Nu Testimuoni veru

Nu testimuoni veru de li cuosi chi cunta lu Zziu Pietru.
 
Non’happi mu nsistu cu fhratima Ernestu mu nterviegnu puru io supa a chigghu chi scrissa, e pe’ chistu lu ringrazziu de’ cora pe’ la possibilità chi mi dunau mu puozzu cunfermara la verità, cuomu perzuna chi, a li tiempi chi lu Zziu Pietru cunta, era presente.
Tutti veri chigghi perzunaggi de cui parra e tutti veri li posti, li carrieri e li situazioni chi descriva e chi si rifheriscianu a l’anni ’50/ ’60.
Lu puozzu fhara pecchì nescivi nta lu 1940, nta la Petra Chjiana a la Salita Martiri, vicinu a lu Passu, duva abitai fhina a lu 1956, quandu a la fhamigghjia mia nci assegnaru na casa a lu Chjianu de L’aria.
Io nc’era, e nta l’anni ’40-’50-’60, fhui puru io protagonista ammienzu a strati e carrieri, e nta li putifhi, fhorgia, fhalignameria, varverìa, duva passai la vita mia de cotraru e duva puotti sfruttara li possibilità chi sti attività mi potìanu dunara.
Fhici lu discipulu nta la Ververìa – Sartoria de’ Mastru Peppinu Pallaria duva potìa lejira gratis tutti li giornalini chi mi piacianu e li giornali sportivi e fhotoromanzi; fhici lu discipulu nta la Fhorgia de lu Zziu Vitu lu Tonzu, duva sfruttava la possibilità mu mi fhazzu la Vombara pe’ lu Pirruocciulu; fhici lu discipulu nta la Fhalignameria de Mastru Vitu Sgruomu e de lu Canatu Mastru Peppinu Sorrenti duva mi fhacìa li Ruoti pe’ lu Carriciegghu.
Fhui quindi protagonista nta l’anni ’40 e l’iniziu de l’anni ’50, e asistivi successivamente a nu lentu ma continu progressu de stu mundu duva, a la dura condizioni de vita, s’assommava, cuomu ricorda Repaci de’ “Calabria grande ed amara”:
“La miseria nera, la fame spaventosa, la follia singola e collettiva, la malaria molesta, la dissenteria, la sfortuna, il malocchio, il demonio, il destino…., la morte liberatrice”.
Seguivi passu passu lu Zziu Pietru mentre portava lu niputi pe’ li strati de lu paisi mio, cu lu cora chjinu de’ commozioni riviviendu, puru io de emigratu, li ricordi de cotraru e de la mia fhanciullezza, nsapurandu viecchji sapuri, sentiendu rumuri a mia fhamiliari de l’attività artigianali de vita paisana, ricordandu, chjiudiendu l’uocchji, sceni de vita civili e religiosa mai scordati.
De randa, mi trasferivi e misi radici nta n’attru postu, ma l’anni passati a Curnga mi restaru sempre impressi nta lu cora e nta la testa.
A chigghj tiempi tuornu spessu cu la mente pecchì fhuru pe mia anni mportanti chi contribuiru mu mi fhormanu cuomu uomu onestu e rispettusu e chi mi cunsentiru mu su sempre orgogliosu d’essere curinghisi d’origini.
Happi occasioni mu mi mbicinu a li posti, mai scordati, quandu de lu 1999 a lu 2008 lavorai nta n’importanti Istituto de Creditu a Lamezia Terme, vicinu propri a la casa mia.
Nta stu periodu happi modu mu frequentu Curnga, ma puru mu mi mantiegnu mpurmatu supa a chigghu chi succedìa nta stu paisi tramiti li notizi chi mi fhornìa Eugeniu Sgruomu, fhigghjiu de Pietru Sruomu, che era consiglieri d’Amministrazioni de lu Centru Cooperativu Centro Calabria e de attri clienti curinghisi chi frequentavanu sta Banca.
Ma seguìendu lu Zziu Pietru pe’ li strati e li chjiazzi de Curnga, mi sentia ancora curinghisi e mi vidìa assiemi a l’amici mia scarara nta li campagni vicini e scorazzara pe’ li strati sentiendumi ancora patruni de lu mundu e attori principali supa nu palcoscenicu ancora affascinanti.
