Micu torna d’America

Dettagli: Categoria principale: ROOT; Visite: 505

Micu torna d’America

di Er. Ga.

E’ tantu tiempu chi nci pienzu mi turmenta nu penzieru nu ricordu ha mu cumpienzu no’ nda fhazzu nu misteru.	Nci lu dissi a la mia sposa pemmu vena puru iggha pecchì esta scrupolosa no’ dassava la fhamigghjia.
A l’iniziu desistìvi pua parrandu cu l’amici ca la vita capiscivi non’è sulu sacrifhici.	Sistemai li puocu cuosi salutai tutti l’amici cu ntenzioni assai virtuosi jia mu truovu li radici.
Nta sia uri de volata arrivai all’aeroportu n’attra ura e l’atterrata cu balici e passaportu.	Quandu vitti chiggha scritta Aeroportu de Lamezia terra santa e beneditta mi sembrava ch’era in Svezia.
Nu tassista si mbicina e mi parra n’attra lingua io cu vuci malandrina dissi: portami a Curinga.	Caminandu pe’ la strata osservava cu attenzioni chiggha terra siminata ma no’ nc’era paragoni.
Superati li Serini arrivammi ad’Acconìa cangiau tuttu a sti collini chi io mancu canuscìa.	10) Vitti tanti cuosi nuovi chi penzava ca sbagghjiai ma no’ nc’era cuntrapruovi e accussì io m’appaciai.
Pua nchjianandu po’paisi lu tassista avìa ragiuni a vurzina già mi ntisi nta la gola nu gruppuni.	A la vista do’ paisi canuscìvi a chjiesa matra io mi ntisi curinghisi e cu l’anima appagata.
Quandu vitti la fhuntana e lu chjiuppu do’ Suncurzu pe’ l’autista cosa strana mu si fherma pe nu muorzu.	Na preghiera a la Madonna na vivuta a la fhuntana pua na fhotu a la colonna fhuru i primi toccasana.
L’autista tantu accuortu arrivatu a lu cartellu dissa: duva vua pe mu ti puortu duva dicia stu pannellu?	Portami a la petra chjiana o mi dassi nta lu passu ca na vota chi su gghana certamenta mi rilassu.
No’ nci fhici tantu ncetta de la genta tutta ntuornu domandai duv’è Cuncetta ca d’america io tuornu.	Dissi: sugnu americanu ma su puru curinghisi cca tornai cu l’aropranu mu rivijiu stu paisi.
Quandu fhui ricanusciutu mi chjiamaru “Micariegghu” m’abbrazzaru e stitti mutu comu fhussi fhigghjioliegghu.	20) Mi sporzai mu mi ricuordu li perzuni tutti quanti chigghi cu cui jia d’accordu puru ch’era n’emigranti.
No’ vi dicu chi successa nta lu passu e petrachjiana ca tornava pe’ scommessa na perzuna Mericana.	A d’abbrazzi e de vasati de parienti tutti quanti pua de’ corpu inaspettati mi scoppiaru quattru pianti.
Sini certu tantu stancu de stu viaggiu avventurosu dissa: siembri già n’agrancu ca lu statu tua è penosu.	M’izzu priestu lu matìnu c’ha mu vijiu tuttu quantu cu’ n’impegnu certosinu stu paisi ch’è n’incantu.
Tu domana fhai chi bua t’accumpagna Cicciariegghu mu ti porta duva vua e mu vidi ogni viniegghu.	Vui girati tuttu mparu tutti chisti carreriegghi ca io ntantu vi preparu nu ragù cu fhilatiegghi.
Ha mu vajiu cu dolori mu nci dicu na preghiera a li cari genitori ca no’ vinni cca in crociera.	Fhuru tanti li motìvi ca m’izzai a matinata doppu sazzu chi dormìvi e mi fhici na russata.
Mi pigghjiai la colazioni fhici subitu dui cunti cu bastuni e cu ntenzioni Jia mu truovu li defhunti.	30) Chjianu chjianu chi nchjianava e chi arrivava nta pruscinu cuosi a menta mi tornava e penzai a lu mio distinu.
