Cu St'andazzu no' ni sarva mancu u Patreternu

Cu St’andazzu No’ ni sarva mancu u Patreternu.

di: Er. Ga.

1)      Gesù Cristu chi gridava
Nci cuntava a lu Signuri
Ca è de tiempu chi penzava
Pemmu caccia sti storturi.
2)      Tu fhacisti chistu mundu
Nci criasti acqua e luci
Lu fhacisti tuttu tundu
Pe mia fhiciaru la Cruci.
L’acconzasti buoni buoni
Nci criasti l’animali
E senza fhara cirimuoni
Nci fhacisti attri rigali.
Uomu e fimmina fhacisti
Pemmu stannu nsanta paci
Nommu stannu sempre tristi
Li mentisti nta’ bambaci.
Nci dicisti sutta vuci
“Cca staciti senza veli
Nci su tanti cuosi duci
No’ toccati chigghi meli”.
Pua nu jiuornu fhu fatali
Quandu Eva nci porgìu
Chigghu pumu e fu letali
Ca la paci si perdìu.
Nci gridasti cu gran vuci
Ti ncazzasti pe’ st’offesa
Nci volìa nu fhampaluci
Fhu pe’ igghi na sorpresa.
Ed’ognunu si coprìa
Combogghjiava li virguogni
Nci parìa na fhisserìa
E si trovaru nta li fhogni.
Ed’ognunu fhatigava
Nc’era sempre nu chiffara
Si stancava e si sudava
Pe’ potìra pua mangiara.
10) Si movìanu a la rinfhusa
Senza reguli e confini
E fù chista chiggha scusa
Mu li riendi cittadini.
Nda chjiamasti unu ndisparti
E nci dunasti li strumenti
Supa na petra e no’ su carti
Scrivisti decia Comandamenti.
Nci scrivisti nomu ammazza
Pemmu onora patra e mamma
Nomu arrobba o mu si ncazza
E nomu cria ncunu dramma.
Nommu avissa mu nci piacia
Donna e arrobba ch’è de attri
Nta de igghu pemmu stacia
Chisti eranu li patti.
Ti mentisti a lu sicuru
Ca sì Tu l’Onnipotenti
Mu nci penzanu nfuturu
E mu ti su’ ricanuscenti.
Pua ognunu si nda jiu
Pigghjiau strata pe’ lu mundu
S’avverau lu tua desìu
Nugghu fha lu vacabundu.
Ca la fhami sai chi facia
No’ ti fhà chjiù ragionara
Ed’è chistu chi ti piacia
E li dassasti fhatigara.
Quandu tuttu jia tranquillu
E lu mundu progredìu
Ncunu ch’era cchjiù arzillu
Certu no’ si ripentìu.
Fhu a stu puntu chi penzasti
E nci dicisti a la Maria
Senza fhara attri mpasti
Pemmu parturiscia a mia.
Mi mandasti nta stu mundu
Pemmu puortu paci e bena
Pemmu vijiu s’è rotundu
E si la gente è cchjiù serena
20) Mi dassasti fhara tuttu
Soprattuttu predicara
Fhina a quandu fhui distruttu
Mentre Tu stavi a guardara.
T’assettasti a sta poltrona
Guardi ngiru nsonnigghjiatu
Mentre ngiru li ddimona
Ogni Statu ha snaturatu.
Quandu mi mandasti nterra
No’ nd’havìa de chisti  mbista
Nta stu mundu nc’era guerra
Io, fhacìa lu moralista.
Ma avogghjia ca parrava
E nci cuntava cuosi buoni
Mancu quandu predicava
Li cangiava sti ddimuoni.
Pe’ li strati si gridava
S’accusava chistu e chigghu
Quandu io mi mbicinava
Nci dunava nu cunzigghjiu.
Ncunu vinna arriedi a mia
Dassau puru la fhatìga
Mi tenìenu  cumpagnìa
Tra de chisti mai na mbriga.
Luca e Giuanni arriedi a Pietru
Attri nove ancora appriessu
Jiemu ngiru e metru a metru
Priedicavamu progressu.
Pua nu jiuornu mu li sfamu
L’abbuttai  de pana e pisci
Senza fhara nu ricramu
Ni nda jimmi lisci lisci.
E la gente ni seguìa
Pe’ li strati e li paisi
Ca Io era lu Messìa
Tutti eranu arrimisi.
Pua la vuci si spargìu
E d’ognunu m’aspettava
Mu accuntientu ogni desìu
D’ogni angulu chjiamava.
30) E lu zzuoppu caminava
Lu cecatu rividìa
