De l'attru mundu a lu ministru de la Sanità

De l'attru mundu a lu ministru de la Sanità
 
Tu chi de Sanità ministru sini,
de tia na cosa volaria spiegata,
nterra pe mia, lu sai, vinna la fini,
pecchi de mia la tassa vua pagata?
 
Era dicembre già lu juornu dece
de l’annu chi passau, novantadui,
passai nta l’attru mundu nsanta pace,
la curpa  si su ccà l'aviti vui.
 
Quand'era ancora nta la terra vostra
nu miedicu mi dissa: si malatu,
a lu spitali curri, va dimostra
ca si malatu e bua ricoveratu.
 
A lu spitali, ahimè! postu no nc'era,
mi dissaru mu vaju a nattra vanda,
tutti mi rispundianu aspetta e spera,
morivi pe' mancanza de na branda.
 
Mo tu cu facci tosta de puttana,
mi dici ancora ca a' mu pagu tassi,
vidi si hai tiempu mo nta sta simana
mu vieni tuna cca mu ti li ncassi.
 
Lu mundu sanu de stu fattu rida
vidienduti com'é chi ti cumpuorti,
ti guarda e ti scemija quandu vida,
ca tassi vua pagati de li muorti.
 
Domenico Vono