Curnga ‘nsuperfici e suttaterra, nta lu centru abitatu, ‘mperifherìa e nta li contrati sperduti de lu territoriu (Jancareggha, Cacci, Agrusini, Zzicca, Centuoni fhina a li confini cu Jicurzu, Curtali, Cilifharcu e la Contissa, adduva jia cu patrima a caccia e pua a l’acqua fhrisca de Monte Covellu), non’havìanu segreti pe’ na ciurma de guagliuni chi nesciru duranti la Sicunda Guerra Mondiali e appena doppu, abituati a privazioni e a periculi chi la guerra stessa havìa siminatu supa a tuttu stu territoriu.
La vita non’era cuomu chiggha de ojia, sempre de fhretta e complicata, ma passava lentamente e nc’era la possibilità mu si viva dunandu cchjiù ‘mportanza a li valori de l’amicizia, de solidarietà nta lu rispettu de li leggi e de tutti l’attri e de’ lu prossimu.
Na generazioni chi si criscìu nta migghi stenti e cu li sacrifhici de la fhamigghjia chi fhicia de tuttu mu n’assicura nu avvenira cchjiù miegghjiu e nu riscattu sociali a li condizioni de povertà nta cui si campava.
Li fhamigghji eranu fhatti de zzappaturi, agricoltori diretti chi coltivavanu la terra de proprietà e chi eranu ritenuti fhortunati si zzappandu rescianu mu mantenanu la fhamigghjia, nceranu coloni, e mastri artigiani chi eranu rispettati de tutti e chi rescianu mu mantenianu la fhamigghjia a condizioni ca, a lu mistieri chi svolgianu, coltivavanu puru nu piezzu de terra (uortu, livari o vigna) chi nci fhornìa lu necessariu giornalieru.
Li profhessionisti (miedici, fharmacisti, notari, ngegnieri ecc.) eranu tutti fhigghji de gente fhacoltosa, gruossi proprietari de tierri, massari, proprietari de vigni, livari e tierri siminati a ranu, ndianu, uorghjiu, e chi havìanu puru li vacchi, li puorci d’allevamentu, li piecuri, gagghjini e attru.
Eranu chisti li perzuni chi amministravanu lu paisi e decidianu a disfacianu a prorpiu piacimentu; no’ nc’era spaziu pe’ nugghu attru provenienti de n’attra categoria de fhatigaturi, pecchì nugghu potìa avira na fhormazione scolastica adeguata.
Era fhortunatu cu potìa fhrequentara la sesta classe elementare pecchì era motivu d’orgogliu e de distinzioni.
La fhini de la guerra e la nova Costituzioni Repubblicana, apirìa ncunu spiragliu de speranza pe’ tutti e si potìa, fhinarmente, dara n’istruzioni a li fhigghji e cu l’istruzioni la possibilità de na vita diversa e miegghjiu de chiggha chi pottaru havìra li patri e l’antenati nuostri.
Nta st’ambienti, chigghi fhigghjiuoli criscianu nfhretta e diventavanu uomini prima ancora de lu tiempu necessariu, pecchì sapparu fhara a menu de tutti chigghi strutturi necessari nta na società civili, ma chi havìanu cuomu rifherimentu sulu la fhamigghjia, chi provvedìa a tuttu chigghu de cui nu fhigghjiu havìa bisuognu.
Li jiuochi, i gruppi d’amici chi si sfidavanu a li carti o nta na partita de palloni, o ancora cu lu ciolè, fhjiunda e attru, e chi affruntavanu li discurzi de li randi, chi havìanu sempre n’uocchjiu chi guardava versu lu fhuturu pe’ li guagliuni, e la libertà chi nc’era mu si vajia duva si volia e mu si fhacia chigghu chi si potìa, ni consentìa mu simu spenzierati e no’ condizionati de li brutturi chi la guerra havìa dassatu.
Lu Zziu Pietru nci cunta a lu niputi ricordandu strati, carrieri, chjiazzi, putifhi duva si svolgianu li mistieri, abbitudini, stori, e no’ si scorda, ricordandu li jiuochi chi si fhacianu, mu nci dicia ca chigghi jiuochi eranu l’unica cosa chi li guagliuni potìanu fhara e potìanu havìra.