E la gente m’acclamava
Chistu esta lu Messìa.
Lu governu sospettusu
Vistu chigghu chi fhacìa
Mi dicìanu ch’è n’abbusu
E ca non’era lu Messìa.
M’acchjiapparu cu la fhorza
Mi ligaru a nu tripiedi
A nu lignu senza scorsa
Mi nchjiovaru mani e piedi.
Nc’era ncunu chi ciangìa
Ncunu chi si disperava
Senza nuggha garanzìa
Nta na grutta mi mpossava.
Cuomu tu m’havivi scrittu
Pe’ tri jiuorni stitti gghana
E lu mundu fhù nterdittu
Ca no’ mi trovaru cchjiuna.
Risorgivi de la morta
Ma no’ vinni dduva a Ttìa
Pemmu vijiu de chi sorta
Ha mu fhacìmu pulizzia.
È de tandu chi su ngiru
Chi mi studiu chistu mundu
Chi lu guardu e lu rimiru
Succedìu nu fhinimundu.
Si mbrigavanu pe’ tierri,
pe’ possessu de regioni
si vidìanu tanti sghierri
malagente cu latroni.
Cu na bumba nd’ammazzaru
De migghjiara de perzuni
Puru cu servìa l’attaru
S’arrendìu a lu patruni.
S’ammazzaru tanti Ebrei
De cristiani lu sterminiu
Diventaru fharisei
Mu conquistanu dominiu.
40) Mi sembrava troppu stranu
Fhattu de sti cervelloni
Mi fhermai a lu Vaticanu
pemmu studiu a situazioni.
Tantu io no’ pagu nenta
Stara cu sti dirigenti
Ca su Ddio onnipotenta
E hajiu tanti appartamenti.
Sta città chi esta eterna
Pe’ lu mundu fhu d’esempiu
Pietru dissa ca è materna
Io la truovu ch’è nu scempiu.
Genta sempre nmovimentu
Chi si sposta cu la fhretta
No’ si fherma nu momentu
Mancu pe’ na sicaretta.
Lu rumuri ti sovrasta
Pe la strata ha mu t’arrassi
Diventau accussì vasta
Tutta chjina de gradassi.
Mi ricuordu chigghu jiuornu
Quandu a peda e Betlemme
Ni partimmi e senza scuornu
Arrivammi a Jerusalemme.
Senza scarpi, senza bici
Senza strati già asfaltati
Chigghi chi ierumu cchjiù amici
Tutti ierumu strosciati.
Quandu Pietru misa peda
Nta stu luogu cunsacratu
No’ penzava ch’era preda
Ca m’havìa rappresentatu.
Ammazzavanu cristiani
Cuomu fhussaru gagghjini
Tutti sette li sovrani
Fhuru acerremi assassini.
Pua li guierri si spandianu
Tra sovrani scanusciuti
Puru nta lu Vaticanu
Si sentìanu mbestialuti.
50) Quantu seculi passaru
Nta l’attesa de la paci
Quantu ebrei chi massacraru
Arrustuti nta fhurnaci.
Cu cercava lu comandu
Lu fhacìa cu bumbi nmanu
Ma la genta no’ s’arrenda
Pe’  nu mundu chhjiù cristianu.
Nc’è cu prega e cu m’implora
Mu si fhina stu massacru
Puru cu hava malucora
E s’ammuccia nta lu sacru.
Pemmu sunu cchjiù criduti
E mu gridanu a gran vuci
Proponiru prevenuti
nu  gran Stemma cu la cruci.
Tutti chigghji chi dicìanu
Ch’era io lu Redentori
Chigghu ch’era nu cristianu
Perza tutti li valori.
Ed’allora cu comanda
Cu na corte tutta arriedi
Si compona la sua banda
E no’ si trovanu rimedi.
E si mangia all’impazzata
Arrobbandu all’ammucciuni
Na mazzetta programmata
Fhatta e tanti patuluni
Nta l’Italia per’esempiu
Nc’esta genta chi guadagna
Chi de sordi fha nu scempiu
E nci para na cuccagna.
Nci su’ attri chi de sordi
No’ nda vida mancu l’ombra
Hanu sulu li ricordi              
No’ si sonnanu sti ngombri.
Non’è chistu tantu gravi
Quantu chigghu chi ti cuntu
Si fhormaru tanti bravi
Mo’ ti dugnu rendicuntu.
60) Cu  na  scorta  sempre  appriessu
Chi proteggia la perzuna
No’ subiscia nu prociessu
Puru ch’esta na latruna.
E la casa no’ si trova