Pua nchjianandu do’ carvaru mura nterra e puorti apierti tanti casi sdarruparu attri eranu scuvierti.	E cercai mu mi ricuordu pemmu pigghjiu ncunu appuntu mu nci puortu cuomu accordu nu completu riendicuntu.
Arrivatu a rivenzinu guardai a destra e pua a sinistra ma de fronte e ggha vicìnu u cimiteru è mbella vista.	Senza mancu ruvettari na benzina e na caserma cchjiù campetti pe cotrari ch’era miegghjiu, fhu conferma.
Meravigghjia e no’ misteru io restai stramangulatu quandu dintra u cimiteru vitti niettu e ordinatu.	Tra nu piantu e na preghiera na cappella e tanti fhotu ripenzai nta chi maniera fhui commossu e cchjiù devotu.
Era ancora tormentatu pe’ li muorti chi ggha vitti pua nescìvi addoluratu e penzai a chigghi affritti.	M’appojiai a nu murettu respirai chiggh’aria fhina mi guardai lu giardinettu ed’era tuttu vitamina.
No passàu nemmenu lestu lu turmientu e la mistizia pe’ nu piezzu restai mestu e m’appuntai ncuna notizia.	40) E mi dissa cicciariegghu: mona jiamu a Rivenzinu pua passamu e stu viniegghu e Santu Ruoccu è cchjiù vicinu.
Guarda: ccana nc’è la scola e cchjiù arriedi nc’è l’Ospiziu scatta fotu a sti vijiola s’hai mu duni nu giudiziu.	S’hai mu cunti a li maistri pemmu guardi ti cumbena o pemmu scatti e mu rigistri ogni cosa ch’è nu bena.
Certamente va rifhatta chista Casa de Riposu menumala ca nc’è st’attra ca sinnò è scandalosu.	Sembra ch’è nu bastimientu e nc’esta puru lu giardinu nci penzau de tantu tiempu lu Maggiori Peruginu.
De chista strata senza margi cu na machina a nu muorzu senza mancu mu t’accuorgi già ti truovi a lu Suncurzu.	Mi ricuordu tanti guoli e no’ passavi cu na bici cu li ciucci e cu li muli s’arrivava nta Salici.
Mo giramu e pe’ ricrijiu a mu passamu e Santu Ruoccu vuogghjiu propi pemmu vijiu chigghu santu e mu lu tuoccu.	Lu palazzu de la scola ha mu vijiu, chigghu russu chigghu supra a na traccola e si ancora esta de lussu.
Scatta e pigghjia stu portuni sti fhurniesti cu l’entrata de stu randa palazzuni ch’è de tiempu abbandunata.	50) Mi ricuordu curinghisi quandu sutta, a sti catoia Chiotti, Piru ed’ Aloisi insegnavanu la storia.
Quandu puortu sta notizia de sti cuosi abbandunati pienzu ca no’ nc’è giustizia e su certu addolurati.	Nta sta zona mi ricuordu macinini a tutta fhorza cca l’alivu jia a nu sordu era certu na risorza.
Certu c’hajiu d’ammirara lu palazzu e sta viduta cu lu stromboli nta mara sientu l’anima sperduta.	Mona scattu a sti tesori a stu portuni e a stu canciegghu duva nc’era Zimatori (dottore) e nc’era sempre nu ribiegghu.
Ha mu nquatru stu palazzu tutti sti saracineschi ma no’ sacciu chi ha mu fhazzu pemmu vijiu chigghi affreschi.	Chiggh’acciegghi e li perzuni, l’angiliegghi a li suffitta archi, stipa e li barcuni cu na vista beneditta.
Do’ terrazzu vidi u mundu Muntisuoru è nta na manu e si guardi ancora nfundu vidi l’isuli e u vulcanu.	Menumala ch’è pittatu perlomenu fhora fhora, ma de dintra è decoratu o tuttu quantu jiu nmalora?
Prima pemmu ni nda jiamu sutta st’arcu hajiu mu passu ch’esta chigghu chi ricramu e cca nu puocu mi rilassu.	60) Nel frattempu vajiu avanti e la chjiesa fhazzu aprira San Giuseppe cu li santi tutti quanti hai de vidira.
Jiu e trovau donna Ngiuannina cu la chjiavi aprìu la porta appicciau na lampadina nommu pigghjiu ncuna storta.	Pua nesciendu a la sinistra ricordai lu panifhiciu pana misu a na cannistra nda traivi benefhiciu.