E li guagliuni criscìru propri supa a chigghj strati, nta chigghj carrieri, nta chigghj putifhi, fhjiancu a fhjiancu cu tutti chigghj perzuni de cui igghu parra e chi ricorda la parti de storia chi chisti costruiru.
Vuogghjiu puru io mu nda ricuordu ncunu, no’ pecchì li ritiegnu cchjiù mportanti de attri, ma pecchì aiutanu li nuovi generazioni mu capiscianu qual’eranu li consizioni nta cui sti guagliuni si movianu.
Puru chista è storia.
Mi ricuordu lu cuginu mio Carru Grassu, de n’annu cchjiù randa de mia, chi morìu giuvini, cu cui d’estati dormiamu assiemi nta nu liettu fhattu supra a n’arvuru (La Loggia), e pe’ la passioni mu arrobbamu cerasi.
Dicu, arrobbamu pecchì puru haviendu la possibilità mu nda mangiamu quantu nda voliamu nta la proprietà de lu Zziu Vitu U Tonzu, a Trungari e a Riola, duva nc’eranu arvuri de fhrutta d’ogni tipu, ni piacìa mu arrobbamu chigghj de l’attri, soprattuttu chigghj de Mastru Fhranciscu e Mastru Sarvaturi, dui fhrati, fhorgiari, vicini de casa, amici de fhamigghjia, chi havìanu nu sapuri ndescrivibili.
La cerasara era a lu limiti de li tierri de lu Zziu Vitu cu li fhratelli Sestitu, ed’eranu propri de na qualità rara, (Cerasi Graffijiuni), gruossi, sapuriti e duri.
La continua presenza de Mastru Fhranciscu, chi coltivava l’uortu jiornati interi, no’ consentìa nuggha possibilità de fhurtu e lu studiu de l’abitudini de li proprietari, no’ dassava nuggha speranza.
N’accuntentavumu de li Cerasi Napulitani de lu Zziu Vitu chi però, non’eranu buoni cuomu chigghj de Mastru Fhranciscu e mastru Sarvaturi.
Ni fhacìamu certi mangiati de Cerasi chi spessu ni venìa la diarrea chi nemmenu l’enterogermina moderna rescìa mu fherma.
Nci volìa ncunu stratagemma mu nci potìamu arrobbara li cerasi a li fhratelli Sestitu, ma quala?
Fhinarmente doppu tantu penzara, ni vinna l’idea.
Mastru Fhranciscu portava a Riola sempre lu ciucciu chi ligava a n’arvuru cu na corda bella longa nmodu mu po’ pasculara.
Na matìna priestu priestu, penzammi mu nci spostamu lu ciucciu nta na proprietà abbastanza luntana, mu nci l’ammucciamu nmodu mu vajia mu lu cerca tierri tierri, e mu nci menta lu tiempu giustu mu nci potìmu fhinarmente arrobbara li cerasi.
E fhu propri de stu modu chi Mastru Fhranciscu s’alluntanau e nui puottimu portara a terminu lu fhurtu.
Mi ricuordu de n’attru guagliuni de cui mi sfuggia lu nomi, ma chi era de nui soprannominatu “Menza Libbra” pecchì era magru e chi, diversi vuoti, l’essere leggeru, nci sarvau la vita.
Na vota, cercandu fhierru viecchjiu de vindira a la Giuannilonga, pe’ guadagnara li sordi mu n’accattamu li giornalini chi voliamu, mentre stacìa tirandu nu fhierru chi spuntava de na briglia chi stacianu costruiendu nta la fhjiumara de Turrina, catta testa sutta.
Mu arriva a lu fhierru, n’attru guagliuni lu tenìa de li piedi a testa sutta, ma la fhorza vinna menu, lu libarau e Menza Libbra catta ammienzu a chigghj piscuni a lu bordu de lu laghettu chi l’acqua havìa fhormatu a li piedi de la briglia.
Rescìu mu nescia sanu e sarvu nta la meravigghjia de tutti l’amici presenti.
N’attra vota, fhaciendu Tarzan supa na livara secolari, zumpandu de na rama a n’attra, no’ rescìu mu s’aggrappa e catta nterra de n’altezza abbastanza avutta; puru sta vota, grascinatu de testa a piedi, resciu mu si sarva.
Mi ricuordo Bestiano Malacari, chi gareggiava cu mia pe’ scommessa o pe dimostrara cu era cchjiù resistente e cchjiù veloci.