Lu lavoru ancora piejiu
E’ na vera malanova
Non’è certu nu gran priejiu.
E non’esta sulu Roma
S’è Milanu o s’è Torinu
S’esta Napuli o a d’Ancona
Nc’esta sempre nu Patrinu.
E’ pe’ chistu chi t’imploru
Mu cangiamu vinna l’ura
Mu nci namu nu ristoru
A cui viva sta sciagura.
Ed’allora ti proponu
Nommu fhai animi nuovi
Ma mu cangi sulu donu
Pe’ li latri, malanuovi.
Cu nescìu nta lu lavoru
E cui happa tanti sordi
Pemmu perda lu decoru
E mu cada ndisaccordi.
Nommu hannu cchjiù na casa
Nommu trovanu lavoru
Nommu nc’è cu dicia trasa
E cu nci duna nu ristoru.
Tutti chigghi milanesi
Propi chiggji cchjiù precisi
Veneziani e Torinesi
Pemmu sunu Calabrisi.
Mentre mbeci li terroni
Sia de Reggiu o Cosentini
Pemmu sunu polentoni
E mu diventanu Trentini.
Si nu trenu ha pemmu  pigghjia
S’ha mu studia o mu lavora
Pemmu dassa la  fhamigghjia
E mu mora e crepacora.
70) Attualmente a stu paisi
Sunu sulu l’antenati
Chi nci paganu li spisi
Mu si fhanu ndottrinati.
Nc’è cu emigra, nc’è cu parta
Cu speranza pemmu trova
Ncuna porta menza aperta
Mu conducia vita nova.
No’ nc’è cchjiù nu misi sulu
Chi na tassa no’ nci arriva
Nci la misaru  ‘nto u culu
Esta propi refhurtiva.
Ma lu piejiu non’è chistu
Ca la tassa va pagata
Ma nc’è sempre n’anticristu
Cuomu arriva, è già arrobbata.
Ed’allora e sti perzuni
Ha mu pienzi chi hai mu fhai
Ha mu cangia la canzuni
E mu li mienti nta li guai.
Cu n’artrosi nta li mani
Na trombosi nta la testa
Ca no’ su perzuni umani
Chista, è genta disonesta.
Io lu vijiu, su d’accordu
No’ nc’è unu chi nci perda
No’ si tratta de nu sordu
Ca manijianu la mmerda.
Tuna guardi e ti nda fhutti
Nci fhai fhara chistu e chigghu
A tutti chisti fharabutti
No’ nci tuorci nu capigghu.
E la chjiesa và nmalora
Nc’è cu fhutta e s’arricchiscia
Cui trovau ‘na minnalora
E la passa liscia e mbriscia.
Io vorìa mu sì d’accordu
Mu cangiamu chist’andazzu
nci dassamu nu ricordu
nci ammuscìamu ncunu vrazzo.
80) No’ nc’è sordu chi nci basta
No’ nc’è cchjiù nu parmu e niettu
Nda vorìanu na catasta
Mu si inchjianu u serviettu.
Ma no’ su sulu li sordi
Chi li renda cannaruti
Ca de fhimmini su ngordi
Certi vuoti . . . travestuti.
E’ non’è la lobba scura
De nu prieviti o prelatu
Chi ti prega e chi t’adùra
E chi resta mmaculatu.
Menumala ca nc’è Cicciu
Chi li scova sti latroni
Chi ti delega stu mpicciu
E si li caccia de’ coglioni.
Puru nta lu Vaticanu
Nci su tanti fhorchettoni
Trovau nu bellu cappellanu
Chi lu chjiamanu Bertoni.
Nc’esta n’attru monsignori
Chi arrivatu da’ Polonia
Cu’  l’amicu fha fhurori
E fa sempre babilonia.
Pua l’Abati de Cassinu
Sempe ngiru a fara fhesta
Nci scopriru l’altarinu
De la vita disonesta.
Ma nci fhuru attri latroni
Chi arrobbaru attri miliardi
Nta li banchi i cervelloni
No’ nda fhiciaru riguardi.
Tra lu Mose, l’Alitalia
E l’Expò portatu a fhini
Rovinaru chist’Italia
Sa’ mangiaru sti mastini.
E si chistu esta l’esempiu
Chi a lu mundu nci dunamu
Aspettamuni cchjiù scempiu
E pe’ chistu ha mu penzamu.
90) No’ ti dicu tagghjia tiesti
O mu spargi tantu sangu
Ma a chisti disonesti
Abbanduna nta lu fhangu.
Mu marciscia chista gente
Nta la mmerda mu si trova
Mu nci pigghjia n’accidente
