Ricordandu li Passuoti

Dettagli: Categoria principale: ROOT; Visite: 107263

Ricordandu li Passuoti

Centocinquanta quartine per ricordare tutti quei personaggi che hanno vissuto

Piazza Immacolata, Il “Passo”.

di: Er. Ga.

1 - Arrivatu nta lu passu mi guardai tuttu ntuornu de l’amici, mancu l’ombra e cercai mu mi ricuordu.	2 - Chigghi mura cu l’assiettu separati de tri tubi tanta genta ggha seduta senza tuoni e ne’ disturbi.
Mona nc’esta sta veranda st’inferriata cu panchini e li dominichi sopratuttu sunu tutti chjini chjini.	Quantu gienti chi passaru de sta chjiazza desulata discutiendu jiuorni nteri de sta gente abbandunata.
Peppinuzzu nzapunava (Lojacono) fhacci ricchji nasu e mussu appricatu cuomu era mu mantena lu discurzu.	E Don Micu lu cumpusu (Frijia) Havìa tuttu nta la menta volìa sempre la ragiuni no nci nda mportava nenta.
Ni governa lu patruni, ni tartassanu de tassi gridau mastru Sarvaturi (Sestito) chi sentìu tuttu lu Passu.	S’hai mu cierchi nu lavoru hai mu emigri all’Albanìa li bulletti hai mu li paghi ma no’ nc’è na migliorìa.
Sapa tuttu stu cotraru chi si frequentau la scola non’appena diplomatu happa pemmu si nda vola.	Pua don Carru l’Abbucatu (Piro) dissa “bravu Sarvaturi” ti la dugnu la ragiuni cca, no’ ncintra lu Signuri.
L’attri no’ stacìanu fhiermi e cu la manu e cu lu jitu no mbolìanu cuntraddira ca lu stessu è lu partitu.	Nc’era ncunu ggha sedutu chi lu mussu lu storcìu e pensava cchjiù convintu a tuttu chigghu chi perdìu.
A la Fiamma, a lu partitu a chiggh’uomu vigorosu nonostanti tanta fhami fhù pe igghu valorosu.	Si dassavi portafhogliu lu trovavi ggha duv’era ma de certu si scordau ca na lira mancu nc’era.
E la fhami tili tili tanta genta decimava nonostanti la fhatiga e li jiornati chi zzappava.	Scordatili chigghi tiempi dissa mastru Sarvaturi ca si mona sì cuntientu ha mu ringrazzi lu Signuri.
Certu, a tìa chi ti nda mporta tu li purghi li dunavi non’havìvi certu ntuoppi e a dui ganghi tu mangiavi.	Lu problema era pe’ nui gente povera ad affritta soprattuttu a cui votava lu Partitu Comunista.
Nda jiettastuvu mazzati nta lu scuru e a la rugheggha non’havivuvu cuntegnu cu tutti chigghi manganeggha.	Mo’ parramu tutti quanti tutti havìmu lu dirittu mu dicimu a fhisserìa buonu, santu e benedittu.
Ringrazziamu lu signuri ca no’ fhù na profhezìa pemmu arriva giustu ntiempu tutta sta democrazzìa.	Tutti quanti hanu dirittu de parrara e mu contesta mu difhenda la ragiuni de sta genta tantu onesta.
Chigghu ch’era sutta varva cu vigori ntervenìa ma volìti stara cittu ma chi mi nteressa a mia.	Cerca puru mu capisci no’ penzara a fissarìa ca de chigghu chi si parra interessa puru a tìa.
Vui gridati a tutta fhorza e mi scoppiastuvu la testa nta stu fhumu e nta sta rissa para ca si fha na fhesta.	E cu era ggha vicìnu chi sentìa chisti panzani mastru Micu “chi successa” pemmu gridanu a sti chjiani.
Si no’ cangianu stu tuonu e si caccianu stu vizzu nci la dugnu io la scusa pemmu cangianu ndirizzu.	Vui, pistati a tutta fhorza e gridati a cchjiù no’ puozzu Accussì vidimu certu Cu ha cchjiù forta u gargaruozzu.