Li percorsi eranu sempre diversi:
Curnga: si partìa de lu passu, corsu Garibaldi, via Roma, Passu.
Curnga: partenza Passu, Ponte, si nchjianava de lu Turrina, Riola, Passu.
Curnga: Campu sportivu, 10-20-50-100 giri de campu.
Igghu era Bartali e io Coppi.
Mi ricuordu Bonaventura Anania, inseparabili cumpagnu de jiuochi e de scola elementari.
Era soprannominatu “Rimitu de la valli de Canni” pecchì cercava sempre cuosi chi mentìa sistematicamente nta la vucca e chi pe’ chistu, nci vinna lu tifhu pe’ dui vuoti.
Mi ricuordu Vicienzu Sorrenti, fhigghjiu de la “Viola” chi emigrau pua nta l’America, a cui mi ligava puru nu rapportu de parentela pecchì la Zzia Rosara, mugghjiera de lu Zziu Vitu u Tonzu, era la suoru de lu patra, ed’ierumu sempre assema quandu si scarava nta lu Zziu Vitu a Trungari e Riola ncerca de fhrutta, puru acerba, chi era la posta mpaliu nta li partiti a li carti chi ni fhacìamu.
No’ mi scuordu chigghu jiuornu quandu, duranti la partita de carti chi ni staciamu fhaciendu sutta la prunara chi havia mu fhorniscia lu quantitativu de pruna chi ni staciemu jiocandu, ni piscau lu Zziu Vitu e nui, pe’ nommu ni fhacimu ricanuscira ni misimu a fhujira de tutti li parti.
Pe’ la fhretta, io pierzi nu scarpu chi mi custau na cazzottijiata de parti de patrima quandu la sira, zziuma si presentau a la casa mia cu lu scarpu, chi havìa ricanusciutu, domandandumi si pe’ casu era io chi l’havìa perdutu e duva penzava ca l’havìa perdutu.
De chigghji tiempi, non’era difficili trovara lu proprietariu de scarpi, pecchì no’ tutti l’havianu e quandu l’avianu prefherianu mu si li caccianu e mu caminanu scavuzzi pe’ tala nommu si conzumavanu.
Mi ricuordu Cicciu Senese, figghjiu de Pietru, patruni de la Bettula chi si trovava all’incrociu de Corsu Garibaldi cu via Salita Martiri.
Mi lu ricuordu nmodu particulara pecchì mancau puocu chi no’ l’ammazzai cu na pistola fhatta de lignu e cu bossuli chi trovavamu nta li campagni cuomu residuati de la guerra appena fhinuta.
Scarricavumu la purvuli, e incchjiamu nu bossulu de cartucciu cu purvuli e cutigghj chi havianu la stessa fhunzioni de li pagghini de li cartucci veri.
S’appojiava supa na tavuleggha a fhorma de pistola, e cu nu fhosparu a lignu s’appicciava mbicinandulu a lu bucu de la cartuccia.
S’infiammava la purvuli e scoppiava mentiendu a rischiu la vita de cui si potìa trovara supa la trajiettoria de lu sparu.
Chigghu jiuorni, pe’ fhortuna, a distanza no’ troppu vicina, si trovava propri Cicciu, e quandu la pistola sparau, la fhacci de Cicciu era tutta chjina de puntini chi eranu propriu li segni dassati de li cutigghj misi nta la cartuccia.
Mi ricuordu Grigorinu Senesi, pe’ na jiornata de prigionia chi passammi nt ana caseggha a lu Ponta.
Era lugliu ma no’ mi ricuordu quala jiuornu, ma era na jiornata particolari pecchì supa la Statali 19, propri de lu Ponta, passava lu giru d’Italia chi de l’Angitula attraversu lu Ponta de Turrina, si dirigia versu Catanzaru duva era fhissatu l’arrivu de la tappa.
Li guagliuni sportivi, appassionati de ciclismu, ngruppu, ni nda jimmi a lu Ponta in’attesa de’ Coppi, Bartali e Magni.
No’ sapiendu a chi ura potìanu passara li corridori, de prima matina partimmi pemmu ni scegghjimu li miegghjiu posti mu potìmu vidira li corridori de’ cchjiù vicini possibili.
