Li Putifhi de lu Passu

Li Putifhi de lu Passu
Arrivai a Curnga e quasi quasi no’ canuscìa mancu la casa vecchia mia …
… li strati eranu tutti asfaltati, li carrieri curati e illuminati, mura adornati de immagini de la storia do’ paisi, casi eleganti e barcuni fhjiuruti. Cuomu diventau bellu lu paisi mio!
Doppu chi assorvivi a tutti li doveri quandu arrivai a curnga (visita a li muorti ecc.) mi precipitai ‘nta li strati de lu paisi mu nci fhazzu canuscìra a niputima i posti de la mia nfanzia, e pe’ mia, mu li rivijiu.
Guarda, nci dicu a niputima Pietru junior, chista non è la Statua de la Libertà, è la Statua de la Mmaculata, misa ggha ssupa a guida de lu populu de curinga.
 La Chjesa ava origini antichissimi risaliendu nfatti a lu 1700 circa: lu terremuotu de lu 1638 distrussa Lacconia (attuali Acconia) e l’abitanti si trasferiru in collina costruiendu la “Abazia de Santu Nicola”.
Sta Chjesa forse, fhu costruita supa li mura viecchji de’ Santu Nicola.
Ojia vidi stu Portuni de Brunzu chi, cuomu mi fhu dittu, fhu fhattu de recente de lu scultori Alessandro Romano, e tutti li disegni interni a la chjiesa, chi restaru li stessi de cuomu mi li ricordava io, fhu opera de’ l’architettu Agostino Guzzi de Miglierina.
Si dicia ancora ca fhu costruita cu lu contributu de tutti li cittadini de’ Curnga chi, lavorandu gratuitamente, costruitu na catina umana mu trasportano, passandu de manu a manu, de lu fiumi Turrina chi è chigghu gghassutta fhina nta lu Passu, li pietri e la rina chi serviru pe’ la costruzioni.
A lu postu de li banchi pe’ sedira, nc’eranu fhila de sieggi, cuomu chigghi de’ casa, e spessu eranu nsufficienti m ospitanu tutti li fhedeli presenti, pe’ cui, tanti attri, assistianu a li vari funzioni restandu all’impiedi. Doppu na’ preghiera e lu segnu de la cruci, jiamu ngiru pe li strati de lu paisi.
Lu Passu
Cominciamu de chigghu gruppu de casi chi fhuru li primi a essere costruiti e de cui si sviluppau tuttu Curnga: lu “Spizzu”, e tutti chigghi casi arroccati l’una supra all’attra, fhuru costruiti de stu modu sia pe’ protezioni ca pe’ risparmiare nta la costruzioni lu doppiu muru separatoriu.
Fhu costruitu tra dui fhjiumari, e venìa chiamatu anticamente “Gallicinò”.
Na fhjiumara, alimentava li “Mulini ad acqua” de’ lu Spizzu, e l’attru fhù ncanalatu e passa sutta sta Chjiazza, lu “Passu”.
Lu nomi “Passu”, deriva de “passaggiu”. Ha mu sai ca, na vota, sta chiazza era attraversata de nu corsu d’acqua e quindi, mu si passa de na parti all’attra, venianu criati passaggi cu ligna o fhraschi chi consentienu a l’abitanti mu raggiungianu l’uortu e la campagna vicina chi si trovava de’ l’attru latu de’ la fhjiumara.
Stu corsu d’accqua vinna mbrigliatu cu nu sottopassaggiu e si criau sta chiazza chi ojia si chiama “Chiazza de la Mmaculata”.
Supa lu spiazzu chi vinna realizzatu, si costruiru successivamente li “Barracchi” de lignu chi corrispundanu a sti costruzioni vasci chi fiancheggiano tutta la chiazza. Ojia sunu naturalmente de muratura, cuomu la costruzioni a cui sunu affiancati duva nc’è la Fharmacia, chi sempre ospitaru attività artigiani e commercianti.
Li Barracchi sunu de proprietà de la Chjiesa.
Cuomu già ti dissi, cu lu passara de lu tiempu, nta li Barracchi si avvicendaru diversi artigiani e diversi commercianti.
Vidi, la prima costruzioni ospita la “Fharmacìa” duva la Dottoressa Elisabetta Anania, svolgìa la profhessioni de’ farmacista, e non si limitava mu distribuiscia sulu medicini, cuomu succede ojia, ma cuomu perzuna umana, si mpurmava de lu malatu e nci mandava sempre li saluti e l’auguriu de na pronta guarigione.
La Dottoressa Anania era na fhimmina cordiali e stimata de tutti li curinghisi. Cuomu fharmacista costituiscia motivu d’orgogliu pe’ tuttu lu paisi essendu la prima fhimmina laureata de tutta la provincia de Catanzaru e forse addirittura de tutta la Regioni Calabria.
La stessa profhessionalità, competenza e umanità la caratterizzava ‘nta l’insegnamento de Matematica e Scienze a la Scola d’Avviamentu Professionali de Curinga, (La prima Scola Media).
In realtà la fharmacìa fhù trasferita nta stu locali doppu la ricostruzioni de lu fhabbricatu chi fhu distruttu de na bumba duranti la guerra.
Sicundu la leggenda, la Bumba havìa mu sdarrupa la Chjiesa chi si trovava accantu, ma pe’ nu “miraculu de’ la Madonna”, lu percorsu fhu deviatu e la Chjiesa restau intatta com’era.
 Pe’ li curinghisi chistu eventu è d’attribuira a nu “miraculu de la Madonna de la Mmaculata”.
Mi ricuordu la Fharmacìa chi si trovava a “Pruscinu” de frunte a lu Palazzu Perugini.