Quandu venanu cca mìa sti Cristiani e Comunisti a mu nci dicu quantu custanu sutta cura li dentisti.	Mu nci dicu cuomu mai quandu scarpi io cunzignu ha mu sientu tanti lagni e mi paganu cu sdiegnu.
Nci sta bene a tutti chigghi chi cangiaru lu partitu mu discuta , mu si mbriga e mu diventa cchjiù accanitu.	Lu discurzu fhila buonu pe’cu esta n’impiegatu ca la paga arriva sempra puru ch’esta n’acciaccatu.
La politica si sapa c’apra puorti e li portuni non’è pe’ perzuni onesti ma pe’ fhurbi e pe’ gurpuni.	E donn’Angila chi frijia Stuoccu Pipi e Baccalà lu profhumu ti cumpunda e ti costringia mu vai gghà.
Non’importa chi ti porta Vinu, acitu o acquareggha mangi tuttu si cucina fhilatiegghi e stigghjioleggha.	Bestianuzzu chi conzava Rudiu a valvula a nu suonu cu la musica coprìa lu burdellu e lu fhrastuonu
E certi vuoti era igghu chi fhacìa de cchjiù casinu soprattuttu la dominica chi tenìa lu cuncertinu.	Mastru Giulu chi cusìa collu e manichi a na giacca stu fhracassu no lu rieggiu ca li timpani mi spacca.
Mi penzava ca fhinianu sti latuorni e chisti lagni e no’ si sentìanu cchjiù sti lamienti dei cumpagni.	E nemmenu chigghi strani gienti de l’avanguardisti chi ogni jiuornu sunu sempa nguerra cu li comunisti.
Nugghu ancora capiscìu ca passaru cchjiù simani e nchjianaru a lu governu sulu li democristiani.	Totu Curciu cu Granatu rifhinianu certi occhjielli gugghjia fhilu e jiditala ggha seduti a li sgabelli.
Puru igghi chi sentìanu sti discurzi gridazzari arricciavanu lu nasu ammienzu a chigghi burdellari	No’ capisciu dissa Totu pecchì tutti hanu ragiuni ma no’ nd’hava sulu unu chi si fhacia lu spaccuni.
Nci vorìa certamente ncunu studiu approfhondìtu mu nci fhacia capiscira ca lu mundu è progreditu.	Nui cusimu e rifhilamu de matina a jiuornu e sira ma a li cunti no’ cumbena cu sta genta cumbattìra.
Don Peppinu mogiu mogiu appoiatu a lu sportellu dicìa spessu e volentieri “quandu fhina stu burdellu”?	Io lu sacciu e puozzu dira tuttu chigghu chi è successu cu era cu lu manganiegghu e cu mbeci fhu reppressu.
Cu minava a tutta fhorza cu gridava sempe ajiutu e lu sangu nci currìa si no’ s’era cunbertutu.	La putifha ggha vicina (Farmacia) de perzuni era chjina lu silenziu ggha regnava mpila ndiana a testa china.
Pemmu pigghi medicini e na purga e Sala ’ngrisi nci dicivi cui è malatu e ti suggerìa l’avvisi.	Propi cca, nta sta carrera sita all’umbra de la chjiesa tri Parmenta e nu scarparu e de perzuni numerosa.
E don Micu cu cautela (Frijia) cu na Mappa sempe appriessu garantìa la tutela de li tierri de possiessu.	Quandu ncunu lu chjiamava ca volìa ncuna notizia era prontu cu na carta e t’esponìa sull’edilizia.
Ti dunava nu cunzigghjiu, ti dicìa quala valori ha na terra chi venìa lavurata e nu trattori.	Stu terrenu dassa stara chjianta alivi oppuru vigna tagghjia tutti chisti cierzi e fai nu carricu de ligna.
Non’è adattu pe’ na casa ca de sutta nc’è na scioggha tuttu ntuornu chjinu d’acqua e la terra è tutta moggha.	Nta sta mappa catastali nci su posti cchjiù sicuri chi ti custa pemmu parri cu ncun’amministraturi?
Si pua nsisti e si cumbintu e no’ vua stara nchjianuri costruisci na caseggha e vavattinda nta Cavuri.	Ogni tantu ntervenìa e difhendìa la fhorestali ca de chistu nda sapìa ch’era spessu capurali.