Era ancora troppu priestu pe’ lu passaggiu de li corridori pe cui, penzammi mu jiamu a pisca de angigghj nta lu Turrina chi, de chigghi tiempi, eranu abbastanza numerosi e abbastanza fhacili mu si piscanu.
La pisca fhu ‘nfruttuosa, ma la fhami cominciau mu si senta. Fhu a stu momentu chi Grigorinu ni proposa mu scaramu nta igghu cha nc’era na fhicara malangiana chi avìa gia fhattu li fhicu de fhjiuri.
Senza esitazioni partimmi a la ricerca de sta fhicara, e quandu arrivammi, affamati cuomu ierumu, cominciammi a mangiara.
Ncunu sagghjiu de supa la fhicara, attri restaru sutta, tantu nd’havìa pe tutti ed’eranu gruossi, maturi e sapuriti.
Tranquilli ca la fhicara era de Grigorinu, nui mangiavumu cuomu fhussa puru la nostra, ma quandu si presentau lu patruni veru, ognunu cominciau a scappara, ma chigghi chi ierumu supa la fhicara, no’ puottimu fhara attru ca mu ni cunsignamu a lu patruni.
Cercavumu mu ni giustifhicamu, ma lu proprietariu no’ nda vozza sapira nenta.
Ni acchjiappau de nu vrazzu e ni chjiusa nta la caseggha, e ggha intra ni dassau fhina a la sira.
Doppu chi fhinìu la jiornata sua de lavoru, fhinarmente ni libarau ma, la corsa avìa giàpassatu, li corridori e li spettatiri si nd’avìanu jiutu a la casa mentre nui ierumu chjiusi nta la caseggha.
Mi ricuordu Totu Paonessa, soprannominatu Malenkov pecchì nci assimigghjiava spiccicatu a nu statista Russu, ma puru pecchì era de na voracità spaventosa. Rescìa mu si mangia centinara de fhicu ndiani e quantitativi industriali de qualsiasi tipu de fhrutta, puru ca non’era ancura perfettamente matura.
Mi ricuordu Nicolinu Cirianni, infallibili cu lu tiru de la fhjiunda.
Rescìa mu ammazza l’acciegghj mentre stacianu volandu e puru quandu si jia a licierti rescìa sempre mu nd’ammazza cchjiù de tutti l’attri attrezzati puru igghi de’ fhjiunda.
Mi ricuordu li fhrati mia Ntoninu ed’Ernestu, lu primu chi moriu quandu era ancora giuvini, lu sicundu, chigghu chi scrissa li ricordi de lu Zziu Pietru, tutti dui cchjiù giuvini de mia, e pe’ chistu discipuli e aiutanti mia soprattuttu d’estati, quandu li fhamigghji de Curnga si trasferianu nmassa a la prajia de Curnga, dormiendu nta pagghjiara e nta barracchi, quandu jiamu a ligniceggha pe cucinara o mu cercamu viermi a lidu de’ mara pe’ piscara.
Mi ricuordu nu jiuornu chi pemmu nci puortu l’asgassari a nu turista chi ogni annu venìa a la spiaggia de Curnga, e chi mi pagava pe’ chistu, partimmi pe’ lu Turrina mu piscamu l’asgassari cu na mbrocca ligata a la punta de na canna longa e nu piezzu de’ fhierru fhilatu.
Non’era difficili pecchì piscara nta la fhiumi era cuomu piscara a mara pecchì abbundava de angigghj e soprattuttu de asgassari.
L’acqua era pulita e si vidianu puru duva si ntanavanu, pe’ chistu era ancora cchjiù fhacili.
Mentre stacìamu piscandu, si mbicinanu dui uomini cu nu tonu minacciosu e ni cercanu li documenti chi ni autorizzavanu a la pisca nta l’acqua duci.
Era nu pretestu mu ni fhanu alluntanara, la richiesta era fhora luogu pecchì ierumu sempre dui cotrari, in costumi de bagnu chi però, pe’ pagura, rispundiru cu na volata de centometristi.
Cominciammi a fhujira fhina a quandu li dui no’ si fhermaru pecchì no’ volianu mu n’acchjiappanu ma volianu sulu mu ni alluntananu de lu fiumi nmodu mu hanu campu libaru.
