, ma a li tiempi mia, ‘nc’era l’Ufficiu de’ lu Daziu.
Cuomu già t’havìa accennatu, mu ammazzi lu puorcu o mu vindi vinu, havìvi mu paghi na tassa chijamata appuntu daziu, e ccà ‘n’cera propriu l’ufficiu addettu a lu pagamentu.
Lu locali fhù adibitu successivamente a cantina e, ancora ojia resista.
Caratteristica de’ sta putifha de vinu è ca d’estati, li tavuli de jiuocu si portanu fhora, supra lu marciappiedi, all’aria aperta e . . . all’umbra de li casi de fhrunti, si jioca tranquillamente a li carti.
A seguìra ‘nc’era la Sartorìa de’ mastru ‘Ntuoni Mulinaru, chi tornàu a lu paisi doppu chi stitta parecchi anni ‘nta l’America.
Sta’ putifha fhù puru Telefonicu Pubblicu, quandu ancora curnga non’era servùta de’ reti telefhonica.
Chistu era già nu sistema nuovu rispettu a lu centralinu, pecchì quandu havìvi mu telefoni, havivi prima mu prenoti la chjiamata, pua venìa trasferita e mpini effettuata; li tiempi, eranu comunque abbastanza luonghi.
Mi ricuordu pua na’ porta de lignu tantu randa e sempre aperta mu po’ trasira lu postali de’ Vitu Mazza. Era puru n’officina attrezzata pe’ li riparazioni . . . nu bancu de lavoru supra la sinistra trasiendu, na fhossa a lu centru de l’officina ‘nmodu mu si potìa lavorara comodamente sutta la machina chi era in riparazioni, tanti chjiavi inglesi, pinzi, giraviti e gummi de’ ricambiu ‘mpenduti a li pareti.
A seguira l’Emporiu de Donn’Antuoni Pacileu, lu negoziu cchjiù fhornitu no’ sulu de’ curnga ma de tuttu lu circondariu.
Era lu negoziu duva cumbenìa accattara pecchì li prezzi non’eranu avutti e la qualità de’l’arrobba era bona, pe’ cui diventàva nu riferimentu pe’ li spisi ‘mportanti chi si fhacìanu, soprattuttu quandu ncunu havìa mu si spusa.
Ojia, lu pùa vidìra de’ tìa stessu, diventàru nu Supermercatu, ma è gestitu ancora de’ l’eredi de’ la stessa fhamigghjia, e comprenda puru chigghu de’ donn’Andrea Pacileu (fhrata de’ donn’Antuoni).
Lu negoziu de donn’Andrea era nu negoziu strittu e luongu, cu lu bancu vendita supra la destra e lu bancu fhrigorifharu de’ fronte all’ingressu. Certamenta non’havìa nenta de ‘nbidiara a chisti moderni Supermercati, tranni ca mo’, ti pua servira de’ sulu, ma mu ti fhài la spisa o mu ti fhài preparara nu paninu, a chigghji tiempi, era cchjiù umanu . . . no’ manacanu li cunsigghji supra la scelta de’ li prodotti e nemmenu la cortesìa e li ringrazziamenti.
Boccacci chjini de’ caramelli eranu misi supra lu bancuni accantu a la vilanza e t’invogliavanu mu ti l’accatti.
No’ ‘nc’era ancora la cassa automatica chi si usa ‘nta li negozi moderni, lu cuntu de’ la spisa venìa fhattu cu carta e pinna e li sordi li mentìa ‘nta lu cassettu de’ lu Bancuni.
Mi ricuordu nu Bilicu, na vilanza de’ portata superiori chi venìa usata pemmu pisa la fharina.
 Si usava ‘nta curnga ‘mbiscara la fharina doppiu zeru a chiggha chi si macinava a lu mulinu de’ Peppa u Mulinaru, mu si preparava sìa lu Pana ma puru la pasta de’ casa cchjiù nota cuomu li tagghjiarini e li fhilatiegghi.
Si fhacìmu na sosta, ti parru de la pasta de casa (li fhilatiegghi) de cui tantu mi sentisti parrara nta l’America e de lu ranu siminatu ‘nta la chjiana de curnga chi tanti perzuni sfamàu, soprattutto ‘nta lu periodu de’ randa crisi economica. . . ni sedìmu supra a chigghu murettu davanti a la putifha de li Pacilei.
 ‘Nta la marìna, chigghu chi si coltivava de cchjiù, assiemi a li bietuli, era propriu lu ranu. ‘Nta li vari appezzamenti de’ terra, de proprietà o de dirittu de’ coltivazioni, si siminava ranu e si chjiantava ndianu.
Doppu l’aratura, la simina e attri curi, lu lavoru cchjiù ‘mpegnativu arrivava soprattutto a giugnu e lugliu, cu l’operazioni de’ Metitura, chi si fhacìa manualmente, e la Trebbiatura.
Si fhormavanu li squatri de metituri, e nu gruppu de’ fhimmini, arriedi arriedi, ricogghjianu li fhasci de’ ranu chi venìanu ammunzegghati supra nmodu mu si fhormanu li griegni.
Lu ijuornu chi si trebbiava, nonostanti si lavorava sutta lu sula liuni, era nu ijuornu de’ fhesta pe’ tutti li partecipanti, e ammienzu a tutti chisti ‘nc’eranu li parienti, l’amici e li vicini . . . ognunu dunava na’ manu e a la fhini, si mangiava.
L’uomini civavanu la trebbia, attraversu la vucca chi si trovava a la parti superiori de la trebbia, li griegni diventavano sempre cchjiù picciuli man manu chi venianu mangiati de’ la trebbia, chi cacciava lu ranu de nu sportellu duva li fhimmini eranu pronti mu inchjianu li sacchi.
Attri operai eranu addetti a la ‘mballatrici chi havìa bisuognu de fhierrufhilatu mu liga li balli de’ pagghjia chi producìa.
A li fhigghjiuoli era riservatu lu compitu mu distribuiscianu l’acqua a tutti chigghi ‘mpegnati ‘nta lu lavoru.
Attri tiempi . . . ojia la mietitrebbia assorva a tutti l’operazioni ‘ntermedi: cu nu sulu passaggiu, meta e trebbia.
Quandu la trebbiatura fhinìa, li sacchi chjini de’ ranu venìanu portati a la casa e venìa cernutu mu si separa lu ranu de’ prodotti strani, e sulu doppu venìa portatu a lu mulinu mu si macina e fhinarmente fhattu fharina, adoperatu mu si fhà lu pana o la fhamosa pasta de’ casa . . . “li fhilatiegghi”.