Machina de Noleggiu, Fhorgiaru e Custurieri.

Machina de Noleggiu, Fhorgiaru e Custurieri.
 
Lu locali accantu a la fharmacìa, è la prima Barracca e, quando io era nu fhigghjiuolu, era lu garagi duva Don Peppinu Maruncelli chiudìa la machina chi usava cuomu machina de’ noleggiu.
De’ chigghi tiempi a curnga, li machini si cuntavanu supra li Jidita de na manu nfatti, si la potianu permettira sulu chigghi fhamigghji chi stacìanu buoni (Vivacqua, Panzareggha ecc.).
Pe’ li spostamenti nta li paisi vicini, spessu si jia a peda o ncavagghu, attri si servianu de la “machina de’ noleggiu”.
Fhù propriu don Peppinu chi ni portau a la Stazioni fherroviaria de’ Sant’Eufhemia quandu, cu’ pattrita piccirigghu, partimmi pe’ l’America.
Era nu tipu chi amava la cumpagnia, e chi si divertìa mu fhacìa scherzi, soprattuttu duranti li rappresentazioni Teatrali, chi eranu n’attrattiva pe’ li curinghisi.
Curnga non’havìa Teatru e venìa usatu qualsiasi locali pe’ sti rappresentazioni.
Duranti la Settimana Santa, la Passioni de Cristu si rappresentava ‘nta lu Troppitu chi si trova sutta lu muru de lu Passu, vicinu a Triccannali.
La Barracca successiva chi mo’ ospita lu Bar, tiempu arriedi ospitau, cuomu t‘havìa dittu, vari attività.
In origini fhù la “Fhorgia” de’ Mastru Vitu Frijia (notu cuomu lu Zziu Vitu u Tonzu) chi fhicìa lu fhorgiaru fhina a quando no’ lu chiamaru sordatu; Pe’ tuttu lu tiempu chi mancau, lu fhorgiaru lu fhicia lu niputi Micu Grassu, fhigghjiu de la suoru Ngiuanna e de mastru Lia Grassu.
L’attività prevedìa la costruzioni de “palietti e tripoda” ma l’attività principali era chiggha de Mperrara Ciucci, Muli e Cavagghi, ma puru Vua chi, all’epoca, venienu utilizzati pemmu si lavuranu li tierri de’ muntagna.
 Successivamente ospitau la putifha de nu Sartu ““Mastru Lia Pallaria” chi, cu li discipuli, (Battista Gaudino e Giulu Prinzi), svolgìu l’attività pe’ luongu tiempu.
Giulio Prinzi diventau lu Mastru principali, quando Mastru Lia Pallaria era avanti cu’ l’anni, e decidiu mu si ritira de’ st’attività.
Battista Gaudinu, abbandunau st’attività pecchì diventau Uscieri de’ Satturia e pua impiegatu de’ Don Pietru Gullu, lu Setturi de’ Curnga.
Sta putifha era nu’ via vai de “discipuli” chi, mentre cercavanu mu si ‘mparanu lu mistieri, passavanu lu tiempu in’allegrìa divertiendusi fhaciendu scherzi, soprattuttu a li passanti.
Lu divertimentu principali si verifhicava quando passava “Mastru Miliu”, lu compusantaru de lu paisi.
Era n’uomu apparentemente scuntrusu, ma in pratica si scialàva mu si fha notara e mu si fha stuzzicara, pe’ tala mu po’ reagira a la manèra sua, chi pe’ igghu era lu massimu divertimentu.
De’ na semplici frasi chi nci venìa rivorgiuta, costruia storielli, sempre de’ contenutu offensivu versu lu malu capitatu, e seguianu li risati e lu divertimentu de’ tutti chigghi chi assistìanu.
 N’attru divertimentu chi usavanu fhara sti guagliuni, era chigghu mu liganu na’ Lira o Cincu liri de’ Carta, a nu fhilu luongu e fhinu, pe’ pua mu si tira non’appena, nu passanti qualsiasi si piegava mu li po’ pigghjiara. No’ nc’era versu mu l’acchjiappa, e si rammaricava quandu s’accorgìa ca era nu scherzu.
Nc’era pua lu Jiuocu cchiù pericolosu de’ la “Palla de’ Carta”.
Si trattava mpratica de’ nu piscuni camuffatu nt ana carta, dassatu in attesa de nu’ passanti desiderosu “mu nci duna nu cavucci a n’oggettu a fhorma de’ palloni”.
Li conseguenzi eranu tragici pecchì, all’epoca, no’ tutti havienu o portavanu li scarpi.
La Bettula de donn’Angila a petrisa, lu Bar e la Varverìa.