N’ammucciammi e vittimu ca stacìanu mbilenandu l’acqua cu certi fhraschi pistati (La Piperìa), mu piscanu l’angigghj chi sturduti, venianu de suli a galla.
Aspettammi fhina a quandu soddisfatti de la pisca no’ s’alluntanaru.
Mentre cogghjianu l’angigghj, mandai a fhratima a la barracca, mu pigghjia la tinagghjia de l’angigghj e nu contenitori, e si ripresentau puocu doppu cu na vasca de zincu e la tinagghjia.
Inchjimmi la vasca de angigghj chi nci distribuimmi a tutti li vicini de barracca.
Pe’ urtimu, mi piacia ricordara dui perzuni chi pe’ mia happaru tanta mportanza.
Lu primu è Don Pietru Gullo, lu Setturi, proprietariu de la Satturia duva lavorava patrima e cumpara de fhratima Ntoninu chi l’havìa vettijiatu.
Era puru chigghu chi quandu nci portava lu giornali, chi l’Edicula de Mastru Peppinu Pallaria, duva io era discipulu, nci mandava jiuornu pe’ jiuornu, mi rigalava sempre una o dui o cincu liri chi io mi spendìa accattandu giornalini, curteggha e tagghjiuoli.
Lu sicundu è Sandru Garofhalu, ancora studente universitariu, chi diventau Abbucatu prima e Magistratu a lu Tribunali de Lamezia Terme doppu, a cui ha mu nci dicu grazzi ca mi indirizzau a lu studiu doppu nu tentativu fhallimentare chi havìa costrettu a patrima mu m’affida a ncunu Mastru buonu mu mi mparu nu buonu mistieri, pecchì nci dissa ca la scola non’era fhatta pe’ mia.
(Chista fhu la sentenza de nu profhessori de fhama doppu nu periodu de preparazioni pe’ l’esami d’ammissioni a li scuoli Medi de Maida).
Chigghi elencati de’ seguanu, fhuru li cumpagni mia, chigghi chi nesciru nta lu ’40 o puocu prima, cu cui passai jiornati interi jiocandu, scarandu e standu ncumpagnìa.
Ojia sunu tutti ottimi profhessionisti e occupanu posti de prestigiu nta la scola, nta Spitali cuomu Miedici Primari e nta la Chjiesa.
Anania Bonaventura, Abbucatu - Attanasi Basilio, Rappresentanti de Commerciu - Attanasi Fortunato, Pitturi - Bretti Giuseppe, Profhessori - Calvieri Giovambattista, Prof. - Cefalì Pietro, Abbucatu, - Cirianni Nicolinu, Ing. - Cuda Aldu, Miedico - Curcio Michelangilu, Calzolaiu, - Diaco Nicola, Maestro - Fruci Franco, Prof. - Furciniti Vincenzo, Rag. - Granata Martino, Maestro - Granata Sebastiano, Sartu - Gugliotta Antonio, Pitturi - Gullo G. Battista, Setturi - Lo Russo Andrea, Commercialista – Lo Russo Carlo, Commercialista - Lo Russo Giampaolo, Miedicu – Lo Russo Mimmu, Chirurgo - Lo Russo Paulu, Dipendente Aeroporto - Malacari Sebastiano, Sartu Varvieri - Marongelli Silviu, Autonoleggiatori, Mazzotta Pinu, Professore Universitario, Mazzotta Guido, Mons. Prof. Università Urbaniana - Mazzotta Lorenzo, Prof. - Paola Annibali, funzionario Inail - Perugini Basilio Carru, Maestro elementare -Senese Elia, Prof - Senese Francesco, Rag. - Senese Francesco, Prof. –. Senese Griguori, Rag. - Sgromo Bernardu - Ing. - Sgromo Vittoriu, Prof. - Zimatore Giuseppe, Cardiologu.
 Ncunu de chisti no’ nc’è cchjiù, ma mi ricuordu lu tiempu chi passammi assiemi chi restau pe’ sempre nta la memoria mia.
Tanti attri jiarìanu ricordati e mi scusu pecchi no’ lu fhazzu, ma puru chisti si fhiciaru valìra svolgiendu profhessioni e mistieri nta lu paisi duva nesciru o nta nu postu qualsiasi de stu mundu duva fhatiganu cu dignità, profhessionalità e mistieri.
 
Peppinu Gaudinu