Ricordai pe’ nu momentu gente misa npila ndiana pemmu pigghji appuntamentu nc’era sempe na mbattana.	Guardai allora lu riuoggiu dissi: cca lu tiempu vola ed’allora moggiu-moggiu dissi jiamu a na traccola.
Ha mu vijiu la fhuntana ha mu guardu la mia scola ha mu fhazzu a fhotu strana duva armava la tagghjiola.	Chiggha strata n’attra vota chi scindìa de Santu Ruoccu cu Ninnuzzu e Cicciu Votta chi arrivavanu a nu tuoccu.
Pemmu guardu ajiu certu Santu Lia e lu Suncurzu quandu Cicciu de Lobertu arrivava mienzu muortu.	De Pagghjietta ni portava scadi fhatti a la pittara puru igghu nda mangiava nd’avìa tanti, d’abbuttara.
Vistu ca si fhicia tardu no’ ni resta ca volara danci sulu ncunu sguardu pecchì è ura de mangiara.	70) La fhacimu sbrigativa ca già sientu li vudeggha e lu prufhumu chi mi arriva e chigghi santi fhilateggha.
Arrivammi ntornu all’una fhorse era già passata quandu vitti Cuncettina e la tavula acconzata.	Nu ragù de carni e puorcu fhilatiegghi e na brindata cu salami de suppuortu e na bona mbrijiacata.
No’ sapìa cchjiù quantu tiempu ggha assettatu io mangiava m’abbuffai pe’ passatiempu ed’era ancora chi mbuccava.	Lu discurzu jia a lu giustu e si parrava a fisserìa de l’america cu gustu chi sarvezza fhu pe mia.
M’accattai na casa nova Rita ggha trovau maritu La fhamigghjia si rinnova si restava era fhallitu.	Lu lavoru ggha no’ manca e lu dollaru camina la saluti mu t’affranca e pua fhara la strimina.
Si pua hai na profhessioni e sì puru diplomatu no nci su limitazioni sì pe’ sempre sistematu.	Io non’happi sta fhortuna e non’havìa tantu studiatu nonostanti sta sportuna no’ fhui mai nu disperatu.
Certu è ca fhatigai e la fhici nta lu culu notta e jiuornu m’ammazzai lavorai comu nu mulu.	80) Quandu era fhriddiciegghu la mugghjiera mi dicìa: duva jiu lu Micariegghu chigghu chi io canuscìa.
Accussina l’indomana mi levava a matinata puru cu la tramuntana la jiornata era addubbata.	Jiuornu prima e jiuornu doppu Chjianu chjianu m’accucchjai tanti sordi e cu’ malloppu io la casa m’accattai.
Cu l’amici e paisani ggha trovati e frequentati nda pigghjiamu de tisani doppu pranzi e mbrijiacati.	Si parrava certi vuoti mu tornamu a lu paisi mu restamu curinguoti cca no’ nc’esta nu tornisi.
Si parrava de Terrata de la chjiesa e Santu Lìa de lu passu e a Mmaculata certi vuoti cu ironìa.	De la villa, de la chjiazza Ndolerata e Sutta Via Tra de igghi chi s’abbrazza ammienzu a tanta nostalgìa.
Io pe’ chistu lu matinu ricominciu a visitara ogni vicu, ogni scalinu c’hajiu de fotografara.	Mu nci puortu resocuntu a l’amici americani e a tutti mu nci cuntu comu stanu i paisani.
Li vicini ggha presenti chi lu vittaru arrivara lu trovaru cu l’intenti ch’era ancora chi mangiava.	90) E si misaru a parrara de li cuosi già passati de l’amici e ricordara chigghi a vita trapassati.
Quandu pana cu dui alivi cu dui sardi già salati si scarava de abusivi chi volìanu lapidati.	Na parola n’attra tira, e pua n’attru amicu vena ed’allora arriva sira e de pranzu sini a cena.
E continua a ricivira cangia amicu ed’argomenti pecchì ognunu vo’ sapira cuomu stanu li parienti.	Cuomu vajia la saluti, cuomu vajia lu lavoru e si chigghi risoluti lu trovaru lu tesoru.