Fhatigau cu li Serrai Bevilacqua e Perugini e de tuttu si mparau cu sti gienti paladini.	Jia a rijiola, jia nmarina fhavareggha e donnavascia turrivecchjia e li serini e no’ catta mai all’ambascia.
Don Battista chi sonava (Grasso) la chitarra e u Mandulinu no’ dassava serenati e pua fhacìa lu ciabattinu.	Certi vuoti si chjiudìa nta sta chjiesa pomeriggiu s’assettava o pianufhorta e sonava de prodigiu.
Puocu supra lu Mbastaru tila,lignu e na cordeggha t’acconzava chigghi mbasti puru cu na tavuleggha.	E lu fhigghjiu Mastru Cicciu piega e salda la lamiera pua la saguma e diventa o na giarra o na lumera.
Don Peppinu chi fumava appojiatu a la cappotta aspettava ncunu tiziu cu la machina mu porta.	Cu volìa mu si nda vajia a l’America o Argentina don Peppinu li portava a la stazioni de matina.
Nc’era Pietru, povariegghu (Frijia) chi non’havìa na parrasìa ma si sonava li campani, lu fhacìa cu maestrìa.	S’era Missa o nu mortuoru Nci cangiava sentimentu ma cu tanta dedizioni cangia lu comportamentu.
E lu povaru zziu Nto’ (Ciliberto) chi passandu salutava e de la cuda de lu ciucciu si fhacìa traspurtara.	Nuzziatu lu postinu chi passava de volata nci mandava l’improperi nci mentìa la pinnegghata.
Nc’è cu vajia pemmu zzappa cui mu abbivara poseggha cca su tutti nteressati a cui apirìu na vutticeggha.	Tutti quandi rispundianu Lu chjamavanu “nc’è posta?” e certi vuoti era costrettu pemmu fhacia ggha na sosta.
Certi vuoti chi ncuntrava Nta lu passu lu Marianu (Montanaro) L’abbisava ca la posta La portava o Castegghanu.	Pua nta ricchji nci dicìa: Tu prepara la poseggha suppressati e capicoggha e lu vinu . . . pe’ na peggha.
Ed è veru quantu Ddio ca nchjianava volentieri quandu jia a la muntagna si fhacìa. . . dui bicchieri.	Cu la scusa de la posta E cu l’amici chi tenìa Suppressati cu poseggha Nd’havìa quantu nda volìa.
Nta sta chjiazza si pistava Fhierru russu e Sola tosta si jiungianu Tavuluni mu si fhacia ncuna porta.	Sbatta e sgruscia lu Tilaru li canniegghi all’Ordituri si guardavi a nu puntuni si mpingianu li Buttuni.
Cu tri buotti sicchi e tuosti Lucrezzuzza ggha tessìa (Frijia) si perdìa ncunu minutu era pe’ n’Ave Maria.	Giuseppuzzu cu zia Titta (Vono) Fhilu e Stoffa nta li mani cu tagghjiava e cu cusìa cu fhacìa li supramani.
E la sira a ritirata tutti ntuornu a lu vrascieri a lavoru già pagatu si vivìanu nu bicchieri.	Doppu sazzu Giuseppuzzu cuomu puru la zia Titta nci nescia de nta li mani chiggha rima beneditta.
Donna ‘Ngiuanna cu Giuseppe vindìa pasta pana e sardi a li povari chi havienu tanta fhami e puocu sordi.	E a tutti chigghi canusciuti chigghi chi eranu mbulletta sia vicini ca luntani nci dunava la libretta.
E pigghjiavanu ncridenza tanta arrobba de mangiara e pagavanu a lu misi quandu ncunu li pagava.	Don Pasquali de patuolu a na seggia ggha assettatu cu na crapa ggha mpenduta e de sangu assai mprappatu.
Gambuncellu cu filiettu Puocu gienti l’accattava Ca ligatu a triccannali ogni puorcu si ngrassava.	E sozzizza e suppressati capicoggha e mangulara quandu jieanu a la campagna nc’era cchjiù de cunzumara.