Nta lu stessu locali duva ojia n’accattamu lu gelatu, e chigghi quattru seduti a lu tavulinu jiocanu a li carti, nc’era “Donn’Angila a Petrisa”: na’ fhimmina vascia, picciriggha ma energica e coraggiusa, chi mandava avanti nu negoziu de generi alimentari e arriedi, separatu de na’ scaffalatura avutta fhina a lu suffittu, na’ trattoria pe’ tutti chigghi chi transitavano pe’ curnga.  Mi ricuordu lu profhumu de lu pana appena spurnatu, ma puru chigghu de la mortatella, de’ soppressati e de li fhormaggi locali, adduri chi attiravano li viandanti, chi si fhermavanu e chi volentieri si vivianu nu bicchieri de vinu.
La chjiazza era la fhermata de li pullman chi jienu a Catanzaru e pe’ Sant’Eufemia e, doviendu aspettara tantu pe’ la partenza, li passeggeri approfittavanu sempre mu si fhanu nu spuntinu.
Li gienti non’havienu fhretta, cuomu capita ojia, de’ chisti tiempi, soprattutto quando viaggiava, pecchì consapevoli ca l’attesa era lunga, e quindi preparata e organizzata, e tuttu rientrava nta la normalità chi no’ generava protesti o lamenteli de parti de’ nugghu.
La specialità de ‘sta Trattorìa era lu “Baccalà Frittu” mangiatu cu nu piezzu de’ pana e nu bicchieri de’ vinu, ed’era spessu lu pranzu de la jiornata.
Li profumi chi inondavano tutta la chjiazza attiravano puru li passanti chi no’ disdegnavano mu fhanu opportuni apprezzamenti e commenti a favori de’ donn’Angila.
Ojia trasiendu ‘nta lu Bar “Al Centone” chigghi viecchji profhumi fhuru sostituiti de l’aroma de lu caffè.
E’ puru possibili mu ti mangi nu’ buonu gelatu.
Rappresenta puru nu puntu de ritrovu pe’ viecchji penzionati chi trasanu pe’ na partita a li carti a costu de na consumazioni ( de solitu caramelli o nu caffè), pagatu naturalmente de cui perda la partita e cu lu gustu de lu trofeu pe’ li vincituri.
 Li coppji de jiocaturi sunu de solitu fissi, e rappresentano nu’ spassu pe’ cu jioca pecchì, è tanta la partecipazioni chi genera spessu accaniti discussioni duranti l’andamentu de’ la partita.
A seguira nc’è la Varverìa de “Peppinuzzu Lojacono” ma a li tiempi mia lavoravano cuomu mastri fhalignami Mastru Vitu Sgruomu e lu canatu mastru Peppinu Sorrenti.
Bravi e capaci artigiani, chi fhacìanu lavori de’ ntarsiu de’ qualità, chi ancora ojia si puonu osservara supra li Portuni de certi casi curinghisi. Prima ancora, nc’era n’attru Varvieri: Giovambattista Calvieri chi si trasferìu pua nta nu locali de sua proprietà, chi stà Sutta la Via, puocu luntanu de’ Chjiazza Mmaculata.
Si dicìa ca’ a li tiempi sua parecchi zzappaturi li capigghi o la varva, no’ la pagavanu cu’ sordi, ma cu prodotti de la campagna (poseggha, Ova e legumi de ogni generi).
Quandu subentrau Peppinuzzu Lojacono, la Varverìa diventau puru luogu de ritrovu pe’ li perzuni cchjù acculturati.
Soprattuttu a tardu pomeriggiu ‘nta li misi ‘nvernali, ‘nta na nuvola de’ fhumu, si discutìa de’ politica locali, ma puru nazionali e internazionali.
No’ mancavanu certu chigghi chi rescienu mu attiranu l’attenzioni e mu trasmettanu na’ nota d’allegrìa cu anedduti supa a personaggi de’ lu paisi chi eranu noti a tutti.
La Varverìa era puru n’edicola chi distribuia li quotidiani nazionali, Corrieri de lu Sport e lu Sport Sud (giornali chi parrava de’ lu sport chi riguardava la Calabria, la Campania e la Basilicata).
L’argomentu sport, lu calciu in particulari, era chigghu a cui partecipavano tutti, spessu cu animati discussioni; ognunu si ponìa a difhesa de la squatra prefherita cu tanta passioni, chi spessu richjiamava l’attenzioni de li passanti.
Peppinuzzu fhu premiatu de la Camera de lu Commerciu pe’ fhedeltà e dedizioni a lu lavoru.
 Laboratoriu de Radiu, nu Scarparu e la Biblioteca.
. . . Lu vidi chigghu negoziu de fhjiuri? Certu ca a ttia no’ ti spira nuggha emozioni, ma hai mu sai ca a li tiempi mia nu negoziu de fhjiuri nta Curnga non’esistia propriu!
Accattara fhjiuri era nconcepibbili pe li gienti comuni chi, vicinu a l’ortaggi, li chjiantava nta lu giardinu propriu.