A la fhini da’ jiornata fhui assalitu da’ stanchezza cu la mente mia ncionata mi sientìa na schifhezza.	Su comunque soddisfattu da’ jiornata già passata ma mi sientu già strafhattu e mo’ nci vò na riposata.
Na dormuta e pua na scossa ruttu libaru e russata mu distiendu sti quattr’ossa sì, nci vo’ n’addormentata.	Ca domana già m’aspetta na jiornata tutta chjina c’ha mu vijiu a Elisabetta ch’esta l’attra mia cugina.
Approfhittu e cu sta scusa partu de lu chjianalari ch’esta certu doverusa e mu salutu a li cumpari.	100) Su curiusu mu rivijiu la colonia e pua lu campu no’ lu fhazzu pe’ castijiu ha mu fhilmu tuttu quantu.
Chi fù bella sta nottata riposai cuomu no’ mai mo’ la varva vo’ rasata ca m’aspetta nu via vai.	A li nove è troppu priestu pemmu vai pemmu la truovi pua nci truovi nu pretiestu e nci puorti buoninuovi.
Tantu iggha è già abbertuta c’arrivasti e stai cca mia a chist’ura è rinduciuta ed’è ggha chi aspetta a tia.	Fhai cu calma e senza fhretta ca si bua nu cumpagniegghu cuomu nescia da’ tuoaletta io ti mandu a cicciariegghu.
Fhù na bella caminata de lu passu o chjianalari ma pe’ strata a la nchjianata nui ncuntrammi li cumpari.	Cuomu stai e cuomu mai pemmu tuorni a stu paisi no’ dicisti duva vai ti nda jisti senza abbisi.
Cuomu stanu l’attri amici li fhigghjiuoli e la cosorte sunu tutti cchjiù fhelici, happaru na bona sorte?	A lu momentu no’ nc’è mala nugghu soffra de doluri no’ dormimu suttascala e ringrazziamu lu Signuri.
Io comunque vinni sulu mu ritruovu st’abitanti ca de tiempu l’havìa ngula de notara cambiamenti .	110) Strati nuovi, rotatori lampadini a no’ finira tanti casi cu decori chi mi fhiciaru stupira.
Mi ricuordu chistu campu cu li vacchi pascolara mona mbeci no’ nc’è scampu po’ nu stadiu diventara.	Mona nchjianu a la Colonia pe’ mu vijiu s’è na villa chiggha chi fhu babilonia e duva fhiciaru i Balilla.
Io ti dassu e ti salutu ca ncampagna su direttu ma nci puorti u benvenutu a tutti quanti cu rispettu.	Nchjianu, guardu e su cumpusu de li casi tuttu ntuornu chistu postu fhu lucrusu diventava nu latuornu.
De lu spaziu chi servìa pe li Giuvini Balilla no’ restau mancu la vìa è na zona ormai tranquilla.	Arrivau lu fhorestieru dissi, e ntisi la bussata mi levai cu lu pensieru e t’aspettava a matinata.
Quantu tiempu chi mancasti era ancora giuvineggha mo’ tornasti e mi trovasti chi su già na vecchjiareggha.	L’importanti mu stai bona cu saluti e cuntentizza e no’ fhara la testona ch’esta chista la ricchizza.
Siembri vì, nu capitanu cu cappiegghu e cu bastuni sì nu veru americanu cu cammisa e pantaluni.	120) Arrivasti volentieri pe mu pruovi sti gambuni li gugghjivi propri ieri tutti st’ossa e sti gruppuni.
Ti nda inchjiu na cisteggha E ti li mangi quandu vua nci lu dici a Cuncetteggha ca chist’attra esta la sua.	Ti preparu na vivanda ed’intantu tu mi cunti cuomu stai de chiggha banda ca m’assiettu fhaccimprunti.
La mugghjiera si spagnava havìa pagura de lu volu si penzava ca scoppiava cuomu fhussa de tritolu.	La fhigghjiola si spusau happa puru già na fhigghjia su cuntientu ca penzau mu sù nonnu de fhamigghjia.
Ca lu Patra è n’Italianu li sua nonni Calabrisi sta niputi americana vena randa a stu paisi.	Mo’ ti fhazzu mu la vidi tiegnu na fotografìa mi la puortu si nci cridi ca io pienzu ch’è cu mia.