E mu nci vena malanova.
Ma lu sacciu ca si buonu
Comprensivu e tolleranti
No’ lu sienti stu fhrastuonu
Stai sedutu e sì distanti.
Pua ti lagni ca la gente
No’ ti prega e no’ t’adora.
Ma sì tu, chi sini assente
E no’ guardi a sta dimora.
Puru chigghi a nui fedeli
Si nda stanu chjiusi nchjiesa
Senza fhara lamenteli
No’ si rescia nta st’impresa.
E s’ammazza all’impazzata
E s’arrobba a dismisura
E la gente esta ncazzata
Ca non’ha vita fhutura.
Io li sientu sti lagnanzi
E sti preghjieri chi mi fhannu
Ca ancora hannu speranzi
Mu distruggianu st’ingannu.
E’ pe’ chistu chi ti dicu
Chi ti priegu a squarciagola
Si no bua ca stu nimicu
Nci la stringia e cchjiù la gola.
Ccà lu buonu già scarzijia
De bontà no’ si nda parra
Cchjiù si stringia la currijia
Cchjiù la genta è cchjiù tamarra.
Mo’ chi arriva l’annu nuovu
Mo chi Su de compleannu
Si lu Vua io nci ripruovu
Mu nci cacciu ncunu dannu.
100) Ma lu gruossu de stu dannu
Li rovini de stu mundu
O Li cacci de’ st’affannu
O arriva u fhinimundu.
Ma chi esta stu ribiegghu
Sti gridati de cafhoni
Ma lu vidi, è vecchjiariegghu
Nonostanti è capelloni.
Ma duv’ieri, duva jisti
T’ammucciasti puru tuna
T’associasti a i socialisti
O si ancora na Baruna?
Ma lu sai cu sugnu io
E pecchì ngiru no’ mi vidi
Sugnu sempe ccà cu Ddio
E d’è inutili ca gridi.
Pua li cuosi de cui parri
Tierri, armi, ranu e sordi
Sunu cuosi de tamarri
Pe’ li gienti chi su ngordi.
E’ lu Spiritu mportanti
Ed’è a chistu chi ha mu guardu
No’ sti pòvari migranti
Mu li trattu cu riguardu.
Nonostanti tuttu chistu
Nui fhacimu riunioni
Riguardamu lu rigistru
Segnalandu sti latroni.
Io na cosa a capiscìvi
Fhicia tuttu nta la fhretta
Fhicia migghji diversivi
Certi, su na barzelletta.
Sette jiuorni nci bastaru
Pemmu cria stu mundu stranu
Ha mu menta nu riparu
Puru nta lu Vaticanu.
Pemmu fhinanu sti guierri
Pemmu cessa sta violenza
Li conquisti de sti tierri
E senza nuggha pestilenza.
110) Pemmu spunta certi lingui
La Politica ha mu caccia
Ca su tutti malilingui
Nci lu lieji nta la fhaccia.
Si cacciava li confini
E li culuri de la peggha
Si sentienu cchjiù vicini
Era cuomu na rugheggha.
Puru tu ricordancillu
Ca chist’uomu ch’igghu fhicia
No’ lu fha stara tranquillu
C’hava mu lu benedicia.
Mu nci caccia st’armi a manu
Sti pistuoli, sti curteggha
Ca no’ portanu luntanu
E no’ sarvanu la peggha.
Ca l’amuri nta stu mundu
Sta cangiandu puru fhorma
Lu dassau nu vacabundu
E sta jiendu fhora norma.
Uomu e uomu stannu assema
E la fhimmina vò n’attra
Sunu chisti nu problema
La fhamigghjia esta n’attra.
Li fhigghjiuoli, puru chisti
Mu li fhai nc’è la ricetta
 Nci su li profhessionisti
Chi li fhanu nta provetta.
Senza Patra e senza Mamma
No’ su fatti cu l’amuri
Quandu criscianu è nu dramma
Senza fhrati e ne’ soluri.
Si tu sì cu mia d’accordu
Non’appena ni ncuntramu
Si no’ vua mu fhai l’ingordu
Mu cangiamu ha mu penzamu.
Si Ddio esta ndisaccordu
In minoranza lu mentìmu
Tantu nui simu d’accordu
E sapìmu chi facìmu.
120) Anzi sai chi proponimu
Mu fhacìmu na gran festa
Tutti Trì mu diventamu
Nu Ddio sulu, e cu na testa.
Ca s’è vera la Madonna
Gesù Cristu e tutti i Santi
Nci vò sulu na colonna