 ‘Nta stu postu, ‘nta l’anni passati, nc’era nu negoziu fornitu de’ laboratoriu tecnicu pemmu si aggiustano li apparecchi Radiu e li Televisioni chi vindìa Sebastianu Garofalu: nu negoziu futuristicu pe’ li tiempi, quandu li primi Televisori cominciavano mu trasanu ‘nta li casi de Curnga.
Quandu venianu trasmessi eventi ‘mportanti, li casi de li fhamigghji chia havianu la Televisioni, si trasfhormavano ‘nta sali cinematografhici in miniatura, pecchì ospitavano no’ sulu i parienti, ma tuttu lu vicinatu, soprattutto guagliuni chi leticavanu fhaciendu n’enormi confusioni.
Li partiti de’ palloni richjiamavano cchjiù gienti possibili ed allora puru la sede de lu Movimentu Sociali (M.S.I.) locale accattau la Televisioni e ricogghjìa tutti li fhigghjiuoli de lu paisi chi, tutti presenti doppu Carosellu seguianu teleromanzi a sfondu storicu e sociali.
Cu lu passara de lu tiempu, la Televisioni si l’accattaru tutti e ‘nta tutti li casi, li sirati, si passavanu in modu diversu; no’ cchjiù ricogghjiuti davanti a lu fhocularu domesticu, ma davanti a la Televisioni, e no’ sulu, ma no’ si cuntavanu cchjiù li storielli e li marachelli cumbinati de li fhigghjiuoli: tutti in silenziu si seguìa quantu la Televisioni trasmettìa.
Chistu negoziu, oltre che riparara e vindìra televisioni e Radiu, distribuia puru lu Radiu corrieri, giornali settimanali pe’ cu havìa la Televisioni. Portava l’elencu de’ tutti li programmi trasmessi sia a la Radiu ca a la Televisioni, e tanti attri notizi de’ Politica e Cronaca rosa.
L’urtima Barracca chi ospita ojia ‘na Barberìa, o nu parrucchieri pe’ uomu, ospitàu pe’ luongu tiempu la scarperìa cchiù nota e frequentata de’ Curnga, “La Putifha de’ lu Ngegnieri”.
Si chiamava Curcio Domenico, soprannominatu “Mastru Micu u Ngegnieri”, scarparu de’ professioni, chi lavorava cu’ tri de li quattru fhigghji masculi chi havìa (Micu, Giuanni e Michelangilu).
Attri discipuli lavoravano ‘nta sta putifha chi disponìa de dui banchji de’ lavoru e, nchjiovavanu e rifhilavanu tomaji e cuoiu pregiatu, mu fhanu scarpi de’ qualità e de notevoli resistenza.
La caratteristica particolari de’ sta putifha, eranu li pareti tappezzati cu manifesti cinematografici: Via col Vento, Quo Vadis, Il Dottor Zivago, Napoli Milionaria e tanti attri.
Chisti manifhesti, oltre ad’essere nu bellu vidìra, servìanu puru mu tappezzano li pareti umidi e cu l’intonacu cadenti.
Oltre mu svolgia l’attività de’ scarparu, Mastru Micu sigìa puru li bulletti de la Luci, pe’ cui, tutti li curinghisi chi havianu mu paganu la Bulletta, havìanu mu passanu de chista putifha.
Cui ritardava, evitava mu passa de lu Passu pecchì, cuomu li vidìa cu’ memz’uocchjiu, li chjiamava a vuci tanta avutta, chi mentìa a disagiu l’interessatu.
Sutta stu murettu all’angulu de la chjiazza, ojia vidìmu na serranda chjiusa, io ricuordu la Biblioteca Comunali de’ Curnga, gestita da “Zio Titta”, nu poeta locali, notu pe’ li poesi a sfondu satiricu chi scrissa supa la vita politica e sociali de’ li tiempi de’ igghu vissuti.
Svolgìa stu lavoru cu’ competenza, dedizioni e tanta passioni.
In pratica, la profhessioni sua era chiggha de’ custurieri chi svolgìa assiemi a lu fhrata Giuseppe, puru igghu poeta, e a li niputi Pippu, Micu e Sandru.
Li viecchji libra, ‘cunu completamente scjiancatu, eranu supa scaffali abbastanza avutti e venìanu richiesti e lejiuti de’ parecchi giuvini de lu paisi chi, attraversu la lettura, s’arricchjienu de’ conoscenzi, chi passavanu puru attraverzu li rappresentazioni Teatrali, chi lu stessu Zia Titta, mentìa in scena assiemi ad attri uomini de’ cultura curinghisi.
Era lu periodu de lu Maestru Terranova, de lu Maestru Sestitu, de lu Maestru Anania, de lu Maestru Sgruomu, de lu farmacista Gugghu, de l’acciprieviti Bianca e de tanti attri chi mo’ no’ mi ricuordu.
Eranu tutti uomini ‘mportanti, de’ cultura e de randa personalità.