Uocchi chjiari e na vuccuzza chi assimigghjia ed’è precisa a la nanna Sabegghuzza vera e santa calabrisa.	Mu hava sempe bona sorta mu ha bontà e gentilezza pemmu criscia sana e fhorta e mu viva nta ricchezza.
Mu ha li cuosi cchjiù virtuosi mu accumpagna la saluti ca pua tutti l’attri cuosi sunu certu benvenuti.	130) Li tua fhigghji duva sunu? su già randi , su crisciuti cca cu tia no’ nc’è nessunu su studenti o su spusati?
Veramenta è nu castijiu ma su tutti laureati ma purtroppu no’ li vijiu ca a lu nordu su emigrati.	Cca nui simu disperati no’ si trova cchjiù lavoru si no’ sù raccumandati ha mu si nda vanu fhora.
Hanu casa, hanu fhatiga no’ nc’è nugghu cca cu mia ogni muorzu nc’è na mbriga ca vorìanu puru a mìa.	No’ pe’ fhara na polemica cca li cuosi no’ cangiaru tu partisti pe’ l’america e li fhigghji mia emigraru.
Mona scindu pe’ la chjiazza tantu pua nui ni vidimu ca sì tu la ciginazza e passu mu ni salutamu.	Mo’ chi sacciu cuomu stai e chi ti vitti de’ perzuna su cuntenta ca tu vai ggha Cuncetta ch’èsta l’una.
Chista strata è nu raccordu chi ti porta a la ziafhama nta stu postu mi ricuordu nc’era propi la fhuntana.	Nd’havìa crita a sti puntuni e ranuocchji a no’ finira cu la Scola e lu Comuni no’ potìa no progredira.
A sta curva suprastrata cu la vista chi offra e offrìa tutti fhanu na fhermata ma pe’ na fotografìa.	140) Chistu bellu panorama ch’è de cchjiù lu canusciutu puru io puortu la fhama ca pe’ mia è lu benvenutu.
Mo’ chi simu de scinduta io ti vijiu sudatizzu ma, fhacimu na viduta e nu giru nta lu Spizzu.	Ha mu vijiu lu mulinu chi cu l’acqua macinava ha mu guardu propi a finu duva scarpi si conzava.
Ti lu dicu ca de certu ha mu sapiti vui cotrari cca no’ nc’era nu desertu era chjinu de scarpari.	Ca li strati de’ lu spizzu no’ su’ sulu principali nc’esta chista pe’ servizzu mu ti porta a Triccannali.
Mo’ tornamu a Petrachjiana ca Cuncetta cucinàu ca lu stomacu ricrama e ncuna cosa preparàu.	Già sti busti sunu chjini e lu sicundu già l’avìmu sunu tutti vitamini ni mangiamu cu lu vinu.
Lu profhumu si spandìa invadìa ogni carrera ojia mangia cca cu mìa e no’ guardara a buttunera.	Si m’assiettu a sta buffetta quandu arriva pemmu partu ha mu puortu la giacchetta mu m’allarga a ncunu sartu.
Quantu è bona chista pasta e cchjiù ancora stu suffrittu nda fhacisti na catasta ma esta santu e benedittu.	150) Spizzichijia cu st’alivi cu stu vinu e sti sozzizza sunu tutti digestivi chi ti caccianu a stanchizza.
Miegghjiu non’esagerara nommu arriva malanova pecchì hajiu e rispettara qu’è chi vena mu mi trova.	Esta certu ed’è sicùru mo’ chi sanu ca si ccana pomeriggiu è nu langùru e non’aspettanu domana.
Ed’infatti già bussaru cuomu fhussaru chjiamati quattru amici nc’i arrivaru pemmu sannu e l’emigrati.	Nta curinga è nu desertu e no’ pe fara meravigghjia nta l’america nc’è certu n’emigratu pe’ famigghjia.
Cuomu stanu li summastri chi successa a chiggh’amici soprattuttu chi portasti nta sta grossa tua balici.	Io vi puortu li saluti de l’amici e dei parienti sunu tutti sbalorduti su felici e su cuntienti.