Li dominichi e a la fhesta fhilatiegghi o tagghjiarini Missa, amici e passijata e pe’ sicundu li fhettini.	Pietru Piru ggha vicinu Jiastimandu mentìa tacchi ca li fhimmini a stu mundu tutti eranu baldracchi.
La Madonna mu li sarva fhaccituosti e lingua longa vannu ngiru scumbogghjiati e no’ sentanu virgogna.	Benedittu Sant’Antuoni chi li chjiama a tutti quanti nta la chjiesa li sbirgogna cuomu fhussa vigilanti.
Nonostanti tuttu chistu de la chjiazza nta lu Passu sbentulanu li gunniegghi chi pe tutti su nu spassu.	Nc’è cu grida, nc’è cu sparra cui si fhacia maravigghjia nc’esta nbeci cu si sciala e penza:” benedittu cu li pigghjia”.
Lu zziu Vitu e Pitruantuoni cu Giuseppe e Pietru Piru tutti assiemi commentandu chi perdienu lu respiru.	Chigghu povaru ndon Micu (Piro) no’ rescìa mu duna udienza nta lu passu pemmu senta a cu volìa certa assistenza.
Carta e pinna nta li mani pemmu pigghia ncunu appuntu a cui havìa pemmu nci fhacia certifhicati a tornacuntu.	Nel frattempu mastru Pietru sutta l’acqua chi sciacquava nu bicchieri de nu quartu pe’ ccui ggha si mbrijiacava.
Nc’era sempre ncun’amicu chi trasìa a matinata mu si viva nu quartinu mpacci a chista vita ngrata.	E ogni tantu a tarda sira Carru, Cicciu, Totu e Tittu si chjiudianu a sta cantina, e mangiavanu suffrittu.
Ed’allora a stu momentu Vitu e Totu cu Vicienzu s’aggregavanu a lu gruppu cu tuttu lu cunzienzu.	Fhrutta, pana, fhungi e frittu cu fhormaggiu pecurinu si mangiavanu de tuttu, ma. . . mbiscatu cu lu vinu.
Cu na tenda chi pendìa de nu palu ggha mpendutu mu cumbogghjia buonu buonu chigghu vinu già vivutu.	Si mbrigavanu a li carti tra cumpagni ggha vicini ma li liti già fhinìanu all’arrivu de’ porcini.
E lu vinu canni canni Jia e venìa de fhiascu a fhiascu chi quandu s’accorgianu ogni currijia era all’allascu.	Quantu vuoti la carrera ggha vicina era allagata no’ facìanu mancu ntiempu ca era longa l’affrescata.
Certi vuoti a matinata nc’era ancora ncunu ‘ngiru chi smartìa la mbrijiacata chi sembrava nu crumiru.	Quandu è ura mu si torna tutti quanti a lu lavoru sembra ca no’ nci fhu nenta nci tenìanu a lu decoru.
Peppinuzzu ggha vicinu (Pallaria) disegnava uri e uri cu lu Gessu e cu lu Metru Cavuzzi de zzappaturi.	Ed’intantu li garzuni nzapunavanu na varva e quand’era bella pronta ncuna lira era sarva.
Partìa priestu la matina e a sira fhonda cca tornava era lu massaru Micu (Perugino) chi a marina fhatigava.	Tra Gagghini Vacchi e Tori no’ restava mancu pagghjia nonostanti siminava Ranu Fhavi e la Granagghjia.
Nonostanti sta fhatiga producìa de tutti cuosi Fhicu Arangi Mandarini chi sembravanu virtuosi.	E all’ura chi arrivava tutti ntuornu li cotrari aspettandu ncuna cosa soprattuttu de mangiara.
Lu Don Micu de Lo Russu era certu cchjiù evolutu Barcu, uogghjiu e macininu li guardava e havìa fhinutu.	Lu Zziu Jo l’americanu (Frijia) cu bastuni nta li mani nta lu passu jia cuntandu stori de l’americani.
Certi vuoti jia a Rijiola mu si guarda la Pignara percorrìa chigghi vijiola e ggha spessu s’assettava.	E non’è ca no’ trovava ncunu amicu pemmu parra nta chiggh’orta pari pari li perzuni eranu a marra.