Pemmu guida tutti quanti.
Ed’allora nci dicìmu
Guarda Ddio a chistu mundu
Pecchì nui no’ ncià fhacìmu
Lu quatratu m’esta tundu.
Io n’elencu già lu fhici
N’attru lu fhacìmu assema
Doppu vai e nci lu dici
Nommu crea ncunu problema.
L’essenziali già lu scrissi
L’elencai nta stu quadernu
Ncuna cosa nci la dissi
A lu nuostru Patreternu.
Ha mu caccia sti confini
Chisti punti cardinali
Ca su chisti li rovini
E sunu errori madornali
Ha mu scegghjia nu culuri
Chjiaru, scuru o coloratu
Nommu fhacia sfumaturi
Mu esta bellu delineatu.
Ha mu cunta li perzuni
Chi hanu tuttu nu culuri
Cu pinniegghu e cu sapuni
Ha mu fhacia lu tinturi.
Senza nugghu portavuci
Ha mu pigghjia li misuri
Pua si sciegghjia Testa o Cruci
E nci associa lu culuri
S’è pe’ tìa no’ nc’è problema
Pecchì nugghu mai ti vida
Io su jiancu e su l’emblema
E’ nu culuri chi ravviva.
130) Pua li fhacia belli e sani
Buoni e d’induli gentili
Nommu sunu cchjiù villani
E d’aspettu signorili.
Non’è bellu s’è dui metri
E nemmancu s’esta unu
Nommu sunu cuomu scheletri
O mu ha forma de nu prunu.
Cu na panza bella liscia
Piedi e mani nta la norma
Cu na testa pemmu agiscia
Mu lavora e no’ mu dorma.
Nommu ha ricchji d’elefanti
O lu nasu e fhormichieri
Mu hava l’uocchj de brillanti
E cerviegghu de’ ngegnieri.
Nzomma mu esta nu bell’uomu
S’esta fhimmina de cchjiuna
Pemmu è nu galantuomu
E la donna na pacchjiuna.
Bell’elencu chi facisti
No’ nda ndivinasti una
No’ mentisti moralisti
Descrivisti la perzuna.
Ma l’elencu no’ finìu
No facisti pemmu fhinu
Pemmu esprimu lu desìu
Pe nu bellu cittadinu.
Ca nta chigghu chi descrissi
De bell’uomu e bella donna
Nta li noti io li scrissi
Mu diventanu colonna.
Eccu cca duv’esta scrittu
E non’hava cca mu resta
Ca esta luongu lu tragittu
Pe’  la genta mu esta  onesta.
Nommu arrobba e nommu scanna
Mu ha pulita la cuscienza
E non’hava pemmu nganna
Ma mu hava cchjiù pacienza.
140) Cu nu puocu de jiudizzu
Chi nci menta nta la testa
Criscia bellu ca sanizzu
E non’esta cchjiù na bestia.
De bontà mu l’inchjia tutti
Mu nci nescia de li ricchji
Nommu sunu fharabutti
Tradituri o diavulicchji.
Nommu guarda li gunniegghji
Soprattuttu chigghi e l’attri
Mu producia cornutiegghji
E mu prolifhica fhigghjiastri.
Mu nci duna nu sorrisu
A tutti chigghi nivuriegghj
E mu li porta mparadisu
Ca no’ sunu crapettiegghj.
Pemmu trova vrazza fhuorti
Chi l’abbrazza e cui lu sfama
Pemmu trova li cumpuorti
E na fhimmina mu l’ama.
Pe’ cui arriva de luntanu
Chi abbanduna chiggha guerra
Mu lu tira ncuna manu
Mu lu porta supa a terra.
Pe’ cui zzappa cu lu picu
E li cagghji l’hava duri
No’ po’ stara de rimitu
Mu si stujia li suduri.
Ca si guardi buonu ngiru
Nc’è cu sfrutta chista storia
Si cumporta de vampiru
E no’ vajia in’istruttoria.
Ogni tantu si nda vida
Ncunu bellu e figurinu
Prontu pemmu si ravvida
Chi protenda a lu divinu.
Si tu pienzi ch’esta giustu
Nci portamu stu messaggiu
E si Ddio nci prova gustu
Cangia tuttu cu coraggiu.
150) Capiscisti puru tuna
Ca lu tiempu è chigghu giustu
Ca si stu mundu l’abbanduna
Certu aumenta lu trambustu.


 
Personaggi:

 Trinità – Padre, Figlio e Spirito Santo.

 

Padre: Signore

Gesù Cristo

Spirito Santo