Ma lu sai ca tanti vuoti ni ncuntramu a lu mercatu cu l’amici curinguoti e ni pigghjiamu nu gelatu?	Ti ricuordi piccirigghji? e pua l’attru rispundìa chi jiocavumu a nucigghji a lu chjianu e Santu Lia?
Micu, Peppa Carru e Ntuoni quattru amici a la pignara senza fhara cirimuoni jienu a fhicu pe’ mangiara.	160) E li guierri de rioni? Passu cuntra lu Carvaru gruppi senza distinzioni ni ruppiemu lu panaru.
No’ fhaciamu marciandietru Nta la gara pe’ volara quandu jiemu a Santu Pietru cu ciolè pe’ passijiara.	Cu la fhjiunda nta terrata nd’ammazzavumu licierti pe’ li giuvini è cazzata certamente su cchjiù sbierti.
Ti ricuordi chiggha sira chi fhacìamu serenata chi mugghjieritta s’adìra e chi ni fhicia na vagnata?	E pe’ nui jiu certu bona ca a l’amici de la chiazza nta lu miegghjiu a signorona nci jiettau la pisciazza.
E pua nta chigghu cuntraluci na mbrellata nta la testa pua pigghjiau nu fhampaluci nta lu mienzu de la fhesta.	E accussìna discurrivi e parravi fhina a sira ti guardavi e t’accorgivi ch’era ura de partira.
Ggha nui simu l’emigrati ma cu onori e profhessioni simu tutti sistemati cu na bella posizioni.	Tutti chigghji chi canusciu e chi frequentu volentieri stati certi nugghu è musciu no’ nc’è nugghu vacanzieri.
No’ nci sunu vacabundi perlomenu no’ nda sacciu hanu tutti taschi fhuondi no’ nc’è nugghu poveracciu.	170) Ma provati chistu vinu assaggiati sti gambuni ch’esta tuttu genuinu e ca no’ siti tamarruni.
Ncumpagnìa si viva miegghjiu soprattuttu si su amici inchjia chistu biccheriegghu mu brindamu cchjiù felici.	Vui domana fhatigati ripigghjiati lu lavoru mo’ chi tutti vi nda jiati certu duormu e mi ristoru.
Ni nda jiamu ch’esta tardu tantu priestu ni vidimu ni ncuntramu a lu bigliardu e na birra ni vivimu.	Ni vidimu e bonanotta. Ti lu dissi ch’è nu vizzu ca sta genta esta bigotta e ca nci manca lu jiudizzu?
Ca na visita chi fanu no’ capiscianu ca dura puru ca no’ sìni stranu massimu tri quarti d’ura?	Non’è chista na gran pena chi mi duna cchjiù fastidu è ca pranzu cu la cena ogni jiuornu è nu scumpidu.
Tu lu sai ca no’ m’importa ca ricivi a tutti quanti esta aperta chista porta puru a chigghji cchjiù irritanti.	Io domana su mbitatu vajiu e mangiu ggha Bettina ma non’hajiu mai giratu chiggha parti da Gabina.
Mo mi curcu nta lu liettu ca domana sugnu ngiru speru pemmu mi riciettu e mu duormu cuomu agghjiru.	180) Jiendu avanti cu rispettu mangi, vivi e ti divierti e la sira nta lu liettu ti rimbuocchi li cuvierti.
Certu ca no’ po’ durara chista vita ch’è nu spassu no’ nda puozzu cchjiù abbusara e mu mangiu pemmu ngrassu.	Nta lu passu vitti a tutti lu carvaru lu girai vitti chigghi casi rutti e tanti amici cca ncuntrai.
Mona passu da’ rugheggha quattru passi sutta a via pemmu vijiu a villiceggha e pe’ na fotografìa.	Stu riuni no’ cangiau cca nc’è sempre poca gente si tu ncuntri na perzuna tuttu tì tornanu a mente.
Li ribiegghi e cu gridava tanti gienti avanti a porta cui cusìa cu ricamava cu mpurnava ncuna torta.	Nc’era puru cu stacìa a la fhurnesta ggha affacciata cu la scusa ca stendìa gghà fhacìa l’annammurata.
