La Storia Mia

Lu Zzio Pietru “Pietru de ngiuanna” cunta
 
La Storia mia. Com’era Curnga nta l’anni ’50 - ‘60
Oja tutti mi chiamanu “Zio Peter”, na vota, pe’ tutti era “Pietru de Ngiuanna” crisciutu e pasciutu a Curnga, urtimu da la fhamigghjia numerosa de “Ntuoni”, chi emigrai ‘nta l’America assiemi a mugghjierima “Angilina” e figghjiuma “Peppinieddu” quando eranu ancora l’anni ’50.
Mi ricuordu ancora a Mamma disperata che ciangìa a la stazioni e Patrima chi la cunzulava diciendunci ca quandu sarìa tornatu, sarìa diventatu certu “Riccu”.
 Lu viaggiu sembrava ca no’ fhinìa mai quandu fhinarmente, vittimu n’enorme Statua chi mi dissaru ca era lu simbulu de chista terra: la “Statua de la Libertà”.
Fhigghjiuma, chi avìa appena decia anni, restau pe parecchiu tiempu disorientatu, puru pecchì no’ sapia mu parra la nova lingua e puru pecchì penzava ancora a l’amici, a li parienti, a la scola chi happa pemmu dassa, a li jiuochi ….
Li primi anni mi sdirrinai, e pe’ tala mu fhazzu sordi, fhacìa de tuttu, puru li lavori cchiù duri e happi mu suppuortu tanti umiliazioni.
Pua, lu tiempu volau: la fhamigghjia criscìu cu n’attri due fhigghji e de l’unica stanza duva staciemu tutti, cu sacrifici, ni accattammi la casa de proprietà; de l’umili lavori chi happi mu fhazzu quando arrivai, a n’occupazioni de rilievu otteniendu accussì nu puocu de riscattu sociali.
Nta lu cora mio, nonostante havia fhattu belli progressi, pensava sempre mu tuornu a la casa mia accussì cuomu ‘nci havia prumisu a mamma.
No’ mi scordai mai ca era italianu… Calabrisi … Curinghisi.
Tuttu chistu, cercai mu lu tramandu puru a li niputi mia Americani.
A lu primu niputi “Peter Junior”, nci cuntava ca sugnu curinghisi e nci parrava ‘ndialettu chi era na lingua troppu diverza de la sua.
Ripeta assiemi a mmia: Cassalora, mbrocca, bumbulieddu, trungari, salici, sculapasta, seggia, cucchiarina e igghupronunciava a modu sua fhaciendu ridìra tutta la fhamigghjia.
‘Nci dicìa … nu jiuornu, quandu divienti cchiù randa, ti puortu a lu paisi de li nonni e de pattrita … e sai quantu cuosi ti fhazzu vidìra: la chjesa da Mmmaculata, Santu Lia Viecchiu, u Carminu, u Palazzu Russu, Gurnieddi, Triccannali, lu mara, lu turrazzu, li Serini, la Chiana,  u Stromboli …..
Ojia, doppu chi misi radici puru cu nuovi generazioni, nta l’America, sugnu prontu u mantiegnu la promisa che ‘nci fhici a Mamma e a Patrima puru ca ormai, no’ nci sunu cchiù.
Doppu cinquant’anni, fhinarmente tuornu arriedi cu mugghjierima e niputima Pietru, fhaciendu lu percorsu inversu chi fhicimu nta lu 1950.