Nc’era Carru, nc’era Micu (Frijia) e Fhranciscu e Sarvaturi Mastru Vitu puocu sutta (Frijia) abbivarava li verduri.	Cumpara Giuanni lu Mannugghu Zzappa a spalla Runca e Accetta fhacìa tuttu e a nu momentu pulizzava li gambetta.
Puocu vuoti jia a la chjiazza pecchì vinu igghu nd’havìa era tanta la fhatiga chi a la missa mancu jia.	Don Peppinu Cilibertu cchjiù galanti e signorili prumentìa e cu na parola t’evitavi li trafhili.
Quantu vuoti li perzuni a l’America chjiamati no’ partianu pe’ nu bullu e restavanu affamati.	Cu pacienza e cu mistieri cu bontà de don Peppinu canusciendu a chistu e a chigghu diventavi n’Argentinu.
Ti scrivìa carta ntestata cu nu timbru d’esibira cu na marca già annullata tu potìvi già partira.	Na squatretta e nu cumpassu cu nu stemma appiccicatu a lu sbarcu de la navi tu passavi inosservatu.
Nc’era lu massaru Carru (Calvieri) chi a tarda sira igghu arrivava liberava lu Cavagghu e li fhigghjiuoli spaventava.	Chi cercavanu riparu nta na porta menza aperta pe’ paura de sta bestia sparianu tutti e a la sberta.
Mastru Micu chi pistava (Calvieri) Fhierru russu e chi affilava li Curteggha pe’ lu Puorcu e l’Accietti pe’ putara.	Lu lavoru no’ mancava: nc’era ciucci de’ mperrara, pichi e zzappi d’acconzara e mascaturi de fhorgiara.
Tiresuzza povareggha (Calvieri) chi tessìa de tila e trama pemmu fhacia li cuvierti pe’ cu havìa pemmu s’assema.	Era longa la jiornata mpila e spila la navetta puru quandu jia mu mangia lu fhacìa cu tanta fhretta.
Pe’ la strata principali automezzi no’ passava cu vandera e ferra a manu don Peppinu fhatigava	Testa vascia e concentratu pemmu stagna li fhressuri li coddari mu conzava chi sembrava nu pitturi.
Don Peppinu Peppa Tostu cu li cavuzzi cunduti doppu havira ggià mbiscatu uogghji vari già mpurruti.	Cu dacalitri a li mani cu tantl’uogghjiu chi sculava inchjia curmi li bidoni chi a San Lucidu portava.
Quandu nenta avìa de fhara si cangiava la giacchetta la barretta chiggha nova e a lu passu de vedetta.	Appojiatu a na colonna sicaretta nta li mani sutta l’uocchji da Madonna si gustava li suttani.
Lu rumuri stridulienti chi fhacìanu Pialli e Sierri no’ si scorda fhacilmenti si sentìa de nta li tierri.	Si pistava e si piallava Tavuliegghi e tavuluni si nchjiovava e si ncogghava Ligniceggha cu listuni.
Cca lu mastru principali si chjiamava Argantuoni n’uomu onestu e religiosu no’ mancava a prigessuoni.	E li Puorti e li Fhurniesti appojiati a chigghi mura cu duscipuli a la sberta chi lisciavanu cu cura.
Cu na carta grossa e fina si grattava e s’allisciava fhina a quandu nsuperfici cuomu vitru diventava.	Ed’allora era lu mastru chi, pinniegghu nta li mani coggha e lucidu mentìa e meritava battimani.
La bravura de stu mastru era chiggha mu fha ‘ntarsi nu portuni rifhinitu era n’opera de l’arti.	Tutti quanti li perzuni ggha vicini e a li cuntuorni li sentianu sti rumuri senza sprecu de latuorni.
Nugghu mai si lamentau Pe’ rumuri de na pialla Nta la testa nci sembrava Nu passaggiu de farfalla.	150) Li perzuni eranu tanti ed’ognunu a la sua prica si dunavanu de fhara mu si sarvanu la vita.

Nav view search

Navigazione

Cerca

Ricordandu li Passuoti

I nostri Visitatori

CuringaOnLine