Eranu diavulerìa chigghi gradi e chigghi perna de sta villa a i tiempi mia ch’era propi na caserma.	E la guardia chi passava(Russo) chi osservava ogni puntuni li fhigghjiuoli spaventava chigghi ch’eranu spaccuni
T’apparìa nta nu momentu propi quandu si jiocava ti pigghjiava a tradimentu e lu palloni ti spaccava.	190) E li chjianti dei fhifoni chi non’eranu d’accordu pemmu spacca lu palloni ca no’ nc’era cchjiù nu sordu.
No’ bastava chistu affrontu e abbisava i genitori e ogni patra era già prontu ed’abbuscavi cu doluri.	Mo’ nta villa ntisi dira ca d’estati s’organizza e tanti jiochi puoi vidira mu si caccianu li spizza.
Nta la chiesa trasu chjianu pemmu vijiu a Santu Ndria San Michieli e San Mbestianu e lu Cora de Maria.	Ha mu fhazzu ncuna fotu de l’ingressu pe’ l’Attaru de cristianu ch’è devotu a stu bellu Acquasantaru.
Mo’ chi niesciu nta la Villa ha mu pierdu nu momentu pemmu liejiu la postilla e li nomi a u Monumentu.	Mi dispiacia ca ha mu vajiu nta lu chjianu e menzalora sinnò ccana havìa mu stajiu pe’ n’attr’ura stacìa ancora.
Ha mu passu de ggha Lucciu pemmu arrivu a San Franciscu pua non’hajiu mu m’ammucciu ca m’assiettu e mi rifhriscu.	Cu l’amici ni ncuntrammi ni fhermammi pe’ parrara cu na birra n’assettammi ripigghjiammi a cuntara.
Ti ricuordi quantu fhumu nta stu bar si cundensava e a li carti pe’ consumu tanta genta si mbrigava?	200) Attri tiempi, attri perzuni attri modi de campara mo’ si sentanu canzuni non’è cchjiù nu sparagnara.
Mo’ vi dassu e vi salutu c’ha mu tuornu ggha Cuncetta ca lu tiempu è già scadutu e d’è certu ca m’aspetta.	Ha mu pienzu chi ha mu fhazzu e mu cominciu a salutara mo’ pe’ chistu io v’abbrazzu ca ggha ajiu de tornara.
Ojia mangi minestroni ca sinnò ti sienti mala pe’ sicundu polpettoni pua ti vivi nu Marzala.	Stu sozzizzu ti l’arrustu pe’ domana a menzijiornu ha mu sienti chigghu gustu e pana fhriscu de lu fhurnu
Quandu tuorni a casa tua ’ncumpagnia d’americani ha mu dici, si lu vua, ca ti liccasti puru i mani.	Sta tranquilla nci lu dicu c’ha mu puortu li saluti com’è certu ca su Micu e li dassu ggha atturruti.
Ha mu vidanu pe’ forza capicoggha e Suppressati chigghi chi ajiu nta la borza e nta sti jiuorni già fhilmati.	Li gambuni, li sozzizza chiggha limba e fhilatiegghi ha mu fhazzu mu nci rizza lu piluorciu e li piliegghi.
Ha mu puortu resucontu de li cuosi chi filmai de li fotu do’ tramontu pe’ cuì io gghà m’impegnai.	210) Mu nci cuntu quantu vitti ca nci fhu nu fhinimundu no’ nci su cchjiù derelitti e ch’esta tuttu n’attru mundu.
Si nci pienzu già mi vena de ciangira a tuttu spianu e chigghu jiuornu la gran pena ca mi fhici americanu.	Io domana sai chi fazzu dassu a tutti li saluti cu nu vasu e cu n’abbrazzu e li dassu nzalinuti.
No’ pua fhara tu sta cosa ch’è na cosa de vigliacchi puru ch’esta dolorosa li saluti, e ti distacchi.	Chi ti custa pua n’abbrazzu na stringiuta de li mani ca non’esta nu trapazzu ed’è na cosa de cristiani.
Cerca pemmu sini umanu pecchì unu sai chi dissa? ti lu dicu in’Italianu nomu passi pua pe fissa.	216) In un addio e per amore il pianto riga il volto di chi parte ma anche quello di chi resta. E ti dissi tuttu.

Nav view search

Navigazione

Cerca

Micu torna d’America

I nostri Visitatori

CuringaOnLine